Vana Nkembu Kuidi Yave

1. Mu mambu mbi bawombu ba kinyemisinanga?

NGIE wummonanga batu kuluta kuyivua beni nkinza kena bankaka? Bawombu bansadilanga internet muingi kukinyemisa mu mambu bamvanga. Vayi bubu, batu baluelu to bamvananga nkembu kuidi Yave Nzambi. Mu dilongi adidi, tunkuiza longuka buidi tulenda vanina Yave nkembu ayi mbi bi tunatanga kuvanga mawu. Mvandi tunkuiza mona buidi tulenda vanina Nzambi nkembu kafueni mu tambula ayi buidi naveka kala kembisila dizina diandi.

MBI BINSUNDULA KUVANA YAVE NKEMBU?

2. Buidi Yave kamonisina nkembu’andi ku Mongo Sinai? (Tala mvandi va thonono levista.)

² Mbi bio nkembu? Mu Kibibila kikuma nkembu, kilenda sundula dioso diambu mutu kalenda vanga dilenda nnata kutambula nzitusu. Bo vavioka mua bilumbu mu thangu Yave kakula basi Isaeli mu buvika ku Ngipiti, nandi wuba monisa nkembu’andi. Yindula mu mambu amama: Bivevi na bivevi bi basi Isaeli bakutakana ku Mongo Sinai muingi kukuwa Nzambi. Va kibuangu bakutakana vayiza ba kitombi, muisi wutona kubasika, ntoto wunyikuka, kuba zitsiemu, bidumu ayi lusuku lungolo. (Esodu 19:​16-18; 24:17; Minku. 68:8) Yindula phila basi Isaeli babela bo Yave kamonisa lulendu luandi ayi nkembu’andi.

3. Mbi binsundula kuvana Yave nkembu?

³ Buabu mbi tulenda tuba matedi batu? Bukiedika ti tulenda vana Yave nkembu? Ngete. Phila yimueka tulenda vangila mawu yidi, mu kuzabikisa bankaka matedi mangolo mandi ma kukuitukila ayi zikhadulu ziandi. Mvandi tulenda vana nkembu kuidi Yave, mu biuma tunnunganga kuvanga mu mangolo mandi. (Yesa. 26:12) Ntinu Davidi ke wumueka mu batu bakembisa Yave. Mu nsambu Davidi kavanga vantuala dikabu di Isaeli, nandi wukamba Nzambi: ‘Ngie Yave vuidi bunene, lulendu, nkembu, nzitusu ayi kuzangama kibila ngie vuidi biabioso bike ku diyilu ayi va ntoto. Bo Davidi kamanisa nsambu’andi, dikabu dioso dikembisa Yave.’—1 Lusa. 29:​11, 20.

4. Buidi Yesu kavanina nkembu kuidi Yave?

⁴ Bo Yesu kaba va ntoto, wuzitisa Tat’andi mu kuzabikisa kuidi batu ti Yave nandi tho yi mangitukulu kaba vanganga. (Mala. 5:​18-20) Mvandi wuvangila mawu, mu kuzabikisa zikhadulu zimboti zi tat’andi ayi mu phila kaba tadilanga bankaka. Kilumbu kimueka bo Yesu kaba longa ku nzo lukutukunu, nandi wumona nkietu mueka baba tovulanga kuidi phevi yimbi mu 18 di mimvu. Phevi beni, yivanga muingi nkietu beni kukondalala ayi kabasa nunganga ko kuba wululama. Yindula mambu maphasi nkietu awowo kamonikina. Mu kiadi, Yesu wumfikama ayi wunkamba: “A nkietu, beluka mu kimbevu ki kuvanganga kuba wukondalala.” Yesu wuntetika mioku ayi muna thangu nandi wutelama ayi “wutona kuzitisa Nzambi”! (Luk. 13:​10-13) Nkietu awowo wuba kibila muingi kukembisa Nzambi ayi befu mvitu tuidi bibila muingi kuvanga mawu.

KIBILA MBI TUMVANINANGA YAVE NKEMBU?

5. Bibila mbi tuidi muingi kukembisa Yave?

⁵ Befu tunkembisanga Yave kibila tukunkinzikanga. Befu tuidi bibila biwombu muingi kuvanga mawu. Dedi, Yave lutidi zangama ayi mangolo mandi masukanga ko. (Minku. 96:​4-7) Ndueng’andi yimmonikanga mu biuma kavanga. Nandi wu tuvana luzingu ayi biuma bioso bintombulu muingi kuzinga. (Nzai. 4:11) Nandi widi wukuikama. (Nzai. 15:4) Mamoso kavanga mantuadisanga ndandu ayi wundukisanga zikhanu ziandi. (Yosua 23:14) Diawu Yelemia katubila: ‘Mu batu boso banduenga ba mimvila mioso ayi kubunda mvandi mintinu miawu mioso, vasi ko mutu wulenda dedakana na ngiewu’! (Yele. 10:​6, 7) Bukiedika, befu tuidi bibila biwombu muingi kukinzika Tat’itu yi diyilu. Vayi kubika to kunkizika, befu mvitu tu kunzolanga.

6. Kibila mbi befu tunzodilanga Yave?

⁶ Befu tunkembisanga Yave kibila tu kunzolanga. Tala zikhadulu zi Yave zi tuvanganga kunzola. Nandi ke nkua kiadi ayi nkua mamboti. (Minku. 103:13; Yesa. 49:15) Bo tumbanga mu kiunda nandi mvandi wumbanga mu kiunda. (Zaka. 2:8) Nandi wu tusadisanga kunzaba ayi kuba bakundi bandi. (Minku. 25:14; Mav. 17:27) Ayi Yave wu kikululanga; ‘Nandi wunkuinamanga muingi kutala diyilu ayi ntoto, wuntelimisanga mutu wukikululanga mu fundu wu ntoto.’ (Minku. 113:​6, 7) Buidi mutu kalenda manga kukembisila Nzamb’itu lutidi zangama?—Minku. 86:12.

7. Luaku mbi lunkinza tuidi muingi kukembisa Yave?

⁷ Befu tunkembisanga Yave kibila tuntomba bankaka banzaba. Bawombu basa zaba ko kiedika matedi Yave. Kibila mbi? Kibila Satana wuntubanga luvunu matedi Yave ayi batu bankikininanga mu luvunu beni. (2 Ko. 4:4) Satana wumvanganga batu kukikinina ti Yave widi nkua nganzi, kavuanga ko batu nkinza ayi wuntuadisanga ziphasi mu nza. Vayi befu tuzabizi kiedika kitedi Nzambi! Befu tuidi luaku lu kuzabikisa batu matedi Nzambi tunsadilanga ayi kuba sadisa mvawu kunkembisa. (Yesa. 43:10) Minkunga 96 yi tukindisa tukembisa Yave. Tunkuiza longuka mu nkunga awowo, buidi tulenda vanina Yave nkembu kafueni mu tambula.

BUIDI TULENDA VANINA YAVE NKEMBU KAFUENI MU TAMBULA?

8. Mu ziphila mbi tulenda kembisila Yave? (Minkunga 96:​1-3)

⁸ Tanga Minkunga 96:​1-3. Befu tulenda kembisa Yave mu mambu tuntuba matedi nandi. Mu matangu amomo, Yave wuntumisa batu muingi ‘banyimbidila,’ ‘bazabikisa dizina diandi,’ ‘bayamikisa kadika kilumbu zitsangu ziandi zimboti zi luvukusu’ ayi ‘bazabikisa nkembu’andi kuidi batu boso.’ Aziozio, zidi ziphila tulenda kembisila Tat’itu yi diyilu. Basi Yuda bakuikama mu sekulu yitheti, basa mona ko boma kuzabikisa bankaka mambu mamboti Yave kavanga ayi kukakidila kimutu kiandi. (Dani. 3:​16-18; Mav. 4:29) Buidi mvitu tulenda vangila mawu?

9-10. Mbi belonguka mu kifuani ki Angelena? (Tala mvandi foto.)

⁹ Tala kifuani ki Angelena,a khomba yinkietu wunkalanga ku Estados Unidos. Mu kibakala nandi wukakidila dizina di Yave ku kisalu. Mu kuba wumona, bantumisa mu lukutukunu lumvangamanga kuidi batu bamona muingi bazabikisa kuidi bansalanga yawu mambu bazabizi kuvanga. Angelena wukubama buboti muingi kumonisa mayangi kambakanga mu kuba wumueka mu Zimbangi zi Yave. Vayi ava yaya Angelena kutuba, wumueka mu batu bansalanga yandi wutuba ti wuyonzikila va nzo yi Zimbangi zi Yave. Ayi wutona kuvueza mambu Zimbangi zi Yave bankikininanga. Angelena wutuba: “Minu yitona kukuazuka. Diawu yi kiyuvusila: ‘Yinkuiza bika mutu katuba luvunu matedi Yave? Voti yinkuiza vanga dioso diambu muingi kunkakidila?’”

¹⁰ Bo mutu beni kamana kutuba, Angelena mu thinu wuvanga nsambu ayi mu luzolo wutuba: “Dedi ngiewu, minu mvami yiyonzikila va nzo Zimbangi zi Yave. Ayi nati bubu, yidi wumueka mu Zimbangi zi Yave.” Kheti diba diambu diphasi kuvanga mawu, vayi Angelena wuba wuvumbama. Nandi wumonisa kuidi batu bansalanga yandi zifoto ziandi ayi zi bakundi bandi bansadilanga Yave mu mayangi. Ayi mu lukinzu, wusudikisa mambu kankikininanga. (1 Pet. 3:15) Mambu mbi mamonika? Bo yaya Angelena kamana kutuba, dibakala beni wuvumbama. Nandi wutuba ti wuntebuka moyo mambu mamboti kaviokila bo kaba landakananga zikhutukunu na Zimbangi zi Yave. Angelena wutuba ti: “Luidi luaku lunneni kukakidila dizina di Yave.” Befu mvitu tuidi luaku lu kuzitisa Yave ayi kunkembisa, bo bankaka ba kumvueza.

11. Buidi bisadi bikuikama bi Yave, banlandikininanga nsua widi mu Minkunga 96:8?

¹¹ Tanga Minkunga 96:8. Befu tunkembisanga Yave mu biuma bitu bi luvalu. Mbuongimini yikiedika, yinzitisanga Yave. (Zinga. 3:9) Dedi, basi Isaeli bavana biuma biawu muingi kutunga ayi kuludika tempelo. (2 Minti. 12:​4, 5; 1 Lusa. 29:​3-9) Minlandikini mi Yesu, babuela mioku mu “biuma biawu.” (Luk. 8:​1-3) Mu sekulu yitheti, Baklistu mvandi bavana biuma biawu muingi kusadisa zikhomba ziawu zi kiphevi. (Mav. 11:​27-29) Bubu, mvitu tunkembisanga Yave mu kuvana minkhailu.

12. Buidi minkhailu tumvananga mintuadisilanga nkembu kuidi Yave? (Tala mvandi foto.)

¹² Mona kifuani kimmonisa buidi minkhailu mitu minkembisilanga Yave. Kipholo kivangama mu 2020 kintubila mambu mamonika ku Zimbábue. Batu bawombu baba belama kufua mu kibila ki nzala, kubunda mvandi khomba mueka bantedilanga Prisca. Kheti mu mambu amomo maphasi, yaya Prisca wutatamana kubasikanga mu kisalu ki kusamuna mu bilumbu kasikika. Batu baba kalanga yandi va nsengi, baba kumvuezanga mu kunkamba ti wunkuiza fua mu nzala bo kankuendanga mu kisalu ki kusamuna, kubika kuandi kue sala. Prisca wuba lufiatu ti, “Yave kayekulanga ko bisadi biandi.” Ayi vasa vioka ko beni thangu, nandi wutambula lusalusu lu kimvuka ki Yave. Prisca kanungina kutambula lusalusu alolo, mu kibila ki minkhailu tumvananga. Batu baba kalanga yandi va nsengi bankamba: Bukiedika, “Nzambi’aku kasa kukuekula ko.” Befu tuntomba kuluta longuka matedi nandi. Sambuadi di batu bankalanga yandi va nsengi batona kulandakananga zikhutukunu.

13. Buidi tulenda kembisila Yave mu mavanga mitu? (Minkunga 96:9)

¹³ Tanga Minkunga 96:9. Befu tunkembisanga Yave mu mavanga mitu. Vaba tombuluanga zinganga Nzambi baba salanga ku tempelo yi Yave kuba badiodila mu nyitu. (Esodu 40:​30-32) Befu mvitu, tufueti ba badiodila kubika to mu nyitu vayi mvandi mu kubika vanga dioso diambu Yave kanlendanga. (Minku. 24:​3, 4; 1 Pet. 1:​15, 16) Tufueti vanga mangolo muingi kubika “kimutu kikhulu”—voti mavanga mambi ayi kuvuata “kimutu kimona” mu kuyindulanga ayi kuvanganga mambu mantuadisa nkembu kuidi Yave. (Kolo. 3:​9, 10) Mu lusalusu lu Yave, kheti batu baba vanganga kitsuza ayi buphunya, balenda balula kimutu kiawu ayi kuvuata kimutu kimona.

14. Mbi ngie belonguka mu kifuani ki Jack? (Tala mvandi foto.)

¹⁴ Tala kifuani ki Jack. Mu kibila ki buphunya ayi mavanga mankaka mambi kaba, baba kuntedilanga Demonio. Mu kibila ki mambu kavanga, banzengila nkanu wu lufua. Vayi bo kaba temina kilumbu beni, Jack wutona kulonguka Kibibila na khomba mueka wuyenda kue longa mu buloku nandi kaba. Nandi wubika mavanga mambi ayi buviokila thangu wukivana muingi kubotama. Mu kibila ki mavanga mamboti Jack kayiza ba, bo kilumbu banzengila nkanu lufua kituka, masodi mankaka baba kengidilanga buloku, batona kudila mu thangu kaba kuba kanina. Wumueka mu zimfumu waba salanga ku buloku wutuba: “Jack wuba mutu wuluta ba mambi ku kibuangu akiki. Vayi buabu weka mutu wu mavanga mamboti.” Bo vavioka sabala yimueka tona bavonda Jack, zikhomba bavutuka ku buloku muingi kutuadisa lukutukunu, bawu badengana kuna wumueka waba landakana lukutukunu mu khumbu yitheti. Mbi binata dibakala beni kuvanga mawu? Nandi wuyituka mu phila Jack kabaludila mavanga ayi waba tomba kuzaba mbi kafueti vanga muingi kubuongimina Yave. Bukiedika, mavanga mitu mantuadisanga nkembu kuidi Tat’itu yi diyilu!—1 Pet. 2:12.

BUIDI YAVE KALA KEMBISILA DIZINA DIANDI?

15. Buidi Yave kala kembisila dizina diandi mu phila yilutidi? (Minkunga 96:​10-13)

¹⁵ Tanga Minkunga 96:​10-13. Matangu amomo matsuka ma Minkunga 96, mammonisa ti Yave widi Mfudisi ayi Ntinu wusonga. Buidi Yave kambelimina kukembisila dizina diandi? Nkandu wunkambu nandi wunkuiza fundisa Babiloni Yinneni, yimvuezanga dizina diandi. (Nzai. 17:​5, 16; 19:​1, 2) Ayi bawombu bala mona lutululu lu Babiloni, bala baka makani ma kusadila Yave va kimueka ayi befu mu mbuongimini yikiedika. Bosi mu Alimangedoni, Yave wala tulula Satana ayi baboso bamvuezanga dizina diandi. Vayi nandi wala vukisa boboso ba kunzolanga, ba kuntumukinanga ayi bankembisanga dizina diandi. (Mala. 8:38; 2 Te. 1:​6-10) Ayi kutsuka luyalu lu Yesu lu kivevi ki mimvu, Yave wala zitisa dizina diandi mu phila yilutidi. (Nzai. 20:​7-10) Nati thangu ayoyo, “ntoto wala, wala nzailu yinkembo wu Yave, dedi bo minlangu minwesilanga ḿbu.”—Haba. 2:14.

16. Mbi widi wukubama muingi kuvanga? (Tala mvandi fofo.)

¹⁶ Yala ba thangu yi mayangi bo batu boso bala kembisa Yave mu kibila ki dizina diandi! Bo tukidi temina nati thangu beni yituka, tulenda sadila loso luaku tuidi muingi kukembisa Yave. Muingi kumonisa nkinza wu mambu amomo, Kisadi Kikuikama wusolizi Minkunga 96:8 muingi maba matangu ma mvu 2025: ‘Vananu Yave nkembu kafueni mu tambula.’