Àkànṣe Àsọyé Fún Gbogbo Èèyàn
Ta Lẹni Tó Kúnjú Ìwọ̀n Láti Ṣàkóso Aráyé?
Alákòóso wo ló lè
• gba aráyé lọ́wọ́ àìríná àìrílò, tí gbogbo èèyàn á máa rí oúnjẹ gidi jẹ kánú, tí wọ́n á sì rílé tó yẹ ọmọlúwàbí gbé?
• ṣe é tí ò ní í sí àjálù mọ́, táráyé á bọ́ lọ́wọ́ omíyalé, ìjì líle àti ìmìtìtì ilẹ̀?
• sọ gbogbo àìsàn di ohun àtijọ́, tó sì máa mú kí ara àwọn arúgbó rí bíi tìgbà tí wọ́n wà lọ́dọ̀ọ́?
• sọ ogun dìtàn, tá a wá mú kí àlàáfíà jọba, kó má sì sí ohunkóhun tó lè fa ìpáyà mọ́?
• mú kí ilẹ̀ ayé yìí, omi, afẹ́fẹ́, igbó àti gbogbo ohun abẹ̀mí àti aláìlẹ́mìí tí Ọlọ́run dá padà dára bíi tìgbà tí Ọlọ́run kọ́kọ́ dá wọn, tá a sì sọ ayé yìí di ọgbà ẹlẹ́wà níbi tí gbogbo nǹkan á ti rọ̀ ṣọ̀mù?
Alákòóso kan ṣoṣo ló wà tó lè ṣe gbogbo ohun rere tá a sọ yìí. Tá wá ni Alákòóso ọ̀hún? Inú àsọyé kan tá a pe àkòrí rẹ̀ ní “Ta Lẹni Tó Kúnjú Ìwọ̀n Láti Ṣàkóso Aráyé?” la ti máa mọ onítọ̀hún. Àsọyé yìí máa wáyé ní ilẹ̀ tí ó ju igba ó lé ọgbọ̀n lọ kárí ayé. Lọ́pọ̀ ibi Gbọ̀ngàn Ìjọba àwa Ẹlẹ́rìí Jèhófà la ti máa sọ àsọyé yìí lọ́jọ́ Sunday, April 6, 2008. Inú àwọn Ẹlẹ́rìí Jèhófà tó wà ládùúgbò rẹ̀ á dùn láti sọ àkókò àti àdírẹ́sì ibi tí wọ́n ti máa sọ àsọyé náà fún ọ. A ó máa retí rẹ o.