Ngie Wuntebuka Moyo?

Ngie wutengi buboti malongi ma Kibanga ki Nsungi ma mvu awuwu? Boti buawu, mona boti wulenda vana mimvutu mi biuvu abibi:

Ndandu mbi tuala baka befu kubotula thangu muingi kutubila, kukuwa ayi kuyindula matedi Yave?

Tuala baka makani mamboti, mu kuba nlongisi wupisuka, kuba kiminu kikinda ayi kuluta kindisa luzolu luitu mu Yave.—w22.01, tsielu. 30-31.

Ndandu mbi tuala baka befu kufiatila mu Yave ayi batu nandi kansadilanga muingi kutuama ntuala?

Ayiyi yawu thangu tufueti fiatila mu phila Yave kamvangilanga mambu mu kumanga bayisa zithuadusulu zi bakulutu ba kimvuka. Kibila bo ziphasi zingolo ziala tona, befu tuala ba bakubama muingi kulandakana zithuadusulu tuala tambula, kheti ziala monikina buka ti zisi ko tsundu.—w22.02, tsielu. 4-6.

Mbi mbasi kaba tomba kutuba bo katuba matedi “nsinga wu kuzongila [mu mioko mi nyadi] Zolobabeli”? (Zaka. 4:8-10)

Kimona mesu akiokio kikindisa dikabu di Nzambi ti tempelo yinkuiza manusu kutungu ayi yawu yinkuiza ba yifuana muingi kubuongimina Yave.—w22.03, tsielu. 16-17.

Buidi tulenda bela kifuani [kimboti] . . . mu thubulu”? (1 Timo. 4:12)

Tufueti tubila mu lukinzu ayi kumonisa mamboti mu kisalu ki kusamuna, kuyimbila mu ntima woso, kuvananga mimvutu mu zikhutukunu, kutubanga kiedika, kukindisa bankaka ayi kubika ziphila zioso ‘zi thubulu zikhambu fuana.—w22.04, tsielu. 6-9.

Kibila mbi bibulu binna bi nganzi bantubila mu buku yi Danieli kapu 7 bindedikinina na kibulu ki nganzi bantubila mu Nzaikusu 13:1, 2?

Kibulu ki nganzi bantubila mu buku yi Nzaikusu kapu 13 kisinsundula ko to kintinu kimueka dedi ki Loma. Vayi kinsundula mintinu mioso mi pulitika minyadila nza.—w22.05, tsielu. 9.

Phila mbi tulenda monisina lufiatu mu phila Yave kamfundisilanga?

Boti mutu be tusoka bisombolo, be tufinga, voti be tuvangila dioso kua diambu dimbi, tubika kunlundila nganzi vayi tufueti bika mambu moso mu mioku mi Yave. Kibila nandi wala manisa mambu moso masumu ma tutuadisilanga.—w22.06, tsielu. 10-11.

Mambu mbi khomba wumvanga nsambu mu lukutukunu kafueti tebukila moyo?

Kiyeku akiokio luisi ko luaku muingi kusemba zikhomba voti kuvana ndubu. Ayi vasintombulu ko kutuba “mambu mawombo” bulutidi va thonono lukutukunu. (Matai 6:7)—w22.07, tsielu 24-25.

Mu phila mbi ‘bo bavanga mambu mambi’ bala ‘vulubukila muingi kufundusu’? (Yoa. 5:29)

Bawu balasa fundusu ko mu mambu bavanga kumbusa. Bala fundusu mu mambu bala vanga bo bala vulubuka ayi mu kutadila mambu mamona bala kuba longa.—w22.09, tsielu. 18.

Diambu mbi di khindusulu yaya J. F. Rutherford kavana mu lukutukunu lu mavula luvangama mu ngonda Yivua 1922?

Mu lukutukunu lu mavula luvangama ku Cedar Point, Ohio ku Estados Unidos nandi wutuba: “Ntinu widi mu kuyala! Ayi benu muidi Zimbangi ziandi, diawu yamikisanu, yamikisanu, yamikisanu Kintinu ayi Ntinu’andi!”—w22.10, tsielu. 3-5.

Ziphila mbi zitatu Yave kalenda tusadisila kukindama dedi bummonisina Yesaya kapu 30?

Kapu ayoyo yimmonisa ti nandi (1) wu tukuwilanga ayi wuntambudilanga minsambu mitu (2) wu tuvananga zithuadusulu ziandi (3) mu kutusakumunanga bubu ayi mu bilumbu binkuiza kuntuala.—w22.11, tsielu. 9.

Kibila mbi tulenda tubila ti mambu madi mu Minkunga 37:10, 11, 29 masalama mu thangu yikhulu ayi mala salama mu bilumbu binkuiza?

Mambu ntinu Davidi katuba mammonisa luzingu lumboti basi Isaeli baba mu luyalu lu ntinu Solomo. Mu lutangu 11 Yesu waba tubila matedi paladizu yala kuiza. (Matai 5:5; Luka 23:43)—w22.12, tsielu. 8-10, 14