DILONGI 5
NKUNGA 108 Luzolo lu Kuikama lu Nzambi
Buidi Tulenda Bakila Ndandu mu Luzolo lu Yave?
“Yesu Klistu wuyiza va nza, muingi kuvukisa batu ba masumu.” —1 TI. 1:15
MAMBU TUANLOGUKA
Buidi tulenda bakila ndandu mu khudulu ayi buidi tulenda vutudila Yave matondo.
1. Mbi tulenda vanga muingi kubika Yave mu mayangi?
YINDULA boti ngie mavana nkhailu kuidi mutu wunzolanga. Vayi wunkuiza nyonga beni ngie kubakula ti, nandi wusueka nkhailu wumvana ayi ti kasa wuvua ko nkinza. Mbi mawu matulonga? Yave wuvana Muan’andi muingi kufua mu kibila kitu. Tuidi lufiatu ti Nandi wumbanga mu mayangi bo tu kuntondanga mu luzolo ka tumonisa, mu nkhailu wu khudulu ka tuvana.—Yoa. 3:16; Lom. 5:7, 8.
2. Mbi tunkuiza longuka mu dilongi adidi?
2 Bumviokila thangu, luvalu tummonisanga mu khudulu lulenda dekuka. Ma kumonika, madi buka befu tuntula nkhailu Yave katuvana, va kibuangu kio tulendi ku wumuena ko. Muingi mabika kumonika, tufueti tatamana kuvutulanga matondo mu mambu Yave ayi Yesu ba tuvangila. Dilongi adidi dinkuiza tusadisa kuvanga mawu. Tunkuiza mona buidi bu kubakila ndandu mu khudulu bubu ayi mu bilumbu binkuiza kuntuala. Mvandi tunkuiza mona buidi tulenda monisina ti tumvuanga nkinza luzolo lu Yave, bulutidi mu thangu Mbambukulu Moyo.
NDANDU TUMBAKANGA BUBU
3. Ndandu mbi tumbakanga bubu mu nkhailu wu khudulu?
3 Befu tumbakanga ndandu mu nkhailu wu khudulu Yesu. Dedi mu nzila khudulu, Yave wunlemvukilanga masumu mitu. Nandi kasi ko mu lukuiku muingi ku tulemvukila, vayi wumvanganga mawu. Nsoniki wu minkunga wutuba: ‘Yave, widi nkua mamboti ayi widi wukubama muingi kulemvukila.’—Minku. 86:5; 103:3, 10-13.
4. Kuidi banani Yave kavana khudulu? (Luka 5:32; 1 Timoti 1:15)
4 Bankaka bammuenanga ti, basi ko bafuana muingi kutambula nlemvu wu Yave. Vayi befu boso tuisi ko bafuana. Mvuala Polo wuvisa ti kasa ba “ko wufuana muingi kutedulu apostolo.” Ayi wu bue tuba: “Mu kibila ki mamboti malutidi ma Nzambi, diawu yididi kiyeku akiki.” (1 Ko. 15:9, 10) Bo tunyongina masumu mitu, Yave wu tulemvukilanga. Kibila mbi? Bakana ko ti, tuidi bafuana muingi kutambula nlemvu, vayi mu kibila ki luzolo luandi. Boti wuyimuena ti wisi ko wufuana muingi kutambula nlemvu wu Yave, tebuka moyo ti Yave kasa vana ko khudulu kuidi batu bavedila vayi kuidi batu ba masumu.—Tanga Luka 5:32; 1 Timoti 1:15.
5. Nani mu befu kalenda yindula ti widi wufuana muingi kutambula nlemvu wu Yave? Sudikisa.
5 Tulendi tuba ko ti bo tueka mimvu miwombo mu kusadila Yave, buna tuidi bafuana muingi kutambula nlemvu’andi. Bukiedika, Yave wumvuanga nkinza lukuikumunu luitu. (Ebe. 6:10) Nandi wuvana Muan’andi bakana ko muingi kufuta kisalu tumvanganga kuidi nandi. Diawu didi diambu dimbi kuyindula ti bo tumvanga mambu mawombo kuidi Yave, buna widi mu lukuiku lu ku tulemvukila. Boti buawu, buna mawu mammonisa ti tuisintomba ko khudulu.—Dedikisa mawu na Ngalatia 2:21.
6. Kibila mbi Polo kakivanina beni mu kisalu ki Yave?
6 Polo wuzaba ti kasa ba ko wufuana muingi kutambula lunungu lu Yave. Vayi kibila mbi ka kivanina beni mu kisalu ki Yave? Nandi kavangila mawu muingi kutonda mu mamboti ayi nlemvu, Yave kammonisa. (Efe. 3:7) Dedi Polo, befu tuntatamananga kusadila Yave mu kifuza, bakana ko ti tuidi bafuana muingi kutambula nlemvu’andi, vayi muingi kumvutudila matondo.
7. Ndandu mbi yinkaka tumbakanga mu khudulu bubu? (Loma 5:1; Tiagu 2:23)
7 Ndandu yinkaka tumbakanga mu khudulu bubu yidi, kuba kikundi kifikama na Yave.a Dedi bumonisini dilongi dibedi, befu tusa butuka ko na kikundi na Nzambi. Vayi mu kibila ki khudulu, befu tuidi ‘ndembama na Nzambi’ ayi kikundi kifikama.—Tanga Loma 5:1; Tiagu 2:23.
8. Kibila mbi tumvutudilanga Yave matondo mu luaku lu kusambila?
8 Kusambila kuidi Yave didi diambu dinkinza befu tulenda vanga—muingi kuba kikundi kifikama ayi nandi. Yave kayuwanga ko to minsambu tumvanganga mu dingumba vayi mvandi wunkuwanga minsambu kadika mutu mu befu kamvanganga. Bo tunsambila, befu tumbanga bavumbama. Vayi ayoyo, yisi ko to yawu ndandu tumbakanga mu nsambu. Kibila nsambu wunkindisanga kikundi kitu na Nzambi. (Minku. 65:2; Tia. 4:8; 1 Yoa. 5:14) Bo kaba va ntoto, Yesu wusambila khumbu ziwombo kibila wuzaba ti Yave waba kunkuwanga. Mvandi wuzaba ti nsambu wuvanga kikundi kiandi na Tat’andi kiluta ba kingolo. (Luk. 5:16) Kuvutulanga matondo mu khudulu Yesu, kulenda tuvanga kuba bakundi ba Yave ayi kukoluka yandi mu nzila nsambu!
NDANDU TUALA BAKA MU BILUMBU BINKUIZA
9. Buidi khudulu yala tuadisila ndandu kuidi bisadi bikuikama bi Yave?
9 Ndandu mbi bisadi bikuikama bi Yave bala baka mu bilumbu binkuiza kuntuala mu kibila ki khudulu? Nandi wala ku bavana luaku lu kuzinga mvu ka mvu. Vayi batu bawombo banyindulanga ti, batu balendi zinga ko mvu ka mvu. Kibila kadika kilumbu batu bantatamananga kufua. Vayi lukanu lu Yave kuidi batu luba, kuzinga mvu ka mvu. Boti Adami kasa sumuka ko, khanu tuisi ko kibila ki kubela kivuvu ki kuzinga mvu ka mvu. Kheti didi diambu diphasi kukikinina bubu kuzinga mvu ka mvu, vayi tulenda kikinina ti mawu madi makiedika, kibila tuzebi ti Yave wufuta thalu yinangama—luzingu lu Muan’andi muingi mambu amomo masalama.—Lom. 8:32.
10. Kivuvu mbi Baklistu basolu ayi mamemi mankaka badi?
10 Kheti kuzinga mvu ka mvu yidi ndandu tuala tambula mu bilumbu binkuiza kuntuala, Yave kantomba befu tuyindulanga mawu bubu. Baklistu basolu badi kivuvu ki kukuenda ku diyilu, bamvingila thangu bala yala na Klistu va ntoto. (Nzai. 20:6) Mamemi mankaka badi kivuvu ki kuzinga ku paladizu va ntoto, mu khambu tovuka ayi kufua. (Nzai. 21:3, 4) Ngie widi wumueka mu mamemi mankaka badi kivuvu ki kuzinga mvu ka mvu va ntoto? Boti buawu, bika kuyindula ti kivuvu ki kuzinga ku diyilu kiawu kilutidi. Kibila Yave katuvangila muingi kuzinga va ntoto, diawu luzingu lu mvu ka mvu, luala tuadisa mayangi makiedika.
11-12. Lusakumunu mbi tuala tambula ku paladizu? (Tala mvandi fikula.)
11 Yindula ntindu luzingu wala ba ku Paladizu va ntoto. Ngie walasa bue kuazuka ko mu kibila ki kimbevo ayi lufua. (Yesa. 25:8; 33:24) Yave wala dukisa zitsatu ziaku zioso. Dedi, kulonguka matedi bibulu, kusika bisiku bi minkunga voti kulonguka kuvanga mambu mankaka. Mvandi wala tomba lusalusu lu bankaka, muingi kutunga nzo, kukubika bibia, kuvanga biuma binkaka bi kusadila ayi kukieba paladizu. (Yesa. 35:1; 65:21) Bo wala zinga mvu ka mvu, ngie wala baka luaku lu kulonguka biuma bioso wuntomba.
12 Yindula mayangi tuala baka, kutambula batu bala vulubuka. (Mav. 24:15) Yindula mvandi mayangi tuala luta mona, mu kulonguka matedi Yave ayi bivangu biandi. (Minku. 104:24; Yesa. 11:9) Bulutidi mu mamoso, kuzaba ti tuala zinga mu khambu kubue vanga ni diambu dimbi. Ngie wunkuiza bika “zinyenzi zi mua thangu zi masumu,” zi kutula nkaku kutambula lusakumunu alolo? (Ebe. 11:25) Bukiedika ti ndamba! Lusakumunu alolo lulutidi kena mosokua mangolo tulenda vanga bubu. Tebuka moyo ti, ku paladizu va ntoto, tualasa tombulu ko kuba kivuvu. Kibila mamoso mala salama. Boti Yave kasa vana ko khudulu yi Muan’andi, khanu mambu moso amomo malasa salama ko.
Lusakumunu mbi ngie wunluta vingila ku Paladizu? (Tala lutangu 11-12)
VUTULA MATONDO MU LUZOLO LU YAVE
13. Buidi tulenda vutudila matondo mu luzolo lu Yave? (2 Kolintu 6:1)
13 Buidi tulenda vutudila matondo mu khudulu Yave ka tuvana? Mu kutula va theti kisalu kiandi mu luzingu luitu. (Mat. 6:33) Yesu wufua “muingi batu banzinga babika zingila muingi kuyikuangidika baveka, vayi muingi kukuangidika mutu no wufuila mu kibila kiawu, no bavulubusa.” (2 Ko. 5:15) Befu tusintomba ko kuzimbisa mamboti ma Yave tukhambu fuana mu kutambula.—Tanga 2 Kolintu 6:1.
14. Phila mbi yinkaka tulenda vutudila matondo?
14 Mvandi tulenda vutula matondo mu luzolo lu Yave, mu kulandakananga zithuadusulu ziandi. Buidi? Bo tumbaka makani matedi kikola voti ntindu kisalu, befu tumfionguninanga mambu Yave kantomba tuvanga. (1 Ko. 10:31; 2 Ko. 5:7) Bo tumbaka makani mammonisa kiminu kitu mu Yave, kikundi kitu ayi nandi kimbuelamanga. Ayi kivuvu kitu ki kuzinga mvu ka mvu kinluta banga ki kiedika.—Lom. 5:3-5; Tia. 2:21, 22.
15. Buidi tulenda monisina ti tumvuanga nkinza kilumbu ki Mbambukulu Moyo?
15 Phila yinkaka tulenda vutudila matondo mu luzolo lu Yave yidi, mu kuvanga mamoso tulenda nunga muingi kutumisa batu bankaka baba yitu mu Mbambukulu Moyo. (1 Ti. 2:4) Ayi mvandi kuba sudikisa mambu mala vangama mu thangu Mbambukulu Moyo. Mvandi tulenda kuba monisa zivideo zidi mu jw.org zintuba: Kibila Mbi Yesu Kafwila? ayi Mbambukulu Moyo Lufwa lu Yesu. Bakulutu ba kimvuka, bafueti vanga mamoso muingi kutumisa batu bavonga mu kiphevi. Yindula mayangi mambanga ku diyilu ayi va ntoto, bo mamemi mankaka ma Yave mazimbala bamvutuka mu kimvuka kiandi! (Luk. 15:4-7) Mu Mbambukulu Moyo bika to kubila zikhomba, vayi mvandi batu bamona ayi bo basiala bue landakananga ko zikhutukunu mu thangu yiwombo. Befu tufueti kuba yamba buboti!—Lom. 12:13.
16. Kibila mbi fueti buela ku kivanina mu kisalu ki kusamuna mu thangu Mbambukulu Moyo?
16 Buidi wummuena, kubuela kukivana mu kisalu ki kusamuna mu thangu Mbambukulu Moyo? Kuvanga mawu yidi phila yi kuvutudila matondo kuidi Nzambi ayi Yesu mu mambu ba tuvangila. Bo tumbuela ku kivana mu kisalu ki Yave, buawu tuala luta bakila lusalusu luandi ayi lufiatu luitu mu nandi luala luta kinda. (1 Ko. 3:9) Landakana matangu ma Kibibila ma Mbambukulu Moyo madi mu mua buku, Fiongunina Matangu ma Kibibila Kadika Kilumbu voti mu Thuadusulu yi Zikhutukunu. Mvandi wulenda sadila matangu amomo mu ndongukulu’aku yi Kibibila.
17. Mambu mbi mantuadisanga mayangi kuidi Yave? (Tala mvandi quadro yintuba: “Ziphila zi Kuvutudila Matondo mu Luzolo lu Yave.”)
17 Ḿba mu kibila ki mambu widi mu kuviokila, wisi ko bu kuvangila mamoso tuma tubila mu dilongi adidi. Tebuka moyo ti Yave kadedikisanga ko kisalu kitu, na kisalu ki bankaka. Vayi nandi wumvuanga nkinza luzolo widi mu nandi. Yave wumbanga mu mayangi bo kammona ti ngie wumvutulanga matondo mu nkhailu wu khudulu.—1 Samu. 16:7; Mala. 12:41-44.
18. Kibila mbi tufueti vutudilanga matondo kuidi Yave Nzambi ayi Yesu Klistu?
18 Mu kibila ki khudulu befu tuntambulanga nlemvu wu masumu, tuidi kikundi na Yave ayi kivuvu ki kuzinga mvu ka mvu. Luzolo, luawu luvanga Yave ku tuvana lusakumunu alolo. Diawu tufueti kumvutudilanga matondo. (1 Yoa. 4:19) Mvandi tufueti vutulanga matondo kuidi Yesu, mu luzolo ka tumonisa mu kuvana luzingu luandi mu kibila kitu.—Yoa. 15:13.
NKUNGA 154 Luzolo Lusukanga ko