Biuvu Bi Mintangi

Bo Davidi kasonika ti wala zitisa dizina di Nzambi “mvu ka mvu,” bukiedika ti mawu maba sundula ti nandi kalasa fua ko Minkunga 61:8?

Ndamba. Kibila mambu kasonika maba makiedika.

Fiongunina mambu nandi kasonika mu matangu mankaka: “Yala zitisa dizina diaku mu minkunga mvu ka mvu mu kudukisa luwawanu luama kadika kilumbu.” “Yi kuzitisa ha Yave, Nzambi’ami mu ntim’ami woso ayi yala zitisa dizina diaku mvu ka mvu.”—Minku. 61:8; 86:12; 145:1, 2.

Bo kasonika mambu amomo, Davidi kabasa yindulanga ko ti kalendi fua ko. Nandi wuzaba ti mu kibila ki masumu batu bamfuanga. (Ngene. 3:3, 17-19; Minku. 51:4, 5) Ayi wuzaba ti kheti batu bakuikama dedi, Abalahami, Isaki ayi Yakobi, mvawu bafua. Diawu nandi wuzaba ti mvandi wala fua. (Minku. 37:25; 39:4) Diawu mambu katuba mu Minkunga 61:8 maba monisa phuila ayi makani kaba, ma kuzitisa Nzambi mvu ka mvu mu bilumbu bioso nandi kaba wu moyo.—2 Samu. 7:12.

Mu mambu mawombo Davidi kasonika mantubila matedi luzingu luandi dedi bummonisina Minkunga 18, 51 ayi 52. Mu Minkunga 23, Davidi wudedikisa Yave banga nsungi wu mamemi wumvananga thuadusulu, lukiebu ayi khindusulu. Ayi Davidi wuba ntindu nsungi awowo. Nandi waba tomba kusadila Yave mu ‘luzingu luandi loso.’—Minku. 23:6.

Tebuka moyo ti Yave nandi wutuadisa Davidi muingi kusonika mambu moso kasonika. Mu mambu nandi kasonika, muba zimbikudulu ziaba tubila mambu mala monika kuntuala. Dedi Davidi wusonika mu Minkunga 110 ti Mfumu’andi “wala kala ku khonzo lubakala lu [Nzambi] ku diyilu ayi wala tambula lulendu loso.” Lulendu muingi kuvanga mbi? Muingi kufuisa tsoni zimbeni zi Nzambi ayi “kufundisa mimvila mioso” va ntoto. Davidi widi nkulu wu Mesiya, wala yadila diyilu ayi widi nkulutu wu “zinganga Nzambi mvu ka mvu.” (Minku. 110:1-6) Yesu wutuba ti mbikudulu yidi mu Minkunga 110 yintubila matedi nandi ayi yala ba tsundukulu mu bilumbu binkuiza.—Matai 22:41-45.

Davidi wutuadusu muingi kusonika mambu mamonika mu thangu’andi ayi mala monika mu bilumbu binkuiza bo kala vulubuka, muingi kuzitisa Yave mu mayangi mvu ka mvu. Diawu matangu madi mu Minkunga 37:10, 11, 29 masundukila mu thangu masonimina vayi mvandi mala sundukila mu bilumbu binkuiza bo Nzambi kala dukisa zikhanu ziandi.—Tala lutangu 8 mu dilongi dintuba ‘Ngie Wala ba Yama ku Paladizu’ mu Kibanga ki Nsungi akiki.

Minkunga 61:8 ayi matangu mankaka mandedakana na lutangu alolo, mammonisa ti Davidi waba tomba kuzitisa Yave nati kala fua. Ayi mammonisa mambu Davidi kala nunga kuvanga bo Yave kala kumvulubusa muingi kubue zinga.