17, 18. Ìwà ìbàjẹ́ wo ló wà nínú ètò òfin àti àkóso ìlú ní Ísírẹ́lì?

¹⁷ Àwọn onídàájọ́ àti olóyè yòókù ní Ísírẹ́lì ni Jèhófà wá yíjú ìdájọ́ rẹ̀ sí báyìí. Wọ́n ń ṣi agbára wọn lò nípa fífi àwọn ẹni rírẹlẹ̀ àti akúùṣẹ́ tó bá ké gbàjarè tọ̀ wọ́n lọ ṣe ìjẹ. Aísáyà sọ pé: “Ègbé ni fún àwọn tí ń fi àwọn ìlànà tí ń pani lára lélẹ̀ àti àwọn tí ó jẹ́ pé, ní kíkọ̀wé ṣáá, wọ́n ti kọ̀wé ìjàngbọ̀n gbáà, kí wọ́n lè ti ẹni rírẹlẹ̀ dànù nínú ẹjọ́, kí wọ́n sì lọ́ ìdájọ́ òdodo gbà lọ́wọ́ àwọn tí ìṣẹ́ ń ṣẹ́ nínú àwọn ènìyàn mi, kí àwọn opó lè di ohun ìfiṣèjẹ wọn, kí wọ́n sì lè piyẹ́ àwọn ọmọdékùnrin aláìníbaba pàápàá!”—Aísáyà 10:1, 2.

¹⁸ Òfin Jèhófà ka gbogbo àìṣèdájọ́ òdodo léèwọ̀, ó sọ pé: “Ẹ kò gbọ́dọ̀ ṣe àìṣèdájọ́ òdodo nínú ìdájọ́. Ìwọ kò gbọ́dọ̀ fi ojúsàájú bá ẹni rírẹlẹ̀ lò, ìwọ kò sì gbọ́dọ̀ ṣe ojúsàájú ẹni ńlá.” (Léfítíkù 19:15) Àwọn olóyè wọ̀nyí ṣàìka òfin yìí sí, wọ́n gbé òfin tiwọn “tí ń pani lára” kalẹ̀, láti lè dá ìwà olè tó burú jù lọ láre, ìyẹn ni, gbígbà tí wọ́n ń gba ìwọ̀nba ohun tí àwọn opó àti ọmọdékùnrin aláìníbaba ní. Lóòótọ́, àwọn òrìṣà Ísírẹ́lì kò rí àìṣèdájọ́ òdodo yìí, ṣùgbọ́n Jèhófà rí i. Jèhófà wá tipasẹ̀ Aísáyà yí àfiyèsí sí àwọn olubi onídàájọ́ wọ̀nyí.

[Àwòrán tó wà ní ojú ìwé 141]

Jèhófà yóò mú káwọn tó ń fi ọmọnìkejì wọn ṣe ìjẹ jẹ́jọ́