DILONGI 2
NKUNGA 19 Ndiwulu Bidia Bimfumu Va Masika ma Builu
Ngie Widi Wukubama mu Kilumbu Kilutidi Mfunu mu Mvu?
“Tatamananu kuvanganga mawu, muingi muthebukilanga moyo”—LUKA 22:19.
MAMBU TUANLONGUKA
Mona kibila mbi Mbambukulu Moyo yididi nkinza, buidi tulenda kubimina ayi buidi tulenda sadisila bankaka kulandakana yawu.
1. Kibila mbi kilumbu ki Mbambukulu Moyo kilutidi mfunu mu kadika mvu? (Luka 22:19, 20)
KUIDI dikabu di Yave, Mbambukulu Moyo lufua lu Yesu, kiawu kilumbu kilutudi nkinza mu mvu. Awowo, wawu to nkungi Yesu kakamba minlandikini miandi bavanganga. (Tanga Luka 22:19, 20.) Tuidi phuila yiwombu muingi kuzaba kibila mbi tuntebukilanga moyo lufua lu Yesu. Ndoku tumona mua bibila.
2. Bibila mbi tuidi muingi kubambukilanga moyo lufua lu Yesu?
2 Mbambukulu Moyo yi tusadisanga kuyindula luvalu lu khudulu. Nkhailu Yesu kavana, wu tutebula moyo ziphila tulenda monisina ti tumvuanga wawu nkinza. (2 Koli. 5:14, 15) Nkhailu awowo, wu tuvana mvandi luaku muingi “tuyikindasananga mu kiminu” na zikhomba zitu. (Loma 1:12) Mu kadika mvu, bawombu bavonga mu kiphevi banlandakananga Mbambukulu Moyo. Bawombu mu bawu, bambakanga makani ma kuvutuka kuidi Yave, mu phila tuba yambilanga mu kilumbu akiokio. Ayi batu bawombu tuntumisanga, bankuitukanga mu mambu bammonanga ayi bankuwanga ayi maba vanganga kutomba kulonguka Kibibila. Mambu amomo, mamvanganga nkungi wu Mbambukulu Moyo wuba nkungi wulutidi mfunu kuidi befu!
3. Buidi Mbambukulu Moyo yi tukutikisilanga mu nza yimvimba? (Tala mvandi foto.)
3 Yindula mvandi buidi Mbambukulu Moyo yintuadisilanga kithuadi kitu mu nza yimvimba. Zimbangi zi Yave mu nza yimvimba, bankutakananga bo thangu yi kuekotanga. Befu boso tunlandakananga dilongi dintubilanga nkinza wu khudulu. Tunkuimbilanga minkunga miodi mu mayangi, bamviokisanga dipha ayi vinu ayi tuntubanga “amen” mu minsambu minna bamvanganga. Mu kilumbu kimueka, bimvuka bioso mu nza yimvimba banlandakananga thuadusulu mueka. Ngie wulenda yindula mayangi Yave ayi Yesu bambanga bo ba tumona mu kithuadi ayi kuba vana nzitusu?
Mbambukulu Moyo, yi tukutikisanga mu nza yimvimba (Tala lutangu lu 3)f
4. Mbi tunkuiza tubila mu dilongi adidi?
4 Mu dilongi adidi, tunkuiza tubila biuvu abibi: Buidi tulenda kubikila ntim’itu muingi kulandakana Mbambukulu Moyo? Buidi tulenda sadisila bankaka kubaka ndandu? Ayi buidi tulenda sadisila bavonga mu kiphevi? Mimvutu mi biuvu abiobio, minkuiza tusadisa kuba bakubama mu nkungi awowo wu mfunu.
BUIDI TULENDA KUBIKILA NTIM’ITU MU MBAMBUKULU MOYO?
5. (a) Kibila mbi tufueti yindudilanga mu luvalu lu khudulu? (Minkunga 49:7, 8) (b) Mbi tulenda longuku mu video yintuba Kibila Mbi Yesu Kafwila?
5 Phila yimueka yinkinza tulenda kubikila ntim’itu mu Mbambukulu Moyo yidi, mu kuyindula luvalu khudulu yi lufua lu Yesu yidi. Befu veka, tulendi kuyivukisa ko mu masumu ayi lufua. (Tanga —Minkunga 49:7, 8; tala mvandi video Kibila Mbi Yesu Kafwila?)a Yave wuvana Muan’andi Yesu muingi ku tukula. Mu phila ayoyo, nandi ayi Yesu bavanga diambu dinkinza. (Loma 6:23) Bo tunluta yindula mambu Yave ayi Yesu ba tuvangila, buawu tunluta vuilanga nkinza khudulu. Diawu tuemmona mua mambu mammonisa ti khudulu yisa ba ko diambu diluelu kuidi Yave ayi Yesu. Ditheti mbi biaba tombulu muingi kuvana khudulu?
6. Mbi biaba tombulu mu khudulu?
6 Khudulu yidi thalu wumfuta muingi kuvutula kiuma wuba. Dibakala ditheti Adami, wuba wuvedila bo bamvanga. Vayi bo kasumuka, wuzimbisa luaku lu kuzinga mvu ka mvu kubika kuandi to kuidi naveka vayi ayi bana bandi boso. Diawu muingi kubue vutula luzingu Adami kazimbisa, Yesu wuvana luzingu luandi muingi ku tukula. Mu luzingu luandi loso va ntoto, Yesu “kasa vola ko disumu ayi kasa tuba ko ni diambu di luvunu.” (1 Pete. 2:22) Mu kuvana luzingu luandi lu vedila, Yesu wufuta thalu yi luzingu Adami kazimbisa.—1 Koli. 15:45; 1 Timo. 2:6.
7. Mambu mbi maphasi Yesu kaviokila bo kaba va ntoto?
7 Kheti wuviokila mu mambu mawombu maphasi, Yesu wutatamana kutumukina Tat’andi yi diyilu. Yesu wuba muana wuvedila vayi matata mandi baba batu ba masumu, kheti bobo wutatamana kuba tumukina. (Luka 2:51) Bo kaba ditoku, vaba tombulu nandi kutatamana wukuikama mu zioso kua zithotolo zilenda kumvanga kubika tumukina. Bo kayiza ba nkulutu, vaba tombulu Yesu kutatamana wukuikama kuidi Nzambi mu zithotolo Satana kaba kuntuadisa. (Matai 4:1-11) Satana wuba makani ma kuvanga Yesu kusumuka ayi kutula nkaku muingi kabika ku tukula.
8. Mu zithotolo mbi zinkaka Yesu kaviokila?
8 Yesu wukindama mu zithotolo zinkaka mu kisalu kiandi ki kusamuna. Dedi zimbeni ziandi banyamisa ayi bakana kumvonda. (Luka 4:28, 29; 13:31) Nandi wumonisa mvibudulu mu zinzimbala zi minlandikini miandi. (Malaku 9:33, 34) Nandi wuviokila mu mambu maphasi dedi, bambula ayi bamvueza. Bosi wutovuka beni ayi bamvonda banga muivi. (Ebe. 12:1-3) Yave wubika muingi Yesu kaviokila mu mambu amomo.b—Matai 27:46.
9. Buidi tummuenanga matedi khudulu yi Yesu? (1 Petelo 1:8)
9 Yesu wutovuka beni muingi kuvana luzingu luandi. Befu kuyindula mu mambu Yesu Klistu ka tuvangila, befu tuala kuna luzolo lungolo mu nandi.—Tanga —1 Petelo 1:8.
10. Thalu mbi Yave kafuta muingi ku tukula?
10 Mbi Yave kavanga muingi Yesu kuvana luzingu luandi? Yave ayi Yesu, baba kikundi kifikama dedi kio tata ayi muana bambanga. (Zinga. 8:30) Buabu, yindula buidi Yave kabela kumona Yesu kukindama mu mambu mawombu maphasi va ntoto. Tuisi ko divuda ti Yave wumona kienzu kumona Muan’andi kutovuka, kusakununu, kulenzu ayi kuthotu.
11. Tubila kifuani kimmonisa buidi Yave kamuena bo bavonda Muan’andi.
11 Noso kua tata wumfuilu muana, zebi ziphasi lufua luntuadisanga. Befu tuidi kiminu kingolo mu luvulubukusu, vayi kiawu kilendi botula ko kienzu tummonanga bo tumfuilu mutu tunzolanga. Kifuani akiokio, ki tusadisa kuvisa buidi Yave kamuena bo Muan’andi wu luzolo katovuka ayi kafua mu mvu 33 T.K.c—Matai 3:17.
12. Mbi tufueti vanga mua zisabala ava Mbambukulu Moyo?
12 Mu thangu Mbambukulu Moyo, tomba kulonguka beni matedi khudulu mu ndongukulu yi ngie veka voti mu mbuongimini yi dikanda. Sadila kisuekulu ki bilongulu ki Zimbangi zi Yave, voti bilongulu binkaka bibongulu mu Kibibila muingi wufiongunina diambu wuntomba.d Mvandi landakana thuadusulu yi matangu ma Kibibila ma Mbambukulu Moyo, mankuizilanga mu thuadusulu—yi zikhutukunu. Ayi kilumbu ki Mbambukulu Moyo, bika kuzimbakana kutala mbuongimini va meni. Bo tunkubika ntim’itu muingi kulandakana Mbambukulu Moyo, tuala ba bakubama muingi kusadisa bankaka babaka mvandi ndandu.—Esala 7:10.
SADISA BANKAKA BABAKA NDANDU
13. Mbi tufueti vanga muingi kusadisa bankaka babaka ndandu mu Mbambukulu Moyo?
13 Buidi tulenda sadisila bankaka muingi babaka ndandu mu Mbambukulu Moyo? Theti mu kutumisa batu kubunda mvandi bo tundengana mu kisalu ki kusamuna ayi kuvanga lista yi batu tuzebi muingi baba yitu mu Mbambukulu Moyo. Mu lista beni, tulenda tumisa basi dikanda ditu, bansalanga yitu, bankotanga yitu kikola ayi batu bankaka. Kheti tuisi ko minkanda miwombu muingi kutumisa batu, tulenda fila link yithumusunu kuidi batu, kibila tuisa zaba ko nani wala ba mu Mbambukulu Moyo.—Mpovi 11:6.
14. Vana kifuani kimmonisa mangolo nkanda wu kutumisina widi.
14 Ka wulenza mangolo nkanda wu kutumisina widi. Khomba mueka widi nnuni widi kinganga wuviakana, wuyituka beni bo nnuni’andi kankamba ti wunkuiza landakana yandi va kimueka Mbambukulu Moyo. Kibila mbi nandi kayitukila? Kibila waba kuntumisanga khumbu ziwombu vayi nandi kabasa vitikanga ko. Buabu mambu mbi mabaluka? Nnuni’andi bamvana nkanda wu thumusunu kuidi nkulutu mueka wu kimvuka kazaba buboti. Tona mu mvu awowo ayi mimvu milanda, nnuni’andi wutatamana kulandakananga Mbambukulu Moyo.
15. Mbi tufueti tebukanga moyo bo tuntumisa batu mu Mbambukulu Moyo?
15 Tebuka moyo ti batu tuntumisa, balenda ba biuvu bulutidi boti balandikiniabu ko ni lukutukunu. Diawu didi diambu dimboti kufika bakuvula ayi kukubama muingi kuba vana mimvutu. (Kolo. 4:6) Dedi, ḿba mutu kalenda kuvula: ‘Mbi bimmonikanga mu nkungi awowo?’ ‘Minutu mikua lunkalanga?’ ‘Ntindu bikhutu mbi yifueti vuata?’ ‘Vantombulu kufuta zimbongu muingi kulandakana luawu?’ ‘Bankongulanga bakaba?’ Befu kutuminsa mutu mu Mbambukulu Moyo tulenda kunkuvula; “Ngie widi mua biuvu?” Bosi sudikisa mutu beni mua diambu kankuvula. Mvandi tulenda sadila zivideo Mbambukulu Moyo Lufwa lu Yesu ayi Mambu Mbi ma Monikanga ku Ǹzo yi Kintinu? Muingi kusadisa mutu kavisa buidi bumvangiminanga zikhutukunu zitu. Ayi tubila mambu mamfunu madi mu dilongi 28 di buku Baka Mayangi ma Mvu ka Mvu!
16. Biuvu mbi binkaka batu tuntumisanga mu Mbambukulu Moyo bankuvulanga?
16 Bo bammana kulandakana Mbambukulu Moyo, batu tuntumisanga balenda ba divuda ayi balenda kuvula biuvu dedi: Kibila mbi batu baluelu to bandianga dipha ayi bannuanga vinu? Khumbu zikua mu nlandikininanga Mbambukulu Moyo? Ayi ḿba mvandi balenda tomba kuzaba boti zikhutukunu zioso zi zimbangi zi Yave zimvangiminanga phila yimueka. Ayi kheti bansudikisanga buboti mambu amomo mu Mbambukulu Moyo, vayi vantombuluanga kubue sudikisa batu tuntumisanga. Mu jw.org muidi dilongi dintuba: “Baboso Baba Mintima Mikubama.” Dilongi adiodio, dilenda ku tusadisa kuvutula mimvutu mi biuvu balenda kutuvana. Tufueti vanga mamoso tunnunga—muingi ‘tusadisa “baboso badi mintima mikubama”—ava ayi bo lukutukunu lu Mbambukulu Moyo lumvioka.—Mava. 13:48.
SADISA BATU BAVONGA MU KIPHEVI
17. Buidi bakulutu ba kimvuka balenda sadisila batu bavonga mu kiphevi? (Yehezekeli 34:12, 16)
17 Mu thangu Mbambukulu Moyo, buidi bakulutu ba kimvuka balenda sadisila baboso bavonga mu kiphevi? Monisa ti ngie wuba vuanga nkinza. (Tanga Yehezekeli 34:12, 16.) Ava Mbambukulu Moyo, vanga mangolo ma kutumisa bawombu mu bawu. Wuba monisa ti wu kuba zolanga ayi wuba vana lusalusu lumtombulu. Wuba tumisa muingi baba mu Mbambukulu Moyo. Ba kumonika, wuba yamba mu mayangi. Bo Mbambukulu Moyo yimvioka, tatamana kue batalanga ayi wuba vana loso lusalusu luntombulu muingi bavutuka kuidi Yave.—1 Pete. 2:25.
18. Buidi befu boso tulenda sadisila batu bavonga mu kiphevi? (Loma 12:10)
18 Boboso mu kimvuka, balenda sadisa batu bavonga mu kiphevi kulandakana Mbambukulu Moyo. Buidi? Wuba monisa luzolo, mamboti ayi lukinzu. (Tanga Loma 12:10.) Tebuka moyo ti zikhomba aziozio, balenda mona nkaku wu kuvutuka kulandakananga zikhutukunu. Ḿba balenda mona boma boti basinkuiza bayamba ko buboti.e Diawu bika kuba vana biuvu bilenda kuba vanga kumona zitsoni, voti kutuba mambu malenda kuba vongisa. (1 Tesa. 5:11) Batu abobo, badi zikhomba zitu zi kiphevi. Befu tumbanga mu mayangi mu kubue ba yawu va kimueka!—Minku. 119:176; Mava. 20:35.
19. Ndandu mbi tumbakanga mu Mbambukulu Moyo lufua lu Yesu?
19 Tumvutulanga matondo bo Yesu ka tukamba tutebukilanga moyo lufua luandi mu kadika mvu. Ayi tuzebi kibila mbi mawu madidi beni nkinza. Kuvanga mawu, befu ayi bankaka tuala baka ndandu. (Yesa. 48:17, 18) Luzolo luitu mu Yave ayi mu Yesu, lumbuelamanga. Befu tumvutulanga matondo mu mambu bawu ba tuvangila. Tunkindisanga luzolo luitu na zikhomba. Ayi tunsadisanga bankaka buidi balenda bakila ndandu mu khudulu. Diawu, tuvanga mamoso tunnunga muingi tuba bakubama mu Mbambukulu Moyo mu mvu awuwu, mu kilumbu kilutidi nkinza mu mvu!
BUIDI TULENDA KUBIKILA NTIM’ITU . . .
mu Mbambukulu Moyo?
muingi kusadisa bankaka kubaka ndandu mu Mbambukulu Moyo?
muingi kusadisa batu bavonga mu kiphevi?
NKUNGA 18 Vutula Matondo mu Khudulu
a Sadila jw.org muingi wubakula bilongulu ayi zivideo bantubila mu dilongi adidi.
b Tala dilongi “Biuvu bi Mintangi” mu Kibanga ki Nsungi Ngonda Yinna mvu 2021.
c Tala buku Achegue-se a Jeová kapu 23, lutangu. 8-9.
d Tala quadro “Mambu Wulenda Fiongunina.”
e Tala foto ayi quadro “Mambu Mbi Kimvuka Kivanga?” Khomba wuvonga mu kiphevi wummona phasi kukota ku nzo kintinu, vayi wununga mabanza amomo. Nandi banyamba buboti ayi wuzola kuba na zikhomba.
f MAMBU MADI MU ZIFIKULA: Mu kibila ki bilokula biviakana, zikhomba ziwombu mu bibuangu binkaka bo banlandakana Mbambukulu Moyo, zikhomba zinkaka bankubamanga muingi balandakana yawu.