Biuvu bi Mintangi
Buidi bubela kukula ku khotolo yi tempelo yi Salomo?
Khotolo vawu baba viokilanga muingi kuvitila va kibuangu kinlongo. Dedi bummonisina Tsekudulu yi Nza Yimona yi Kibibila Kinlongo babasisa ava mvu 2023, “khotolo yiba 20 di zikovado mu kukula ayi mu kutatuka yidedakana na kutola ku nzo ayi ntela wuba 120.” (2 Lusa. 3:4) Zitsekudulu zinkaka zintuba ti khotolo yiba “120 yi zikovado” mu ntela zinsundula 53 di zimetro!
Vayi Tsekudulu yi Nza Yimona yi Kibibila Kinlongo yi mvu 2023 yitubila matedi tempelo yi Salomo mu phila ayiyi: “Ntela wuba 20 di zikovado,” voti 9 di zimetro.a Mona mua bibila bi phisulu ayoyo.
Ntela wu khotolo basi wutubila ko mu 1 Minti. 6:3. Mu lutangu alolo Yelemia wusonika matedi kutola, kukula ayi kuvinda ku khotolo kubika kuandi ntela. Diawu mu kapu yinlanda, nandi wutubila mambu mawombo matedi tempelo kubunda mvandi ḿbu wu kisengu, 10 di zi caruage ayi makunzi muadi ma cobre mabe banga va khotolo. (1 Minti. 7:15-37) Boti khotolo yiba 50 di zimetro mu kukula ayi yivitila nati kusinina tempelo, kibila mbi Yelemia kasa tubila ko matedi ntel’andi? Kheti vavioka zisekulu, minsoniki mi basi Yuda batuba ti khotolo yisa luta ba ko ntela kena kusukila tempelo yi Salomo.
Batu ba luzabu bantombanga kuzaba boti bibaka bi tempelo biba bifuana muingi kununga kizitu ki 120 di zikovado ki ntela wukhotolo. Mu thangu yikhulu baba sadilanga mamanya ayi zi tijolo muingi kutunga. Dedi mielu mu zitempelo zi Ngipiti miba miyalubuka kuwanda ayi kuyilu kuba kuluelu. Vayi tempelo yi Salomo yiba disuasana. Batu baluzabu bantumbanga ti bibaka bisa ba ko kuvioka 6 di zikovado voti 2.7 metros. Nta kinongo wuntadilanga matedi zifikula, bantedilanga Theodor Busink wutuba: “Mu kutadila phiba yi bibaka biba va khotolo tempelo bisa ba ko 120 di zikovado mu [ntela].”
2 Lusa. 3:4 ḿba basa yikopiya ko buboti. Kheti masonoko mankaka makhulu muidi mu sonama “120” mu lutangu alolo, ayi matangu mankaka dedi Codex Alexandrinus mu sekulu yintanu ayi Codex Ambrosianus muidi musonama “20 di zikovado.” Kibila mbi escriba kasonikina phila yikhambu fuana “120”? Bikuma “khama” ayi “zikovado” bidi bidedakana mu kiebeleu. Diawu ḿba escriba kasonikina “khama” kubika kuandi “zikovado.”
Bukiedika bo tumvanga mangolo muingi kuvisa mambu matedi tempelo yi Salomo mu nduenga, tunsikikanga thalu mu tempelo yi kiphevi. Tuntonda beni Yave mu ku tutumisa muingi tumbuongimina mu tempelo ayoyo!—Ebe. 9:11-14; Nzai. 3:12; 7:9-17.
a Nota yimueka yike va wanda yinsudikisa ti “masonoko mankaka makhulu muidi musonama ‘120 di zikovado,’ vayi mu zitsekudulu zinkaka muidi musonama ‘20 di zikovado.’”