Apá Kẹrin: Bí A Ṣe Lè Darí Ìkẹ́kọ̀ọ́ Bíbélì Tí Yóò Máa Tẹ̀ Síwájú

Bí A Ṣe Lè Kọ́ Àwọn Akẹ́kọ̀ọ́ Wa Láti Máa Múra Sílẹ̀

¹ Akẹ́kọ̀ọ́ tó bá ń ka ibi tá a fẹ́ kẹ́kọ̀ọ́ sílẹ̀, tó ń sàmì sí ìdáhùn, tó sì mọ bí òun ṣe lè dáhùn ìbéèrè látọkànwá máa ń tètè tẹ̀ síwájú gan-an nípa tẹ̀mí. Nítorí náà, bí ìkẹ́kọ̀ọ́ kan bá ti fìdí múlẹ̀, kí ìwọ àti akẹ́kọ̀ọ́ náà jọ múra ẹ̀kọ́ kan sílẹ̀ láti lè kọ́ ọ ní bó ṣe lè máa múra sílẹ̀ fún ìkẹ́kọ̀ọ́. Ohun tó máa ṣe ọ̀pọ̀ akẹ́kọ̀ọ́ láǹfààní jù ni pé, kẹ́ ẹ jọ múra àkòrí kan sílẹ̀ látòkèdélẹ̀ nínú ìwé tẹ́ ẹ̀ ń kẹ́kọ̀ọ́.

² Sísàmì sí Ìdáhùn àti Kíkọ Kókó Ọ̀rọ̀ sí Etí Ìwé: Ṣàlàyé bí akẹ́kọ̀ọ́ ṣe lè mọ àwọn kókó ọ̀rọ̀ tó dáhùn ìbéèrè inú ìwé ìkẹ́kọ̀ọ́ ní tààràtà. Fi ìwé tìrẹ hàn án, kó lè rí bó o ṣe sàmì sí kìkì àwọn kókó ọ̀rọ̀ àtàwọn gbólóhùn tó ṣe pàtàkì. Bí ẹ ṣe ń bá ìkẹ́kọ̀ọ́ náà lọ, ó lè máa tẹ̀ lé àpẹẹrẹ tìrẹ, kí òun náà máa sàmì sí kìkì àwọn ohun tó lè jẹ́ kó rántí ìdáhùn. (Lúùkù 6:40) Lẹ́yìn èyí, sọ pé kó máa dáhùn ìbéèrè látọkànwá, láìsí pé ó ń kà á jáde látinú ìwé. Èyí á jẹ́ kó o lè mọ bí ohun tí ẹ̀ ń kẹ́kọ̀ọ́ ṣe yé e tó.

³ Nígbà tí akẹ́kọ̀ọ́ náà bá ń múra sílẹ̀ fún ìkẹ́kọ̀ọ́, ó ṣe pàtàkì gan-an pé kó máa fẹ̀sọ̀ ṣàyẹ̀wò àwọn ẹsẹ Ìwé Mímọ́ tí a kàn tọ́ka sí láìkọ ọ̀rọ̀ wọn. (Ìṣe 17:11) Sọ bí àwọn ẹsẹ Ìwé Mímọ́ tí a ò kọ ọ̀rọ̀ wọn sínú ìwé ìkẹ́kọ̀ọ́ ṣe ti àwọn kókó tó wà nínú ìpínrọ̀ lẹ́yìn. Ṣàlàyé bó ṣe lè máa kọ kókó ọ̀rọ̀ sí etí ìwé ìkẹ́kọ̀ọ́ rẹ̀. Máa fi yé e nígbà gbogbo pé inú Bíbélì ni gbogbo ohun tó ń kọ́ ti wá. Rọ akẹ́kọ̀ọ́ náà pé, tó bá ń dáhùn ìbéèrè kó máa fi ohun tó wà nínú àwọn ẹsẹ Ìwé Mímọ́ tí a ò kọ ọ̀rọ̀ wọn sínú ìwé kún àlàyé rẹ̀.

⁴ Yíyẹ Ibi Tí Ẹ Fẹ́ Kẹ́kọ̀ọ́ Wò àti Ṣíṣe Àtúnyẹ̀wò: Tí akẹ́kọ̀ọ́ bá fẹ́ bẹ̀rẹ̀ sí múra ìkẹ́kọ̀ọ́ rẹ̀ sílẹ̀, ó máa dára kó kọ́kọ́ yẹ ibi tẹ́ ẹ máa kẹ́kọ̀ọ́ wò látòkèdélẹ̀. Sọ fún un pé tó bá fẹ́ ṣe èyí, ó kàn lè wo àkòrí ẹ̀kọ́ náà, àwọn ìsọ̀rí ọ̀rọ̀ rẹ̀ àtàwọn àwòrán tó wà níbẹ̀. Ṣàlàyé fún un pé kó tó parí ìmúrasílẹ̀ rẹ̀, ó yẹ kó tún ṣe àtúnyẹ̀wò àwọn kókó pàtàkì tó wà nínú ẹ̀kọ́ náà, bóyá kó lo àpótí àtúnyẹ̀wò, bó bá wà nínú ẹ̀kọ́ náà. Tó bá ń ṣe àtúnyẹ̀wò bẹ́ẹ̀, á lè máa rántí ẹ̀kọ́ náà.

⁵ Bí a bá kọ́ akẹ́kọ̀ọ́ kan láti máa múra ìkẹ́kọ̀ọ́ sílẹ̀ dáadáa, á lè máa dáhùn ní ìpàdé ìjọ, ìdáhùn rẹ̀ á sì dára gan-an. Yóò tún jẹ́ kó mọ bó ṣe lè máa dá kẹ́kọ̀ọ́ fúnra rẹ̀, èyí tó máa ṣe é láǹfààní lọ́pọ̀lọpọ̀ lẹ́yìn ìgbà tó bá kẹ́kọ̀ọ́ tán.

Wo Fídíò Náà, No Blood—Medicine Meets the Challenge, Kó O sì Jàǹfààní Rẹ̀

Báwo ni ìmọ̀ rẹ ṣe tó nípa oríṣiríṣi ọ̀nà tó ti wà lágbo ìmọ̀ ìṣègùn báyìí fún ṣíṣe ìtọ́jú aláìsàn láìlo ẹ̀jẹ̀? Ǹjẹ́ o mọ díẹ̀ lára àwọn ìtọ́jú tí àwọn oníṣègùn lè fúnni láìlo ẹ̀jẹ̀ yìí àti bí wọ́n ṣe ń lò wọ́n? Wo fídíò yìí, kó o wá fi àwọn ìbéèrè tó tẹ̀ lé e yìí yẹ ìmọ̀ rẹ wò.—Àkíyèsí: Nítorí pé àwọn ibì kan wà nínú fídíò yìí tá a ti fi iṣẹ́ abẹ hàn ní ráńpẹ́, kí àwọn òbí rò ó dáadáa bóyá ó yẹ kí àwọn ọmọ wọn kéékèèké wò ó tàbí kò yẹ kí wọ́n wò ó.

(1) Ìdí pàtàkì wo làwa Ẹlẹ́rìí Jèhófà kì í fi í gbẹ̀jẹ̀, ibo ni ìlànà yẹn sì wà nínú Bíbélì? (2) Tá a bá fẹ́ gbàtọ́jú, irú ìtọ́jú wo la máa ń fẹ́? (3) Ẹ̀tọ́ wo ni ẹni tó ń gba ìtọ́jú ní? (4) Téèyàn bá lóun ò gbẹ̀jẹ̀, kí nìdí tí èyí fi tọ̀nà tó sì bọ́gbọ́n mu? (5) Tí ẹ̀jẹ̀ bá ti dà púpọ̀ jù lára èèyàn, ohun méjì wo ló ṣe pàtàkì kí dókítà kọ́kọ́ ṣe? (6) Àwọn ewu wo ló wà nínú gbígba ẹ̀jẹ̀ sára? (7) Àwọn nǹkan wo làwọn dókítà oníṣẹ́ abẹ lè lò kí ẹ̀jẹ̀ má bàa fi bẹ́ẹ̀ ṣòfò nígbà iṣẹ́ abẹ? (8) Tí wọ́n bá fẹ́ fún ẹ ní oògùn àfidípò ẹ̀jẹ̀, ìwádìí wo ló yẹ kó o ṣe nípa rẹ̀? (9) Ǹjẹ́ ó ṣeé ṣe láti ṣe àwọn iṣẹ́ abẹ tó le tó sì díjú gan-an láìfa ẹ̀jẹ̀ sí ẹni tó ń gbàtọ́jú lára? (10) Kí ni àwọn oníṣègùn tó ń pọ̀ sí i ń fẹ́ láti ṣe fún àwa Ẹlẹ́rìí Jèhófà, kí ló sì ṣeé ṣe kó kúkú di ìlànà táwọn oníṣègùn á máa lò láti fi tọ́jú gbogbo aláìsàn?

Ẹnì kọ̀ọ̀kan ni yóò ṣe ìpinnu tó bá ẹ̀rí ọkàn rẹ̀ mu nípa bóyá òun á gba èyíkéyìí lára irú àwọn ìtọ́jú tá a fi hàn nínú fídíò yìí tàbí òun ò ní gbà á.—Wo Ilé Ìṣọ́ June 15, 2004, ojú ìwé 22 sí 24, àti 29 sí 31, àti Ilé Ìṣọ́ October 15, 2000, ojú ìwé 30 àti 31.