Ngie Widi Wukubama Muingi “Kuzinga va Ntoto”?

BEFU boso tuntomba kumona tsundukulu yi mambu Yesu katuba ti: Mayangi kuidi batu badi mintima milembama, bila bawu bala tambula ntoto banga kiuka. (Matai 5:5) Baklisto basolu mvandi, bala vua ntoto mu thangu bala yala na Yesu ku diyilu. (Nzai. 5:10; 20:6) Baklisto boso bubu, badi phuila yi kuzinga va ntoto mvu ka mvu. Bawu bala zinga mu busonga, mu mayangi ayi mu ndembama. Muingi mawu masalama, bawu bala ba kisalu kimfunu ki kuvanga. Mona mambu matatu bawu bala vanga: theti, bala balula ntoto Paladizu, dimmuadi, bala sadisa baboso bala vulubuka kubaka biuma bioso bintombulu ayi dintatu, bala kuba longa. Yindula mbi wulenda vanga, muingi kumonisa ti wuntomba kuvanga mawu ku Paladizu.

NGIE WIDI WUKUBAMA MUINGI KUBALULA NTOTO PALADIZU?

Bo Yave katuma batu muingi “babuta bana ayi kuwesa ntoto”, nandi waba tomba kutuba ti ntoto woso wufueti ba Paladizu. (Ngene. 1:28) Baboso bala zinga ku Paladizu bala tombulu kutumukina lutumu alolo. Va thonono, bo tuala ba ku ntoto wumona, wawu walasa fika ba ko Paladizu, kibila Paladizu yiba ku Edeni yisiala ko. Bo Alimangedoni yala vioka, befu tuala ba kisalu kiwombu ki kidiodisa ntoto!

Mawu ma tutebula moyo, kisalu kiwombo basi Isaeli baba, bo babotuka ku buvika ku Babiloni ko bazingila 70 di mimvu. Yesaya wubikula ti, Yave wala kuba sakumuna muingi bavutula kitoko ntoto’awu wuba. Mbikudi Yesaya wutuba: “Nandi wala kitula dikanga diawu banga Edeni ayi wala vanga thandu yivutuka dedi lumbu lu Edeni. Kuawu kuala ba mayangi, bala vutula matondo ayi kuala ba minkunga mimboti.” (Yesa. 51:3) Yave wusadisa basi Isaeli bavutula ntoto’awu wuba kibuangu kimboti. Bobuawu mvandi, Yave wala sakumuna batu boso bala zinga ku Paladizu, kukitula yawu kibuangu kimboti. Vadi mambu ngie wulenda vanga mu bilumbu abibi, muingi kumonisa ti wuntomba kubuela mioku kisalu beni.

Phila yimueka wulenda vangila mawu, yidi mu kudiodisa ayi kuludikanga nzo’aku ayi biuma bioso bidi va luphangu. Ngie fueti vanga mawu kheti batu bankalanga va nsengi ba vanganga ko mawu ayi mvandi wulenda vangila mawu, mu kubuela mioku kudiodisa Nzo Kintinu ayi kibuangu tumvangilanga zikhutukunu zinneni. Ayi boti wulenda nunga, kuwesa nkanda ayi kukivana mu kisalu ki kutunga, voti kusadisa bo bivuka bimmonika. Kuvanga mawu, yidi mbonosono ti ngie wuntomba kusadisa zikhomba ziaku. Diawu wulenda longuka bisalu binkaka muingi wu bisadila boti wala baka lunungu lu Yave lu kuzinga mvu ka mvu.

Dingumba di zikhomba bandiodisa Nzo Kintinu.

KUBAMA MUINGI KUYAMBA BO BALA VULUBUKA

Bo Yesu kamana kuvulubusa muana Yayilu, mu nsualu wutuma muingi bamvana bidia. (Malako 5:42, 43) Ḿba disa ba ko beni diambu diphasi kukieba muana wunkietu wu Yayilu wuba 12 di mimvu. Yindula kisalu kiwombu kiala vangama, bo mambu Yesu kakanikisa mala salama ti batu ‘boso badi mu biziami bela kuwa mbembu’andi ayi bela basika’ (Yoa. 5:28, 29) Kheti Kibibila kisimvana ko bivisa biwombu matedi mambu amomo, vayi tuzebi ti, bo bala vulubuka bala tomba biuma dedi bidia, vama va kukala ayi mimvuatu. Bukiedika ti ngie wulenda tona kumonisa ti widi wukubama muingi kusadisa? Vadi biuvu biwombo tulenda fiongunina.

Mbi wulenda vanga bubu bimmonisa ti widi wukubama muingi kuzinga va ntoto?

Zikhomba badi ku aeroporto bamvana ndinzulu mboti kuidi zikhomba bankuiza landakana lukutukunu lu zi tsi ku Paris.

Bo bamvana ndubu ti nkengididi wu bimvuka wunkuiza tala kimvuka kinu, ngie wukivananga muingi kunyamba? Boti khomba waba sadilanga ku beteli matambula kiyeku ki kuvutuka ku nzo, voti nkengididi wu bimvuka kasiedi ko phunga yi kutatamana mu kiyeku kiandi, bukiedika ti ngie wulenda kukivana muingi ku basadisa kutomba nzo? Boti lukutukunu lu zi tsi voti lu mavula lunkuiza vangimina va kizunga kiaku, bukiedika ti ngie wulenda kukivana muingi kuyamba zikhomba?

BA WUKUBAMA MUINGI KULONGA BALA VULUBUKA

Mu kibila ki mambu madi mu Mavanga 24:15, tuntedimina ti vala ba luvulubukusu lu bivevi na bivevi bi batu ayi bawombu mu bawu basa baka ko luaku lu kuzaba Yave. Vayi bala baka luaku alolo, bo bala vulubuka. a Ayi bisadi bi Yave bikuikama bawu bala vanga kisalu akiokio ki kulonga. (Yesa. 11:9) Dedi yaya Charlotte, wusamuna mu bibuangu biwombu dedi, ku Europa, ku sude yi América ayi ku África, widi phuila muingi kuvanga mawu. Mu mayangi nandi wutuba: “Yidi phuila muingi kulonga batu bala vulubuka. Ayi bo yintanga kinongu ki mutu wuzinga kumbusa, yinyindulanga: ‘Boti mutu awowo wuzaba Yave, khanu luzingu luandi luba disuasana.’ Yidi beni phuila kuzabikisa batu bala vulubuka mambu bakhambu zaba.”

Kheti bisadi biwombu bi Yave bazinga ava Yesu kiza va ntoto, bala longuka mambu mawombu. Yindula mayangi ayi luaku lunneni lu kusudikisa Danieli zimbikudulu nandi kasonika zio kakhambu visa. ( Dani. 12:8) Voti kusudikisa Luti ayi Naomi ti mu khati nkunu’awu muawu Mesiya kayizila. Yindula mayangi mala ba ma kusamuna zitsangu zimboti mu nza yimvimba, mu thangu yalasa bue ba ko mambu mambi ma luyalu lu Satana!

Khomba yinkietu widi mu kuvana mua nkanda kuidi nkietu mueka ku lavandaria.

Mbi ngie widi mu kuvanga bimmonisa ti widi wukubama muingi kulonga batu bala vulubuka? Phila yimueka yi kuvangila mawu yidi, mu kubuela pisuka mu kulonga ayi ku buela mioku kisalu ki kusamuna kidi mu kuvangama mu nza yimvimba. (Matai 24:14) Boti phunga voti mambu mankaka ma kutula nkaku muingi kuvanga mawu, vanga mamoso wulenda nunga bubu muingi kumonisa ti widi wukubama muingi kulonga batu bala vulubuka.

Yindula mu biuvu abibi binkinza, bukiedika ti widi wukubama muingi kuzinga va ntoto? Ngie widi wukubama muingi kuyamba ayi kulonga batu bala vulubuka? Ngie wulenda monisa ti widi wukubama bubu, mu kusadila loso luaku muingi kuvanga ntindu bisalu bio tuala vanga ku paladizu!

a Tala dilongi di Kibanga ki Nsungi ngonda Yivua mvu 2022 kidi ntu diambu “Bansadisa Bawombo Kubaka Lunungu”.