Àwọn Ògbóǹtagí Ṣàgbéyẹ̀wò Àwọn Àfidípò Ẹ̀jẹ̀

NǸKAN bí 200 ògbóǹtagí láti agbègbè United States pàdé ní Cleveland, Ohio, ní Saturday, October 7, 1995, láti jíròrò ọ̀ràn tí ó túbọ̀ ń di ohun tí àwọn onímọ̀ nípa ìṣègùn ń ní ìfẹ́ ọkàn sí: oògùn àti iṣẹ́ abẹ aláìlo ẹ̀jẹ̀.

Wọ́n jíròrò ọ̀pọ̀ àyíká ipò tí ń peni níjà. Fún àpẹẹrẹ, bí aláìsàn kán bá ní àrùn àìtó ẹ̀jẹ̀ tí ó le koko ńkọ́? Báwo ni a ṣe lè tọ́jú ọmọ ọwọ́ tí a bí ní kògbókògbó gan-an láìlo ẹ̀jẹ̀? A ha lè ṣe iṣẹ́ abẹ ọkàn láṣeyọrí láìsí ìfàjẹ̀sínilára bí? Ó dùn mọ́ni nínú pé, iṣẹ́ abẹ aláìlo ẹ̀jẹ̀—ọgbọ́n ìṣiṣẹ́ tí a sábà ń lò, tí ń ṣèrànwọ́ fún ara láti fúnra rẹ̀ gbé ìpèsè ẹ̀jẹ̀ rẹ̀ ró—ni a ti lò ní gbogbo àwọn ipò yìí pẹ̀lú àbájáde rere.a

Èé ṣe tí a fi ń fẹ́ àfidípò fún fífa ẹ̀jẹ̀ síni lára? Sharon Vernon, olùdarí Ibùdó fún Oògùn Aláìlo Ẹ̀jẹ̀ àti Iṣẹ́ Abẹ ní St. Vincent Charity Hospital ní Cleveland sọ pé: “A ti rí i pé fífa ẹ̀jẹ̀ síni lára sábà máa ń kó àrùn ranni, ní pàtàkì àrùn mẹ́dọ̀wú.” Ó tẹ̀ síwájú pé: “Àní nígbà tí ẹ̀jẹ̀ kò bá kéèràn ranni pàápàá, ó lè mú kí agbára ìdènà àrùn aláìsàn náà dín kù.” Bí ó tilẹ̀ jẹ́ pé a ti dín títan àrùn AIDS kálẹ̀ kù nípasẹ̀ àyẹ̀wò ẹ̀jẹ̀, ọ̀pọ̀ àrùn ṣì kù síbẹ̀ tí irú àyẹ̀wò bẹ́ẹ̀ kò lè rí. Láìkò sì ka àìní náà fún ìmúrasílẹ̀ púpọ̀ tí ó ní sí, iṣẹ́ abẹ aláìlo ẹ̀jẹ̀ ń dín àwọn ilé ìwòsàn lówó kù, níwọ̀n bí ó ti ń mú àwọn ìṣòro tí ó jẹ mọ́ òfin, tí ó lè jẹ yọ nígbà tí àwọn aláìsàn bá gba ẹ̀jẹ̀ tí ó ti di alábàwọ́n, kúrò.

Lójú àwọn Ẹlẹ́rìí Jèhófà, ìdí ṣíṣe pàtàkì jù lọ kan wà fún yíyẹra fún gbígba ẹ̀jẹ̀ sára: Òfin Ọlọ́run kà á léèwọ̀. (Ìṣe 15:29) Síbẹ̀, wọ́n ń fẹ́ láti gba ìtọ́jú ìṣègùn tí ó dára jù lọ, tí wọ́n bá lè rí gbà. Nípa báyìí, wọ́n ti fọwọ́ sowọ́ pọ̀ pẹ̀lú àwọn dókítà, tí wọ́n ń ṣagbátẹrù ìwádìí nípa ìtọ́jú ìṣègùn aláìlo ẹ̀jẹ̀. Kì í ṣe àwọn Ẹlẹ́rìí Jèhófà nìkan ni irú ìtọ́jú bẹ́ẹ̀ ṣàǹfààní fún, ṣùgbọ́n, ó tún ṣàǹfààní fún ọ̀pọ̀ míràn tí wọ́n ń ṣàníyàn nípa ewu fífa ẹ̀jẹ̀ síni lára.

[Àlàyé ìsàlẹ̀ ìwé]

[Àwòrán Credit Line tó wà ní ojú ìwé 32]

Fọ́tò WHO láti ọwọ́ P. Almasy