KISUEKULU KI ZIBUKU MU KHONDI MAYO
Kibanga ki Nsungi
KISUEKULU KI ZIBUKU MU KHONDI MAYO
Ibinda
  • KIBIBILA
  • BILONGULU
  • ZIKHUTUKUNU
  • w23 Ngonda Yinna zitsyel. 2-7
  • Mbi Tulenda Longuka mu Mangitukulu Yesu Kavanga?

Tsielu ayiyi yisi ko video ayoyo

Lemvuka, video ayiyi yisinkuiza sika ko kibila diambu dimbi dibe monika.

  • Mbi Tulenda Longuka mu Mangitukulu Yesu Kavanga?
  • Kibanga ki Nsungi Kinsamuna Kintinu Ki Yave (Dilongi)—2023
  • Mua Mintu mi Malongi
  • Malongi Mankaka madi Nguizani
  • MALONGI TULENDA LONGUKA MATEDI YAVE AYI YESU
  • DILONGI DITEDI KUKIKULULA
  • DILONGI DITEDI KUMONISA KIADI
  • BAKA NDANDU MU NDONGUKULU’AKU
  • Mambu Mbi Yesu Kavanga Bo Kaba Va Ntoto?
    Baka Mayangi ma Mvu ka Mvu!—Mu Kulonguka Kibibila
Kibanga ki Nsungi Kinsamuna Kintinu Ki Yave (Dilongi)—2023
w23 Ngonda Yinna zitsyel. 2-7

DILONGI 15

Mbi Tulenda Longuka mu Mangitukulu Yesu Kavanga?

“Nandi wuvanga mamboti va kizunga kioso.”—MAVA. 10:38.

NKUNGA 13 Klisto, Ntungulu’itu

MAMBU TUANLONGUKAa

1. Tubila matedi mangitukulu matheti Yesu kavanga.

MONA mbi bimonika kutsuka mvu 29 T.K. bo Yesu katona kisalu kiandi ki kusamuna. Yesu, mam’andi Malia ayi Bapostolo, baba tumisa mu nkungi wu dikuela ku Kanani, buala bumueka buba ku norte yi Nazileti divula Yesu kabutukila. Malia wuba nkundi wu musi dikanda waba kuela ayi ḿba wutambula kiyeku ki kuyamba batu batumisa mu nkungi. Vayi vamonika diambu dibina bundula batu bankuela,—vinu yimana.b Ḿba bawu basa ta ko mana ti kunkuiza monika batu bawombu. Malia mu nsualu, wutala muan’andi ayi wunkamba: “Bawu basiedi ko vinu.” (Yoa. 2:1-3) Mbi Yesu kavanga? Nandi wuvanga mambu ma kukuitukila—wukitula “nlangu vinu.”—Yoa. 2:9, 10.

2-3. (a) Buidi Yesu kasadila lulendu kaba lu kuvanga mangitukulu? (b) Ayi mbi tunkuiza longuka mu dilongi adidi?

2 Yesu wuvanga mangitukulu mawombu mu kisalu kiandi ki kusamuna.c Nandi wusadila lulendu kaba muingi kusadisa mafunda na mafunda ma batu. Dedi, mu mangitukulu Yesu kavanga, khumbu wadi nandi wudikila batu—khumbu yitheti wudikila 5.000 di babakala ayi khumbu yimuadi 4.000 di babakala—befu kutanga batu boso badia mu zikhumbu zia ziwadi aziozio, kubunda mvandi bakieto ayi bana balezi, balenda vioka 27.000 di batu. (Matai 14:15-21; 15:32-38) Mu khumbu yinkaka, Yesu wubelusa batu bawombu. (Matai 14:14; 15:30, 31) Yindula buidi batu babela mu mayangi, mu mangitukulu Yesu kavanga!

3 Mangitukulu Yesu kavanga madi beni tsundu mu befu bubu. Mu dilongi adidi, tunkuiza longuka malongi malenda kindisa kiminu kitu mu mangitukulu moso Yesu kavanga. Bosi tunkuiza fiongunina buidi tulenda landikinina kifuani kiandi ki kukikulula ayi kumona kiadi kamonisa bo kavanga mangitukulu.

MALONGI TULENDA LONGUKA MATEDI YAVE AYI YESU

4. Mangitukulu Yesu kavanga ma tulonga malongi mankindisa kiminu kitu mu nani?

4 Mangitukulu ma Yesu ma tulonga malongi mankindisa kiminu kitu bika to mu nandi vayi mvandi mu Tat’andi, kibila Yave nandi tho yi mangitukulu. Mavanga 10:38 yintuba: “Nzambi kasodila [Yesu] mu nzila mangolo ma phevi yinlongo, nandi wuvanga mamboti va kizunga kioso, mu kubelusa baboso Nkadi’amphemba kaba tovula kibila Nzambi wuba yandi.” Tebuka moyo ti Yesu wulandakana Tat’andi mu phila yivedila mu mambu katuba ayi kavanga—kubunda mvandi mangitukulu—kavanga. (Yoa. 14:9) Tala malongi matatu tulenda longuka mu mangitukulu Yesu kavanga.

5. Mbi bivanga Yesu kuvanga mangitukulu? (Matai 20:30-34)

5 Theti Yesu ayi Tat’andi ba tuzolanga beni. Bo kaba va ntoto, Yesu wumonisa ti waba zolanga beni batu, mu kuvanga mangitukulu muingi kudekula ziphasi ziawu. Khumbu yimueka, babakala buadi baba ziphofo bandinda lusalusu. (Tanga Matai 20:30-34.) Mona ti Yesu “wu bamona kiadi” ayi wu babelusa. Kikuma basadila mu Kingeleko “wu bamona kiadi” kinsundula kumona kiadi kingolo kuidi wadi yaku. Kiadi akiokio, kintuadusuluanga mu luzolo, kiawu mvandi kivanga Yesu kudikila batu baba mu nzala ayi kubelusa dibakala diba buazi. (Matai 15:32; Malako 1:41) Tulenda ba lufiatu ti Nzambi “wedi kiadi” ayi Muan’andi ba tuzolanga beni ayi bammonanga kiadi bo tuntovuka. (Luka 1:78; 1 Pete. 5:7) Bukiedika, bawu badi phuila muingi kumanisa ziphasi zioso zi batu!

6. Lulendu mbi Nzambi kavana Yesu?

6 Dimuadi, Nzambi wuvana Yesu lulendu muingi kumanisa ziphasi va nza. Bo Yesu kavanga mangitukulu, nandi wumonisa ti kalenda manisa ziphasi zioso zio befu tulendi nunga ko kumanisa. Dedi, nandi widi lulendu muingi kumanisa ziphasi zioso—tutambula mu nzila masumu dedi bimbevu ayi lufua. (Matai 9:1-6; Loma 5:12, 18, 19) Mangitukulu mandi mammonisa ti, nandi kalenda belusa mintindu mioso mi bimbevu ayi kuvulubusa bafua. (Matai 4:23; Yoa. 11:43, 44) Mvandi lulendu luandi lummonisa ti widi mangolo muingi kumanisa bivuka ayi kuvukisa batu mu ziphevi zimbi. (Malako 4:37-39; Luka 8:2) Mayangi beni kuzaba ti Yave wuvana lulendu alolo mu mioku mi Muan’andi!

7-8. (a) Lufiatu mbi mangitukulu ma Yesu ma tuvana? (b) Mangitukulu mbi ngie widi phuila yi kumona mu nza yimona?

7 Dintatu tulenda ba lufiatu ti lusakumunu tuala tambula mu nzila Kintinu ki Nzambi luala salama. Mangitukulu Yesu kavanga bo kaba va ntoto, ma tulonga ti nandi wala luta vanga mawu mu kuba Ntinu wu Kintinu ki Nzambi ku diyilu. Mona mbi tuala mona bo Yesu kala tona kuyala va ntoto. Tuala ba buvinha bumboti, wala manisa bimbevu ayi kumanisa ziphasi zi batu. (Yesa. 33:24; 35:5, 6; Nzai. 21:3, 4) Tualasa bue fua ko nzala ayi kumonikina bivuka. (Yesa. 25:6; Malako 4:41) Tuala ba mu mayangi kuyamba batu tunzolanga bafua “kubasika ku biziami.” (Yoa. 5:28, 29) Mangitukulu mbi ngie widi phuila yi kumona mu nza yimona?

8 Bo Yesu kavanga mangitukulu, nandi wumonisa ti waba kukikululanga ayi waba monisanga kiadi—befu mvitu tufueti landakana zikhadulu aziozio. Ndoku tumona bifuani biodi, mu kutonina mu nkungi wu dikuela ku Kanani.

DILONGI DITEDI KUKIKULULA

9. Mbi Yesu kavanga mu nkungi wu dikuela? (Yoane 2:6-10)

9 Tanga Yoane 2:6-10. Bo vinu yimana mu nkungi wu dikuela, bukiedika ti Yesu wuba mu lukuiku muingi kukitula nlangu vinu? Ndamba. Kibila vasi ko ni mbikudulu yitubila ti Mesia wala vanga vinu. Buabu wukiyindula buidi wulenda bela mu nkungi wu dikuela diaku boti malavu mameni. Bobuawu mvandi Yesu wumona kiadi dikanda, bulutidi dibakala ayi nkieto baba kuela. Kibila nandi kabasa tomba ko muingi bakuela abobo babunduka. Diawu dedi bo tuma tubila, Yesu wuvanga mangitukulu mu kukitula—nlangu vinu—kuvioka 390 yi zilitru. Ḿba Yesu wuvanga vinu yiwombu muingi kudukisa zitsatu zi batu boso baba mu nkungi ayi muingi kusadisa bakuela abobo basumbisa vinu yisobila ayi babaka zimbongo. Bukiedika, bakuela abobo bavutudila matondo mu mambu Yesu kaba vangila!

Yesu widi wutelama ayi wuntala bakuela bamona ayi batu batumisa mu nkungi dikuela kunua vinu mu mayangi.

Landakana kifuani ki Yesu mu kubika kukinhemisa mu mambu wunnunga kuvanga (Tala matangu 10-11)e

10. Mambu mbi mankinza madi mu kapu 2 yi buku yi Yoane? (Tala mvandi fikula.)

10 Mona mua mambu mankinza madi mu kapu 2 yi buku yi Yoane. Ngie bemona ti bakana ko Yesu wuwesa bibasa bi nlangu? Muingi kubika ba buka ti widi mu kukimonisa, diawu katedila bisadi muingi bavanga mawu. (Tala lutangu 6, 7) Ayi bo kakitula nlangu vinu, Yesu kasa bonga ko mua nkadu muingi kue vana ntuadisi wu nkungi wu dikuela muingi kubimba. Vayi nandi wukamba muingi bisadi bavanga mawu. (Tala lutangu 8) Yesu kasa bonga ko nkadu vinu muingi kubimba va ntuala batu, mu kukinhemisa ayi kutuba, ‘Bimbanu vinu yima vanga!’

11. Mbi tulenda longuka mu mangitukulu Yesu kavanga?

11 Mbi tulenda longuka mu mangitukulu Yesu kavanga ma kukitula nlangu vinu? Tulenda longuka dilongi ditedi kukikulula. Yesu kasa kinhemisa ko mu mangitukulu kavanga, kibila nandi kabasa kukinhemisanga ko mu mambu kaba vanganga. Mu kukikulula, khumbu zioso nandi wuvana nzitusu kuidi Tat’andi. (Yoa. 5:19, 30; 8:28) Befu kulandakana kifuani ki Yesu mu kukikulula, tualasa kinhemisa ko mu mambu tulenda nunga kuvanga. Boso kua bubela mambu tumvanga mu kisalu ki Yave, tubika kukinhemisa, vayi tufueti vua nkinza luaku tuidi lu kusadila Nzambi ayi tuvana nzitusu yosu kuidi nandi. (Yele. 9:23, 24) Kibila tuzebi ti vasi ko ni diambu tulenda nunga kuvanga mu khambu lusalusu lu Yave.—1 Koli. 1:26-31.

12. Phila mbi yinkaka tulenda landikinina kifuani ki Yesu ki kukikulula? Vana kifuani.

12 Tala phila mbi yinkaka tulenda landikinina kifuani ki Yesu ki kukikulula. Yindula kifuani akiki: Nkulutu wu kimvuka wumbotula thangu muingi kusadisa khomba yi ditoku widi nsadisi wu bakulutu ba kimvuka kukubika dilongi diandi ditheti di baboso. Mu lusalusu lu nkulutu wu kimvuka, khomba ayoyo wunnunga kuvanga dilongi dimboti dio baboso bankuiza zola beni ayi bo lukutukunu lummana, wumueka mu zikhomba wunsolula na nkulutu wu kimvuka ayi wuntuba; ya Kingandi bevanga disolu dimboti ve?’ Vayi bukiedika ti vantombulu nkulutu beni wu kimvuka kutuba: Ngete, vayi minu yiviokisa thangu muingi kunsadisa. Voti mu kukikulula nandi wuntuba: Ngete bevanga disolu dimboti ayi minu yibe zola beni. Bo tukikulula, tuisinkuiza tomba ko kutambula nzitusu mu mambu mamboti tumvangila bankaka. Tuala ba mu mayangi kuzaba ti Yave wummonanga ayi wumvuanga nkinza mambu tumvanga. (Dedikisa mawu na Matai 6:2-4; Ebe. 13:16) Bukiedika, tunkuangidikanga Yave bo tunlandakana kifuani Yesu kamonisa ki kukikulula.—1 Pete. 5:6.

DILONGI DITEDI KUMONISA KIADI

13. Mbi Yesu kamona bo kaba belama ku divula di Nayini ayi mbi kavanga? (Luka 7:11-15)

13 Tanga Luka 7:11-15. Mona mambu mamonika bo Yesu kaba mu kisalu ki kusamuna ku Ngalili. Nandi wuvanga viagi ku Nayini divula di Ngalili diba dibelama na divula di Sunemi, ko mbikudi Elisa kavulubusila muana wu nkieto wumueka mu 900 di mimvu kumbusa. (2 Minti. 4:32-37) Bo Yesu kabelama va muelu divula, nandi wumona batu baba basika muingi kue zika muana wu mfuizi, diba diambu diphasi kibila mfuizi beni wawu to muana kaba. Ayi vaba nkangu wu batu baba kunlandakana. Yesu wuba telimisa ayi wuvanga diambu di kukuitukila kuidi mfuizi beni—nandi wuvulubusa muan’andi! Alolo luawu luvulubukusu lutheti Yesu kavanga bantubila mu zibuku zinna zintubila matedi Yesu.

Collage: 1. Yesu wumbomba ngudi wumueka bo ba kezika muan’andi. 2. Khomba wumueka yinkieto widi mu kubomba khomba wunkaka widi mu kudila bo bankuimbila nkunga mu nzo Kintinu.

Landakana kifuani ki Yesu mu kutuama ntuala muingi kumonisa kiadi kuidi bo bafuilu mutu banzolanga (Tala matangu 14-16)

14. Mambu mbi mankinza madi mu kapu 7 yi buku yi Luka? (Tala mvandi fikula.)

14 Mona dimueka mu mambu mankinza bantubila mu kapu 7 yi buku yi Luka. Ngie bemona ti Yesu “wumona” ngudi wufuilu muana, bosi “wummona kiadi”? (Tala lutangu 13) Ḿba Yesu wummona kiadi—bo kaba dila mu thangu baba kue zika—muan’andi. Yesu kasa mona ko to kiadi ngudi ayoyo vayi wuvanga dioso diambu muingi kunsadisa. Mu mbembu yivumbama nandi wunkamba: “bika kubue dila.” Nandi wutuama ntuala muingi kuvanga dioso diambu. Wuvulubusa muana wu mfuizi ayi “wumvana kuidi mam’andi.”—Tala lutangu 14, 15.

15. Mbi tulenda longuka mu mangitukulu ma Yesu?

15 Mbi tulenda longuka mu mangitukulu Yesu kavanga mu kuvulubusa muana wu mfuizi? Tulenda longuka dilongi di kumonisanga kiadi batu bafuilu batu banzolanga. Bukiedika ti tuisi ko mangolo ma kuvulubusa batu dedi bo Yesu kavangila. Vayi dedi Yesu, tulenda monisa kiadi kuidi batu bafuilu batu banzolanga. Tulenda vangila mawu mu kutuama ntuala mu kumonisa kiadi mu mambu tuntuba ayi tumvanga, mu kuvanga dioso diambu muingi ku basadisa ayi kuba bomba.d (Zinga. 17:17; 2 Koli. 1:3, 4; 1 Pete. 3:8) Ayi kheti bikuma biluelu voti mambu maluelu tumvanga, malenda kuba nhikuna ntima.

16. Dedi bummonisina foto, mbi tulenda longuka mu kifuani ki ngudi wufuilu muana?

16 Tala kifuani akiki. Mua mimvu kumbusa, bo zikhomba baba kuimbila nkunga mu lukutukunu ku nzo Kintinu, khomba mueka yinkieto wumona ti ngudi mueka yiba va khonzo’andi wutona kudila. Nkunga beni waba tubila matedi kivuvu ki luvulubukusu ayi ngudi beni wufuilu muan’andi wunkieto. Khomba beni bo kazaba mawu wumfikama, wusimba va divangiti muingi kumbomba ayi wumanisa kuyola yandi nkunga beni va kimueka. Bosi ngudi beni wutuba: “Yimona luzolo luwombu lu zikhomba.” Khomba yibomba ngudi wufuilu muana, wuba mu mayangi mu kumona ngudi beni kukuenda mu lukutukunu. Khomba beni wutuba: “Mu lukutukunu, muawu tumbakilanga khindusulu.” Tulenda ba lufiatu ti Yave wummonanga ayi wumvuanga nkinza kheti mambu maluelu tumvangilanga kuidi bo bafuilu batu banzolanga ayi bo badi “mintima mikofakana.”—Minku. 34:18.

BAKA NDANDU MU NDONGUKULU’AKU

17. Mbi tuma longuka mu dilongi adidi?

17 Tulenda baka khindusulu bo tunlonguka binongu bi Kibibila, bintubila matedi mangitukulu ma Yesu. Mawu ma tulonga ti Yave ayi Yesu ba tuzolanga beni ayi Yesu widi lulendu muingi kumanisa ziphasi zi batu ayi kuba lufiatu mu lusakumunu tuala tambula kutsi Kintinu ki Nzambi, ku nza yimona. Bo tumfiongunina matedi binongu abiobio, tulenda yindula ziphila tulenda landikinina zikhadulu zi Yesu. Buidi wummuena kuvanga thuadusulu mu ndongukulu’aku voti mu mbuongimini yi dikanda muingi kutubila mangitukulu mankaka Yesu kavanga? Mona mbi wulenda longuka ayi zabikisa mawu kuidi bankaka. Yindula masolo makhindusulu wulenda baka ngie kuvanga mawu!—Loma 1:11, 12.

18. Mbi tunkuiza longuka mu dilongi dinlanda?

18 Kutsuka kisalu kiadi ki kusamuna, kuawu Yesu kavangila mangitukulu matatu matedi luvulubukusu. Mu batu Yesu kavulubusa, lumueka luba disuasana,—luawu luba lu nkundi’andi ayi wumvulubusa mu phila yi kukuitukila. Malongi mbi tulenda longuka mu mangitukulu Yesu kavanga, bantubila mu zibuku zinna zintubila matedi luzingu luandi? Ayi buidi tulenda kindisila lufiatu luitu mu kivuvu ki luvulubukusu? Tunkuiza fiongunina biuvu abiobio mu dilongi dinlanda.

MVUTU MBI WULENDA VANA?

  • Malongi mbi malenda kindisa kiminu kitu mu mangitukulu Yesu kavanga?

  • Mbi tulenda longuka matedi kukikulula mu mangitukulu madi mu Yoane 2:6-10?

  • Mbi tulenda longuka matedi kiadi mu mangitukulu madi mu Luka 7:11-15?

NKUNGA 20 Wuvana Yesu Muan’aku Wumueka to

a Yesu wuvumbika bivuka, wubelusa zimbevu ayi wuvulubusa bafua. Didi diambu di kukuitukila kumona mangitukulu Yesu kavanga! Mangitukulu moso amomo kavanga madi mu Kibibila, bika ti muingi ku tutula boma, vayi muingi ku tulonga. Bo tumfiongunina mawu, tulenda longuka malongi mankindisa lufiatu luitu mu Yave, mu Yesu ayi kubakula zikhadulu ziawu zio tufueti kuna.

b Mutu wumueka wumfionguninanga Kibibila wutuba: “Mu thangu yikhulu, diba diambu dinlongu kuyambanga batu. Ayi vaba tombulu mutu wunyamba batu kudukisa zitsatu zioso zi zinzenza. Bulutidi mu nkungi wu dikuela kibila kuaba banga batu bawombu.”

c Mu zibuku zinna zintubila matedi Yesu, muidi kuvioka 30 di mangitukulu Yesu kavanga. Ayi khumbu zinkaka, Kibibila kimfubikisanga mangitukulu mankaka Yesu kavanga. Khumbu yimueka, “batu boso ku divula” bayenda kuidi Yesu ayi “nandi wubelusa bawombu mu bawu.”—Malako 1:32-34.

d Tala dilongi di Kibanga ki Nsungi di kilumbu ki 1 ngonda Kumi Yimueka mvu 2010 didi ntu diambu “Console os enlutados, assim como Jesus fez” dilenda kusadisa kutuba ayi kuvanga mambu mankindisa mutu wufuilu mutu kanzolanga.

e MAMBU MADI MU ZIFIKULA:Yesu widi wutelama ayi wuntala bakuela ayi batu batumisa mu nkungi dikuela kunua vinu mu mayangi.

    Zibuku mu Ibinda (2008-2025)
    Basika
    Kota
    • Ibinda
    • Kufila
    • Phila Wuntombila
    • Copyright © 2025 Watch Tower Bible and Tract Society of Pennsylvania
    • Zithuadusulu bu Kusadila
    • Nsiku wu no Wuvuidi
    • Configurações de Privacidade
    • JW.ORG
    • Kota
    Kufila