DILONGI 35
NKUNGA 123 Tumamana mu Lukuikumu Thuadusulu yi Nzambi
Buidi Bakulutu ba Kimvuka Bansadisilanga Batu Babotuka mu Kimvuka?
“Ku diyilu kuala luta ba mayangi, mu kibila ki nsumuki wumueka wumbalula mavanga mandi kena mu kibila ki 99 di batu basonga bakhambu tombulu kubalula mavanga mawu.”—LUKA 15:7.
MAMBU TUANLONGUKA
Kibila mbi vantombuluanga kubotula batu bankaka mu kimvuka ayi buidi bakulutu ba kimvuka balenda sadisila batu banyongina mavanga mawu kubue baka lunungu lu Yave.
1-2. (a) Buidi Yave kantadilanga batu bamvolanga masumu mangolo mu lutia luawu? (b) Mbi Yave katomba mu batu boso bamvolanga masumu mangolo?
Yave kakikininanga ko bisadi biandi bavangila mambu mu phila bantombila ayi nandi katadilanga ko bobo masumu va khati dikabu diandi. (Minku. 5:4-6) Nandi kantomba befu tukinzika minsiku miandi misonga, mio katuvana mu Kibibila. Yave kasintomba ko befu batu ba masumu tuvangila mambu mu phila yivedila. (Minku. 130:3, 4) Vayi mvandi, nandi kakikininanga ko batu ba ‘kumvuezanga ayi bankitulanga mamboti mandi malutidi kuidi befu, banga kibila muingi kuvangila mambu matsoni.’ (Yud. 4) Bukiedika, diawu Kibibila kintubila ti, nandi wala bunga batu bakhambulu basonga mu mvit’andi bantedilanga Alimangedoni.—2 Pet. 3:7; Nzai. 16:16.
2 Vayi, Yave kasintomba ko ni mutu kabungu. Dedi bo tuma longuka mu kikhuku akiki ki malongi, Kibibila kimmonisa ti, Yave kantomba “baboso babalula mavanga mawu”. (2 Pet. 3:9) Bakulutu ba kimvuka banlandakananga kifuani ki Yave, bo bammonisa mvibudulu ayi bankuedika kusadisa mutu bevola disumu, kabalula mavanga mandi ayi kuvutuka kubue ba lunungu lu Yave. Vayi, basiko baboso bamvolanga masumu mangolo, bankikininanga lusalusu bantambulanga. (Yesa. 6:9) Bankaka bansolanga kuawu kutatamana kuvanga mambu mambi, kheti bakulutu ba kimvuka bankuedikanga kuba sadisa khumbu ziwombo kunyongina masumu mawu. Ma kumonika, mbi bakulutu ba kimvuka bafueti vanga?
“BOTULANU VA KHAT’INU MUTU WIDI MAVANGA MAMBI”
3. (a) Mbi Kibibila kintuba, bafueti vangila mutu wummanga kunyongina disumu dingolo? (b) Kibila mbi tulenda tubila ti mutu beni, naveka wunsolanga kubotuka mu kimvuka?
3 Bo mutu kamvola disumu dingolo ayi wummanga kunyongina diawu, bakulutu ba kimvuka, banlandakananga thuadusulu yidi mu 1 Kolintu 5:13: “Botulanu va khat’inu mutu widi mavanga mambi.” Mawu mammonikanga, kibila mutu wumvola disumu, naveka wunsolanga kuandi kumonikina ziphasi voti kuvela mo naveka kabe vata. (Nga. 6:7) Kibila mbi katubila mawu? Kibila kheti mu lusalusu loso bakulutu ba kimvuka bamvana, nandi wumanga kuandi kunyongina masumu mandi. (2 Minti. 17:12-15) Mavanga mandi mammonisa ti nandi, besola kuandi kubalukila zithumu zi Yave.—Deute. 30:19, 20.
4. Kibila mbi bamvaninanga ndubu, bo mutu wukhambu nyongina masumu mandi kambotuka mu kimvuka?
4 Bo mutu wukhambu nyongina masumu mandi kambotuka mu kimvuka, bamvananga ndubu muingi kuzabikisa kimvuka ti nandi kasiediko wumueka mu Zimbangi zi Yave.a Bamvaninanga ndubu ayoyo, bika ti muingi kumfuisa zitsoni. Vayi muingi zikhomba mu kimvuka babaka bu kulandikinina mambu mantuba Kibibila ti babika “ba kithuadi” ayi “ni kheti kudia na mutu beni”. (1 Ko. 5:9-11) Thuadusulu ayoyo, yintuadisanga ndandu. Mvuala Polo wusonika: “Mua ndambu luvi lumfunisanga falini yoso.” (1 Ko. 5:6) Mutu wukhambu nyongina disumu dingolo kabe vola, kalenda nata bankaka kuvonga mu mangolo bamvanga ma kuzingila mu zithumu zisonga zi Yave.—Zinga. 13:20; 1 Ko. 15:33.
5. Buidi tufueti tadila batu bambotukanga mu kimvuka ayi kibila mbi?
5 Buabu, buidi zikhomba zinkaka bafueti tadila mutu bebotuka mu kimvuka? Kheti tuisinkuiza bue ba ko yandi kithuadi, tufueti kuntadila, dimemi dizimbala, bika ti mutu wukhambulu bu kubue balukila. Kheti dimemi dimueka dibe zimbala, vayi balenda bakula diawu ayi kuvutula diawu mu phaka. Tebuka monyo ti mutu bebotuka mu kimvuka, mvandi wukivana kuidi Yave. Kiadi ayi kiunda kuzaba ti mu kubotuka mu kimvuka, mammonisa ti nandi kasi bue zingila ko mu mambu kakanikisa kuidi Yave ayi mawu mantula luzingu luandi va kingela. (Yehe. 18:31) Vayi, befu tuzebi ti, mu nlemvu’andi, Yave widi kivuvu ti mutu beni wala vutuka. Buidi bakulutu ba kimvuka balenda sadisila mutu wubotuka mu kimvuka?
BUIDI BAKULUTU BA KIMVUKA BANSADISILANGA BATU BAMBOTUKA MU KIMVUKA
6. Mbi bakulutu ba kimvuka bamvanganga muingi kusadisa batu babotuka mu kimvuka?
6 Bo mutu kambotuka mu kimvuka, bukiedika ti bakulutu ba kimvuka ba kunkuekulanga ayi balendi buensadisa ko kuvutuka mu mioko mi Yave? Ndamba, masiko mawu! Bo banzabikisanga kuidi mutu wukhambu nyongina masumu mandi ti wunkuiza botuka mu kimvuka, mua dingumba di bakulutu bafueti kunsudikisa mambu nandi kafueti vanga muingi kavutuka. Vayi masiko to mawu bakulutu ba kimvuka bamvanganga. Bawu mvandi bankambanga bawombo mu batu abobo ti, bawu bankuiza yangalala beni kubue kutakana yawu, bo vamvioka mua zingonda muingi kumona boti bawu babe balula phil’awu yi kuyindudila. Boti mutu wumbotuka mu kimvuka bekikinina mawu, buna bakulutu ba kimvuka, bankuiza bue kutakana yandi muingi kunsadisa kunyongina masumu mandi ayi kuvutuka mu kimvuka. Vayi ba kumona mu lukutukunu beni ti nandi yibubu kabaludi’abu ko mayindu mandi, bawu bankuiza tatamana kuvanga mangolo muingi kubue kutakana yandi mu khumbu yinkaka.
7. Mu kulandakana kifuani ki Yave, buidi bakulutu ba kimvuka bammuenanga kiadi mutu mabotuka mu kimvuka? (Yele. 3:12)
7 Bakulutu ba kimvuka, banlandakananga kiadi ki Yave, mu phila bawu bantadilanga mutu bebotuka mu kimvuka. Dedi, kheti dikabu di Isaeli dimbalukila, vayi Yave kasa temina ko theti bawu banyongina mavanga mawu muingi nandi kaba sadisa. Vayi, naveka Yave wutuama ntuala muingi kuba sadisa, kheti bawu basa monisa ko bivisa ti banyongina masumu mawu. Dedi bo tutubidi mu dilongi dimmuadi di kikhuku akiki ki malongi, Yave wufuanikisa kiadi kiandi, mu kukamba mbikudi Hosea, kalemvukila nkazi’andi, kheti nandi wuvola disumu dingolo. (Hose. 3:1; Mal. 3:7) Mu luzolo lukiedika, bakulutu ba kimvuka bantomba muingi mutu bevola disumu dingolo, kavutuka kuidi Yave, ayi bawu bayedikanga ko kuntula nkaku kuvanga mawu.—Tanga Yelemia 3:12.
8. Buidi kinongo Yesu kata kitedi muana wuzimbala, kimmonisina kiadi ki Yave? (Luka 15:7)
8 Wuntebuka monyo kinongo Yesu kata, matedi muana wuzimbala? Bo tata kamona ku kinanu muan’andi waba vutuka ku nzo, nandi “wuduma muingi kuendengana, mu kiadi wumbumbakana ayi wumvana besu.” (Luk. 15:20) Mona ti, tata kasa temina ko muingi muana kanlomba theti nlemvu, bosi kansadisa. Vayi nandi mutu wutheti wutuama ntuala ayi mawu matata ma luzolo bamvanganga. Bakulutu ba kimvuka mvandi, bammonisanga zioziawu zikhadulu kuidi batu bambotuka mu kimvuka. Bawu bantombanga mamemi amomo mazimbala, mavutuka kuidi Yave. (Luk. 15:22-24, 32) Mayangi mawombo mambanga ku diyilu, bo mutu wubotuka mu kimvuka kamvutuka ayi mawu mvandi mammonikanga va ntoto.—Tanga Luka 15:7.
9. Mbi Yave kankindisa batu babotuka mu kimvuka?
9 Mambu tuma longuka nati avava, mammonisa ti Yave kakikininanga ko batu bakhambu nyongina masumu mawu, batatamana mu kimvuka. Vayi mvandi, nandi kavonganga ko kuba sadisa. Nandi kantomba bawu bavutuka. Tala mabanza ma Yave matedi batu banyonginanga masumu mawu mu Hosea 14:4: ‘Yala babelusa mu kukhambu kuawu ku lukuikumunu. Yala bazola mu ntima woso. Kibila, yisiedi ko mu nganzi mu kibila ki dikabu di Isaeli.’ Ayoyo, yidi khindusulu yinneni kuidi bakulutu ba kimvuka, muingi batomba kumona mu mutu bevola disumu dingolo, kioso kuandi kivisa kimmonisa ti nandi matona kunyongina masumu mandi. Ayi yidi khindusulu kuidi batu babotuka mu kimvuka, yimmonisa ti Yave kantomba babika kukala beni kisina mu kuvuka mu kimvuka.
10-11. Buidi bakulutu ba kimvuka, balenda sadisila batu babotuka thama mu kimvuka?
10 Abu batu bama viokisa mimvu miwombo tona babotuka mu kimvuka ki Yave? Batu abobo, mba basiala bue vola ko disumu diba vanga kubotuka mu kimvuka. Ayi mba ni kheti baveka basiala bue tebuka ko monyo, mambu maba tatula mu kimvuka ki Yave. Kheti bobo, bakulutu ba kimvuka, bafueti vanga mangolo muingi kutomba batu abobo. Bo bakulutu ba kimvuka ba kebatala, bawu balenda sambila yawu ayi mu luzolo, kuba tumisa muingi bavutuka mu kimvuka ki Yave. Bukiedika, mutu wutatuka kimvuka ki Yave mu mimvu miwombo, kalenda ba wulebakana mu kiphevi. Diawu, na kutomba kuvutuka mu kimvuka, bakulutu ba kimvuka, balenda dinda khomba mueka kalongukanga yandi Kibibila, kheti nandi kavutukidi’abu ko mu kimvuka. Bakulutu ba kimvuka, bawu bafueti sola mutu wunkuiza longukanga yandi Kibibila.
11 Bakulutu ba kimvuka, banlandakananga kiadi ki Yave mu kusadisa batu babotuka mu kimvuka, bazaba ti kimvuka ki Yave, kidi kikubama muingi kuba tambula. Ayi bo mutu wuvola disumu kanyongina masumu mandi ayi kambalula mavanga mandi, nandi kalenda vutuka mu kimvuka, kheti vamvioka to mua thangu.—2 Ko. 2:6-8.
12. (a) Mu mambu mbi bakulutu ba kimvuka bafueti bela keba keba? (b) Kibila mbi tulendi yindudila ko ti batu bankaka balendi tambula ko nlemvu wu Yave? (Tala mvandi nota.)
12 Khumbu zinkaka, bakulutu ba kimvuka, bafueti ba keba keba ava kuvutula mu kimvuka mutu wuvangila muana kilezi mambu mambi, wubalukila kimvuka ki Yave voti wuyedika kuvonda dikuela mu bibila bikhambulu nguizani ayi luzolo lu Yave. Bakulutu ba kimvuka, bafueti ba bivisa bikiedika, bimmonisa ti mutu awowo, benyongina masumu mandi mu bukiedika. (Mal. 2:14; 2 Ti. 3:6) Bakulutu ba kimvuka bafueti kieba zikhomba ayi yoyawu thangu, bafueti tebukanga monyo ti Yave wumvitikanga batu boso, banyonginanga masumu mawu mu bukiedika ayi bambika kubue vanga mambu mambi. Kheti bakulutu ba kimvuka bafueti ba keba keba na zikhomba bavuna bankaka, bawu balendi yindula ko ti batu bankaka balendi tambula ko nlemvu wu Yave.b— 1 Pet. 2:10.
MBI ZIKHOMBA MU KIMVUKA BALENDA VANGA?
13. Disuasana mbi didi mu phila tuntadilanga mutu betambula tsembolo kuidi bakulutu ba kimvuka ayi mutu bebotuka mu kimvuka ki Yave?
13 Dedi bo tumueni mu dilongi diviokizi, khumbu zinkaka, bamvananga ndubu ti khomba mueka mu kimvuka betambula tsembolo. Ma kumonika befu tulenda tatamana kukoluka yandi, mu kuzaba ti nandi benyongina mu bukiedika masumu mandi ayi wubika kubue vanganga mambu mambi. (1 Ti. 5:20) Mvandi, nandi khidi khomb’itu yi kiphevi ayi wuntomba khindusulu’itu. (Ebe. 10:24, 25) Vayi, matedi mutu bebotuka mu kimvuka, vadi disuasana. Kibibila kintuba ti, tufueti bika “ba kithuadi” na mutu beni, “ni kheti kudia yandi.”—1 Ko. 5:11.
14. Buidi Baklistu balenda sadila kilunzi kiawu kikubuku mu Kibibila, matedi mutu wubotuka mu kimvuka? (Tala mvandi foto.)
14 Bukiedika ti mambu tuma tubila mansudula ti tufueti bayisa mutu mabotuka mu kimvuka ki Yave? Ndamba, bakana ko mawu. Tuisinkuiza bue ba ko yandi kikundi ayi kuviokisa yandi thangu muingi kuvuvisa. Vayi kadika kisadi ki Yave, kalenda sadila kilunzi kiandi kikubuku mu minsua mi Kibibila, muingi kuzaba boti kalenda tumisa mu lukutukunu, musi dikanda diawu voti mutu wuba yawu kikundi, vayi wobotuka mu kimvuka. Abu na kukuiza mu lukutukunu? Kumbusa tuaba tubanga ti tulendi kumbila ko. Vayi bubu, kadika mutu mu befu, kalenda sadila kilunzi kiandi kikubuku mu minsua mi Kibibila, muingi kuzaba makani kambaka. Bankaka balenda sola kubila mutu awowo ayi kumvana ndizulu yimboti. Vayi tulendi yoluka ko beni yandi voti kuba yandi kikundi.
Baklistu balenda sadila kilunzi kiawu kikubuku mu Kibibila, muingi kubaka makani, boti balenda kuawu kutumisa mutu wubotuka mu kimvuka kayiza mu lukutukunu ove kumvana to ndizulu yimboti (Tala mvandi lutangu 14)
15. Ntindu mbi masumu bantubila mu 2 Yoane 9-11? (Tala mvandi quadro, “Bukiedika ti Polo ayi Yoane baba tubila matedi diodiawu disumu?”)
15 Bankaka balenda yindula ti phisulu ayoyo yimona, yisiko kithuadi na lutangu lu Kibibila luntuba: “Woso mutu wu kumvana mboti, widi mu kubuela mioko mavanga mandi mambi?” (Tanga 2 Yoane 9-11.) Befu kufiongunina buboti mambu nsoniki wu lutangu alolo kasonika, tunkuiza mona ti nandi waba tubila matedi batu babalukila kimvuka ki Yave, ove baboso bamvukumunanga bankaka kuvanga mambu Yave kankandiminanga. (Nzai. 2:20) Diawu, boti mutu widi mu kutuadisa malongi mantubila bubi kimvuka ki Yave voti zikhadulu zimbi, bakulutu ba kimvuka balendi baka ko makani ma kuentala. Ḿba, bumviokila thangu, nandi kalenda balula mavanga mandi. Vayi ma kukhambu monika, tulendi kumbila ko ni kuntumisa kayiza mu lukutukunu.
LANDAKANA KIFUANI KI YAVE KI KUMONA KIADI
16-17. (a) Mbi Yave kantomba muingi batu boso bavola masumu mangolo bavanga? (Yehe. 18:32) (b) Buidi bakulutu ba kimvuka bansandilanga va kimueka na Yave?
16 Mbi tuma longuka mu kikhuku akiki ki malongi matanu? Yave kasintomba ko ni mutu kabungu. (Tanga Yehezekeli 18:32.) Nandi katomba batu boso ba masumu baba kikundi ayi nandi. (2 Ko. 5:20) Kiawu kibila tona thama, kambikilanga thangu ayi kanlubudilanga batu bamvanganga mambi, kuba kuandi dikabu dimvimba voti mutu wumueka, babalula mavanga mawu ayi bavutuka kuidi nandi. Bakulutu ba kimvuka badi luaku lu kusala va kimueka na Yave bo bamvanga mangolo muingi kusadisa batu bavola disumu, banyongina masumu mawu.—Lom. 2:4; 1 Ko. 3:9.
17 Yindula Mayangi zimbasi ku diyilu bambanga, bo batu babotuka mu kimvuka banyonginanga masumu mawu. Tat’itu Yave ku diyilu, wumbanga beni mu mayangi, khumbu zioso wumueka mu mamemi mandi mazimbala, mamvutukanga mu kimvuka kiandi. Luzolo luitu mu Yave, lumbuelamanga bo tunyindulanga matedi kiadi kiwombo ayi mamboti malutidi ka tumonisanga.—Luk. 1:78.
NKUNGA 111 Mambu ma tuvananga Mayangi
a Tuisi bue sadilanga ko kikuma kuvaikusu. Vayi dedi bummonisina mambu Polo katuba mu 1 Kolintu 5:13, befu tunkuiza batedilanga, batu babotuka mu kimvuka.
b Bo Kibibila kintubila matedi disumu dikhambulu nlemvu, masinsundula ko ti, vadi ntindu wumueka wu disumu dio Yave kakhambu lemvukilanga. Vayi mansundula, masumu mo batu bamvola mu lutia luawu ayi bantatamana kuvanga mawu muingi kubalukila Nzambi. Kheti mutu bevola disumu di phila ayoyo, tuisiko befu tufueti kumfundisa.—Mala. 3:29; Ebe. 10:26, 27.