Ẹ̀sìn Kristẹni Dé Ọ̀pọ̀ Orílẹ̀-Èdè

Àwọn ọmọlẹ́yìn Jésù ṣègbọràn sí àṣẹ tí Jésù pa fún wọn pé kí wọ́n wàásù káàkiri ayé. Lọ́dún 47 Sànmánì Kristẹni, àwọn Kristẹni tó wà nílùú Áńtíókù rán Pọ́ọ̀lù àti Bánábà pé kí wọ́n lọ wàásù. Àwọn ọkùnrin méjì yìí fìtara wàásù káàkiri gbogbo ilẹ̀ Éṣíà Kékeré. Lára àwọn ìlú tí wọ́n ti wàásù ni Déébè, Lísírà àti Íkóníónì.

Pọ́ọ̀lù àti Bánábà wàásù fún gbogbo èèyàn, títí kan àwọn olówó àti tálákà àti ọmọdé àti àgbà. Ọ̀pọ̀lọpọ̀ èèyàn sì di Kristẹni. Nígbà tí Pọ́ọ̀lù àti Bánábà fẹ́ wàásù fún Sájíọ́sì Pọ́lọ́sì tó jẹ́ gómìnà ìlú Sápírọ́sì, ọkùnrin kan fẹ́ dí wọn lọ́wọ́. Ọkùnrin náà máa ń pidán, ìyẹn ni pé ó máa ń lo ẹ̀mí èṣù láti tan àwọn èèyàn jẹ. Pọ́ọ̀lù wá sọ fún ọkùnrin náà pé: ‘Kí Jèhófà bá ẹ wí.’ Lẹ́sẹ̀kẹsẹ̀, ojú ọkùnrin náà fọ́. Ohun tó ṣẹlẹ̀ yìí mú kí gómìnà náà di onígbàgbọ́.

Pọ́ọ̀lù àti Bánábà wàásù káàkiri, wọ́n wàásù láti ilé dé ilé, nínú ọjà, lójú ọ̀nà àti nínú sínágọ́gù. Ìgbà kan wà tí wọ́n ṣiṣẹ́ ìyanu kan ní Lísírà tó mú kí arọ kan rìn. Báwọn èèyàn ṣe ríṣẹ́ ìyanu yìí, wọ́n rò pé òrìṣà ni Pọ́ọ̀lù àti Bánábà, wọ́n sì fẹ́ jọ́sìn wọn. Ṣùgbọ́n Pọ́ọ̀lù àti Bánábà sọ pé kí wọ́n má jọ́sìn àwọn, wọ́n ní: ‘Èèyàn bíi ti yín ni wá, Ọlọ́run nìkan ni kẹ́ ẹ máa jọ́sìn!’ Nígbà tó yá, àwọn Júù kan wá, wọ́n sì bẹ̀rẹ̀ sí í mú káwọn èèyàn kórìíra Pọ́ọ̀lù. Àwọn èèyàn náà sọ Pọ́ọ̀lù lókùúta, wọ́n sì wọ́ ọ jáde nílùú, wọ́n rò pé ó ti kú. Àmọ́, Pọ́ọ̀lù ò kú! Àwọn ará wá gbé e kúrò níbi tí wọ́n wọ́ ọ sí, wọ́n sì mú un pa dà wọnú ìlú. Lẹ́yìn náà, Pọ́ọ̀lù pa dà sí Áńtíókù.

Lọ́dún 49 Sànmánì Kristẹni, Pọ́ọ̀lù tún rìnrìn àjò míì. Lẹ́yìn tó pa dà dé ọ̀dọ̀ àwọn ará ní Éṣíà Kékeré, ó tún ń wàásù dé àwọn ibi tó jìnnà gan-an títí kan Yúróòpù. Ó dé Áténì, Éfésù, Fílípì, Tẹsalóníkà àtàwọn ibòmíì. Sílà, Lúùkù, àti ọ̀dọ́kùnrin kan tórúkọ ẹ̀ ń jẹ́ Tímótì dara pọ̀ mọ́ Pọ́ọ̀lù nínú ìrìn àjò yìí. Wọ́n sì ṣiṣẹ́ pọ̀ láti dá àwọn ìjọ sílẹ̀ àti láti mú káwọn ìjọ náà lágbára. Pọ́ọ̀lù dúró ní Kọ́ríńtì fún ọdún kan àtààbọ̀ kó lè ran àwọn ará lọ́wọ́. Ó wàásù, ó kọ́ni, ó tún kọ lẹ́tà sí ọ̀pọ̀ ìjọ. Ó máa ń rán aṣọ tí wọ́n fi ń pàgọ́, ó sì tún máa ń báwọn èèyàn pàgọ́ kó lè rówó bójú tó ara ẹ̀. Nígbà tó yá, Pọ́ọ̀lù pa dà sí Áńtíókù.

Lọ́dún 52 Sànmánì Kristẹni, Pọ́ọ̀lù tún rìnrìn àjò láti lọ wàásù nígbà kẹta, ó sì bẹ̀rẹ̀ ní Éṣíà Kékeré. Ó rìnrìn àjò láti ìlú Fílípì títí dé Kọ́ríńtì. Pọ́ọ̀lù lo ọ̀pọ̀ ọdún ní Éfésù, ó kọ́ni, ó ń mú àwọn èèyàn lára dá, ó sì ń ran àwọn ìjọ lọ́wọ́. Ó tún máa ń sọ̀rọ̀ Ọlọ́run lójoojúmọ́ níbì kan táwọn èèyàn máa ń kóra jọ sí láti kẹ́kọ̀ọ́. Ọ̀pọ̀ èèyàn ló fetí sílẹ̀, wọ́n sì yíwà pa dà. Níkẹyìn, lẹ́yìn tó wàásù ìhìn rere ní ọ̀pọ̀ ilẹ̀, Pọ́ọ̀lù kọjá sí Jerúsálẹ́mù.