Ngie Wuntebuka Moyo?

Ngie wutengi buboti malongi ma Kibanga ki Nsungi ma mvu awuwu? Boti buawu, mona boti wulenda vana mimvutu mi biuvu abibi:

Mbi bintombulu matedi “kubalula mayindu maku”? (Loma 12:2)

Mawu masinsundula ko to kuvanga mambu mamboti. Vayi tufueti fiongunina kimutu kitu ayi kuvanga mamoso tulenda nunga muingi kutumukina zithuadusulu zi Yave.—w23.01, tsielu. 8-9.

Buidi tulenda tadila mu phila yifuana mambu ma nza?

Vadi bibila muingi kuvua nkinza zimbikudulu zi Kibibila, zintubila matedi mambu madi mu kumonika mu nza. Vayi tubika tuba mambu tukhambulu bivisa bioso, malenda tuadisa kithatu mu kimvuka. Masolo mitu mafueti tuadusu mu nzila bilongulu tuntambulanga mu kimvuka ki Yave. (1 Koli. 1:10)—w23.02, tsielu. 16.

Disuasana mbi didi mbotumunu yi Yesu na mbotumunu—yi minlandikini miandi?

Vabasa tombulu ko Yesu kukivana kuidi Yave, kibila wubutukila mu dikabu dikivana kuidi Yave. Nandi kabasa tombulu ko kunyongina masumu mandi, kibila wuba wuvedila.—w23.03, tsielu. 5.

Buidi mimvutu mitu milenda kindisila bankaka mu zikhutukunu?

Phila yimueka yidi, mu kuvana mimvutu mikhufi ayi kubika kutubila mambu moso mamfunu madi mu lutangu. Kibila befu kuvanga mawu, bankaka basinkuiza baka ko ma kutuba.—w23.04, tsielu. 23.

Mbi bio “Nzila yi Busonga” yidi mu Yesaya 35:8?

Nzila yitheti yintubila basi Yuda babasika mu buvika ku Babiloni ayi bavutuka ku Isaeli. Buabu mbi tulenda tuba matedi nzila yi busonga bubu? Mu mimvu milanda ava 1919, bavanga kisalu ki kukubika, kusekula—ayi kubasisa Bibibila ayi bilongulu binkaka. Dikabu di Nzambi bandiatilanga mu “nzila yi busonga” yidi paladizu yi kiphevi yimvanganga batu kutambula lusakumunu lu Nzambi.—w23.05, tsielu. 15-19.

Malongi mbi mankinza matedi bakietu buadi Zingana kapu 9 yintubila?

Zingana yintubila “nkietu wukhambulu nduenga” wumvana thumusunu yinnata “ku lufua” ayi “nduenga yi kiedika” ba yifuanikisa banga nkietu wumvana thumusunu yi “nzila yikiedika” ayi yiluzingu. (Zing. 9:1, 6, 13, 18)—w23.06, tsielu. 22-24.

Buidi Yave kamonisina kukikulula ayi mayindu mafuana kuidi Loti?

Yave wukamba Loti kabasika ku divula di Sodoma muingi katina ku miongo. Vayi bo Loti kadinda Yave muingi kenda ku Zoali, nandi wuvitika.—w23.07, tsielu. 21.

Mbi nkazi kafueti vanga bo nnuni kammona zifilme zi kitsuza?

Nandi kalendi ku yivana ko fotu. Vayi kafueti tsikika thalu mu kukindisa kikundi kiandi na Nzambi ayi kuyindula mu bifuani bi bakietu baviokila mu mambu maphasi batambula khindusulu kuidi Nzambi. Nandi mvandi kalenda sadisa nnuni’andi kutatuka mu mintambu milenda kumvanga kubue bua mu ntambu awowo.— w23.08, tsielu. 14-17.

Buidi nduenga yilenda tusadisila bo tumviokila mu zikhuamusu?

Tulenda tadila biuvu voti zithotolo ti luidi luaku muingi kuzaba mbi mutu kanyindula ayi kamvua nkinza. Kuyindudila abobo, kuala tusadisa kuba bakubama muingi kutambudila mu phila yivumbama.— w23.09, tsielu. 17.

Mbi tulelnda longuka mu kifuani ki Malia matedi kuba mangolo?

Bo Malia kazaba ti wunkuiza ba ngudi Mesia, nandi wutambula khindusulu kuidi bankaka. Mbasi Ngabilieli ayi Elizabeti bavana khindusulu kuidi Malia. Befu mvitu tulenda tambula khindusulu kuidi zikhomba zitu.—w23.10, tsielu. 15.

Buidi Yave kantambudilanga minsambu mitu?

Yave wukanisa kukuwa minsambu mitu ayi wuntadilanga buidi miawu mididi nguizani na lukanu luandi. (Yele. 29:12) Bobuawu mvandi, nandi wuntambudilanga minsambu mitu mu ziphila ziviakana ayi wala tatamana ku tusadisa.—w23.11, tsielu. 21-22.

Loma 5:2 yintubila “kivuvu,” vayi kibila mbi babue tubila kiawu mu lutangu 4?

Bo mutu kankuwa zitsangu zimboti, kalenda baka kivuvu ki kuzingila ku paladizu. Vayi bo kamviokila mu zikhuamusu ayi wunkindama mu ziawu, nandi wummonanga lununga lu Nzambi ayi kivuvu kinluta buela kindamanga.—w23.12, tsielu. 12-13.