Lusalusu Kuidi Bakietu ba Bavangila Mambu Mambi

Mu jw.org, muidi dilongi dintonina abubu: “Segurança da mulher—O ponto de vista da Bíblia.” Va wanda vadi link yimueka yilenda kusadisa kukulula dilongi beni ayi kubasisa mu minkanda. Khomba mueka ku Estados Unidos bantedilanga Stacy wutuba: “Yikulula dilongi adiodio, bosi minu ayi khomba wunkaka tuyenda ku kibuangu kimueka bankiebilanga bakietu.

Nkietu mueka wunsadilanga ku kibuangu beni wu tukamba boti kalenda nata minkanda miba dilongi beni kuidi bakietu baba zingilanga ku kibuangu beni. Mawu masadisa muingi kukabula kuvioka 40 di malongi beni ayi kuvana 30 di minkanda mi kukotila mu jw.org. Bo tubue vutuka kuna mu khumbu yinkaka, mutu waba tuadisanga kibuangu beni wuvua nkinza malongi beni ayi wubika muingi tulongukanga kibibila na bakietu boso baba zingilanga kuna.

Yaya Stacy ayi zikhomba wadi zinkaka zi bakietu, babaka ndandu mu kibuangu kinkaka bankebanga mvandi bakietu. Wumueka mu batu bansadilanga kuna wutuba: “Dilongi adidi dinkuiza sadisa bakietu akuku.” Nandi wubue tuba: “Bawu bankuiza zola kukuwa dilongi adidi.” Bo bavutuka kilumbu kinkaka, batu bawombo baba kalanga va kibuangu beni bakutakana muingi kulonguka Kibibila, ayi batu buadi mu bawu baba tomba kulandakana zikhutukunu mu sabala yilanda ku Nzo yi Kintinu.

Yaya Stacy wutuba: “Tuyituka phila batu batambudila dilongi adiodio. Tuyangalala beni mu phila ba tuyambila ayi tuidi beni phuila yi kumona buidi Yave kankuiza sakumuna mangolo mitu ma kutomba batu batidi kukuwa zitsangu zimboti.”