Buku Yitheti yi Samueli
19 Buviokila thangu, Sauli wukamba muan′andi Yonatan ayi bisadi biandi bioso ti, waba tomba kuvonda Davidi. 2 Yonatan muana Sauli waba zolanga beni Davidi, diawu kakambila mambu amama kuidi Davidi: “Tat′ama Sauli wuntomba ku kuvonda, diawu fueti ba keba keba. Yono va meni fueti tina muingi kue suama. 3 Minu ayi tat′ama tuala kuenda ku thandu va ndeku kibuangu wala suamina. Minu yinkuiza yoluka na tat’ama matedi ngiewu, ayi minu kuzaba dioso diambu yinkuiza kuzabikisa.
4 Bosi Yonatan wutubila buboti Davidi vantuala tat′andi Sauli: “A ntinu bika kuvangila Davidi mambu mambi kibila nandi kasa kuvangila ko ne diambu dimbi, vayi mambu moso kamvanganga ma kutuadisanga to ndandu. 5 Nandi wutula luzingu luandi va kingela muingi kuvonda Ngoliati. Mu phila ayoyo, Yave wuvukisa dikabu dioso di Isaeli, ayi bo ngie wumona mawu, ngie wuyangalala beni. Buabu kibila mbi wuntombila kutengula menga makhambulu kibila mu kuvonda Davidi?” 6 Sauli wukikinina mambu Yonatan kankamba, ayi wutuba: “Yinleva phesi mu dizina di Yave ti, yisinkuiza vonda ko Davidi.” 7 Bosi Yonatan wutumisa Davidi, wunzabikisa mambu moso, ayi Yonatan wunata Davidi kuidi Sauli. Mu phila ayoyo, Davidi wubue vutuka kusadila Sauli dedi bo kaba vangilanga.
8 Buviokila thangu, basi Isaeli babue nuana na basi Filistea, ayi Davidi wuvonda masodi mawombo ma basi Filistea, ayi basi Filistea bankaka batina.
9 Ayi Yave wutuadisa mayindu mambi maba tatisa Sauli, nandi wuba wukala ku nzo na didionga va koko bo Davidi kaba sika harpa. 10 Sauli wukuba Davidi didionga, vayi Davidi kasa nongana ko didionga beni. Diawu dikota mu kibaka, ayi mu builu beni Davidi wutina. 11 Muna builu beni, Sauli wufila mimvuala ku nzo Davidi muingi banlunga ayi va meni babaka bu kumvondila. Vayi Mikal nkazi Davidi wukamba Davidi: “Ngie kukhambu tina builu abubu, yono va meni bankuiza kuvonda.” 12 Mu thinu Mikal wusadisa Davidi kakulukila va nela muingi katina. 13 Mikal wubonga kitumba ki dikanda, wutula kiawu va kika va kibuangu Davidi kaba lala, wutula kikhutu kivangulu mu mika mi zikhombo ku ntu kitumba beni, ayi wufuka kiawu.
14 Sauli wufila mimvuala muingi belanda Davidi, vayi Mikal wuba kamba: “Davidi widi mu kubela.” 15 Vayi Sauli wubue fila mimvuala muingi belanda Davidi ayi wuba kamba: “Yenda nanngunanu vana kika ayi ntualanu akuku, muingi yimvonda.” 16 Bo mimvuala beni bakota ku nzo Davidi, bawu bamona kitumba ki dikanda batula kikhutu kivangulu mu mika mi zikhombo va kibuangu Davidi kaba thetikanga ntu. 17 Mu kibila akiokio, Sauli wuyuvula Mikal: “Kibila mbi ngie bephunina ayi besadisila mbeni′ama kuvuka?” Mikal wumvutudila: “Nandi bekhamba ti minu kukhambu kunsadisa, wunkuiza phonda.”
18 Davidi wutina ayi wuye dengana Samueli ku Ramá. Davidi wunzabikisa mambu moso Sauli kamvangila. Bosi Davidi ayi Samueli bayenda ku Naioti ayi bakala kuna. 19 Buviokila thangu, bakamba Sauli: “Davidi widi ku Naioti kibuangu kidi ku Ramá.” 20 Muna thangu beni, Sauli wufila zimvuala muingi bebuila Davidi. Bo zimvuala beni bamona mimbikudi baba bikula ayi Samueli waba kuba tuadisa, Nzambi wuvanga muingi zimvuala Sauli kafila batona kubikula.
21 Bo Sauli kazaba mawu, nandi wubue fila zimvuala zinkaka, vayi bawu mvawu batona kubikula. Bosi Sauli wubue fila dingumba dintatu di zimvuala, vayi bawu mvawu batona kubikula. 22 Bosi naveka Sauli wuyenda ku Ramá, ayi bo kavitila va ditanga dinneni diba ku Seku, nandi wuyuvula batu baba vana: “Samueli ayi Davidi kuidi badi?” Bawu bamvutudila: “Badi ku Naioti kibuangu kidi ku Ramá. 23 Bo Sauli kananguka ku Seku muingi kukuenda ku Naioti kibuangu kidi ku Ramá, Nzambi wuvanga muingi nandi mvandi kabikula, ayi nandi waba bikula mu nzila yoso nate kavitila ku Naioti kibuangu kidi ku Ramá. 24 Sauli mvandi wuvula bikhutu ayi wutona kubikula vantuala Samueli. Sauli wuba wulala pheni nkua muinya woso ayi builu boso. Diawu bantubilanga mambu amama ku Isaeli: “Sauli mvandi widi ḿbikudi?”