Kifuani ki Nani Wulenda Landakana?

“Bo yiba mambu mabe kukhuasula, minu yaba botulanga thangu muingi kuyindula mu mutu yaba monanga ti widi kifuani kimboti ayi wuviokila mu momawu mambu minu yaba viokila.”—Haley.

Kulandakana kifuani kimboti ki bankaka, kulenda tusadisa tubika viokila mu mambu mambi. Vantombulu kusola kifuani kimboti muingi kulandakana.

• Kibila mbi vantombuluanga kuba keba keba bo tunsola kifuani tufueti landakana?

• Buidi tulenda sodila kifuani kimboti?

• Mbi matoko mankaka bantubanga

Kibila mbi vantombuluanga kuba keba keba bo tunsola kifuani tufueti landakana?

• Batu wunsola banga kifuani muingi kulandakana, balenda kunata mu zinzila zimboti voti zimbi.

  Kibibila kitu kindisa kulandakana bifuani bimboti. Kiawu kintuba: “Ayi bo lummona ndandu bambakanga mu zikhadulu ziawu zimboti, landakananu kifuani kiawu.”—Ebeleo 13:7.

  Diyindu: Mu kuzaba ti batu wunsola banga kifuani muingi kulandakana balenda kunata mu zinzila zimboti voti zimbi, bo wunsola, buboti beni kubika kutadila zikhadulu ziawu, ti badi bazabakana voti badi phung′aku.

  “Yilonguka mambu mawombo mu kifuani ki yaya Adam—kuba kuandi phila kanyindudilanga voti zikhadulu ziandi. Yintebukilanga monyo mu mambu kavanga ayi katuba. Ayi nandi kasa zaba ko buidi mawu matsadisila.”—Colin.

• Batu wunsola banga kifuani muingi kulandakana, balenda vukumuna mayindu maku ayi phila wumvangilanga mambu.

  Kibibila kintuba: “Bikanu kuvunuka. Minkangulu mimbi mimbifisanga zikhadulu zimboti.”—1 Kolintu 15:33.

  Diyindu: Bo wunsola kifuani ki mutu wulenda landakana, tadila zikhadulu ziandi kubika kuandi phila kamvuatilanga.

  “Wulendi ku yivua ko nkinza, ngie kuyidedikisanga na batu bazabakana. Mawu malenda ku kuvanga kubua mu kiunda kingolo.”—Tamara.

  Yindula mu mambu amama: Kibila mbi dilenda bela diambu dimbi kulandakana kifuani ki batu bazabakana?

• Bifuani bi batu wunsola, bilenda kuvanga kununga mambu wuntomba voti kuvunzikisa makani maku.

  Kibibila kintuba: “Woso wundiatanga na bankua nduenga, wala ba nduenga.”—Zingana 13:20.

  Diyindu: Sola kifuani ki batu bo wuzebi ti badi zio ziawu zikhadulu ngie widi. Mu phila ayoyo, wala nunga kulonguka mambu mawombo mala kusadisa kudukisa makani maku.

  “Sikikanga ndilu bo wumbaka makani. Dedi wulenda tuba: ‘Yintomba kununga kudedikisanga mambu dedi yaya Jane. Nandi wunsadilanga thangu′andi buboti ayi kavunzikisanga ko makani mandi.’”—Miriam.

  Kuvutikila mambu: Bo wunsola buboti kifuani wuntomba kulandakana, ngie wala zaba kusola ntindu mutu wuntomba kuba.

Buidi tulenda sodila kifuani kimboti?

Wulenda vangila mawu mu ziphila wadi.

1. Wulenda sola khadulu mueka wuntomba kukuna, bosi kutomba kifuani ki mutu widi khadulu beni muingi kulandakana.

2. Boti vadi mutu ngie wunzolanga, wulenda sola zikhadulu mu nandi zio wuntomba kukuna.

Mambu manlanda, malenda ku kusadisa kununga mawu.

Ngie wulenda landakana kifuani ki:

• Matoko. “Yintomba kulandakana kifuangi ki nkudiama wulutidi. Nandi wunluta vuanga nkinza kusadisa bankaka. Minu yinlutidi mu phunga, vayi nandi widi zikhadulu zimboti zio mini yisi ko. Ayi mawu ma kuphanganga kutomba kulandakana kifuna kiandi.”—Miriam.

• Bakulutu. Kuba kuandi matata maku voti khomba mu kimvu. “Matata mami badi kifuani kimboti kuidi minu. Bawu badi zikhadulu zimboti. Mu kuba batu ba masumu, bawu bamvanganga zinzimbala, vayi badi batu bakuikama.”—Annette.

• Bifuani bi Kibibila. “Yisola kulandakana bifuani bantubila mu Kibibila—dedi: Timoti, Ruti, Yobi, Petelo ayi muana musi isaeli wuba va kivika. Bo yinluta botulanga thandu muingi kulonguka bifuani biawu, yinnunganga kuvisa mambu baviokila. Yinzolanga beni kutanga binongo bidi mu buku Imite a sua fé ayi mvandi kikhuku Exemplo a Seguir’ kidi mu buku Os Jovens Perguntam—Respostas Práticas.”—Melinda.

Diyindu: Bika kusikimina mu kifuani ki mutu wumueka to. Mvuala Polo wukamba zikhomba ku Filipi: “Tatamananu kutala kifuani ki batu banlandakana kifuani kio befu tu mubikila.”—Filipi 3:17.

Ngie zebi? Wulenda ba kifuani kimboti kuidi bankaka! Kibibila kintuba: “Ba kifuani kimboti kuidi batu bakuikama, mu thubulu, mu mavanga, mu luzolo, mu kiminu ayi mu kuba wudiodila mu ziphila zioso.”—1 Timoti 4:12.

“Kheti widi mu kuvanga mangolo muingi kubalula zikhadulu ziaku, wulenda sadisa bankaka kuvanga mawu. Tusa zaba ko banani ba tutadilanga banga kifuani kiawu ayi tusa zaba ko ti mambu tuntuba malenda sadisa bankaka kubalula luzingu luawu.”—Kiana.