DILONGI 35
Mbi Binkuiza Kusadisa Kubaka Makani Mamboti?
Befu boso tumbakanga makani mu luzingu. Dedi, tufueti baka makani matedi buidi tunkuiza dukisila zitsatu zitu zi kinsuni, vama tunkuiza kala ayi nani tunkuiza kuela. Vayi makani tumbaka malenda ba mamboti voti mambi. Befu kubaka makani mamboti, tunkuiza baka mayangi mu luzingu ayi kukuangidika Yave.
1. Buidi Kibibila kilenda kusadisila kubaka makani mamboti?
Ava kubaka makani, sambila kuidi Yave ayi fiongunina mbi Kibibila kintuba matedi mambu beni. (Tanga Zingana 2:3-6.) Khumbu zinkaka Yave wu tuvananga zithuadusulu zi tusadisanga kumona mbi tufueti vanga. Vayi khumbu zinkaka nandi wu tubikanga tusadila kilunzi kitu muingi tubaka makani. Kutumukina Yave mawu makani malutidi tulenda baka.
Vayi boti vasi ko ni nsiku wumueka wu Kibibila wulenda kusadisa kubaka makani, mbi wulenda vanga? Yave wu tutuadisanga mu ‘nzila tufueti diatila.’ (Yesaya 48:17) Mu Kibibila muidi minsua miwombo milenda ku tusadisa. Minsua, madi malongi ma Kibibila mammonisa mabanza ayi mayindu ma Yave. Diawu befu kubotulanga thangu muingi kutanga Kibibila tunkuiza nunga kuzaba mabanza ma Yave. Ayi befu kuvanganga mangolo muingi kuyindula mu phila Yave kanyindudilanga, tunkuiza baka makani mamboti ayi kunkuangidika.
2. Mbi wufueti yindulanga ava kubaka makani?
Kibibila kintuba: “Nkua nduenga wumfionguninanga buboti ndiatulu’andi.” (Zingana 14:15) Mawu mansundula ti ava kubaka makani, tufueti botulanga thangu muingi kuyindula mu mambu beni. Ayi bo tumvanga mawu, tufueti kuyikuvusa: ‘Buidi yilenda sadila minsua mi Kibibila mu mambu amama? Minu kubaka makani amama, yinkuiza baka ndembama mu ntima? Makani yintomba kubaka mankuiza tuadisa ndandu voti ziphasi kuidi bankaka? Ayi bulutidi, buidi Yave kankuiza bela?’—Deutelonomi 32:29.
Yave nandi mutu wufuana muingi ku tukamba mambu mamboti ayi mambi. Bo tumbotula thangu muingi kuyindula mu minsua mi Kibibila ayi kusadila miawu, tunkuiza ba kilunzi kimboti. Kilunzi kidi buka mbembu mu khat’itu yi tusadisanga kusuasisa mamboti ayi mambi. (Loma 2:14, 15) Diawu, befu kukubika buboti kilunzi kitu, tunkuiza nunga kubaka makani mamboti.
BUELA LONGUKA
Fiongunina buidi kukubika kilunzi kitu mu minsua mi Kibibila kulenda tusadisila kubaka makani mamboti.
3. Bika Kibibila kituadisa luzingu luaku
Buidi minsua mi Kibibila milenda kusadisila kubaka makani mamboti? Tala VIDEO, bosi tubilanu biuvu binlanda.
Nkhayilu mbi Yave katuvana?
Kibila mbi Yave katuvanina luaku lu kusola?
Mbi nandi katuvana muingi ku tusadisa kubaka makani mamboti?
Muingi wumona mua minsua mi Kibibila, tanga Efeso 5:15, 16. Bosi tubilanu buidi wulenda sadila “buboti thangu” bo . . .
wuntanga Kibibila kadika kilumbu.
wumvanga mangolo muingi kuba nnuni voti nkazi, nkundi, tata ayi muana wumboti.
wunlandakana zikhutukunu.
4. Kubikanga kilunzi kiaku muingi wubaka makani mamboti
Disi ko diambu diphasi kubaka makani mamboti boti vadi nsiku wu Kibibila wu tukamba mbi tufueti vanga. Vayi mbi tunkuiza vanga boti vasi ko ni nsiku wumueka wunsudukisa mbi tufueti vanga? Tala VIDEO, bosi tubilanu biuvu binlanda.
Mu video tube mona, mambu mbi khomb’itu kabe vanga muingi kukubika kilunzi kiandi ayi kabaka makani mankuangidika Yave?
Bo tuntomba kubaka makani, kibila mbi tulendi bikila ko bankaka ba tubakila makani? Tanga Ebeleo 5:14, bosi tubilanu biuvu binlanda:
Khumbu zinkanka, tulenda mona ti bulutidi mboti bankaka ba tubakila makani. Vayi mbi kadika mutu kafueti nunga kusuasisa?
Mbi binkuiza tusadisa kukubika kilunzi kitu muingi tubaka makani mamboti?
Dedi mapa, tulenda sadila kilunzi kitu muingi ku tusadisa kubaka makani matedi buidi bu kunatina luzingu luitu
5. Kinzika kilunzi ki bankaka
Batu badi disuasana, diawu mvandi bambakilanga makani maviakana. Buidi tulenda monisina lukinzu mu kilunzi ki bankaka? Mona bifuani biodi:
Kifuani 1: Khomba mueka wunzolanga kuvanga maquiagem wubaluka mu kimvuka kio zikhomba bakhambu zolanga kumona mutu wumvanga maquiagem.
Tanga Loma 15:1 ayi 1 Kolinto 10:23, 24, bosi tubilanu biuvu binlanda:
Dedi bummonisina matangu amama mbi khomba awowo wu nkieto kafueti vanga? Mbi wunkuiza vanga boti mambu widi nsua wu kuvanga mantatisa kilunzi ki bankaka?
Kifuani 2: Khomba mueka zebi ti Kibibila kisinkandimina ko kunua malavu, vayi naveka wubaka makani ma kubika nua malavu. Khomba beni bantumisa mu mua nkungi ayi wummona zikhomba zinkaka kunua malavu.
Tanga Mpovi 7:16 ayi Loma 14:1, 10, bosi tubilanu biuvu binlanda:
Dedi bummonisina matangu amama mbi khomba awowo wu dibakala kafueti vanga? Mbi wunkuiza vanga boti mutu wunkaka wumvanga mambu mantatisa kilunzi kiaku?
Mambu mbi tufueti vanga muingi tubaka makani mamboti?
1. Dinda lusalusu lu Yave muingi wuzaba ma kuvanga.—Yakobi 1:5.
2. Fiongunina bilongulu bibongulu mu Kibibila muingi wuzaba nsiku wudedakana na mambu wumviokila. Mvandi wulenda koluka na khomba wuyonzuka mu kiphevi.
3. Fiongunina boti makani wunkuiza baka mankuiza tatisa kilunzi ki bankaka voti ndamba.
BATU BANKAKA BANTUBANGA: “Ngie wulenda vanga dioso kua diambu wuntomba, kibila mambu bankaka bantubanga matedi ngiewu masi ko nkinza.”
Kibila mbi tufueti vuila nkinza mayindu ma Nzambi ayi ma bankaka?
MBI NGIE BELONGUKA
Tulenda baka makani mamboti befu kutomba kuzaba buidi Yave kankuiza bela mu mambu tuntomba kuvanga ayi kufiongunina boti mambu beni mankuiza tuadisa ziphasi voti ndandu kuidi bankaka.
Vutukila Mambu Mamfunu
Buidi wulenda bakila makani mankuangidika Yave?
Buidi wulenda kubikila kilunzi kiaku?
Buidi wulenda monisina ti wumvuanga nkinza kilunzi ki bankaka?
TALA MAMBU MANKAKA
Buidi wulenda bakila makani mankindisa kikundi kiaku na Nzambi?
“Tome decisões que honram a Deus” (A Sentinela, 15 de Abril de 2011)
Buela fiongunina buidi Yave ka tuvaninanga malongi.
Mona mbi bisadisa dibakala dimueka, kubaka makani mamboti mu mambu kaba viokila.
Buela longuka buidi tulenda kuangidikila Yave boti vasi ko nsiku wunsudikisa mambu tufueti vanga.
“Precisa sempre duma ordem bíblica?” (A Sentinela, 1 de Dezembro de 2003)