Ngie Zebi?
Ntindu mbi dikalu dibakala musi Etiope kaba diatila bo Filipi kafikama vo kaba?
KIKUMA “dikalu” basadila mu Tradução do Novo Mundo kilenda sundula woso kua ntindu dikalu. (Mava. 8:28, 29, 38) Diawu, ḿba dibakala di musi Etiope waba diatila mu dikalu dilutidi kena makalu masodi baba sadilanga voti mo baba vangilanga bisavu bi kuduma. Mona mua bibila mu mawu.
Dibakala di musi Etiope wuvanga viagi yi kinanu. Nandi “waba kiebanga kiuka kioso ki Kandase, mfumu yi nkietu yi basi Etiope.” (Mava. 8:27) Etiope yikhulu yiba nati kutsi bubu bantedilanga Sudão ayi mua kitini ki ntoto ki Ngipiti. Kheti dibakala adiodio kasa diatila ko mu diodiawu dikalu na mfuna, ḿba nandi wuba mfuna muingi kunata mu viagi. Mu kutadila makalu baba sadilanga mu sekulu yitheti mu T.K, muingi makalu beni manata batu maba zi peneu zinna. “Makalu beni maba phuasa muingi kunata mfuna ayi maba vanganga muingi viagi yiba yimboti ayi ḿba maba vanganga viagi kuba beni nkulu dedi—bummonisina buku yi Mavanga.
Dibakala di musi Etiope waba tanga bo Filipi kafikama vo kaba. Kinongu kintuba ti “Filipi wuduma va khonzu dikalu ayi wuyuwa musi Etiope beni kutanga mambu Yesaya kasonika mu mbembu yinangama.” (Mava. 8:30) Makalu amomo, masa vangulu ko muingi kudiata beni thinu, mu kibila akiokio masadisa dibakala di musi Etiope kutanga ayi masadisa mvandi Filipi waba diatila mu malu kubakidila dibakala adiodio.
Musi Etiope “wudinda Filipi muingi kamaka mu dikalu ayi kakala va khonzu’andi.” (Mava. 8:31) Mu thangu ayoyo, kuba mvandi ntindu makalu mankaka baba sadilanga muingi kuvanga bisavu bi kuduma zithinu ayi mutu waba natanga diawu waba banga wutelama, vayi makalu mankaka ma viagi dedi dio musi Etiope kasadila, diba phuasa muingi nandi ayi Filipi bakala.
Mu kutadila mambu madi mu Mavanga kapu 8 ayi bivisa bi biuma bikhulu babakula bidi mu bilongulu bitu, bintuba ti musi Etiope wudiatila mu ntindu dikalu di viagi kubika ti dikalu di masodi voti mo baba vangilanga bisavu bi kuduma