Mbi Tulenda Longuka mu Mikanda Miodi mi Petelo?

1. Mbi mvuala Petelo katuadusu muingi kuvanga ava kafua?

MVUALA Petelo wuzaba ti waba belama kufua. Nandi wudiata va kimueka ayi Yesu, wutatamana wukuikama mu mimvu miwombu, wuvanga minlonguki mu kisalu ki kusamuna ayi wuba wumueka mu dingumba di ntuadisi. Vayi kisalu ki Petelo kisa mana ko. Mu mvu 62-64 T.K., nandi wutuadusu mu phevi yinlongo muingi kusonika nkanda 1 Petelo ayi 2 Petelo. Nandi wuba lufiatu ti minkanda amiomio, miala sadisa Baklistu.—2 Pete. 1:​12-15.

2. Ndandu mbi Baklistu babaka mu minkanda Petelo kasonika?

² Petelo wusonika minkanda amiomio bo zikhomba baba ‘viokila mu ziphasi.’ (1 Pete. 1:6) Bankua mambi, bakotisa malongi maluvunu ayi mavanga mawu mambi mu khati kimvuka ki Baklistu. (2 Pete. 2:​1, 2, 14) Baklistu ku Yelusalemi baba zingila mu ‘bilumbu bitsuka,’ kibila divula adiodio baba belama ku ditulula kuidi masodi ma basi Loma. (1 Pete. 4:7) Bukiedika, minkanda mi Petelo misadisa Baklistu batatamana bakuikama kheti mu mambu ma phasi baba viokila ayi kukubama mu ziphasi bala monikina ku ntuala.b

3. Kibila mbi tufueti fiongunina minkanda Petelo kasonika?

³ Kheti mvuala Petelo wusonikina minkanda amiomio, kuidi Baklistu mu sekulu yitheti, vayi Yave wubika muingi miawu miba mu Kibibila. Ayi tulenda baka ndandu mu minkanda amiomio. (Loma 15:4) Dedi Baklistu abobo, befu mvitu tumviokilanga mu zithotolo zilenda kututula nkaku wu kusadila Yave. Mvandi tuambelama kuvikokila mu ziphasi zingolo, zilutidi kena zio basi Yuda baviokila. Mu minkanda mi Petelo, muidi zindubu zinkinza zi tusadisa kutatamana bakuikama nati mu kilumbu ki Yave, kununga boma bu batu ayi kukuna luzolo luwombu kuidi bankaka.

TATAMANA KUVIBIDILA

4. Dedi bummonisina 2 Petelo 3:​3, 4, mbi bilenda thota kiminu kitu?

⁴ Befu tunzingilanga va khati batu bakhambulu kiminu mu zimbikudulu zi Kibibila. Mimvuezi ba tuvuezanga, kibila tunlubulanga mu mimvu miwombu tsukulu yi nza. Ayi bawu bantubanga ti tsukulu ayoyo, yalasa kuiza ko. (Tanga 2 Petelo 3:​3, 4.) Musi dikanda, mutu wunkotanga yitu kikola ove wunsalanga yitu, na kutukamba mambu amomo, mawu malenda thota kiminu kitu. Ayi mvuala Petelo, wusudikisa mbi biala tusadisa mu mambu amomo.

5. Mbi bilenda kutusadisa kutatamana bakuikama nati kutsuka? (2 Petelo 3:​8, 9)

⁵ Batu bankaka balenda yindula ti Yave widi mu kukala beni kisina muingi kutulula nza ayiyi yi mambi. Vayi mambu Petelo katuba, ma tusadisa kuvibidila mu phila yifuana ayi kutebuka moyo ti phila Yave kantadilanga thangu yidi disuasana ayi befu batu. (Tanga 2 Petelo 3:​8, 9.) Kiveve ki mimvu kuidi Yave, kidi buka kilumbu kimueka. Nandi widi mvibudulu ayi kasintomba ko ni mutu kabungua vayi bo kilumbu kiandi kiala fuana, nandi wala bunga nza ayiyi. Bukiedika, luaku lunneni tuidi muingi kuvana kimbangi kuidi batu boso mu nza.

6. Mbi bilenda kutusadisa ‘kutatamana kuyindula’ matedi kilumbu ki Yave? (2 Petelo 3:​11, 12)

⁶ Mvuala Petelo wu tulubala muingi ‘tutatamana kuyindula’ ti kilumbu ki Yave kima belama. (Tanga 2 Petelo 3:​11, 12.) Buidi wulenda vangila mawu? Mu kuyindula kadika kilumbu mu lusakumunu tuala tambula mu nza yimona. Dedi, yindula ngie wumvumuka phemu yimboti, wundia bidia bimboti ayi kumona batu wunzolanga bafua kuvulubuka ayi kulonga batu bazinga mu mimvu miwombu. Kuyindudila mambu mu phila ayoyo, kulenda kusadisa kutatamana kuvibidila nati thangu beni ayi kuba lufiatu ti tsukulu yi nza ayiyi yima belama. ‘Kuzaba mambu amomo’ mankuiza kuntuala, ‘malasa tuvanga ko kuvukumuka’ mu luvunu lu bankua mambi.—2 Pete. 3:17.

NUNGA BOMA BU BATU

7. Mbi boma bu batu bulenda kutuvanga?

⁷ Bo tunyindula kilumbu ki Yave, tumbanga mu mayangi muingi kuzabikisa zitsangu zimboti kuidi batu. Vayi kheti bobo, tulenda ba boma bu kusamuna. Kibila mbi? Mu kibila ki boma bu batu. Mawu mamonikina mvuala Petelo. Va builu baba fundisa Yesu, Petelo wumanga kukikinina ti wuba nlandikini wu Yesu ayi khumbu ziwombu nandi wutuba ti kasa kunzaba ko. (Matai 26:​69-75) Buviokila thangu, mvuala Petelo wutuba mu lufiatu ti ‘tulendi ba ko boma bo bawu badi voti kuba divuda.’ (1 Pete. 3:14) Mambu Petelo katuba ma tuvana lufiatu ti befu tulenda nunga boma bu batu.

8. Mbi bilenda kutusadisa kununga boma bu batu? (1 Petelo 3:15)

⁸ Mbi bilenda tusadisa kununga boma bu batu? Petelo wu tukamba: ‘Zitisanu Klistu banga mfumu, mu mintima minu.’ (Tanga 1 Petelo 3:15.) Mawu mansundula kuyindula mu kiyeku ayi lulendu lu Mfumu’itu Yesu Klistu. Boti widi luaku muingi kusamuna zitsangu zimboti kuidi bankaka vayi wummona boma, yindula Yesu mu Kintinu kiandi ku diyilu wuzungadala na biveve na biveve bi zimbasi. Ayi yindula mu “kimfumu kiandi kioso ku diyilu ayi va ntoto.” Ayi nandi wala ba “yaku mu bilumbu bioso nati kuna tsukulu yi nza.” (Matai 28:​18-20) Mvuala Petelo wu tukindisa, ‘tubanga bakubama.’ Ngie wuntomba kuvana kimbangi ku kikola, ku kisalu voti va kibuangu kinkaka? Kubama ava mawu kumonika ayi yindula mambu wunkuiza tuba. Dinda mu nsambu kibakala ayi ba lufiatu ti Yave wunkuiza kusadisa kununga boma bu batu.—Mava. 4:29.

‘TUMONISANGA LUZOLO LUKIEDIKA’

9. Buidi ntulu mueka Petelo kakhambu monisina luzolo? (Tala mvandi fikula.)

⁹ Petelo wulonguka buidi bu kumonisina luzolo. Nandi wuba va kimueka bo Yesu katuba: ‘Yikuluvana lutumu lumona: Luzolasananga benu na benu, dedi bo minu yi luzodila, benu mvinu luzolasananga benu na benu.’ (Yoa. 13:34) Buviokila thangu, Petelo wubua mu ntambu mu zikuamusu zi batu ayi wubika ku bue dia na zikhomba ziandi bakhambu ba basi Yuda. Mvuala Polo wutuba ti mambu Petelo kavanga, maba mambi. (Ngala. 2:​11-14) Petelo wukikinina ‘tsembolo’ ayi wulonguka mu yawu. Mu minkanda kayiza sonika, Mvuala Petelo wutuba ti tulendi tubanga ko to ti tuidi luzolo mu zikhomba zitu vayi tufueti monisanga luawu mu mavanga.

10. Ndandu mbi “luzolo lukiedika luntuadisanga”? Sudikisa. (1 Petelo 1:22)

¹⁰ Petelo wutuba ti tufueti monisanga “luzolo lukiedika” kuidi zikhomba zitu. (Tanga 1 Petelo 1:22.) Luzolo alolo, lutusadisanga “kutumukina mu bukiedika.” Ayi luawu lu tulonga ti “Nzambi kasi ko luvasanu.” (Mava. 10:​34, 35) Tulendi tumukina ko lutumu Yesu ka tuvana matedi luzolo, boti tunsola batu tummonisina luzolo beni. Dedi Yesu, befu mvitu tulenda baka zikhomba balenda ba yitu kikundi kifikama. (Yoa. 13:23; 20:2) Vayi Petelo wu tutebula moyo ti tufueti monisanga luzolo lu kiedika—kuidi ‘zikhomba zioso.’—1 Pete. 2:17.

11. Mbi binsundula kumonisa “luzolo mu ntimba woso”?

¹¹ Petelo wu tulonga ti befu tufueti monisanga “luzolo lu kiedika mu ntima woso” Kuidi zikhomba zitu. Kikuma luzolo lu “kiedika” kinsundula kubika tula zindilu bo tummonisa luzolo beni. Buabu boti khomba be tufinga voti be tunyongisa ntima? Mu mayindu ḿba tulenda yindula kuvutudila mambi mu mambi kubika kuandi kumonisa luzolo. Vayi Petelo wulonguka kuidi Yesu ti kuvutudila mambi, kulendi kuangidika ko Nzambi. (Yoa. 18:​10, 11) Petelo wusonika: “Kawuvutudila mambi mu mambi. Vayi vutudila mambi mu mamboti.” (1 Pete. 3:9) Bika luzolo lu kunata kuba mutu wumboti kheti bankaka ba tuvangila mambu mambi.

12. (a) Mbi luzolo lukiedika lu tukindisa kuvanga? (b) Dedi bummonisina video Não deixe nada atrapalhar nossa união mbi widi wukubama muingi kuvanga?

¹² Mu nkanda wutheti, Petelo wutubila matedi ‘luzolo lu kiedika.’ Luzolo alolo, lufukanga ko to mua masumu, vayi lumfukanga ‘masumu mawombu.’ (1 Pete. 4:8) Ḿba Petelo wuntebuka moyo dilongi matedi kulemvukila Yesu kanlonga mu mimvu kumbusa. Mu thangu ayoyo ḿba Petelo waba kikininanga ti nandi wuba mutu wunlemvu bo kavana diyindu kuidi Yesu ti kalenda lemvukila khomb’andi mu “sambuadi di mintulu.” Vayi Yesu wunlonga ti—tufueti lemvukilanga—bankaka “nati 77 di mintulu” voti kulemvukila bankaka mu kukhambu monisa ndilu. (Matai 18:​21, 22.) Boti ngie wummona phasi kusadila dilongi adiodio, buna bika kuvutuka mbusa! Bisadi bioso bi Yave badi batu ba masumu. Thangu zinkaka bannuananga nzingu muingi kumonisa nlemvu. Vayi didi diambu dinkinza ngie fueti vanga di kulemvukila khomb’aku ayi kudedikisa mambu mu ndembama.c

BAKULUTU BA KIMVUKA KENGIDILANU MAMEMI

13. Mambu mbi maphasi bakulutu ba kimvuka bamviokilanga bo bankindisa zikhomba?

¹³ Bukiedika, Petelo kasa zimbakana ko mambu Yesu kankamba bo kavulubuka: “Sunganga mamemi mami.” (Yoa. 21:16) Boti widi nkulutu wu kimvuka, ngie mvaku zebi ti wufueti sadilanga zithuadusulu aziozio. Dilenda ba diambu diphasi vayi nkulutu wu kimvuka kafueti botula thangu muingi kukeba kiyeku akiokio kinkinza. Bakulutu ba kimvuka bafueti tula zitsatu zi dikanda diawu va theti mu kuba kieba mu kinsuni ayi mu kiphevi. Bawu mvawu bantuamanga ntuala mu kisalu ki kusamuna, bankubikanga biyeku bimvangamanga mu zikhukutunu zi kimvuka, mu lukutukunu lu divula ayi zi mavula. Bawombu mu bawu, bantambulanga biyeku bi kusala mu dingumba di COLIH ayi mu bisalu bi kutunga. Bukiedika, bakulutu ba kimvuka badi bisalu biwombu bi kuvanga!

14. Mbi bilenda sadisa bakulutu ba kimvuka kukengidila mamemi? (1 Petelo 5:​1-4)

¹⁴ Mvuala Petelo wukindisa bakulutu yandi ba kimvuka ‘bakengidila mamemi ma Nzambi’. (Tanga 1 Petelo 5:​1-4.) Boti ngie widi nkulutu wu kimvuka, tuzebi ti wunzolanga zikhomba ziaku ayi widi wukubama muingi kuba sadisa. Vayi thangu zinkaka wulenda mona ti widi mawombu ma kuvanga ayi wumbanga wuvonga muingi kudukisa kiyeku akiokio. Mbi wulenda vanga? Yekuka bizitu bioso kuidi Yave. Mvuala Petelo wusonika: ‘Boti mutu wutambula kiyeku, buna kakisadila mu mangolo Nzambi kankumvana.’ (1 Pete. 4:11) Bukiedika zikhomba ziaku mu kimvuka, bamviokilanga mu mambu maphasi mala mana to ku nza yimona. Vayi tebukanga moyo ti Yesu Klistu “nsungi wulutidi,” wala kuvana mangolo mantombulu muingi wuvanga kiyeku kiaku. Nandi kalenda kuvana mangolo mu bilumbu abibi ayi mu nza yimona. Diawu Nzambi wuntomba ti bakulutu ba kimvuka, bazola zikhombo ziawu, baba kindisa ayi baba “bifuani bimboti kuidi mamemi.”

15. Buidi bakulutu ba kimvuka bakengidila mamemi? (Tala mvandi foto.)

¹⁵ Yaya William widi nkulutu wu kimvuka, wuvisa nkinza wu kukengidilanga mamemi. Bo kivunga ki COVID-19 kitona, nandi ayi bakulutu bankaka ba kimvuka babaka makani mu kadika sabala kutelanga kadika khomba mu mangumba mawu. Nandi wusudikisa ti: “Zikhomba ziwombu baba bafeka ku nzo, balenda ba mayindu makhambu fuana.” Yaya William wutuba ti bo khomba kankunzibudila ntima, nandi waba kunkuwanga muingi kavisa zitsatu ayi mambu ma kumvanga kukuazuka. Diawu nandi waba tombanga ziphila kalenda kunsadisila dedi zivideo mu jw.org. Nandi wubue tuba: “Kukengidila nkinza beni kuidi bubu. Boti tumvanga mangolo muingi kusadisa batu balonguka matedi Yave, bobuawu mvandi tufueti vanga mangolo muingi kusadisa mamemi ma Yave kutatamana mu kiedika.”

BIKA YAVE KADUKISA KHUBUMUNU’AKU

16. Mu ziphila mbi tulenda sadila malongi tuma longuka mu minkanda mi Petelo?

¹⁶ Nati avava, tuma tubila mua malongi mu minkanda miodi mvuala Petelo kasonika. Ḿba ngie bemona vama wulenda luta buela vangila mangolo. Dedi, ngie wulenda botula thangu muingi kuyindula lusakumunu tuala tambula mu nza yimona? Ngie Wulenda sikika makani ma kuvana kimbangi ku kisalu, ku kikola voti vama vankaka? Ngie wulenda tomba ziphila wulenda luta monisina luzolo lu kiedika kuidi zikhomba ziaku? Bakulutu ba kimvuka, bukiedika ti muidi bakubama muingi kukengidila mamemi ma Nzambi mu phila yifuana? Bo wukifiongunina ayi wummona mambu wufueti balula, buna bika kuvonga. Kibila ‘Mfumu widi nkua mamboti,’ ayi wala kusadisa kununga. (1 Pete. 2:3) Petelo wu tukindisa: ‘Nzambi . . . Naveka wala dukisa khubumunu ayi wala kutusikimisa mu khambu vonga.’—1 Pete. 5:10.

17. Mambu mbi malenda monika befu kutatamana bakuikama ayi kukikinina khubumunu Yave katuvananga?

¹⁷ Khumbu mueka, mvuala Petelo wuyimona ti kasa ba ko wufuana muingi kuba vantuala Muana Nzambi. (Luka 5:8) Vayi mu lusalusu lu Yave ayi lu Yesu, Petelo wutatamana kuba nlandikini wu Klistu ayi wuyiza baka lunungu ‘lu kukota mu Kintinu ki Mfumu’itu ayi mvulus’itu Yesu Klistu.’ (2 Pete. 1:11) Ngie kutatamana wukuikama dedi Petelo ayi kubika Yave kakusadila, ngie mvaku ‘wala tambula nsendo wu luzingu lu mvu ka mvu.’—1 Pete. 1:9.