Ngiewu Widi mu Kukubama mu Matedi Mbambukulu Moyo?

Pasika yitsuka Yesu kakemba, yiba beni tsundu, kibila lufua luandi luaba fikama. Diawu nandi kabakila makani ma kukembila yawu na bapostolo bandi ayi wutsikika nkungi wu Bidia bi Mfumu va Masika ma Builu. Nandi wutuma Petelo ayi Yoane muingi benda kekubika kibuangu bankuiza dila Pasika beni. (Luka 22:7-13; tala foto yidi va thonono.) Mawu ma tutebula moyo ti tufueti kubama muingi tuba mu Mbambukulu Moyo yala vangama mu kilumbu 27 Ngonda Yintatu. Tuidi lufiatu ti bimvuka mba bama sola mutu wunkuiza vanga dilongi, ku kubika vinu ayi mapha ayi mambu mankaka. Vayi mbi ngie wulenda vanga muingi wuba wukubama mu mbambukulu moyo?

Kubika ntim’aku. Tanga ayi yindula matangu ma Kibibila mantubila matedi Mbambukulu Moyo. Wulenda dengana matangu amomo mu mua buku Fiongunina Matangu ma Kibibila Kadika Kilumbu. Wulenda mona mvandi mambu mankaka mu Apêndice B12-A-B12-B mu tsekudulu yimona yi Tradução do Novo Mundo da Bíblia Sagrada. (Tala mvandi Thuadusulu yi Zikhutukunu yi Ngonda Yinna, Mvu 2020 Makanda balenda dengana malongi mantubila matedi mbambukulu moyo muingi balonguka mu mbuongimini va dikanda mu Índice das Publicações da Torre de Vigia voti mu Guia de Pesquisa para Testemunhas de Jeová.

Tumisa bankaka. Tumisa batu boso wulenda nunga muingi bayiza mu mbambukulu moyo. Wulenda tumisa batu wuvana kimbangi, batu banlongukanga yaku Kibibila, batu bankalanga yaku va nsengi ayi basi dikanda diaku. Bakulutu ba kimvuka bafueti vanga mangolo muingi kutumisa zikhomba bavonga mu kiphevi. Bambuka moyo ti ngie kudengana mutu wunkalanga ku kibuangu kinkaka, ngie wulenda mona kilokolo ayi vama Mbambukulu Moyo yala vangimina ku kibuangu kankalanga mu kukota mu jw.org, vantuba MA TUTEDI bosi, “Mbambukulu Moyo lufua lu Yesu.”

Mambu mbi mankaka tufueti vanga muingi tuba bakubama?