Esodu

34 Yave wukamba Mose: “Bonga mamanya muadi madi dedimueka na mamanya mo maba minsiku, ayi minu yinkuiza sonika mu mamanya beni minsiku mio miba mu mamanya matheti mo ngie wubula. 2 Yono mu meni kubama muingi wutombuka ku Mongo Sinai, ayi minu yinkuiza yoluka yaku kuna mbata mongo beni. 3 Ni mutu wunkaka kalendi kuenda ko yaku ku mongo beni, ni kheti kuba va kibuangu kifikama. Mvandi ni ngombi voti dimemi bafueti dila ku mongo beni.”

4 Mu phila yoyo, Mose wubonga mamanya muadi maba dedimueka na mamanya kavanga mu khumbu yitheti, bosi mu kilumbu kilanda va meni, nandi wutombuka ku Mongo Sinai dedi bo Yave kankambila, ayi wunata mamanya beni kakubika. 5 Bosi Yave wukuluka va mongo beni mu dituti va kibuangu kiba Mose, ayi wunzabikisa ntindu mbi mutu Yave kadi. 6 Yave wuvioka vantuala Mose ayi wunkamba: “Yave, Yave, Nzambi nkua nlemvu, nkua kiadi, widi mvibudulu, widi luzolo lukuikama ayi nkua kiedika. 7 Nzambi wummonisanga luzolo lukuikama kuidi zimbandu ziwombo, wunlemvukilanga zinzimbala ayi masumu. Vayi wala fundisa bana ayi batekulu mu kibila ki zinzimbala zi matata mawu, mu zimbandu ziawu zioso.”

8 Muna thangu beni Mose wufukama ayi wunyinika kizizi kiandi va tsi. 9 Bosi wutuba: “A Yave, boti minu yidi luvalu va mesu maku, lemvuka a Yave yiza muingi wenda yitu, kheti befu tuidi dikabu didi ntu ngolo. Lemvukila zinzimbala ayi masumu mitu, ayi kikinina muingi tuba dikabu diaku.” 10 Nzambi wumvutudila: “Yidi mu kuvanga yaku luwawanu. Yinkuiza vanga mangitukulu mawombo vantuala dikabu, mo kayivengiabu ko kuidi dikabu dinkaka. Ayi batu boso bala mona mambu ma kukuitukila ma Yave, kibila yala kuluvangila mambu mawombo ma kukuitukila.

11 “Teka matu mu mambu yaku kamba bubu. Yinkuiza kukisa vantual’inu basi amorreu, basi kanani, zi hitita, zi perizeu, zi heveu ayi zi jebuzeu. 12 Banu keba keba muingi lubika vanga luwawanu na batu bankalanga ku ntoto benu luidi mu kukuenda, muingi mawu mabika ba ntambu kuidi benu. 13 Vayi benu lufueti tulula bikumu biawu, makunzi mawu manlongo ayi mamanya mawu ma kubuongimina. 14 Benu mulendi buongimina ko zinzambi zinkaka, kibila Yave widi Nzambi nkua kiphala wuntombanga babuongimina to nandi. 15 Banu keba keba muingi lubika vanga luwawanu na batu bankalanga ku ntoto benu luidi mu kukuenda, kibila mu thangu bankuiza buongimina zinzambi ziawu ayi bamvana minkhailu, bawu balenda kulutumisa muingi ludia minkhailu beni. 16 Benu kuvanga mawu, khanu bana binu ba babakala bankuiza kuela bana bawu ba bakietu, ayi bo bana bawu bankuiza buongimina zinzambi ziawu, bana binu ba babakala mvawu bankuiza buongimina zinzambi beni.

17 “Bikanu kuvanga zinzambi zi bisengu.

18 “Benu lufueti kembanga Nkungi wu Mapha Makhambulu Luvi. Lufueti dianga mapha makhambulu luvi mu sambuadi di bilumbu, dedi bo yima kukambila. Ayi lufueti vangilanga mawu mu thangu yisikika, mu ngonda yi Abibe, kibila ngonda yi Abibe yawu lubasika ku Ngipiti.

19 “Bana boso batheti ba babakala badi bama, kuba kuandi ba batu voti ba bibulu. 20 Ngie fueti vana dimemi va mvingi muana wutheti wu phunda muingi kunkula, vayi ngie kumanga kunkula, buna fueti kumvonda mu kumbita nti ku dikosi. Benu lufueti kula bana binu boso batheti ba babakala, ayi ni mutu kalendi kuiza ko vantual’ama mioko yi mioko.

21 “Benu lufueti vanga bisalu binu bioso mu sambanu di bilumbu. Vayi mu Kisabala kilumbu sambuadi, lufueti vunda. Lufueti vunda kheti mu thangu yi kukubika ntoto, voti mu thangu yi kuvela mbongu.

22 “Lufueti kembanga Nkungi wu Zisabala, bo mumvela mimbutu mitheti miyela mi trigu. Ayi lufueti kembanga Nkungi wu Zitenda ku tsuka mvu.

23 “Babakala boso ba dikabu bafueti kuendanga khumbu tatu mu mvu vantuala Yave Mfumu yikiedika, Nzambi yi Isaeli. 24 Minu yinkuiza kukisa mimvila mioso vantual’inu, ayi yinkuiza buela zindilu zi kizunga kinu. Ni mutu kalasa zininanga ko ntoto’inu, bo luala kuendanga khumbu zitatu mu mvu vantuala Yave Nzamb’inu.

25 “Mulendi vana ko menga ma nkhailu’ama va kimueka na biuma bidi luvi. Ayi mulendi lunda ko nkhailu wu nkungi wu pasika nati mu kilumbu kinlanda.

26 “Benu lufueti natanga ku nzo Yave Nzamb’inu mimbutu mitheti milutidi lunkongula mu zitsola zinu.

“Ayi mulendi lamba ko muana khombo mu kusadila leta yi ngudi’andi.”

27 Yave wubue kamba Mose: “Ngie fueti sonika mambu amama yima tuba, kibila yinkuiza vanga yaku luwawanu ayi yinkuiza vanga luwawanu na basi Isaeli, mu kutadila mambu beni. 28 Mose wukala kuna mongo na Yave mu 40 di bilumbu. Nandi kasa dia ko ni kiuma ayi kasa nua ko nlangu. Ayi nandi wusonika mu mamanya Kumi di Minsiku mi Luwawanu.

29 Bosi Mose wukuluka ku Mongo Sinai na mamanya muadi kasonika Kumi di Minsiku mi Luwawanu. Bo Mose kakuluka, nandi kasa zaba ko ti kizizi kiandi kiaba lezaba beni, bo kayoluka na Nzambi. 30 Bo Aloni ayi basi Isaeli boso batala Mose, bawu bamona ti kizizi kiandi kiaba lezama beni, diawu babela boma mu kumfikama.

31 Vayi Mose wuba tela, diawu Aloni ayi bakulutu boso ba dikabu bafikimina vaba Mose, ayi nandi wuyoluka yawu. 32 Bosi basi Isaeli boso bafikama vo kaba, ayi nandi wuba zabikisa mambu moso Yave kankamba ku Mongo Sinai. 33 Kadika khumbu Mose kaba mananga kukoluka yawu, nandi waba fukanga nledi ku kizizi kiandi. 34 Vayi bo Mose kaba kuendanga vantuala Yave muingi kukoluka yandi, nandi waba botulanga nledi ku kizizi kiandi nati mu thangu kaba botukanga vana. Bosi waba kuendanga kuidi basi Isaeli muingi kuba zabikisa zithumu Nzambi kamvana. 35 Basi Isaeli baba monanga ti kizizi ki Mose kiaba lezamanga beni, diawu Mose kaba fukilanga nledi ku kizizi kiandi, nati mu thangu kamvutuka kuidi Nzambi muingi kukoluka yandi.