Yosia Wuba Bakundi Bamboti

Mu mbwenu’aku, mpasi kuvanga mambu mamboti?— Bawombo baǹtubanga ti mpasi. Mawu mamonikina mwana mweka baǹtedilanga Yosia. Kibibila kimmonisa ti nandi mpasi kaba monanga kuvanga mambu masulama. Angi nandi wuba bakundi bamboti baǹsadisa. Twanlonguka matedi Yosia ayi bakundi bandi.

Amoni wuba tata yi Yosia, Nandi wuba ǹtinu wu basi Yuda. Amoni wuba muntu wumbi ayi waba bwongiminanga zinzambi zi bitumba. Yosia wuvingana va kiǹtinu ki Yuda bo tat’andi kafwa. Vayi Yosia 8 di mimvu to kaba! Mu mbwenu’aku, nandi wuba muntu wumbi dedi tat’andi?— Ḿve, kasa bubela ko!

Tona mu bumwana bwandi, nandi waba tombanganga kutumamana Nzambi. Diawu kavangila kikundi na bantu baba vanganga luzolo lu Yave. Bawu baǹsadisa kuvanga luzolo lu Nzambi. Banani baba bakundi ba Yosia?

Wumweka mu bawu wuba ḿbikudi Sefania. Nandi waba lubula bantu mu matedi mambu mambi mala monika ba kutatamana kubwongimina bitumba. Yosia waba kuwanga dilongi ma Sefania ayi kabasa bwongiminanga ko zinzambi zi bitumba, vayi Yave to kaba bwongiminanga.

Ǹkundi wuǹkaka wu Yosia dizina dyandi Yelemia. Mu kutala mu kumona bawu mpunga yimweka baba ayi mu bulezi buawu, zinzo ziawu ziba zifikama. Bawu baba bakundi ba luzolo. Diawu bo Yosia kafwa, Yelemia wusonika ǹkunga wuǹkinza wutedi kubala ǹkundi’andi. Yelemia ayi Yosia baba sadisananga mu dyambu kuvanga mambu masulama ayi kutumamana Yave.

Mbi wulenda longuka mu ǹtungulu Yosia?—Nketi mu bumwana bwandi, Yosia waba tombanga kuvanga mambu masulama. Nandi wuzaba ti kafweti vanga kikundi na bantu banzolanga Yave. Diawu, landakana kifwani ki Yosia mu kusola bakundi batidi Yave ayi balenda kusadisa kuvanga mambu masulama!