Biuvu bi Mitangi
Thangu mbi kisalu ki kusamuna zitsangu zimboti kiala mana?
Yesu wutuba: “Zitsangu azizi zimboti zi Kintinu, ziala samunu mu ntoto wumvimba, muingi kuvana kimbangi kuidi batu ba mimvila mioso, bosi tsukulu yala kuiza.” (Mat. 24:14) Kikuma ki kingeleku basekudila ‘tsukulu’ mu lutangu alulu, luntomba kutubila tsukulu yi nza ayiyi yi Satana Yave kala bunga mu Alimangedoni. (Nzai. 16:14, 16) Nati thangu beni yala kuiza, befu tuala tatamana kusamuna zitsangu zimboti. Mambu amomo ma tusadisa kuvisa tsudukusu yimona matedi mambu amomo.
Kumbusa, tuaba yindulanga ti kisalu ki kusamuna zitsangu zimboti ziala mana bo ziphasi zingolo ziala tona, ayi bo Babiloni Yinneni voti binganga bioso bi luvunu biala tuluka. (Nzai. 17:3, 5, 15, 16) Tuaba yindulanga ti mambu amomo mawu mala ba thonono yi mambu Yesaya kabikula matedi thangu yi mamboti ma Yave. (Yesa. 61:2) Mvandi tuaba yindulanga ti, baboso bala vuka mu ziphasi zingolo, bala tombolu kumonisa lukuikumunu luawu mu Yave ava mawu mamonika. Mvandi tuaba kuyidedikisanga na batu, bo Yelusalemi yi tuluka mu mvu 607 A.T.K. Batu abobo bavuka, batambula kidimbu ki luvukusu ava Yelusalemi yi tuluka. Kibila bawu baba sadilanga Yave ayi baba lendanga mambu mambi. (Yehe. 5:11; 9:4) Vayi mayindu amomo masi ko kithuadi na mambu Yesu katuba mu Matai 24:14, mammonisa ti, nati mu ziphasi zingolo batu bala baka luaku lu kukikinina zitsangu zimboti ava Alimangedoni yimana.
Phisulu’itu yimona matedi Matai 24:14; mvandi yidi kithuadi na phisulu’itu yimona yidi mu Nzaikusu 16:21. Buidi? Mvutu widi mu phila batu bantadilanga zitsangu zimboti. Dedi kuidi batu bala vuka, mvuala Polo wusonika ti “zitsangu aziozio zidi zimboti, kuidi batu badi mu nzila phulusu, vayi kuidi batu badi mu nzila yi mbungulu ayi kuidi zimbeni zi Nzambi, tsangu ayoyo yidi yimbi buka mfimbu yintuadisanga lufua.” (2 Ko. 2:15, 16) Batu abobo banlendanga zitsangu aziozio zi kintinu kibila ziawu zinzabikisanga mavanga mawu mambi, ti Satana nandi wu ku batuadisanga ayi ti, bawu bala bungu.—Yoane 7:7; 1 Yoane 2:17; 5:19.
Mvuala Yoane wubikula mu Nzaikusu 16:21 ti mamanya ma gelo mala bua, mala ba beni manneni. Mawu mammonisa ti, kisalu ki kusamuna kinkuiza luta tubila matedi dizina di Yave ayi mambu kankuiza vanga. (Yehe. 39:7) Bukiedika ti mu thangu ziphasi zingolo, bo binganga bioso bi luvunu biala tuluka, vala ba batu bankuiza kikinina zitsangu zimboti? Ḿba mawu mala monika. Ḿba bawu bankuiza tebuka moyo ti zimbangi zi Yave mu mimvu miwombo bansamunanga ti binganga bi luvunu biala tuluka.
Muingi kufuanikisa, yindula mu mambu mamonika ku Ngipiti bo Yave kafila kumi di zitsingulu. Bo Yave kafuisa zitsoni zinzambi zioso zi Ngipiti, nkangu wunneni wukhambu ba basi Isaeli bakutakana na basi Isaeli muingi bavuka. (Esodu 12:12, 37, 38) Batu abobo ḿba baba ku khonzu Yave, kibila bamona zindubu Yave kavana mu nzila Mose matedi kumi di zitsingulu kusalama.
Noso mutu wunkuiza ba ku khonzu yi Yave bo ziphasi zingolo ziala tona mu thangu binganga bioso bi luvunu biala tuluka, wala baka luaku lu kubuela mioko baklistu basolo bala ba va ntoto mu thangu beni. (Mat. 25:34-36, 40) Thangu yi kuvasa mamemi yala mana bo Alimangedoni yala tona ayi baklistu boso basolo bala tambula ḿfutu wu kuzingila ku diyilu.
Phisulu ayoyo yimona yimmonisa ti Yave widi nkua luzolo ayi nkua kiadi. Bukiedika, nandi kasintomba ko ni mutu kabungu, vayi wuntomba baboso babalula mavanga mawu.—2 Pet. 3:9.