Ngonda Yintanu

Baklistu mu sekulu yitheti, mvawu batovuka bo nzala yiyiza monika mu “ntoto woso.” Bukiedika, disa ba ko diambu diluelu kuidi zimfumu zi makanda kukieba makanda ayi mvandi kuidi matoko baba mayindu ma kubuela kukivana mu kisalu ki kusamuna. Bukiedika ti bawu bayindula ti makani mawu masinkuiza salama ko? Kheti mu mambu moso amomo, zikhomba bayolama mu mawu. Bawu batatamana kusamuna mu mayangi ayi basadila biuma biawu muingi kusadisa zikhomba ziawu ku Yuda kheti bo mambu mabaluka. (Mav. 11:​29, 30) Baboso batambula bidia, bamona lusalusu lu Yave. (Mat. 6:​31-33) Zikhomba batambula lusalusu bayiza ba beni bafikama na zikhomba baba vana lusalusu. Ayi baboso bavana lusalusu bamona mayangi mankuizilanga mu kuvana.—Mav. 20:35. w23.04 16 ¶12-13

Khumbu zinkaka Yave wuntambudilanga minsambu mitu mu kusadila batu bakhambu kumbuongiminanga. Dedi, Yave wusadila ntinu Alatasasta muingi kutambudila nsambu wu Nehemia wu kubue tungisa bibaka bi divula di Yelusalemi. (Nehe. 2:​3-6) Bubu mvandi, Yave kalenda sadila batu bakhambu kumbuongiminanga muingi ku tusadisa mu thangu tumviokila mu mambu maphasi. Khumbu ziwombo tutambudilanga ko mimvutu mi minsambu mitu mu phila tuntombila. Vayi mimvutu tuntambulanga miawu mintombulu muingi tutatamana bakuikama kuidi Tat’itu. Diawu sikika thalu mu phila Yave kantambudilanga minsambu miaku. tufueti botulanga thangu muingi kufiongunina ziphila Yave kantambudilanga minsambu mitu. (Minku. 66:​19, 20) Tumonisanga ko to kiminu bo tunsambila kuidi Yave, vayi mvandi tunkikininanga mu phila kantambudilanga minsambu mitu.—Ebeo. 11:6. w23.05 11 ¶13; 12 ¶15-16

Bo tukivana kuidi Yave, befu tukanikisa kumbuongina ayi kuvanga luzolo luandi. Diawu, tufueti dukisa kuvanga mamoso tukanikisa kuidi Yave ayi masi ko mambu tulenda lembakana. Kibila Yave wutuvanga muingi tuvanga luzolo luandi. (Nzai. 4:11) Mvandi wu tuvanga na phuila yi kudukisa zitsatu zitu zi kiphevi ayi wu tuvanga mu kifuani kiandi. Mu kibila akiokio, tulenda nunga kumfikama ayi kubaka mayangi mu kuvanga luzolo luandi. Mvandi bo tumvanga luzolo lu Nzambi ayi tunlandakana kifuani ki Muan’andi, tumbakanga “khindusulu.” (Mat. 11:​28-30) Tatamana kukindisa luzolo luaku mu Yave. Ngie wulenda vanga mawu, mu kuyindula mu mambu moso mamboti nandi kamana kuvangila ayi mu lusakumunu kala kuvana. Bo luzolo luaku mu Nzambi lunluta buelama, disinkuiza ba ko diambu diphasi kuntumukina. (1 Yoa. 5:3) Yesu wununga kuvanga luzolo lu Nzambi, mu kusambila kuidi Yave muingi kansadisa ayi wusikika mayindu mu lusakumunu kaba vingila. (Ebe. 5:7; 12:2) Dedi Yesu, sambila muingi Yave ka kuvana mangolo ayi tatamana kuyindula mu kivuvu ki luzingu lu mvu ka mvu. w23.08 27-28 ¶4-5

Befu boso tunzolanga batu bammonisanga mvibudulu. Ayi tuba kinzikanga kibila bawu bamvibidilanga mu khambu dasuka. Mvandi, tunzolanga bo bankaka ba tumonisa mvibudulu bo tumvanga nzimbala. Ayi tuntondanga bo nlongis’itu wu Kibibila ka tumonisa mvibudulu muingi ku tulonga kiedika ayi bo tuaba vanga mangolo ma kusadila mambu tuaba longuka mu Kibibila. Bulutidi, tuntondanga bo Yave ka tumonisanga mvibudulu. Kheti befu tunzolanga batu badi mvibudulu, vayi ḿba tulenda kikinina ti disi ko diambu diluelu kumonisa mvibudulu. Dedi, vantombulu kumonisa mvibudulu bo tuidi mu ntanda muingi kusumba biuma. Khumbu zinkaka, tumonisanga ko mvibudulu bo bankaka ba tufuemisa. Ayi tulenda mona phasi kutatamana kumonisa mvibudulu mu lukanu lu Yave matedi nza yimona. Diawu, tufueti luta ba mvibudulu mu mambu moso. w23.08 20 ¶1-2

Yave wukamba Ngidioni kavutula nduka masodi moso mu zinzo. Nandi ḿba wukiyuvusa: ‘Bukiedika ti vadi tsundu kulandakana thuadusulu ayoyo? Mawu mankuiza tusadisa?’ Kheti bobo, Ngidioni wutumukina. Bubu, bakulutu ba kimvuka banlandakananga kifuani ki Ngidioni mu kulandakana zithuadusulu bo mambu mambaluka. (Ebe. 13:17) Ngidioni wutumukina Yave kheti wuba boma bu kutula luzingu luandi va kingela. (Minkongu 9:17) Bo Yave katuba ti wunkuiza nkieba ayi mvandi kukieba dikabu, Ngidioni wufiatila mu mawu. Bakulutu ba kimvuka bankalanga mu zitsi bakandimina kisalu kitu, balenda landakana kifuani ki Ngidioni mu kumonisa kibakala bo bantuadisa zikhutukunu ayi kisalu ki kusamuna kheti bankana kuba tula mu buloku, kuba fundisa, kuba bonga biuma badi ayi kuba vanga bubi. Mu ziphasi zingolo, vala tombulu bakulutu ba kimvuka kumonisa kibakala muingi kulandakana zithuadusulu bala tambula. w23.06 5-6 ¶12-13

Yave wutuadisa muingi basonika mu Kibibila kifuani ki nkulutu zinganga Nzambi Yoyada muingi tubakila ndandu. (Lom. 15:4) Ayi bo Yoyada kafua, Yave wumvana nzitusu mu kumvana luaku lu “kunzikila va kibuangu baba zikilanga mintinu. Kibila nandi wuvanga mamboti ku Isaeli mu kukinzika Nzambi yikiedika ayi nzo’andi.” (2 Lusa. 24:​15, 16) Kinongo ki Yoyada kilenda tusadisa kuvumina Nzambi. Bakulutu ba kimvuka balenda landakana kifuani kiandi mu kutatamana bakotuka mu kiphevi ayi kukieba buboti mamemi ma Nzambi. (Mav. 20:28) Zikhomba zima nuna, balenda longuka ti ba kuvumina Yave ayi kutatamana bakuikama, nandi kalenda kuba sadila muingi kudukisa luzolo luandi. Matoko balenda longuka mu phila Yave kakiebila Yoasi ayi kulandudila kifuani ki Yave mu bakulutu badi bakuikama, mu kuba kinzika ayi kuba vua nkinza. Bulutidi bo bavanga mawombo mu kisalu ki Yave. (Zinga. 16:31) Tumbuelanga mioko mu lukuikumunu ‘baboso bantuama ntuala’, mu kuba tumukina.—Ebe. 13:17. w23.06 17 ¶14-15

Sadila kilunzi kiaku muingi wuzaba khumbu zikua wulenda nangunina koku. Kibila befu kunangunanga koku mu kadika kiuvu, tulenda tula ntuadisi divuda ayi tulenda ba buka befu tuidi mu kunkuika muingi ka tusola tuvana mvutu, kheti bankaka baveniabu ko mvutu. Ayi mambu amomo malenda vanga bankaka kuba mu kiunda muingi babika kubue nangunanga koku. (Mpovi 3:7) Bo batu bawombo mu lukutukunu bannanguna koku muingi kuvana mvutu, ḿba befu tualasa bue baka ko luaku, lu kuvana mimvutu kadika thangu. Ayi khumbu zinkaka, ntuadisi ḿba kasinkuiza tusola ko muingi tuvana mimvutu kadika thangu. Ma kumonika, malenda ku tubika mu kiunda, vayi tulendi fuema ko boti basinkuiza tusola. (Mpovi 7:9) Boti wusa nunga ko kuvana mimvutu mu lukutukunu khumbu zioso wufina tomba, buidi wummuena kuteka matu bo bankaka bamvana mimvutu ayi kuba nyunga kutsuka lukutukunu? Ngie kuvanga mawu, zikhomba ziaku bankuiza baka khindusulu. w23.04 23-24 ¶14-16

Tanga Diambu di Nzambi ayi yindula mu mawu. Dedi bo nti wulenda bela wukinda boti ziganzi zisikama mu ntoto, bobuawu mvandi befu kuba lufiatu mu mambu Kibibila kintuba, kiminu kitu kinkuiza ba kikinda. Bo nti wukayonzukilanga, buawu zinganzi ziandi zinkuiza luta kotila mu ntoto ayi zinkuiza kindimina. Bobuawu mvandi, bo tuntanga ayi tunyindula mu mambu tuntanga, buawu kiminu kitu kinkuiza buelimina ayi kuba lufiatu ti phila Nzambi kamvangilanga mambu yawu yilutidi. (Kolo. 2: 6, 7) Yindula buidi malongi, zithuadusulu ayi lukiebu lu Yave lusadisila bisadi biandi mu thangu yikhulu. Dedi, mbikudi Yehezekeli wuteka matu bo mbasi yi Yave kazonga tempelo. Kimona mesu akiokio, kikindisa Yehezekeli ayi ki tulonga mambu mawombu matedi buidi tulenda kakidila zithuadusulu zi Yave matedi mbuongimini yikiedika. (Yehe. 40: 1-4; 43:​10-12) Befu mvitu tumbakanga ndandu bo tumbotula thangu muingi kulonguka ayi kuyindula mu mambu maphinda madi mu Diambu di Nzambi. Ntim’itu wulenda ba wukindama befu kufiatila to mu Yave.—Minku. 112:7. w23.07 18 ¶15-16

Mu Kibibila muidi bifuani biwombu bimboti matoku balenda landakana. Bisadi abiobio bikuikama mu thangu yikhulu, baba zolanga Nzambi ayi batambula biyeku biwombu muingi kukeba dikabu diandi. Ngie mvaku wulenda bakula bifuani bimboti bi Baklistu bayonzuka mu kiphevi, va khati dikanda diaku ayi mu kimvuka. (Ebe. 13:7) Ayi Yesu Klistu widi kifuani kimboti kuidi ngiewu. (1 Pet. 2:21) Ngie wulenda longuka mu nduenga bifuani abiobio, mu kulandakana zikhadulu ziawu. (Ebe. 12:​1, 2) Diawu baka makani mu phila wulenda landikinina bifuani beni. Mutu widi nduenga, wunyindulanga buboti ava kubaka makani. Diawu vanga mangolo muingi kukuna khadulu ayoyo. Longuka minsua mi Kibibila ayi yindula matedi ndandu milenda kutuadisa. Minsua amiomio, milenda kusadisa kubaka makani mankuangidika Yave. (Minku. 119:9) Ngie kuvanga mawu, wala yonzuka mu kiphevi.—Zinga. 2:​11, 12; Ebe. 5:14. w23.12 24-25 ¶4-5

Matata, longanu bana binu muingi bazaba kutambudila mimvutu mu nlembami, bo bamviokila mu zithotolo mu kibila ki mambu bankikininanga. (Tia. 3:13) Matata mankaka bamvangilanga mawu mu mbuongimini’awu yi dikanda. Bawu bamfionguninanga mambu malenda monika ku kikola ayi bamvanganga mbonosono matedi buidi balenda vanina mvutu ayi kuyolukila mu phila yivumbama ayi yifuana. Malongi madi mu khond’itu mayo, malenda sadisa Baklistu kukolukila mu kibakala ayi kuba lufiatu ti vadi bibila binkinza muingi kukikinina mu mawu. Kikhuku kidi mu jw.org, kintuba “Os Jovens Perguntam,” muidi malongi matedi matoku. Mawu madi makubuku muingi kusadisa matoku mu mambu bankikininanga ayi kuvana mimvutu mu bikuma biawu veka. Kulonguka mawu mu mbuongimini yi dikanda, baboso balenda longuka bu kukakidila kiminu kiawu mu phila yifuana ayi yivumbama. w23.09 17 ¶10; 18 ¶15-16

Mana tsikika makani ma kiphevi ayi wunnuana nzingu muingi kudukisa mawu? Boti ngete, buna zaba ti wisi ko to ngie veka. Dedi, yaya Philip waba tomba kuvanga minsambu mimboti ayi kubuela zikhumbu kabe sambidilanga. Vayi diba diambu diphasi kubaka thangu muingi kusambilanga. Yaya Erika waba tomba kutukanga mu thangu yifuana mu zikhutukunu zi kubasikilanga mu kisalu ki kusamuna. Vayi kheti bobo, kabasa tukanga ko mu thangu yifuana mu zikhutukunu aziozio. Boti vadi makani wutsikika vayi wisinnunga ko kudukisa mawu, bika kuba mu kiunda kibila mawu masinsundula ko ti wulendi nunga ko. Kheti makani maluelu, vantombulu thangu ayi mangolo muingi kudukisa mawu. Bo wukhidi vanga mangolo muingi kudukisa makani beni, mawu mammonisa ti wumvuanga nkinza kikundi kiaku na Yave ayi wuntomba kuvanga mamoso wulenda nunga. Yave wumvuanga beni nkinza mangolo maku. Vayi nandi kasintomba ko wuvanga mambu malutidi mu kitesu kiaku. (Minku. 103:14; Mika 6:8) Diawu, wufueti tsikika makani mafuana kuidi ngiewu. w23.05 26 ¶1-2

Batu badi kibakala balenda mona boma, vayi balendi bika ko mawu, maba tula nkaku kuvanga masonga. Danieli wuba beni kibakala, nandi waba longukanga zimbikudulu zi Nzambi, kubunda mvandi zimbikudulu zi Yelemia. Mu nzila ndogukulu ayoyo, Danieli wununga kuvisa ti buvika bu basi Yuda ku Babiloni, buba nduka kumana. (Dani. 9:2) Danieli wumona ti Diambu di Nzambi didi kiedika. Mawu makindisa lufiatu luandi mu Nzambi ayi mvandi makindisa baboso baba lufiatu mu Nzambi. (Dedikisa na Loma 8: 32, 37-39.) Ayi dilutidi nkinza, Danieli waba sambilanga khumbu ziwombo mu kilumbu kuidi Tat’andi yi diyilu. (Dani. 6:10) Nandi wudinda nlemvu wu masumu mawu ayi wuzibula ntim’andi kuidi Yave. Danieli wudinda lusalusu. (Dani. 9:​4, 5, 19) Nandi wuba mutu wu masumu dedi befu, diawu kasa butuka ko na kibakala vayi wukuna khadulu ayoyo mu kulongukanga Diambu di Nzambi, kusambila ayi kufiatila mu Yave. w23.08 3 ¶4; 4 ¶7

Bo tuntumukina zimfumu zi luyalu, befu tumbakanga ndadu ayi mvandi batu bankaka. Buidi? Befu tuviokilanga ko mu ziphasi zinkuizilanga mu kukhambu tumukina nsiku. (Lom. 13:​1, 4) Bo tuntumukina zimfumu zi luyalu, bawu bala mona ti Zimbangi zi Yave, badi batu bantumukinanga. Dedi, mua mimvu kumbusa ku Nigeria, masodi bakota ku nzo Kintinu mu thangu zikhomba baba mu lukutukunu muingi kutomba batu baba vanga divunza muingi babika kufuta ziphaku. Vayi mfumu masodi wukamba masodi babasika ayi wutuba: “Zimbangi zi Yave bamfutanga ziphaku.” Zaba ti kadika khumbu ngie wuntumukina nsiku, wunkuiza vanga muingi baluta kinzika dikabu di Yave—ayi kukieba zikhomba ziaku. w23.10 9 ¶13

Bisadi biwombu bi Yave bamvingilanga tsukulu yi nza ayiyi mu mimvu miwombu. Batu bawombo banyindulanga ti, zikhanu zi Yave zialasa salama ko. Vayi Yave wukamba Habakuki matedi zimbikudulu ziandi bo katuba: “Kimona mesu kiala salama mu thangu yifuana. Kiawu kimfikama mu thinu nati kutsuka ayi kalendi vuna ko. Kheti vamvioka beni thangu, tatamana kuvingila! Kibila kiawu kiala kuiza mu thangu yifuana!” (Haba. 2:3) Bukiedika ti Yave wukanikisa to mambu amomo kuidi Habakuki? Voti mambu nandi katuba madi tsundu mvandi kuidi befu bubu? Mu nzila phevi yinlongo, mvuala Polo wutubila mambu amomo kuidi Baklistu baba vingilanga beni nza yimona. (Ebe. 10:37) Diawu tulenda ba lufiatu ti, kheti lukanu lu Nzambi luidi buka ti lualasa salama ko, vayi “mutu no wunkuiza, wala tuka ayi kasi bue kala ko kisina.” w23.04 30 ¶16

Kiadi ayi kiunda kuzaba ti, basi Isaeli bawombu bamanga bivisa biaba monisa ti Yave nandi waba sadila Mose muingi kuba tuadisa. (Zinta. 14:​10, 11) Khumbu ziwombu, bawu bamanga kukinzika kiyeku Nzambi kavana Mose. Mambu mbi mayiza monika? Yave wumanga muingi mbandu ayoyo bakota mu ntoto kaba kanikisa. (Zinta. 14:30) Vayi, bankaka mu basi Isaeli balandakana thuadusulu yi Yave. Dedi, Yave wutuba: ‘Calebi . . . Wunlandakananga zithuadusulu ziama mu ntima woso.’ (Zinta. 14:24) Nzambi wusakumuna Calebi ayi wumvana luaku lu kusola kuma nandi kaba tomba kukala ku ntoto wu kanani. (Yosua 14:​12-14) Mbandu yilanda yi basi Isaeli, mvandi yivana kifuani kimboti mu matedi kulandakana thuadusulu yi Yave. Bo Yosua kavinginina Mose muingi kutuadisa basi Isaeli, bawu ‘batatamana kunkinzika mu bilumbu bioso bi luzingu luandi.’ (Yosua 4:14) Mambu mbi mayiza monika? Yave wuba sakumuna mu kuba nata ku ntoto kaba kanikisa.—Yosua 21:​43, 44. w24.02 21 ¶6-7

Dedi bo dotolu kalenda nungina kuvisa buidi ntimi’itu widi mu kusadila, mu kutala phila menga mankumbila mu zitsila zi koko, befu mvitu tulenda zaba matedi luzolo luitu mu Nzambi, bo tumfiongunina luzolo tummonisanga kuidi zikhomba zitu. Befu kumona ti luzolo tuidi mu zikhomba zitu luidi lulebakana, mawu mammonisa ti luzolo luitu mu Nzambi, mvandi luidi lulebakana. Vayi, befu kutatamana kumonisa luzolo kuidi zikhomba zitu, buna tulenda ba lufiatu ti luzolo luitu mu Nzambi luidi lungolo. Tufueti vanga dioso diambu boti luzolo luitu kuidi zikhomba luidi mu kudekuka. Kibila mbi? Kibila mawu mansundula ti kiphevi kitu kidi mu kulebakana. Mvuala Yoane wusonika ti: “Mutu wukhambu zolanga khomb’andi no kammonanga, kalendi zola ko Nzambi no kakhambu monanga.” (1 Yoa. 4:20) Mbi tulenda longuka mu mawu? Yave wumbanga mu mayangi bo tuntatamana “kuzolasananga befu na befu.”—1 Yoa. 4:​7-9, 11. w23.11 8 ¶3; 9 ¶5-6

Bo ntinu Yoasi kaba ditoku wubaka makani manduenga. Kheti kasaba ko tata, nandi wulandakana thuadusulu yi Mfumu Zinganga Nzambi Yoada. Mfumu zinganga beni, wutuadisa Yoasi buka muan’andi. Mu phila ayoyo, Yoasi mu nzailu wubaka makani ma kutuadisa mbuongimini yikiedika ayi kusadila Yave. Yoasi mvandi wutuama ntuala mu kuludika tempelo yi Yave. (2 Lusa. 24:​1, 2, 4, 13, 14) Boti bake mu kukulonga kuzola Yave ayi kuzingila mu zithuadusulu ziandi, buna nkhailu wu luvalu bake mu kukuvana. (Zinga. 2:​1, 10-12) Matata balenda kubika bana bawu mu ziphila ziviakana. Matata maku bala ba mu mayangi ngie kulandakana malongi ba kuvana mabongulu mu Kibibila. Bulutidi ngie wunkuiza bika Yave mu mayangi ayi wala kuna kikundi kifikama kuidi nandi. (Zinga. 22:6; 23:​15, 24) Bukiedika ti mawu masi kuvana ko bibila binkinza muingi kulandakana kifuani ki Yoasi bo kaba ditoku? w23.09 8-9 ¶3-5

Yave wunkanikisa kutambudila minsambu mitu. Nzamb’itu wunzolanga bisadi biandi bikuikama, diawu nandi kalasa manga ko kutambudila minsambu miawu. (Minku. 10:17; 37:28) Vayi mawu masinsundula ko ti nandi wala tambudila minsambu miawu mioso. Vala tombulu kutelimina, kibila minsambu minkaka tundindanga tuela mitambudila to mvutu ku nza yimona. Yave wuntadilanga boti mambu tukundinda madi nguizani na luzolo luandi. (Yesa. 55:​8, 9) Dimueka mu lukanu beni didi: Nandi wuntomba ntoto wuwala batu bakuntumukina mu ntima woso. Vayi Satana wutuba ti bulutidi batu bakituma baveka. (Ngene. 3:​1-5) Muingi kumonisa ti Satana widi nkua luvunu, Yave wubika muingi batu bayala baveka. Vayi luyalu lu batu luntuadisanga ziphasi bubu. (Mpovi 8:9) Yave kalasa manisa ko ziphasi zioso mu bilumbu abibi. w23.11 21 ¶4-5

Yave wukanikisa ti mu nzila Abalahami mimvila mioso miala sakumunu. Vayi bo Abalahami kaba 100 di mimvu ayi Sala 90 di mimvu, buna babutidiabu ko muana babakanikisa. Ḿba mu mbuenu’itu befu batu, tulenda tuba ti balendi bue buta ko muana. Bukiedika, disa ba ko diambu diluelu mu bawu. “Vayi mu kivuvu, nandi wuba lufiatu ti wunguiza ba tata yi mimvila miyombo.” (Lom. 4:​18, 19) Bukiedika mambu amomo mayiza salama. Nandi wuyiza ba tata yi Isaki muana no baba vingila beni. (Lom. 4:​20-22) Befu tulenda ba lunungu va mesu ma Nzambi ayi tulenda ba batu basonga dedi bo Abalahami kabela. Bo mvuala Polo kasonika: “Bikuma, ‘nandi wuyiza tedulu’ bisa sonimina ko to mu kibila kiandi, biawu bisonimina mvandi mu kibila kitu kibila mvitu tuala tedulu batu basonga befu kukikinina mu mutu no wuvulubusa mfumu’itu Yesu.” (Lom. 4:​23, 24) Dedi Abalahami, vantombulu tumonisa kiminu mu mavanga ayi kuba kivuvu ti mambu Yave kakanikisa, mala salama. w23.12 7 ¶16-17

Bo ngie wumviokila mu mambu ma kutula boma, tebuka moyo ti Yave wummonanga mambu widi mu kuviokila ayi phila widi mu kumuena. Dedi, Yave kasa mona ko to ziphasi basi Isaeli baviokila ku Ngipiti, vayi mvandi wuzaba ziphasi baba viokila.” (Esodu 3:7) Bo widi mu kuviokila mu diambu diphasi, ḿba ngie wulenda mona buka ti Yave kasinkuiza kusadisa ko. Mbi wulenda vanga? (2 Mint. 6:​15-17) Tala biuvu abibi: Ngie mana baka khindusulu mu dilongi voti mu mvutu khomba kavana mu lukutukunu? Vadi kilongulu, video voti nkunga wumana kukindisa? Vadi mutu mana kutangila matangu ma Kibibila ma kukindisa? Tulendi zimbakana ko luzolo lu kikhomba ayi bidia bi kiphevi tuntambulanga. Tebuka moyo ti mambu tuma tubila, midi minkhailu mi Yave. (Yesa. 65:13; Mala. 10:​29, 30) Minkhailu amiomio, mimmonisa ti Yave wu kuvuanga nkinza. (Yesa. 49:​14-16) Ayi mvandi mimmonisa ti nandi widi mutu wu lufiatu. w24.01 4-5 ¶9-10

Ava kavutuka ku diyilu, Yesu wutebula moyo minlandikini miandi kiyeku baba ki kuba zimbangi ziandi “ku Yelusalemi, ku Yuda, ku Samalia nati kusukila nza.” (Mav. 1:8; Luk. 24:​46-48) Bo vavioka mua thangu, zimfumu zi binganga zi basi Yuda bakanga mvuala Petelo ayi Yoane ayi baba tula vantuala zimfumu zi luyalu, muingi babika kubue samuna. (Mav. 4:​18, 21) Petelo ayi Yoane baba vutudila: “Befu tulendi vonga ko kutubila mambu tuyuwa ayi tumona.” (Mav. 4:​19, 20) Bo babasisa mvuala Petelo ayi Yoane mu buloku, bawu bazitisa Yave ayi batsikika thalu’awu mu kuvanga luzolo lu Nzambi. Yave wutambudila nsambu awowo.—Mav. 4:31. w23.05 5 ¶11-12

Mu mimvu miwombo Yave ayi Muan’andi wu luzolo badi kikundi kifikama. Kikundi kiawu, kiawu kilutidi ayi kitheti mu nza yimvimba. Dedi bummonisina matangu ma bubu Yave khanu wutuba, ‘Awuwu nandi minu yikikinina.’ Vayi nandi waba tomba muingi tuzaba luzolo kadi mu Yesu bo katuba “Muana minu yinzolanga.” Yave wuyangalala mu Yesu ayi mu mambu kaba belama kuvanga. (Efe. 1:7) Yesu kasaba ko divuda mu luzolo Tat’andi kaba mu nandi. Yesu wuba luzolo mu Tat’andi ayi wuba lufiatu ti Tat’andi waba kunzolanga.—Yoa. 3:35; 10:17; 17:24. w24.01 28 ¶8

Yindula mutu wuntuba diambu dimbi matedi ngiewu. Ngie zebi ti mawu masi ko makiedika, vayi batu bawombu bankikinina mu mawu. Bulutidi, bawombu bankuiza tatamana kutubila luvunu alolo ayi kukikinina mu mawu. Buidi ngie wunkuiza muena? Ngie wunkuiza yazuka bo batu abobo bankuiza bifisa kimutu kiaku? Kifuani akiokio kitusadisa kuvisa buidi Yave kamuena bo dizina diandi divuezu. Wumueka mu bana bandi ba kiphevi wutuba luvunu matedi nandi kuidi nkietu wutheti Eva. Ayi nandi wukikinina mu luvunu alolo. Luvunu alolo luvanga muingi matata mitu matheti babayisa Yave. Mu kibila akiokio, disumu ayi lufua biyiza kuidi batu boso. (Ngene. 3:​1-6; Lom. 5:12) Mambu moso maphasi tummonanga mu nza—dedi lufua, mimvita, buphumbulu—mayizila mu kibila ki luvunu Satana katuba. Buidi Yave kamuena luvunu alolo ayi ziphasi luawu lutuadisa? Tuisi ko divuda ti Yave widi Nzambi wukhambu lundanga ngazi, vayi widi ‘Nzambi yi mayangi.’—1 Ti. 1:11. w24.02 8 ¶1-2

Buidi ngie wulenda landikinina kifuani ki Yozefi? Tona bubu tomba kuzaba mbi wunkuiza vanga ngie kumonikina zithotolo. Longuka kutina mambu Yave Nzambi kanlendanga ayi kubika kuyindula mu mawu. (Minku. 97:10; 119:165) Mu phila ayoyo, ngie walasa vola ko disumu bo wala viokila mu zithototolo. Ḿba ngie mana zaba kiedika ayi wuntomba kusadila Yave mu ntim’aku woso, vayi wummona nkadu boma kukivana ayi kubotama. Ngie wulenda landakana kifuani ki Ntinu Davidi. Ngie wulenda lomba kuidi Nzambi: ‘Mfiongunina ah Nzambi ayi zaba ntim’ami. Thota ayi zaba mayindu mami. Thala keni nzila mbi minu yidi ayi ndiatisa mu nzila yi mvu ka mvu.’ (Minku. 139:​23, 24) Yave wunsakumunanga baboso “bakuntombanga mu bukiedika.” Mangolo ngie wumvanga muingi kukivana ayi kubotama mammonisa ti ngie widi phila mutu awowo.—Ebeleo 11:6. w24.03 6 ¶13-15

Fumu yi zinganga Nzambi wutambula nsua muingi kuyundula dikabu va ntuala Nzambi voti kutuamina dikabu ntuala va ntuala Nzambi. Aloni nandi mfumu yi zinganga Nzambi yitheti Yave kasola, bo bayundula nzo yinlongo. Dedi bo mvuala Polo kasudikisila, ‘vaba tombulu kubieka zinganga Nzambi ziwombo, kibila lufua luaba ku batulanga nkaku muingi batatamana mu kisalu kiawu.’ (Ebe. 7:​23-26) Ayi mu kuba batu ba masumu zimfumu zi zinganga Nzambi aziozio, babe vananga minkhailu mu kibila ki masumu mawu. Adiodio diawu disuasana didi mu zimfumu zi zinganga Nzambi ziba ku Isaeli na Yesu Klistu Mfumu Zinganga Nzambi. Mfumu Zinganga Nzambi Yesu Klistu, widi ‘kisadi . . . Ki nzo yinlongo yikiedika, yo Naveka Yave katuadisa kubika batu.’ (Ebe. 8:​1, 2) Mvuala Polo ‘wusudikisa ti [Yesu] wunzinganga mvu ka mvu ayi ni mutu kalasa vinginina ko kiyeko kiandi.’ Mvuala Polo wubue tuba ti Yesu widi “wuvedila” vayi zimfumu zi zinganga Nzambi ku Isaeli basa ba ko bavedila. Diawu, vabasa tombulu ko ‘Yesu kuvana minkhailu’ mu kibila ki masumu mandi. w23.10 26 ¶8-9

‘Diyilu dikhulu’ dinsundula mintinu mi pulitika mintuadusuluanga kuidi Satana ayi ziphevi zimbi. (Mat. 4:​8, 9; 1 Yoa. 5:19) Kikuma bansadila mu Kibibila, ‘ntoto’ kilenda sundula batu banzinganga va ntoto. (Ngene. 11:1; Minku. 96:1) Mu phila ayoyo, ‘ntoto wukhulu’ wunsundula batu boso badi mavanga mambi, banzinganga mu bilumbu bitu. Yave, kalasa sikimina ko to mu kubalula voti kuludika ‘diyulu’ ayi ‘ntoto’ wukhulu, vayi mvandi wala tulula bankua mambi. Mu phila ayoyo, nandi wala vingisa ‘diyilu dimona ayi ntoto wumona’—mansundula ti luyalu lumona, luala yadila batu basonga. Yave wala vedisa ntoto ayi batu. Dedi bo mbikudi Yesaya kabikudila, ntoto woso wala ba dedi bo bubela lumbu lu Edeni. Ayi nandi wala ku tuvanga bamona mu kutuvana buvinya buduka. Bikata, ziphovo ayi bafua matu bala beluka. Ayi mvandi bafua bala vulubuka muingi kubue zinga.—Yesa. 25:8; 35:​1-7. w23.11 4 ¶9-10

“Ziphasi zingolo” zidi beni disuasana na bivuka binkaka bimmonikanga. (Mat. 24:21) Kibila befu tuzebi ti ziawu ziala kuiza. Kuvioka 2.000 di mimvu kumbusa, Yesu wulubula minlandikini miandi muingi bakubama mu kilumbu akiokio. Befu kukubama bubu, dialasa ba ko diambu diphasi kukindama ayi kusadisa bankaka kuvanga momawu mambu. (Luk. 21:36) Vala tombulu kukindama muingi kutumukina Yave ayi kuba lufiatu ti nandi wala ku tukieba. Mbi tuala vanga ba kuvionya biuma bi zikhomba zitu? (Haba. 3:​17, 18) Vala tombulu kumonisa kiadi muingi tununga kuba sadisa. Bo Ngongi ayi Mangongi kala tunuanisa, mbi tuala vanga boti vala tombulu kuzinga thangu yiwombu va kimueka na zikhomba zitu? (Yehe. 38:​10-12) Vala tombulu kuba luzolo lungolo mu zikhomba zitu kibila luawu luala tusadisa kukindama mu thangu ayoyo yi ziphasi. w23.07 2 ¶2-3

Bakuela balenda longuka mu kifuani ki Akila ayi Prisila. (Lom. 16:​3, 4) Bawu baba salanga, baba samunanga ayi baba yisadisanga nkazi na nnuni. (Mav. 18:​2, 3, 24-26) Tulenda mona ti khumbu zioso Kibibila kintubila matedi Akila mvandi kintubila matedi Prisila. Buidi bakuela balenda landikinina kifuani kiawu? Yindula mu mambu ngie ayi mutu wukuelana yaku mulenda vanga. Ḿba mulenda vanga mambu mankaka va kimueka. Dedi, Akila ayi Prisila basamuna va kimueka. Mulenda vanga thuadusulu yi kusamuna va kimueka? Akila ayi Prisila mvandi basala va kimueka. Ḿba ngiewu ayi mutu wukuelana yaku muvanganga ko kisalu kimueka, vayi bukiedika ti mulenda vanga bisalu bi nzo va kimueka? (Mpovi 4:9) Bo mumvanga mangolo muingi kuyisadisa voti kusala va kimueka, munkuiza ba banga dingumba ayi munkuiza baka luaku lu kusolula. w23.05 22-23 ¶10-12

Khumbu zinkaka, befu boso tulenda ba mu boma. Dedi, bo Ntinu Sauli kaba tomba kuvonda Davidi, nandi wubaka makani ma kutinina ku Ngaza, divula di basi Filisteia. Ayi ‘boma buandi bubuelama’ bo kabakula ti ntinu wu Ngaza, Akisi wuzaba ti nandi wuba disodi dipisuka mu kunuana mvita ayi baba kunyayisa kuidi basi Isaeli ti nandi wuvonda ‘kumi di bivevi na bivevi’ di basi Filisteia. (1 Samu. 21:​10-12) Diawu kaba kuazukila, matedi mbi ntinu Akisi kankuiza mvangila. Vayi Buidi Davidi kanungina boma kaba? Davidi wutubila mabanza kaba ayi buidi kanungina mawu, mu mambu kasonika mu Minkunga 56. Mu thangu kaba banga boma, nandi waba fiatilanga Yave. (Minkunga 56:​1-3, 11) Mu lusalusu lu Yave, nandi wuvuna kulawuka ayi mawu mamonikina buka ti masi ko tsundu, vayi mawu mamvukisa. Kibila, Ntinu Akisi kasa bue ntadilako buka mbeni.—1 Samu. 21:13–22:1. w24.01 2 ¶1-3

Banani bantubila mu matangu ma bubu? Baklistu basolu! Diawu, bo bala ba ku diyilu kutsuka ziphasi zingolo, kiyeku kiawu kitheti kiala ba kunuana. Ku diyilu, bawu bala ba va kimueka na Yesu ayi zimbasi ziandi muingi kunuana mvita wutsuka na zimbeni zi Nzambi. Yindula diambu adidi. Bubu Baklistu bawombu basolu beka biboba. Vayi bo bala vulubuka muingi kuezingila ku diyilu, bawu bala ba bivangu bi kiphevi balasa bue fua ko ayi bala ba mangolo mawombu. Bala tambula kiyeku ki kunuanisa zimbeni zi Nzambi va kimueka na Mfumu’itu Yesu Klistu. Bo mvita wu Alimangedoni wala vioka, bawu bala ba kiyeku ki kusadisa batu va ntoto muingi baba bavedila. Tuisi ko divuda ti bawu bala luta vangila zikhomba ziawu mamboti kena mu thangu bawu baba batu ba masumu va ntoto! w24.02 6-7 ¶15-16

Vadi batu bankaka badi bakubama muingi kukivana ayi kubotama. Vayi kheti bobo, bammonanga boma. Bawu bakuyikuvusanga, abu minu kuvola disumu dingolo ayi kuvaikusu mu kimvuka? Boti buawu wumbelanga, ba lufiatu ti Yave wala kuvana mamoso wuntomba muingi “wudiatila mu phila yifuana va meso mandi ayi muingi kunkuangidika mu mambu moso.” (Kolo. 1:10) Nandi mvandi wala kuvana mangolo muingi wuvanga mambu masulama va meso mandi. Nandi mana monisa mawu, ti kalenda vanga mawu mu phila kasadisila bankaka. (1 Cor. 10:13) Diawu basi ko baboso bamvaikusuanga mu kimvuka. Yave wunkubikanga dikabu diandi muingi batatamana bakuikama. Batu boso badi basumuka ayi banthontuanga kuvanga mambu mambi. (Tia. 1:14) Ngie widi nsua wukusola mambu mbi wunkuiza vanga bo wumviokila mu zithototolo. Bukiedika ti ngie veka, wulenda nunga kusola buidi luzingu luaku lunkuiza bela? Batu bankaka bammanganga kukikinina ti tuisi ko nsua wukukiyala befu veka, vayi ngie kuviokila mu zithotolo, ngie wulenda longuka kuvanga mawu.w24.03 5 ¶11-12