Orí 117

Irora Ẹdun Ninu Ọgba Naa

NIGBA ti Jesu pari gbigbadura, oun ati awọn oluṣotitọ apọsiteli rẹ̀ 11 kọ awọn orin iyin si Jehofa. Lẹhin naa wọn sọkalẹ lati iyara oke naa, wọn jade sinu okunkun alẹ́ titutu minimini, wọn sì pada forile isọda Afonifoji Kidironi, niha Bẹtani. Ṣugbọn loju ọna, wọn duro nibi ayanlaayo kan, ọgba Gẹtisemani. Eyi wa ni ọgangan tabi ni sakaani Òkè Olifi. Niye igba ni Jesu ti pade pẹlu awọn apọsiteli rẹ̀ nihin-in laaarin awọn igi olifi.

Ni fifi mẹjọ ninu awọn apọsiteli rẹ̀ silẹ—boya nitosi ẹnu ọna ọgba naa—o fun wọn ni itọni: “Ẹ jokoo nihin-in nigba ti emi ba lọ sọhun-un lati gbadura.” Lẹhin naa ni o mu awọn mẹta yooku—Peteru, Jakọbu, ati Johanu—o sì rin siwaju sinu ọgba naa. Ẹdun ọkan ba Jesu o sì daamu tẹduntẹdun. “A kó ẹdun ọkan ba ọkan mi gidigidi, ani de iku,” ni oun sọ fun wọn. “Ẹ duro nihin-in ki ẹ sì maa baa niṣo ni ṣiṣọna pẹlu mi.”

Ni lilọ siwaju diẹ, Jesu wolẹ ni dida oju rẹ bolẹ o bẹrẹsii gbadura pẹlu ifọkansi: “Baba mi, bi o ba ṣeeṣe, jẹ ki aago yii kọja kuro lọdọ mi. Sibẹ, kii ṣe bi ifẹ mi bikoṣe bi ifẹ rẹ.” Ki ni oun ni lọkan? Eeṣe ti oun fi ‘ni ẹdun ọkan gidigidi, ani de iku’? Oun ha nfasẹhin kuro ninu ipinnu rẹ̀ lati kú ati lati pese irapada ni bi?

Rara o! Jesu kò bẹ̀bẹ̀ pe ki a da oun si kuro lọwọ iku. Ani ironu yiyẹra fun iku irubọ paapaa, ti Peteru damọran rẹ nigba kan, jẹ ìríra fun un. Kaka bẹẹ, oun wa ninu irora nitori pe oun bẹru pe ọna ti oun yoo gba ku laipẹ—gẹgẹ bi òkúùgbẹ́ oniwa ọdaran kan—yoo mu ẹgan wa sori orukọ Baba rẹ̀. Oun nisinsinyi nimọlara pe ni iwọnba wakati diẹ sii a o kan oun mọ́gi bi ẹni buburu kan—asọrọ odi lodisi Ọlọrun! Eyi ni ohun ti o daamu rẹ gan-an gidigidi.

Lẹhin gbigbadura fun akoko gigun kan, Jesu pada o sì ri awọn apọsiteli mẹta naa ti nsun. Ni biba Peteru sọrọ taarata, oun wipe: “Ṣe ẹyin eniyan yii kò tilẹ le ba mi ṣọna fun wakati kan ni bi? Ẹ maa baa niṣo ni ṣiṣọna ki ẹ sì maa gbadura nigba gbogbo, ki ẹyin ma baa bọ sinu idẹwo.” Bi o ti wu ki o ri, ni jijẹwọ pe wọn wa labẹ masunmawo ati pe wakati ọjọ naa ti lọ jinna, oun wipe: “Ẹmi nharagaga, ṣugbọn ẹran ara ṣe ailera.”

Lẹhin naa Jesu pada lọ ni igba keji o sì beere pe ki Ọlọrun mu “ago yii” kuro lọdọ oun, iyẹn ni, ipin tabi ifẹ inu Jehofa fun un. Nigbati oun pada wa, o tun ri awọn mẹta naa ti nsun lẹẹkan sii nigba ti wọn ì bá ti maa gbadura pe ki wọn maṣe bọ sinu idẹwo. Nigba ti Jesu ba wọn sọrọ, wọn kò mọ ohun ti wọn yoo sọ ni ifesi pada.

Ni igbẹhin gbẹhin, ni igba kẹta, Jesu lọ si itosi, bi o sì ti wà lori eékún rẹ̀ o gbadura pẹlu ẹkun alokunlagbara ati omije pe: “Baba, bi iwọ ba fẹ, mu ago yii kuro lọdọ mi.” Lọna ti o muna Jesu nimọlara irora ti o lekenka nitori ẹgan ti iku rẹ gẹgẹ bi ọdaran kan yoo mu wa sori orukọ Baba rẹ̀. Họwu, ki a finisun gẹgẹ bi asọrọ odi kan—ẹnikan ti o gegun-un fun Ọlọrun—fẹrẹẹ jẹ ohun ti o pọ ju lati mu mọra!

Bi o tilẹ ri bẹẹ, Jesu nbaa lọ lati gbadura pe: “Kii ṣe ohun ti emi nfẹ, bikoṣe ohun ti iwọ fẹ.” Jesu fi pẹlu igbọran mu ifẹ inu tirẹ tẹriba fun ti Ọlọrun. Pẹlu eyi, angẹli kan lati ọrun farahan o sì fun un lokun pẹlu awọn ọrọ ti nfunni ni iṣiri. O jọ bi ẹni pe angẹli naa sọ fun Jesu pe o ni ẹrin musẹ itẹwọgba Baba rẹ̀.

Sibẹ, ẹ wo ẹru ti o tẹ̀wọ̀n ti o wà ni awọn ejika Jesu! Iye ayeraye oun funraarẹ ati ti gbogbo ẹya iran ẹda eniyan wà ni aidaniloju sibẹ. Masunmawo ero imọlara naa pọ tabua. Nitori naa Jesu nbaa lọ ni gbigbadura pẹlu itara pupọ sii, oogun rẹ̀ sì wa dabii awọn ẹ̀kán ẹ̀jẹ̀ bi o ti nbọ sori ilẹ. “Bi eyi tilẹ jẹ ohun àrà ṣiṣọwọn gan-an,” ni The Journal of the American Medical Association ṣalaye, “oogun ẹlẹ́jẹ̀ . . . le waye niu ipo ọran elero imọlara giga.”

Lẹhin igba naa, Jesu pada sọdọ awọn apọsiteli rẹ̀ fun igba kẹta, ati lẹẹkan sii o ri wọn ti wọn nsun. Ẹdun ọkan paraku ti tán wọn lókun. “Ni iru akoko kan bi eyi ni ẹyin nsun ti ẹ sì nsinmi!” ni oun ṣe saafula. “O tó! Wakati naa ti de! Ẹ wòó! A fi Ọmọkunrin eniyan si ọwọ́ awọn ẹlẹṣẹ. Ẹ dide, ẹ jẹ ki a lọ. Ẹ wòó! Afinihan mi ti sunmọtosi.”

Nigba ti o ṣì nsọrọ lọwọ, Judasi Iskariọti yọ si i, pẹlu ogunlọgọ awọn eniyan ni gbigbe awọn ògùṣọ̀ ati awọn fitila ati awọn ohun ija. Matiu 26:30, 36-47; 16:21-23; Maaku 14:26, 32-43; Luuku 22:39-47; Johanu 18:1-3; Heberu 5:7, NW.

▪ Lẹhin fifi iyara oke silẹ, nibo ni Jesu mú awọn apọsiteli rẹ̀ lọ, ki ni o sì ṣe nibẹ?

▪ Nigba ti Jesu ngbadura, ki ni awọn apọsiteli nṣe?

▪ Eeṣe ti Jesu fi wà ninu irora ẹdun, ibeere wo ni o sì beere lọdọ Ọlọrun?

▪ Ki ni òógùn Jesu ti o dabii awọn ẹ̀kán ẹ̀jẹ̀ fihan?

Orí 118

Ìtáṣìrí ati Ìfàṣẹ Ọba Muni

OTI kọja ọganju oru daadaa nigba ti Judasi ṣamọna ogunlọgọ awọn ọmọ ogun, awọn olori alufaa, awọn Farisi, ati awọn miiran wá sinu ọgba Gẹtisemani. Awọn alufaa ti fohunṣọkan lati san 30 owó fadaka fun Judasi lati taṣiiri Jesu.

Ni iṣaaju, nigba ti a le Judasi lọ kuro nibi ounjẹ Irekọja, lọna ti o han gbangba, o ti lọ ni taarata si ọdọ awọn olori alufaa. Awọn wọnyi pe awọn oṣiṣẹ oloye wọn jọ lẹsẹkẹsẹ, pẹlu agbo awọn ọmọ ogun. Boya Judasi ti kọkọ ṣamọna wọn lọ si ibi ti Jesu ati awọn apọsiteli rẹ ti ṣayẹyẹ Irekọja naa. Ni ṣiṣawari pe wọn ti kuro, ogunlọgọ naa ti wọn ru awọn ohun ija ti wọn sì gbe awọn fitila ati awọn ògùṣọ̀ tẹle Judasi jade kuro ni Jerusalẹmu sọda Afonifoji Kidironi.

Bi Judasi ti nṣamọna ọpọ eniyan ti nto lọ naa gun Òkè Olifi, o mọ̀ daju ibi ti oun yoo ti ri Jesu. Laaarin ọsẹ ti o kọja, bi Jesu ati awọn apọsiteli ti nrinrin ajo siwasẹhin laaarin Bẹtani ati Jerusalẹmu, niye igba ni wọn maa nduro ninu ọgba Gẹtisemani lati sinmi ati lati sọrọ pọ. Ṣugbọn, nisinsinyi, bi o ti ṣeeṣe pe Jesu ti wà ni ikọkọ ninu okunkun labẹ awọn igi olifi, bawo ni awọn ọmọ ogun yoo ṣe dá a mọ? Wọn lè ma tii ri i ri ṣaaju. Nitori naa, Judasi pese ami kan, ni sisọ pe: “Ẹni yoowu ti mo ba fi ẹnu ko lẹnu, oun ni; ẹ mú un lọ sinu iṣọ ipamọ ki ẹ sì fà á lọ laisewu.”

Judasi ṣamọna ogunlọgọ naa wa sinu ọgba naa, o rí Jesu pẹlu awọn apọsiteli rẹ̀, o sì lọ taarata sọdọ rẹ̀. “Pẹlẹ o, Rabi!” ni o sọ o sì fi ẹnu ko o lẹnu lọna jẹlẹnkẹ gan-an.

“Àwé, fun ète wo ni iwọ fi wà nihin-in?” ni Jesu dahun. Lẹhin naa, ni didahun ibeere oun tikaraarẹ, o sọ pe: “Judasi, iwọ ha dà Ọmọkunrin eniyan pẹlu ifẹnukonu?” Ṣugbọn o tó gẹẹ fun olutaṣiiri rẹ̀! Jesu sunmọ iwaju sinu imọlẹ awọn ògùṣọ̀ ati fitila ti njo o sì beere pe: “Ta ni ẹyin nwa?”

“Jesu ara Nasarẹti,” ni idahun ti o wá naa.

“Emi ni oun,” ni Jesu fesipada, bi o ti duro pẹlu igboya niwaju wọn. Bi ẹnu ti yà wọn nipa aiṣojo rẹ̀ ati ni ṣiṣaimọ ohun ti wọn lè fojusọna fun, awọn ọkunrin naa fa sẹhin wọn sì ṣubu lulẹ.

“Mo sọ fun yin pe emi ni oun,” ni Jesu fi pẹlẹtu nba ọrọ rẹ lọ. “Nitori naa, bi o ba jẹ pe emi ni ẹ nwa, ẹ jẹ ki awọn wọnyi maa lọ.” Kete ṣaaju ìgbà naa ninu iyara oke, Jesu ti sọ fun Baba rẹ̀ ninu adura pe oun ti pa awọn apọsiteli oun oluṣotitọ mọ ko sì sí ọkan ninu wọn ti o ti sọnu “bikoṣe ọmọ iparun.” Nitori naa, ki ọrọ rẹ̀ ba lè ni imuṣẹ, o beere pe ki a jẹ ki awọn ọmọlẹhin oun lọ.

Bi ọkàn awọn ọmọ ogun naa ti balẹ lẹẹkan sii, ti wọn dide, ti wọn sì bẹrẹsii de Jesu, awọn apọsiteli naa mọ ohun ti o fẹ ṣẹlẹ. “Oluwa, ṣe ki a fi idà kọlu wọn?” ni wọn beere. Ki Jesu to fesi pada, Peteru, ni fifi agbara lo ọkan ninu awọn idà meji ti awọn apọsiteli ti muwa, gbejako Malkọs, ẹru alufaa àgbà. Peteru tase ori ẹru naa ṣugbọn o ké eti rẹ̀ ọtun kuro.

“Ẹ jẹ ki o mọ si ibi ti o de yii,” ni Jesu sọ gẹgẹ bi o ti dasi ọran naa. Ni fifi ọwọ kan eti Malkọs, ó wo ọgbẹ́ naa sàn. Nigba naa ni o kọnilẹkọọ pataki kan, ni pipaṣẹ fun Peteru pe: “Da idà rẹ pada si aye rẹ̀, nitori gbogbo awọn wọnni ti wọn gbé idà yoo ṣegbe nipa idà. Tabi iwọ ronu pe emi kò lè beere lọdọ Baba pe ki o fun mi nisinsinyi ni ohun ti o ju lejiọnu mejila awọn angẹli?”

Jesu ṣetan fun ifaṣẹ ọba muni naa, nitori o ṣalaye pe: “Bawo ni Iwe Mimọ yoo ṣe ni imuṣẹ pe o gbọdọ ṣẹlẹ ni ọna yii?” O sì fikun un: “Ago naa ti Baba ti fifun mi, emi kò ha nilati mú un lọnakọna bi?” Oun wà ni ifohunṣọkan patapata pẹlu ifẹ inu Ọlọrun fun un!

Nigba naa ni Jesu ba ogunlọgọ naa sọrọ. “Ẹyin ha jade wa pẹlu idà ati ọ̀gọ gẹgẹ bi si ọlọṣa lati fi aṣẹ ọba mu mi?” ni oun beere. “Lati ọjọ de ọjọ ni mo ti wà pẹlu yin ninu tẹmpili ti mo nkọni, sibẹ ẹ kò sì mú mi lọ sinu àhámọ́. Ṣugbọn gbogbo eyi ti ṣẹlẹ fun iwe mimọ awọn wolii lati ni imuṣẹ.”

Lori koko yẹn agbo ẹgbẹ awọn ọmọ ogun naa ati olori awọn ologun ati awọn oṣiṣẹ olóyè awọn Juu yara gbá Jesu mu wọn sì dè é. Ni riri eyi, awọn apọsiteli pa Jesu tì wọn sì salọ. Bi o ti wu ki o ri, ọdọmọkunrin kan—o jọ bi ẹni pe ọmọ ẹhin naa Maaku ni—duro laaarin ogunlọgọ naa. O lè ti wà ninu ile nibi ti Jesu ti ṣayẹyẹ Irekọja ati lẹhin igba naa ki o tẹle ogunlọgọ naa lati ibẹ. Nisinsinyi, bi o ti wu ki o ri, wọn dá a mọ̀, igbidanwo ni wọn sì ṣe lati gbá a mu. Ṣugbọn o fi ẹwu aṣọ ọ̀gbọ̀ rẹ̀ sẹhin o sì lọ kuro. Matiu 26:47-56; Maaku 14:43-52; Luuku 22:47-53; Johanu 17:12; 18:3-12, NW.

▪ Eeṣe ti Judasi fi ni imọlara idaniloju pe oun yoo ri Jesu ni ọgba Gẹtisemani?

▪ Bawo ni Jesu ṣe fi idaniyan fun awọn apọsiteli rẹ̀ han?

▪ Igbesẹ wo ni Peteru gbe ninu ìgbèjà Jesu, ṣugbọn ki ni Jesu sọ fun Peteru nipa rẹ̀?

▪ Bawo ni Jesu ṣe ṣipaya pe oun wà ni ifohunṣọkan patapata pẹlu ifẹ inu Ọlọrun fun oun?

▪ Nigba ti awọn apọsiteli pa Jesu tì, ta ni o duro, ki ni o sì ṣẹlẹ si i?

Orí 119

A Mú Un Lọ Sọdọ Anasi, Lẹhin Naa Sọdọ Kaifa

JESU, ti a de gẹgẹ bi ọdaran lasan kan, ni a muwa sọdọ Anasi, alufaa àgbà tẹlẹri ti o ni agbara idari nlanla. Anasi jẹ alufaa agba nigba ti Jesu gẹgẹ bi ọdọmọkunrin ẹni ọdun 12 ya awọn olukọ rabi ninu tẹmpili lẹnu. Ọpọ lara awọn ọmọkunrin Anasi lẹhin naa ṣiṣẹsin gẹgẹ bi alufaa àgbà, ọkọ ọmọbinrin rẹ̀ Kaifa ni o sì di ipo yẹn mu nisinsinyi.

O ṣeeṣe ki wọn ti kọ́kọ́ mu Jesu lọ si ile Anasi nitori ìyọrí ọlá ọlọjọ pipẹ ti olori alufaa yẹn ní ninu igbesi aye isin awọn Juu. Iduro diẹ yii lati ri Anasi yọnda fun Alufaa Agba Kaifa lati pe Sanhẹdrin jọ, ile ẹjọ giga Juu oni mẹmba 71 naa, ati pẹlu lati ko awọn ẹlẹrii eke jọ.

Olori alufaa Anasi nisinsinyi bi Jesu leere nipa awọn ọmọ-ẹhin rẹ̀ ati nipa ẹkọ rẹ̀. Bi o ti wu ki o ri, Jesu sọ ni idahun pe: “Emi ti sọrọ ni gbangba fun araye; nigba gbogbo ni emi nkọni ninu sinagọgu, ati ni tẹmpili nibi ti gbogbo awọn Juu npejọ si: emi kò sì sọ ohun kan ni ikọkọ. Eeṣe ti iwọ fi nbi mi leere? beere lọwọ awọn ti o ti gbọ ọrọ mi, ohun ti mo wi fun wọn: woo, awọn wọnyi mọ ohun ti emi wi.”

Nitori eyi, ọkan lara awọn oṣiṣẹ olóyè ti wọn duro nitosi Jesu gbá a ni oju, ni wiwi pe: “Olori alufaa ni iwọ nda lohun bẹẹ?”

“Bi mo ba sọrọ buburu,” ni Jesu fesi, “jẹrii si buburu naa: ṣugbọn bi rere ba ni, eeṣe ti iwọ fi nlu mi?” Lẹhin tí wọn bá ara wọn sọ ọ̀rọ̀ yii, Anasi ran Jesu lọ ni dídè si Kaifa.

Nisinsinyi gbogbo awọn olori alufaa ati awọn àgbà ọkunrin ati awọn akọwe ofin, bẹẹni, gbogbo Sanhẹdrin, bẹrẹ sii pejọ. O han gbangba pe ile Kaifa ni ibi ipade wọn. Lati ṣe irufẹ ijẹjọ bẹẹ ni alẹ Irekọja ni kedere lodisi ofin Juu. Ṣugbọn eyi ko dá awọn aṣaaju isin naa duro ninu ète buburu wọn.

Awọn ọsẹ diẹ ṣaaju, nigba ti Jesu ji Lasaru dìde, awọn Sanhẹdrin ti pinnu laaarin araawọn pe o gbọdọ ku. Ati pe ni kiki ọjọ meji ṣaaju, ni Wednesday, awọn alaṣẹ isin naa ti pete lati fipa mú Jesu nipa ihumọ alareekereke lati pa á. Ronu, niti tootọ wọn ti dá a lẹbi ṣaaju ìgbẹ́jọ́ rẹ̀!

Awọn isapa nlọ lọwọ nisinsinyi lati wá awọn ẹlẹrii ti wọn yoo jẹri eke ki wọn baa lè gbe ẹjọ ọdaran dide lodisi Jesu. Bi o ti wu ki o ri, wọn kò lè rí ẹlẹrii kankan ti ó wà ni iṣọkan ninu ẹri wọn. Asẹhinwa asẹhinbọ, awọn meji jade wa wọn sì tẹnumọ́ ọn pe: “Awa gbọ́ o wipe, Emi yoo wo tẹmpili yii ti a fi ọwọ́ ṣe, niwọn ijọ mẹta emi yoo sì kọ́ omiran ti a kò fi ọwọ́ ṣe.”

“Iwọ kò dahun kan?” Kaifa beere. “Ki ni eyi ti awọn wọnyi njẹri si ọ?” Ṣugbọn Jesu wà ni idakẹjẹẹ niṣo. Ani pẹlu ẹsun eke yii paapaa, si itiju Sanhẹdrin, awọn ẹlẹrii naa kò lè mu ìtàn wọn fohunṣọkan. Nitori naa alufaa agba naa gbiyanju ọgbọ́n jìbìtì yiyatọ.

Kaifa mọ bi awọn Juu ti nnimọlara nipa ẹnikẹni ti o nsọ pe oun jẹ Ọmọkunrin Ọlọrun gan-an. Ni awọn iṣẹlẹ meji ṣaaju, wọn ti fi pẹlu iwanwara lẹ lebẹẹli asọrọ odi ti o yẹ fun iku mọ Jesu lara, nigba kan ti wọn ti fi pẹlu aṣiṣe foju inu woye pe oun nsọ pe oun dọgba pẹlu Ọlọrun. Kaifa nisinsinyi fi pẹlu arekereke beere pe: “Mo fi Ọlọrun alaaye fi ọ bú pe, ki iwọ sọ fun wa bi iwọ ba ṣe Kristi Ọmọ Ọlọrun.”

Laika ohun ti awọn Juu rò si, niti tootọ Jesu ni Ọmọkunrin Ọlọrun. Ati lati dakẹ ni a lè tumọ sí sísẹ́ jijẹ Kristi rẹ̀. Nitori naa Jesu fesipada pẹlu igboya pe: “Emi ni: ẹyin yoo sì ri Ọmọ eniyan ti o jokoo ni ọwọ ọtun agbara, yoo sì maa ti inu awọsanma ọrun wa.”

Nitori eyi, ninu ifihan amunijigiri, Kaifa gbọ́n ẹ̀wù rẹ̀ fàya ti o si ṣe saafula pe: “O sọ ọ̀rọ̀ òdì; ẹlẹrii ki ni a sì nwa? Woo, ẹyin gbọ ọ̀rọ̀ òdì naa nisinsinyi. Ẹyin ti rò ó sí?”

“O jẹ̀bi ikú,” ni awọn Sanhẹdrin pokiki. Nigba naa wọn bẹrẹ sii fi da àpárá, wọn sì sọ ọpọlọpọ ọ̀rọ̀ òdì si i. Wọn gbá oju rẹ̀ wọn sì tutọ́ sí i. Awọn miiran bo gbogbo oju rẹ̀ wọn sì fi ikuuku wọn gbà á wọn sì wi pẹlu òdì ọ̀rọ̀ ti ko barade: “Sọtẹlẹ ta ni lù ọ́?” Ihuwasi eleeebu, ti kò ba ofin mu yii waye nigba ìgbẹ́jọ́ òru naa. Matiu 26:57-68, NW; Mt 26:3, 4; Maaku 14:53-65; Luuku 22:54, 63-65; Johanu 18:13-24; 11:45-53; 10:31-39; Joh 5:16-18.

▪ Nibo ni a mu Jesu wa lakọọkọ, ki ni o sì ṣẹlẹ sí i nibẹ?

▪ Nibo ni a mu Jesu lọ tẹle e, ati fun ète wo?

▪ Bawo ni Kaifa ṣe mu ki awọn Sanhẹdrin pokiki pe Jesu lẹtọọ si iku?

▪ Ihuwasi eleeebu, ti kò ba ofin mu wo ni o waye nigba ìgbẹ́jọ́ naa?

Orí 120

Ìsẹ́ni Ninu Àgbàlá

LẸHIN pipa Jesu tì ninu ọgbà Gẹtisemani ati sisalọ ninu ibẹru pẹlu iyoku awọn apọsiteli, Peteru ati Johanu dá sisa wọn duro. Boya wọn lé Jesu ba nigba ti a nmu un lọ si ile Anasi. Nigba ti Anasi fi i ranṣẹ sọdọ Alufaa Agba Kaifa, Peteru ati Johanu tẹle e ni okeere rere, o han gbangba pe ọkàn wọn pin laaarin ibẹru fun iwalaaye tiwọn funraawọn ati idaniyan jijinlẹ wọn niti ohun ti yoo ṣẹlẹ si Ọga wọn.

Ni dide si ile Kaifa ti o laye, Johanu lè ri aye wọle sinu agbala naa, niwọn bi oun ti jẹ ẹni mimọ alufaa àgbà. Peteru, bi o ti wu ki o ri, ni a fi silẹ ni iduro ni ẹnu ilẹkun lẹhin ode. Ṣugbọn laipẹ Johanu pada o sì ba oluṣọna naa sọrọ, iranṣẹ ọmọdebinrin kan, a sì gba Peteru laye lati wọle.

Nisinsinyi otútù nmu, awọn iranṣẹ onitọọju ile naa ati awọn oṣiṣẹ oloye alufaa agba ti dá ina eléèdú. Peteru darapọ mọ wọn lati maa mooru fẹẹrẹ nigba ti o nduro de abarebabọ iyẹwo ẹjọ Jesu. Nibẹ, ninu imọlẹ ina naa, oluṣọna ti o jẹ ki Peteru wọle wò ó daradara. “Iwọ pẹlu wa pẹlu Jesu ti Galili!” ni o ṣe saafula.

Bí inú ti bí i pe a dá a mọ̀, Peteru sẹ́ mimọ Jesu nigba kankan ri niwaju gbogbo wọn. “Emi kò mọ ohun ti iwọ nwi,” ni oun wi.

Lori koko yẹn, Peteru jade lọ si itosi ẹnubode. Nibẹ, ọmọdebinrin miiran kiyesi i, oun naa sì tun sọ fun awọn wọnni ti wọn nduro nitosi: “Ọkunrin yii wà pẹlu Jesu ti Nasarẹti.” Lẹẹkan sii, Peteru sẹ́ ẹ, ni bibura pe: “Emi kò mọ ọkunrin naa!”

Peteru duro ninu agbala naa, ni gbigbiyanju lati maṣe pe afiyesi bi o ti le ṣeeṣe tó. Boya ni ori koko yii ó tagìrì nigba ti akukọ kan kọ ninu okunkun owurọ kutukutu. Laaarin akoko naa, iyẹwo ẹjọ Jesu nlọ lọwọ, o han gbangba pe a nṣe e ni apakan ile loke àgbàlá naa. Laisi aniani Peteru ati awọn miiran ti wọn nduro nisalẹ ri wíwá ati lilọ oniruuru awọn ẹlẹrii ti wọn nwa lati jẹrii.

Nǹkan bii wakati kan ti kọja lati igba ti a ti da Peteru mọ gẹgẹ bi alabaakẹgbẹpọ Jesu. Nisinsinyi diẹ ninu awọn wọnni ti wọn duro nitosi sunmọ ọn wọn sì sọ pe: “Loootọ, ọkan ninu wọn ni iwọ nṣe, nitori pe ohùn rẹ fi ọ han.” Ọkan ninu awujọ naa jẹ ibatan Malkọs, ẹni ti Peteru gé eti rẹ̀ danu. “Emi kò ha ri ọ pẹlu rẹ̀ ní agbala?” ni oun wi.

“Emi kò mọ ọkunrin naa!” Peteru fi taratara tẹnumọ́ ọn. Niti tootọ, o gbiyanju lati mu wọn gbagbọ pe gbogbo wọn ṣe aṣiṣe nipa gígégùn ún ati bibura nipa ọran naa, ti o sì ntipa bayii pe ibi wa sori araarẹ̀ bi kii ba ṣe otitọ ni oun nsọ.

Ni gẹlẹ bi Peteru ṣe ṣe ìsẹ́ni kẹta yii, àkùkọ kọ. Ati ni iṣẹju yẹn, Jesu, ẹni ti o han gbangba pe o ti jade sita sí ọ̀dẹ̀dẹ̀ loke agbala naa, yida o sì wò ó. Lẹsẹkẹsẹ Peteru ranti ohun ti Jesu sọ ni kiki iwọnba wakati diẹ ṣaaju ninu iyara oke: “Ki àkùkọ too kọ lẹẹmeji, ani iwọ yoo sẹ́ mi ni igba mẹta.” Bi ìwọ̀n ẹ̀ṣẹ̀ rẹ̀ ti wọ̀ ọ́ lọ́rùn, Peteru jade sode o sì sọkun kíkorò.

Bawo ni eyi ṣe lè ṣẹlẹ? Pẹlu okun rẹ̀ nipa tẹmi ti o dá a loju tobẹẹ, bawo ni Peteru ṣe lè sẹ́ Ọ̀gá rẹ̀ lẹẹmẹta kiakia bẹẹ? Laisi iyemeji rárá ayika ipo naa ba Peteru lojiji. Wọn ti fi èrú yi otitọ po, Jesu ni wọn sì fihan gẹgẹ bi ọdaran tí ó buru jáì. Ohun ti o tọna ni a mu ki o farahan bii aitọna, alaiṣẹ alairo gẹgẹ bi ẹlẹbi ẹṣẹ. Nitori naa nitori awọn ikimọlẹ akoko naa, Peteru ṣi inu rò. Lojiji agbara òye iduroṣinṣin rẹ̀ ti o tọna dàrú: ibẹru eniyan pa á sara ti eyiini sì mu ibanujẹ wá bá a. Njẹ ki iyẹn maṣe ṣẹlẹ si wa lae! Matiu 26:57, 58, 69-75; Maaku 14:30, 53, 54, 66-72; Luuku 22:54-62; Johanu 18:15-18, 25-27.

▪ Bawo ni Peteru ati Johanu ṣe ri aye wọle sinu agbala alufaa agba?

▪ Nigba ti Peteru ati Johanu wà ninu agbala naa, ki ni o nlọ lọwọ ninu ile?

▪ Igba meloo ni àkùkọ kọ, ati niye igba meloo ni Peteru sẹ́ mimọ Kristi?

▪ Ki ni o tumọsi pe Peteru gégùn-ún o sì búra?

▪ Ki ni o mu ki Peteru sẹ́ pe oun mọ Jesu?