Tsikika Makani Wunkuiza Dukisa mu Thangu Mbambukulu Monho

Kadika mvu, Zimbangi zi Yave banlandakananga va kimueka Mbambukulu Monho Lufua lu Yesu. Mu zisabala ava Mbambukulu Monho voti mu zisabala zinlanda tunsadilanga luaku loso muingi kuzitisa ayi kutonda Yave mu kutuvana nkhailu yi khudulu. (Efe. 1:3, 7) Dedi, tuntumisanga bankaka mu ntima woso mu lukutukunu alolo. Ayi bankaka, balenda ludika mua mambu mu luzingu luawu muingi kuba minsadisi mi mintuami ntuala ayi kuvana 30 voti 50 ma bilokulu mu Ngonda Yintatu voti Yinna. Wuntomba kubuela kukivana mu kisalu ki kusamuna mu thangu ayoyo yi Mbambukulu Monho? Mbi bilenda kusadisa kubaka ndandu?

Tulenda nunga kubuela kukivana befu kukubama buboti. (Zinga. 21:5) Bo thangu yi Mbambukulu Monho yitukizi’abu ko, yawu thangu yifuana muingi kukubama. Mona mbi wulenda vanga muingi kubuela kukivana mu kisalu ki kusamuna mu thangu yi Mbambukulu Monho ayi fiongunina buidi wulenda dukisila makani beni. Ayi dinda Yave kasakumuna mangolo maku.—1 Yoa. 5:14, 15.

Wulenda yindula ziphila wulenda buedila kukivana mu kisalu ki kusamuna mu thangu yi Mbambukulu Monho?