DILONGI 8

Bifwani Bimvisikisa

Matai 13:34, 35

DILONGI: Bwela pisuka mu phila wunlongila mu kusadila bifwani bilenda sadisa batu ba kukuwa kuvwa nkinza ayi binlonga mambu mankinza.

Sola bifwani bikhambu phasi. Dedi Yesu, sadila byuma bilwelu mwingi wusudikisa byuma binneni, ayi byuma bikhambu phasi mwingi wusudikisa byuma bidi phasi. Bika bwela sudikisa byuma bikhambu tsalulu bilenda vanga batu kukhambu visa kifwani. Tomba kuzaba ti mambu wuntuba mu kifwani, madi ngwizani ayi dilongi widi mu kulonga, mwingi batu ba kukuwa babika vukumuka mu mambu makhambu tsundu.

Tala buboti. Tala byuma bidi mu nza, longuka bilongulu bi Baklisto, ayi yuwa minlongisi mipisuka. Bo wumvanga mawu, sonika bifwani bawu bansadila ayi byo ngye mvaku wulenda sadila mu malongi wumvanga. Sweka bifwani beni mu buku voti kiswekulu kinkaka.
Yindula mambu mala sadisa batu ba kukuwa. Sola bifwani bintubila mambu batu ba kukuwa bamvanganga voti banzolanga. Ba keba keba mwingi bifwani byaku bibika fwisa batu zitsoni voti kuba finga.
Longa mambu malutidi nkinza. Tsikika mayindu mu mambu malutidi nkinza mu kifwani, bika ti mu mambu malwelu. Vanga mangolo mwingi batu ba kukuwa babika to tebukila moyo kifwani beni, vayi dilongi wunlonga mu kifwani beni.