ÀWỌN OHUN PÀTÀKÌ TÓ ṢẸLẸ̀ LỌ́DÚN TÓ KỌJÁ

Iṣẹ́ Ń Yára Tẹ̀ Síwájú Nílùú Warwick

BÍ ARA àwọn èèyàn ṣe ń yá gágá, bẹ́ẹ̀ ni iṣẹ́ ń lọ ní pẹrẹu níbi tá a fẹ́ fi ṣe oríléeṣẹ́ àwa Ẹlẹ́rìí Jèhófà ní ìlú Warwick, ìpínlẹ̀ New York, ní orílẹ̀-èdè Amẹ́ríkà. Ọgọ́rọ̀ọ̀rún àwọn ará wa lọ́kùnrin àti lóbìnrin ló ti yááfì ọ̀pọ̀ nǹkan kí wọ́n lè wá kópa nínú iṣẹ́ ìkọ́lé náà. Síbẹ̀, ọ̀pọ̀ wọn ló ń sọ pé, “A ò ní jẹ́ kí ohunkóhun gba àǹfààní tá a ní láti ṣiṣẹ́ níbí mọ́ wa lọ́wọ́.” Ẹ jẹ́ ká jọ wo ohun tó ń lọ nílùú Warwick.

Báwo ló ṣe rí lára àwọn tó ń ṣiṣẹ́ ní Warwick?

“Iṣẹ́ tó ń lọ ní Warwick yìí kì í ṣe ọ̀rọ̀ ilé kíkọ́ lásán. Jèhófà ń mú kí onírúurú ẹgbẹ́ tó ń kọ́lé wà níṣọ̀kan, ó sì ń jẹ́ ká túbọ̀ ronú lórí bá a ṣe ń yàwòrán àti bá a ṣe ń ṣètò àwọn iṣẹ́ ìkọ́lé tó ṣe pàtàkì.”—Enrique Ford.

“Sáàmù 127:1 sọ pé: ‘Bí kò ṣe pé Jèhófà tìkára rẹ̀ bá kọ́ ilé náà, lásán ni àwọn tí ń kọ́ ọ ti ṣiṣẹ́ kárakára lórí rẹ̀.’ Ọ̀rọ̀ yìí jẹ́ ká rí i kedere pé ìbùkún Jèhófà ló lè mú ká ṣe àṣeyọrí gidi nídìí iṣẹ́ yìí.”—Troy Snyder.

“Kò tíì sí ohun tó fún ìgbàgbọ́ mí lókun bíi ti iṣẹ́ yìí.”—Richard Devine.