DILONGO 3
Adami ayi Eva Babayisa Nsiku Nzambi
Kilumbu kimweka Eva bo kaba nafeka, nyoka yinfikama ayi yinyuvula: ‘Bukyedika ti Nzambi wu muyimina kudya makundi moso ma minti madi ku lumbu?’ Eva wuvutula: ‘Tulenda kwitu kudya makundi moso manti madi ku lumbu vayi mu matedi nti wu kuzabila mamboti ayi mambi, Nzambi wuyimina kusimba wawu ni kudya makundi manti beni mwingi tubika fwa.’ Bosi nyoka yi vutudila, ‘mwisi mfwa ko kibila Nzambi zebi ti kyoso kilumbu mwala dya, meso minu mala zibuka ayi mwala ba buka Nzambi mu kuzaba mamboti ayi mambi.’ Budedi ti makyedika kankamba? Ndamba, luba luvunu vayi Eva wukikinina mambu bankamba. Bo Eva katadila ngolo dikundi beni, wubwela phwila yi kudya dyawu. Bosi Eva wudya dikundi beni ayi wuvana mvandi Adami. Adami wuzaba kwandi ti ba kulevula Nzambi, bawu bala fwa. Angi Adami wubayisa Nzambi ayi wudya dikundi beni.
Ku tsuka kilumbu kina, Yave wuyoluka na Adami ayi Eva. Wuba yuvula kibila mbi balevudila nsiku’andi. Eva wuvana nyoka foti ayi Adami wuvana Eva foti. Nzambi wumona ti Adami ayi Eva basa tumamana ko nsiku’andi, diawu kaba kukisila ku lumbu lu Edeni ayi wutula zimbasi ayi mbeli yi mbazu mwingi kukengidilanga va khotolo yi lumbu beni mu dyambu Adami ayi Eva babika kubwe vutuka.
Yave wunsinga mvandi mutu wuvukumuna Eva. Yawu yisa ba ko to nyoka yi yoluka na Eva vayi mbasi bayiza tedila Satana Nkadi’ampemba wuswamina mu nyoka, kibila Yave kasa vanga ko nyoka kayolukanga. Satana kavangila mawu mwingi kuvukumuna Eva kabika kutumamana Nzambi. Kuntwala Yave wala bunga Satana mwingi kabika kubwe vukumuna batu kuvanganga mambu mambi. Masi ko mayangi kuzaba ti Yave wala ma vanga?
“Satana . . . Nandi mvondi tona vana thonono ayi kasia zingila ko mu kiedika bila mu niandi muisi ko kadi kiedika.”—Yoane 8:44, Matangu madi va wanda nkanda