Landakana Kifuani ki Yave —Ki Kuba Mayindu Mafuana

1. Mu phila mbi Baklistu bafueti bela banga nti? (Tala mvandi fikula.)

“PHEMU yilendi kelula ko nti widi mu kudemba.” Ngana ayoyo yimonisa ti minti mifueti kondalala bo kumvanga phemu yingolo, muingi mibika bua. Befu mvitu tufueti ba bakubama muingi kolama bo mambu mambaluka mu luzingu luitu, muingi tutatamana kusadila Yave mu mayangi. Buidi? Mu kuba mayindu mafuana ayi kukinzika mayindu ma bankaka bo mambu mambaluka mu luzingu.

2. Zikhadulu mbi ziala tusadisa kukolama bo mambu mambaluka mu luzingu ayi mbi tunkuiza longuka mu dilongi adidi?

² Mu kuba bisadi bi Yave, tuntomba kuba mayindu mafuana. Mvandi, tuntomba kukikulula ayi kumonanga kiadi. Mu dilongi adidi tunkuiza mona buidi zikhadulu aziozio zisadisila Baklistu, bo mambu mabaluka mu luzingu luawu. Mvandi tunkuiza mona buidi zikhadulu aziozio, zilenda tusadisila. Vayi theti, tuenlonguka buidi Yave ayi Yesu badidi kifuani kimboti matedi kuba mayindu mafuana.

YAVE AYI YESU BADI MAYINDU MAFUANA

3. Bivisa mbi tuidi ti Yave widi mayindu mafuana?

³ Yave bakuntedilanga “Thadi” kibila nandi widi wukuikama ayi kabalukanga ko. (Deute. 32:4) Ayi mvandi widi mayindu mafuana. Bumviokila thangu, Yave mvandi wutatamana kubalula mayindu mandi muingi luzolo luandi luvangama. Yave wuvanga batu mu kifuani kiandi ayi wu tuvanga muingi tununga kukolama bo mambu mambaluka mu luzingu luitu. Nandi wu tuvananga minsua misulama mi Kibibila muingi tubaka makani ma nduenga ayi tununga kheti mu mambu maphasi tuidi mu kuviokila. Kifuani ki Yave ayi minsua ka tuvananga midi bivisa ti kheti bakuntedilanga “Thadi,” vayi mvandi widi mayindu mafuana.

4. Vana kifuani kimmonisa ti Yave widi mayindu mafuana. (Levitiku 5:7, 11)

⁴ Zinzila zi Yave zidi zisonga ayi zifuana. Nandi kakuikanga ko batu bavangila mambu mu phil’andi. Mona buidi Yave kamonisina kuba mayindu mafuana kuidi basi Isaeli. Nandi kasa bakuikanga muingi baboso bavana minkhailu mu phila yimueka. Ayi khumbu zinkaka Yave, waba bikanga muingi kadika mutu mu bawu, kavana nkhailu mu kutadila mbakulu’awu.—Tanga Levitiku 5:7, 11.

5. Vana kifuani kimmonisa ti Yave wukikululanga ayi wummonanga kiadi.

⁵ Yave wukikululanga ayi wummonanga kiadi. Zikhadulu aziozio, zikumvanganga kuba mayindu mafuana. Dedi, Yave wumonisa ti wukikululanga, bo kabaka makani ma kutulula divula di Sodoma. Mu nzila zimbasi ziandi, Yave wukamba Loti muingi katina ku miongo. Vayi Loti wumona boma bu kukuenda kuna. Diawu Loti kadindila Yave nsua muingi nandi ayi dikanda diandi batina ku divula baba tedilanga Zoali. Divula beni diba diluelu ayi diba mu khati divula Yave kabaka makani ma kutulula. Diawu Yave khanu wukuika Loti muingi kalandakana mambu moso kankamba. Vayi masi ko mawu kavanga. Kibila Yave wumvana luaku muingi kenda ku divula beni di Zoali, kheti maba sundula kubika kubue tulula divula beni. (Ngene. 19:18-22) Mimvu miwombo kuntuala, Yave wumonisa kiadi kuidi basi Ninive. Nandi wufila mbikudi Yona muingi ke zabikisa tsangu ti divula beni, dinkuiza tuluka. Vayi, bo basi Ninive manhongina masumu mawu, Yave wuba mona kiadi ayi kasa be tulula ko divula beni.—Yona 3:1, 10; 4:10, 11.

6. Buidi Yesu kaladikinina kifuani ki Yave mu kuba mayindu mafuana.

⁶ Yesu wulandakana kifuani ki Yave mu kuba mayindu mafuana. Yave wumfila va ntoto muingi kusamuna kuidi “mamemi mazimbala ma basi Isaeli.” Ayi Yesu wumonisa ti wuba mayindu mafuana mu kukieba buboti kiyeku kiandi. Khumbu yimueka, nkietu wumueka kasa ba ko musi Isaeli, wunlomba muingi kabelusa muan’andi wuba “ziphevi zimbi.” Ayi mu kuba kiadi, Yesu wubelusa muana wu nkietu beni. (Matai 15:21-28) Tala kifuani kinkaka. Va thonono kisalu kiandi ki kusamuna Yesu wutuba: “Noso wukumbanga . . . , Mvandi yala kummanga.” (Matai 10:33) Vayi bukiedika ti Yesu wumanga mvuala Petelo bo kammanga mu zikhumbu zitatu? Ndamba. Kibila, Yesu wusikika thalu mu zikhadulu zimboti zi Petelo dedi bo nandi kanhongina mambu kavanga ayi kiminu kiandi. Bo bamvulubusa, Yesu wumonikina Petelo ayi wunkamba ti wunlemvukila ayi ti waba kunzolanga.—Luka 24:33, 34.

7. Dedi bummonisina Filipi 4:5, buidi tuntomba kubela bazabakana?

⁷ Befu tuma mona ti Yave ayi Yesu badi mayindu mafuana. Abu befu? Yave mvandi wuntomba muingi tuba mayindu mafuana. (Tanga Filipi 4:5.) Tsekudulu yimueka yisekudila abubu matangu amama: “Kuba wuzabakana dedi mutu widi mayindu mafuana.” Befu tulenda kukikuvusa: ‘Bukiedika ti batu ba kumbonanga ti yidi mutu widi mayindu mafuana ayi zebi kukiyala? Voti bawu bakumbonanga dedi mutu widi lukasu, nganzi ayi widi phasi mu kuba yandi va kimueka? Bukiedika ti yinkuikanga bankaka bavangila to mambu mu phila minu yintombila? Bukiedika ti minu yinkuwanga ayi yimvuanga nkinza mayindu ma bankaka?’ Befu kumonisa ti tuidi mayindu mafuana, tunkuiza landakana kifuani ki Yave ayi ki Yesu. Ndoku tumona mambu muadi matedi kuba mayindu mafuana:—bo mambu mambaluka mu luzingu luitu ayi bo mayidu mitu madi maviakana na mayindu ma bankaka.

BA MAYINDU MAFUANA BO MAMBU MAMBALUKA

8. Mbi bilenda kutusadisa kuba mayindu mafuana bo mambu mambaluka mu luzingu luitu? (Tala mvandi nota.)

⁸ Vantombuluanga kuba mayindu mafuana bo mambu mambaluka. Ayi bo mambu mambaluka, tulenda viokila mu mambu mawombo maphasi tuaba khambu yindulanga. Ayi mambu beni malenda ba, kimbevu kingolo, kukhambu ku zimbongo ayi bo mintinu bantomba ku tutula nkaku muingi kubuongimina Yave. (Mpovi 9:11; 1 Koli. 7:31) Mvandi, bo mambu mambaluka mu kimvuka voti bo biyeku bitu bimbaluka, bilenda ku tuvanga kuba mu kiunda. Kheti mambu malenda baluka, vayi tulenda nunga befu kuvanga mambu amama: (1) Kuvitika mambu mabe baluka (2) kutsikika thalu mu mambu mankuiza kuntuala, (3) kutebuka moyo mambu mamboti madi mu kumonika mu luzingu luaku (4) kusadisa bankaka.b Ndoku tufiongunina bifuani bi batu balandakana mambu amomo.

9. Buidi bakuela bamueka badi mu kisalu ki misioni banungina bo mambu mabaluka?

⁹ Vitika mambu mabe baluka. Yaya Emanuele ayi yaya Francesca batambula kiyeku ki kuba misioni ku tsi yinkaka. Bo batona kulonguka mbembu yimona mu kimvuka kimona, kivunga ki COVID-19 kitona ayi zikhomba babasa bue kutakananga ko va kimueka. Kiadi ayi kiunda kuzaba ti mu thangu beni ngudi yi yaya Francesca wuyiza fua. Diawu nandi waba tomba kuba va kimueka na basi dikanda, vayi mu kibila ki kivunga, kasa nunga ko kuvanga viage muingi kuba kuna. Vayi mbi biba sadisa kununga mambu amomo mu kibakala? Theti, yaya Emanuele ayi yaya Francesca basambila va kimueka muingi babaka nduenga ayi babika kukuazuka beni. Ayi Yave wutambudila minsambu miawu mu kuba vana khindusulu yi kiphevi muingi batatamana kununga mu kibakala. Dedi, babaka khindusulu mu mambu khomba mueka katuba mu video, khomba beni wutuba: “Befu kufika vitika bo mambu mambaluka mu luzingu luitu, disinkuiza ba ko phasi kuvutuka kuba mayangi ayi kununga kuvanga mambu moso tunnunga mu kiyeku kitu kimona.”c Dimmuadi, babaka makani ma kubuela pisuka mu kuvana kimbangi mu telefoni ayi kutona ndongukulu yi Kibibila. Dintatu, mu luzolo bavitika mbombolo ayi lusalusu batambula kuidi zikhomba. Ayi khomba mueka yinkietu waba kuba filanga minkanda mikhindusulu kadika kilumbu mu mvu beni. Bobuawu mvandi, befu kuvitika bo mambu mambaluka mu luzingu luitu, buawu tunkuiza luta bakila ndandu ayi mayangi mu mambu tunnunga kuvanga.

10. Buidi Yaya Christina kayolimina kheti bo mambu mabaluka?

¹⁰ Sikika thalu mu mambu mankuiza kuntuala ayi ba mayindu mafuana. Yaya Christina musi Romênia wunkalanga ku Japão, wuba mu kiunda bo bazibika kimvuka kaba ki kingelesu. Vayi kheti mu kiunda kaba, nandi kasa sikika ko thalu kumbusa, vayi wubaka makani ma kuvanga mambu moso maba tombulu muingi kulonguka mbembu yi Japonês ayi wuvitika kiyeku kimona bamvana ki kukuenda ku kimvuka kimona ki Japonês ayi wusamuna mu kifuza mu mbembu beni. Ayi wudinda nkietu wumueka waba salanga yandi muingi kansadisa kabuela longuka mbembu beni. Muingi kunlonga, nkietu beni wuvitika muingi basadila mua buku Baka Mayangi ma Mvu ka Mvu! muingi kusadisa yaya Christina kazaba buboti mbembu yi Japonês. Mawu mavanga yaya Christina kubuela pisuka mu mbembu yi Japonês ayi nkieto beni mvandi wutona kuvua nkinza kiedika. Befu kusikika thalu kuntuala kheti bo mambu mambaluka ayi kuba mayindu mafuana, tulenda tambula lusakumunu tuaba khambu yindula kutambula.

11. Buidi bakuela bamueka manungina mambu bawu baba viokila matedi kukhambu ku zimbongo?

¹¹ Sadisa bankaka. Bakuela bamueka bankalanga ku tsi bakandimina kisalu kitu batona kuviokila mu tsatu matedi kukhambulu ko zimbongo bo mambu mabaluka ku tsi’awu. Buidi bawu bayiza yolimina? Theti, bawu banata luzingu lukhambulu kikhafi. Bosi basikika thalu muingi kusadisa bankaka ayi babuela kifuza mu kisalu ki kusamuna, kubika kuandi kutsikika mu mambu bawu baba viokila. (Mava. 20:35) Nnuni’andi wutuba: “Kubuela kukivana mu kisalu ki kusumuna kutu sadisa muingi tubika tsikika thalu mu mayindu makhambu fuana vayi mu kuvanga luzolo lu Yave.” Bo mambu mu luzingu luitu mambaluka, tufueti tatamananga kutebuka monyo nkinza wu kusadisa bankaka, bulutidi bo tumvanga kisalu ki kusamuna.

12. Buidi kifuani ki mvuala Polo kilenda ku tusadisa kuba mayindu mafuana mu kisalu ki kusamuna?

¹² Tufueti ba mayindu mafuana mu kisalu ki kusamuna. Kibila tuidi luaku lu kuzaba batu bawombu badi binganga, zikhadulu ayi mimvila voti bikhulu biviakana. Ayi befu tulenda landakana kifuani ki mvuala Polo kibila nandi wuba mayindu mafuana. Ayi Yesu, wumvana kiyeku ki kuba “mvuala wu mimvila minkaka.” (Loma 11:13) Mu kiyeku katambula, mvuala Polo wusamuna kuidi basi Yuda, basi Ngeleku, batu ba luzabu, batu bakhambulu beni mbakulu ayi mintinu. Muingi kunhikuna mintima mi batu baba bikhulu biviakana, mvuala Polo wuyiza ba “Biuma bioso kuidi batu ba ziphila zioso.” (1 Koli. 9:19-23) Mvuala Polo wubotula thangu muingi kuyindula mu batu kaba samuna ayi mambu bawu baba kikininanga mu binganga biawu. Kuvanga mawu kunsadisa kuba mayindu mafuana ayi kusamuna mu phila maba nhikunanga mintima miawu. Mvitu tulenda baka ndandu mu kisalu ki kusamuna, befu kubotula thangu muingi kuyindula mu zitsatu zi batu tunsamuna.

KINZIKA MAYINDU MA BANKAKA

13. Ntambu mbi widi mu 1 Kolintu 8:9 tulenda bika befu kukinzika mayindu ma bankaka?

¹³ Kuba mayindu mafuana kunkuiza tusadisa mvandi kukinzikanga mayindu ma batu bankaka. Dedi, ḿba khomba wumueka wunkieto wunzolanga kuvanga makiagi vayi wunkaka ndamba. Voti khomba wu dibakala wunzolanga kunua malavu mu kitesu kifuana, vayi wunkaka ndamba. Baklistu boso banzolanga kuba buvinha bumboti, vayi kadika mutu mu bawu wunsolanga mintindu miviakana mi mbukulu. Befu kuba kifu ki kuyindulanga ti befu tunnunga mu mambu moso, tulenda tona kukuika zikhomba zitu, muingi bavanga mambu mu phil’itu. Ayi mawu malenda buisa zikhomba zitu zi kiphevi ayi kutuadisa luvasanu mu kimvuka. Bukiedika, befu tuisintomba ko mambu amomo mamonika. (Tanga 1 Kolintu 8:9; 10:23, 24) Ndoku tutubila bifuani biodi, bi tumonisa buidi kusadila minsua mi Kibibila milenda ku tusadisila kuba mayindu mafuana ayi kutatamana kutuadisa ndembama.

14. Minsua mbi mi Kibibila mifueti ku tutuadisa matedi phuatulu ayi phila tumvangilanga minlengi?

¹⁴ Phuatulu ayi phila yi kuvangila minlengi. Mu luzolo,Yave kasa sikika ko mintindu mi bikhutu tufueti vuata. Vayi tufueti vuatila mu phila yifuana yi Baklistu, mu kuvuatila mu phila yimboti, mu kukikulula ayi mu “lukinzu.” (1 Timo. 2:9, 10; 1 Pete. 3:3) Kibila tuisintomba ko batu ba tutadila mu phila yikhambu fuana mu kibila ki phuatulu’itu. Ayi zithuadusulu zi Kibibila zinsadisanga mvandi bakulutu ba kimvuka muingi babika sikika minsiku matedi phuatulu ayi phila yi kuvangila minlengi. Dedi bakulutu ba kimvuka kimueka, baba tomba kusadisa zikhomba zi matoku mu kimvuka baba landakananga kifuani ki batu mu nza mu phila yi kuvangila minlengi. Vayi buidi bakulutu balenda sadisila zikhomba aziozio zi matoko, mu khambu sikika minsuku? Nkengididi wumueka wu bimvuka wuvana malongi kuidi bakulutu ba kimvuka beni mu phila balenda kuba sadisila. Nandi wutuba: “Boti ngiewu widi vama vadi batu bawombu, vayi batu banluta tsikika thalu mu phila bevuatila kubika mu mambu widi mu kutuba, buna ngie wusa vuatila ko mu phila yimboti ayi wufueti fiongunina phuatulu’aku.” Kifuani akiokio nkengididi wu bimvuka kasadila, kisadisa bakulu ba kimvuka kusadisa zikhomba aziozio zi matoku mukhambu tsikika minsiku.d

15. Minsiku mbi ayi minsua mbi milenda kututuadisa matedi mbukulu? (Loma 14:5)

¹⁵ Mintindu mi mbukulu. Mu kuba Baklistu, kadika mutu mu befu kafueti baka makani mandi veka matedi buidi bu kukiebila buvinha buandi. (Ngala. 6:5). Kibibila kimvana to mua minsiku matedi buvinha buitu mu mambu matedi kusadila menga ayi bundoki. (Mava. 15:20; Ngala. 5:19, 20). Vayi mu mambu mankaka matedi buvinha, kadika khomba widi luaku lu kusola. Mu kutadila matedi makani, khomba wunkaka kalenda sola kutomba zidotoli muingi kubuela zaba matedi buidi bu kukiebila buvinha buandi, vayi wunkaka kalenda sola kuandi ziphila zinkaka. Tulendi kuika ko bankaka muingi bavitika ntindu mbukulu befu tube sola. Vayi tufueti kinzika makani ma zikhomba zitu matedi mambu amomo. Ayi muingi tununga kuvanga mawu, tufueti yindula mu mambu amama: (1) Kintinu ki Yave to kiala tuala buvinha buala kadidila. (Yesa. 33:24) (2) Kadika khomba “kafueti ba lufiatu” ti mambu nandi kabe sola mawu malutidi. (Tanga Loma 14:5.) (3) Tulendi fundisa ko bankaka matedi makani mawu, ayi tuinsintomba ko kuvanga ni kiuma kilenda kuba vanga kusumuka. (Loma 14:13) (4) Mu luzolo, Baklistu boso bazebi ti dilutidi nkinza kutuadisa ndembama kena kutula makani mandi va theti. (Loma 14:15, 19, 20) Befu kutatamana kuyindula mu mambu amama, tunkuiza tatamana kutuadisa kikundi kifikama na zikhomba zitu ayi kutuadisa ndembama mu kimvuka.

16. Buidi nkulutu wu kimvuka kalenda monisina ti widi mayindu mafuana bo bambaka makani na bakulutu bankaka? (Tala mvandi foto.)

¹⁶ Bakulutu ba kimvuka, bafueti vana kifuani kimbote matedi kuba mayindu mafuana. (1 Timo. 3:2, 3) Kuba ntuadisi mu dingumba di bakulutu ba kimvuka, kuisinsundula ko kukuika bakulutu bankaka balandakana to makani mandi. Kibila nandi zebi ti phevi yinlongo yi Yave yilenda tuadisa woso kua khomba mu bakulutu muingi kubaka makani mamboti ayi ma nduenga mankuiza tuadisa ndandu kuidi baboso. Ayi boti makani beni masinlevula ko minsua mi Kibibila, nkulutu wu kimvuka widi mayindu mafuana, wunkuiza buela mioko makani beni kheti mawu madi disuasana na makani mandi.

NDANDU TUMBAKANGA MU KUBA MAYINDU MAFUANA

17. Lusakumunu mbi Baklistu badi mayindu mafuana bantambulanga?

¹⁷ Baklistu bantambulanga lusakumunu luwombu mu kuba mayindu mafuana. Kuvanga mawu ku tusadisanga muingi tuba bakundi bamboti ayi kutuadisa ndembama ayi mayangi. Befu tunzolanga kusadila Yave na zikhomba badi zikhadulu ayi bikhulu biviakana. Ayi tunyitukanga beni kuzaba ti kheti tuidi disuasana, tumbuongiminanga Yave mu kithuadi. Ayi bulutidi, tumbakanga ndandu mu kuzaba ti tunlandakananga kifuani ki Yave mu kuba mayindu mafuana.