DILONGI 26
NKUNGA 123 Tumamana mu Lukuikumu Thuadusulu yi Nzambi
Tusa Zaba ko Mamoso
“Tulendi visa ko mamoso matedi Nzambi nkua ngolo zioso.”—YOBI 37:23.
MAMBU TUENLONGUKA
Kheti tusa zaba ko mambu moso mala monika, tulenda kindama mu mambu maphasi befu kufiatila mu Yave.
1. Buidi Yave ka tuvangila ayi kibila ?
Yave wutuvanga na luaku lu kuyindula, kulonguka, kuvisa mambu ayi kumonisa nduenga. Kibila mbi katuvangila mu phila ayoyo? Kibila nandi wuntomba muingi tunzaba ayi tusadila ndueng’itu muingi kunsadila—Zinga. 2:1-5; Lom. 12:1
2. (a) Mbi tufueti kikinina matedi befu? (Yobi 37:23, 24) (Tala mvandi fikula.) (b) Ndandu mbi tumbakanga bo tunkikinina ti tusa zaba ko mambu moso?
2 Kheti tuvangulu na luaku lu kulonguka, vayi mambu tuzebi madi ndilu. (Tanga Yobi 37:23, 24.) Tala kifuani ki Yobi. Nzambi wumvana biuvu biwombo kakhambu nunga kutambudila. Mawu mansadisa kubalula phil’andi yi kuyindudila. (Yobi 42:3-6.) Befu mvitu tumbakanga ndandu bo tukikululanga ayi bo tunkikininanga ti tusa zaba ko mambu moso. Mu kibila akiokio tunfiatilanga mu Yave ayi nandi wutu zabikisanga mambu mantombulu befu kuzaba, muingi tubaka makani manduenga mu luzingu.—Zinga. 2:6.
Dedi Yobi, tulenda baka ndandu befu kukikinina ti tusa zaba ko mambu moso (Tala lutangu 2)
3. Mbi tunkuiza longuka mu dilongi adidi?
3 Mu dilongi adidi, tunkuiza tubila mua mambu tukhambu zaba ayi mambu maphasi mammonikanga mu kibila akiokio. Mvandi tunkuiza tubila kibila mbi dididi diambu dimboti kubika zaba mambu mankaka. Kufiongunina mambu amomo mankuiza tusadisa kuba lufiatu ti Yave wu tuzabikisanga mambu mantombulu tuzaba.—Yobi 37:16.
TUSA ZABA KO THANGU MBI TSUKULU YI NZA YALA KUIZA
4. Dedi bummonisina Matai 24:36, mambu mbi befu tukhambu zaba?
4 Tanga Matai 24:36. Befu tusa zaba ko thangu mbi tsukulu yi nza ayiyi yala kuiza. Bo Yesu kaba va ntoto, nandi mvandi kasa zaba ko ni kilumbu voti kilokolo tsukulu yi nza yala kuiza.a Kuntuala nandi wukamba minlandikini miandi ti Yave nandi to widi nsua wu kuzaba thangu ayi kilumbu.(Mav. 1:6, 7) Yave wutsikika thangu kala tuala tsukulu yi nza ayiyi. Befu tuisi ko nsua wu kuzaba thangu mbi mawu mala monika.
5. Mayindu mbi tulenda ba mu kukhambu zaba thangu mbi tsukulu yi nza yala kuiza?
5 Dedi bo Yesu katubila, befu tusa zaba ko nati thangu mbi tufueti vingila muingi tsukulu yi nza ayiyi yituka. Mu kibila akiokio, ḿba tulenda vonga bulutidi boti tuidi mu kuvingila mu thangu yiwombo kilumbu ki Yave. Voti ḿba tulenda mona phasi kukindama mu zinzomono zi basi dikanda voti batu bankaka. (2 Pet. 3:3, 4) Ḿba tulenda yindula ti disinkuiza ba ko diambu diphasi kukindama ayi kuvibidila befu kuzaba thangu mbi tsukulu yi nza yala kuiza.
6. Kibila mbi didi diambu dimboti kubika zaba kilumbu tsukuklu yi nza yala kuiza?
6 Bo Yave kakhambu tuzabikisa thangu tsukulu yi nza yala kuiza, nandi wu tuvana luaku muingi tumonisa ti tukunsadilanga mu luzolo ayi tukunfiatilanga. Befu tuntomba kusadila Yave mvu ka mvu. Diawu tubika tsikika thalu’itu mu thangu tsukulu yi nza yala kuiza, vayi tufueti tsikika thalu’itu mu mambu Yave kala vanga. Befu kuvanga mawu, tuala tatamana kukindisa kikundi kitu na Yave, ayi tuala vanga mamoso tunnunga muingi kunkuangidika.—2 Pet. 3:11, 12.
7. Mambu mbi tuzebi?
7 Tufueti tsikika thalu’itu mu mambu tuzebi. Ayi befu tuzebi ti, bilumbu bitsuka bitona mu mvu 1914. Mu nzila Kibibila, Yave wubikula mambu ma tuvana bivisa ti tuidi mu kuzingila mu bilumbu bitsuka. Ayi bivisa beni bi tuvana lufiatu ti “kilumbu ki Yave kima fikama.” (Sefa. 1:14) Tuzebi mvandi ti Yave wuntomba muingi tusamuna zitsangu zimboti kuidi batu. (Mat. 24:14) Zitsangu aziozio zidi mu kusamunu mu 240 di zitsi ayi kuvioka 1,000 di zimbembu. Vasintombulu ko kuzaba kilumbu ayi kilokolo tsukulu yi nza yala kuiza, muingi tutatamana kumonisa kifuza mu kisalu ki kusamuna
TUSA ZABA KO BUBOTI PHILA YAVE KAMVANGILANGA MAMBU
8. Buidi Yave kamvangilanga mambu? (Mpovi 11:5)
8 Khumbu zinkaka tuvisanga ko buboti “phila Nzambi kamvangilanga mambu.” (Tanga Mpovi 11:5.) Mawu mammonisa ti thangu zinkaka Yave wumbikanga mambu mamonika muingi luzolo luandi luvangama. Tulendi visa ko buboti kibila Yave kambikilanga mambu mamonika voti phila nandi kankuiza tusadisila. (Minku. 37:5) Dedi bo tukhambu visanga buidi muana kankonzukilanga mu kivumu ki mam’andi, befu mvitu tulendi visa ko mamoso matedi Nzambi.
9. Mu kukhambu zaba phila Yave kalenda tusadisila, mayindu mbi tulenda ba?
9 Kukhambu zaba phila Yave kankuiza tusadisila, kulenda tuvanga tuba mu boma. Ḿba tulenda ba mu boma bu kukivana muingi kubuela mioko kisalu ki kusamuna, kunata luzingu lukhambu kikhafi, voti kukuenda kuma kulutidi tsatu yi minsamuni. Voti ḿba tulenda yindula ti befu kukhambu nunga kudukisa makani mitu ma kiphevi, buna tuisi ko lunungu va meso ma Yave. Voti kheti mu mangolo moso tumvanga mu kisalu ki kusamuna, vayi vasi ko mutu widi wukubama muingi kulonguka Kibibila. Ayi mvandi tulenda ba divuda boti tumvanga mawombo mu kisalu ki kutunga vayi kheti bobo, tundengananga bikaku biwombo. Mu kibila ki mambu amomo tulenda kuyimuena buka ti tuisi ko lusalusu luYave.
10. Zikhadulu mbi tulenda kuna befu khambu zaba phila Yave kamvangilanga mambu?
10 Kukhambu zaba phila Yave kamvangilanga mambu, kulenda tusadisa kukuna zikhadulu zimboti dedi kukikulula ayi kuzaba ndilu’itu. Mvandi kulenda tusadisa kukikinina ti mayindu ma Yave, malutidi kena mayindu mitu. (Yesa. 55:8, 9 ) Mvandi malenda tusadisa kufiatila mu Yave muingi tubaka ndandu mu luzingu. Ayi bo tummona ndandu tumbakanga mu kisalu ki kusamuna voti mu bisalu binkaka bi Kintinu, tumvananga nzitusu yoso kuidi Yave. (Minku. 127:1; 1 Ko. 3:7) Kheti mambu mammonikina mu phila tukhambu yindudila, tulenda ba lufiatu ti Yave wunkuiza tusadisa. (Yesa. 26:12) Tufueti vanga khonzo’itu mu kufiatila mu Yave, ayi nandi wala vanga khonzo’andi. Tuidi lufiatu ti Yave wala tuvana zithuadusulu tuntomba. Kheti mu kukhambu sadila mangitukulu dedi bo kaba vangilanga mu thangu yikhulu.—Mav. 16:6-10.
11. Mambu mbi tuzebi, ma tubombanga?
11 Befu tuzebi ti Yave widi nkua luzolo, wumvanganga mambu masonga ayi widi nkua nduenga. Tuzebi mvandi ti nandi wumvuanga nkinza mamoso tumvanga mu kisalu kiandi, ayi bo tunsadisa zikhomba zitu. Ayi mvandi tuzebi ti nandi wunsakumunanga baboso ba kunsadilanga mu lukuikumunu.—Ebe. 11:6
TUSA ZABA KO MAMBU MALA MONIKA YONO
12. Dedi bummonisina Tiagu 4:13, 14, mambu mbi tukhambu zaba?
12 Tanga Tiagu 4:13, 14. Befu tusa zaba ko buidi bunkuiza bela luzingu luitu kimba yono. Kibila mambu ma kinzimbukulu malenda ku tumonikina mu nza ayiyi mu yoso kua thangu. (Mpovi 9:11) Mu kibila akiokio tulendi zaba ko boti makani tumbaka matedi bilumbu binkuiza, mala salama voti tuala tatamana bamoyo muingi kumona mambu tukanikisa kusalama.
13. Buidi tulenda bela bo mambu ma kinzimbukila ma tumonikina?
13 Tulenda ba mu boma bo mambu mu luzingu luitu mambaluka mu kinzimbukulu. Ayi tulenda kuazuka mu matedi mbi binkuiza tumonikina, ayi mawu malenda dekula mayangi mitu. Mambu maphasi mammonikanga mu kinzimbukila malenda tutuadisa kiunda ayi nganzi. Ayi boti mambu tuntomba kuvanga masinsalama ko, tulenda ba mu kiunda.—Zinga. 13:12.
14. Mbi tufueti vanga muingi tuba mu mayangi? (Tala mvandi fikula.)
14 Bo tunkindama mu ziphasi, tummonisanga ti tunsadilanga Yave mu luzolo kheti mu moso kua mambu maphasi tulenda viokila. Kibibila kimmonisa ti tulendi vingila ko muingi Yave ka tukieba mu mambu moso maphasi ayi kasi ko nandi wuntuadisanga mambu maphasi tumviokilanga. Nandi zebi ti vasintombulu ko befu kuzaba mambu mala monika kuntuala muingi tuba mu mayangi. Vayi mayangi mitu mankuizilanga mu kutumamana zithuadusulu ziandi. (Yele. 10:23) Bo tunfiatila mu nandi mu thangu tumbaka makani, yidi buka befu tuntuba: “Yave na kutia, ayi na kutuvana moyo, tunkuiza vanga mambu amama voti manani.”—Tia. 4:15
Befu kutomba thuadusulu yi Yave ayi kuntumamana, nandi wala tukieba (Tala lutangu 14-15)b
15. Mambu mbi tuzebi matedi bilumbu binkuiza?
15 Kheti tusa zaba ko mambu mala ba yono, vayi befu tuzebi ti Yave wu tukanikisa luzingu lu mvu ka mvu. Tuzebi ti vasi ko ni kiuma kilenda ntula nkaku kudukisa mambu kakanikisa. (Titu 1:2) Nandi to kalenda tuba mambu mala monika kuntuala. (Yesa. 46:10) Mvandi befu tuzebi ti vasi ko ni kiuma kilenda tula nkaku luzolo Yave kadi mu befu. (Lom. 8:35-39) Nandi wu tuvananga nduenga, mbombolo ayi mangolo muingi tukindama mu moso kua mambu maphasi tulenda viokila mu luzingu. Tulenda ba lufiatu ti Yave wala tatamana ku tusadisa ayi kutu sakumuna.—Yele. 17:7, 8.
TULENDI VISA KO NATI KITESU MBI YAVE KA TUZABIDI
16. Dedi bummonisina Minkunga 139:6, Mambu mbi Yave kazebi matedi befu?
16 Tanga Minkunga 139:1-6. Mvang’itu zebi mamoso matedi befu. Nandi zebi mayindu mitu, mabanza mitu, kibila ki tunatanga kuvanga mambu ayi mvandi zebi mambu moso madi kutsi ntim’itu. Ntinu Davidi wutuba: ‘Yave wutu kengidilanga muingi ku tusadisa voso vama tuidi.’ Bukiedika didi diambu di kukuitukila kuzaba ti Nzambi yilutidi zangama no wuvanga diyilu, ntoto ayi biuma bioso, wu tuvuanga nkinza. Davidi wubue tuba: ‘Nzayilu yi Yave, yidi yi kukuitukila. Tulendi yivisa ko buboti.’—Minku. 139:6.
17. Kibila mbi tulenda muena phasi kukikinina ti Yave wutu zebi buboti?
17 Ḿba mu kibila ki phila tuyonzukila, voti mambu tuaba kikininanga, tulenda mona phasi kukikinina ti Yave widi tata yi luzolo ayi wutuvuanga nkinza. Voti tulenda yindula ti zinzimbala tuvanga kumbusa zidi beni zimbi ayi zilenda vanga Yave ku tutatuka. Ntinu Davidi mvandi wukimuena mu phila ayoyo. (Minku. 38:18, 21) Ḿba mutu wuntomba kubalula nzingulu’andi muingi kukuangidika Nzambi kalenda kuyikuvusa: Boti Nzambi wumvisanga mayindu mami, kibila mbi kantombila muingi yibalula phila yinzodilanga kunatina luzingu luama?’
18. Ndandu mbi tulenda baka befu kukikinina ti Yave wutu zebi buboti? (Tala mvandi foto.)
18 Tufueti kikinina ti Yave wu tuzebi buboti ayi wummonanga mambu moso mamboti tumvanganga, kheti mo befu veka tulendi nunga ko kumona. Yave wummonanga zinzimbala zitu, vayi kheti bobo Nandi wumvisanga mabanza mitu ayi bibila bi tunatanga kuvanga mambu. Nandi wu tuzolanga. (Lom. 7:15) Befu kukikinina ti Yave wutu zebi buboti ayi wummonanga mambu mamboti mu befu, lufiatu luitu mu nandi lumbuelamanga ayi mawu ma tusadisanga kunsadila mu lukuikumunu ayi mu mayangi.
Yave wu tusadisanga kununga mambu mammonikanga mu luzingu luitu ayi wutu sadisanga kukindisa kiminu kitu mu matedi nza yimona (Tala lutangu 18-19)c
19. Mambu mbi tuzebi matedi Yave?
19 Befu tuisi ko divuda ti Yave nkua luzolo. (1 Yoa. 4:8) Tuzebi ti minsua miandi mimmonisanga luzolo kadi mu befu ayi wuntombanga tubaka ndandu mu luzingu. Yave wuntomba tubaka luzingu lu mvu ka mvu, diawu kafidila muan’andi dedi khudulu. Nkhayilu wu khudulu wu tuvana lufiatu ti kheti tuidi batu ba masumu, tulenda nunga kusadila Yave mu phila nandi kantombila. (Lom. 7:24, 25) Mvandi tuzebi ti “Nzambi wulutidi kena ntim’itu ayi nandi zebi mambu moso.” (1 Yoa. 3:19, 20) Yave zebi mamoso matedi befu ayi widi lufiatu ti tulenda nunga kuvanga luzolo luandi.
20. Mbi biala tusadisa kubika kukuazuka mu mambu tukhambu zaba?
20 Yave kasa tusueka ko mambu mamfunu tufueti zaba. Diawu vasintombulu ko kukuazuka mu mambu tukhambu zaba. Vayi tufueti tsikika thalu mu mambu malutidi nkinza. Bo tumvanga mawu, tummonisanga ti tunfiatilanga Yave mu ntima woso. (Yobi 36:4) Kheti tununganga ko kuvisa mawombo matedi Yave bubu, tuidi lufiatu ti nandi wala tatamana ku tulonga mambu mamona mvu ka mvu. Mayangi beni kuzaba ti tuala tatamana kulonguka matedi mvang’itu Yave mvu ka mvu.—Mpovi 3:11.
NKUNGA 104 Phevi Yinlongo Nkhayilu wu Nzambi
a Yesu nandi wala tuama ntuala muingi kutulula nza ayiyi yi Satana mu mvita wu Alimangedoni. Diawu bubu tulenda tuba ti nandi zebi thangu tsukulu yi nza yala kuiza.—Nzai. 6:2; 19:11-16
b MAMBU MADI MU FOTO : Tata mueka ayi muan’andi, badi mu kukubika mochila muingi baba bakubama va kumonika diambu diala tombulu kutina.
c MAMBU MADI MU FOTO: Khomba mueka wumviokila mu mambu mawombo maphasi, wunyindula luzingu lu mayangi kala baka mu thangu kala kota mu nza yimona.