Sáàmù

129 “Láti ìgbà èwe mi ni wọ́n ti ń gbógun tì mí”+

—Kí Ísírẹ́lì sọ pé—

2 “Láti ìgbà èwe mi ni wọ́n ti ń gbógun tì mí;+

Àmọ́, wọn kò ṣẹ́gun mi.+

3 Àwọn tó ń túlẹ̀ ti túlẹ̀ kọjá lórí ẹ̀yìn mi;+

Wọ́n ti mú kí àwọn poro* wọn gùn.”

4 Àmọ́ olódodo ni Jèhófà;+

Ó ti gé okùn àwọn ẹni burúkú.+

5 Ojú á tì wọ́n, wọ́n á sì sá pa dà nínú ìtìjú,

Gbogbo àwọn tó kórìíra Síónì.+

6 Wọ́n á dà bíi koríko orí òrùlé

Tó ti rọ kí a tó fà á tu,

7 Tí kò lè kún ọwọ́ ẹni tó ń kórè,

Tàbí apá ẹni tó ń kó ìtí jọ.

“Kí ìbùkún Jèhófà wà lórí yín;

A súre fún yín ní orúkọ Jèhófà.”