DILONGI 23
NKUNGA 2 Dizina Diaku Yave
Tumvuanga Nkinza Yave, Ayi Dizina Diandi
‘‘Benu luidi zimbangi ziama’ butubidi Yave.’—YESA. 43:10.
MAMBU TUANLONGUKA
Tunkuiza mona mbi tulenda vanga, muingi tumonisa ti Yave widi wunlongo mu ziphila zioso ayi ti Satana widi nkua luvunu.
1-2. Buidi tuzabidi ti Yesu waba vuanga beni nkinza dizina di Yave?
YESU wumvuanga beni nkinza dizina di Yave. Ayi nandi mutu wulutidi wukakidila dizina di Tat’andi. Dedi bo tumueni mu dilongi dibedi, Yesu wuba wukubama muingi kufua mu kibila ki Tat’andi. (Mala. 14:36; Ebe. 10:7-9) Ayi bo luyalu luandi lu Kiveve ki mimvu luela mana nandi wala vutula luyalu kuidi Tat’andi muingi kuzitisa dizina di Yave. (1 Ko. 15:26-28) Luzolo Yesu kadi mu dizina di Nzambi, lummonisa ti nandi wuba kikundi kifikama ayi Tat’andi. Mamoso Yesu kavanga mammonisa ti nandi wunzolanga beni Yave.
2 Yesu wuyiza va ntoto dedi mvuala wu Nzambi. (Yoa. 5:43; 12:13) Nandi wuzabikisa kuidi minlandikini miandi dizina di Tat’andi. (Yoa. 17:6, 26) Mvandi wulonga ayi wuvanga mangitukulu mu dizina di Yave. (Yoa. 10:25) Yesu wudinda kuidi Yave muingi kakieba minlandikini miandi. (Yoa. 17:11) Boti Yesu wunzolanga beni dizina di Yave, buidi mutu kalenda bela nlandikini wu Yesu mu khambu visa mbi dizina di tat’andi dinsundula?
3. Mbi tunkuiza longuka mu dilongi adidi?
3 Mu kuba minlandikini mi Yesu, mvitu tumvuanga nkinza dizina di Yave. (1 Pet. 2:21) Mu dilongi adidi tuemmona kibila mbi baboso bansamunanga “zitsangu zimboti zi kintinu” bubu, ba kuba tedilanga mu dizina di Yave. (Mat. 24:14) Mvandi tunkuiza mona buidi kadika mutu mu befu kafueti tadila dizina di Yave.
“DIKABU DINNATA DIZINA DIANDI”
4. (a) Kiyeku mbi Yesu kavana kuidi minlandikini miandi ava kavutuka ku diyilu? (b) Mu kibila ki kiyeku akiokio kiuvu mbi tulenda kuyivana?
4 Mu bilumbu bitsuka bi Yesu va ntoto ava kuvutuka ku diyilu, nandi wukamba minlandikini miandi : “Bo phevi yinlongo yala kulumuka mu benu, luala tambula mangolo ayi luala ba zimbangi ziami ku Yelusalemi, ku Yuda, ku Samalia ayi nati kusukila nza.” (Mav. 1:8) Mawu maba sundula ti zitsangu zimboti zisinkuiza samunu ko to ku Isaeli, vayi mvandi mu mimvila minkaka. Buviokila thangu batu abobo ba mimvila minkaka bayiza baka luaku lu kuba minlandikini mi Yesu. (Mat. 28:19, 20) Vayi Yesu wuba Kamba: “Luala ba zimbangi ziama.” Mambu amomo mabe sundula ti minlandikini mi Yesu bafueti ba zimbangi zi Yesu? Mambu madi mu kapu 15 yi Mavanga mankuiza tusadisa kubaka mvutu wu kiuvu akiokio.
5. Buidi bapostolo ayi bakulutu ku Yelusalemi bamonisina ti batu boso bafueti zaba dizina di Yave? (Tala mvandi fikula.)
5 Mu mvu 49 T.K., Bapostolo ayi bakulutu ku Yelusalemi bakutakana, muingi kuyindula matedi mbi bapakanu bakikinina kiedika bafueti vanga muingi baba baklistu. Va tsuka lukutukunu beni, Tiagu khomba Yesu wutuba: “[Petelo] masudikisa buboti phila Nzambi mu khumbu yitheti kavutudila thalu’andi kuidi batu mu nza, muingi kasola va khati’awu batu bafueti ba mu dikabu dinnata dizina diandi.” Dizina di nani Tiagu kaba tubila? Mu kutubila mambu mbikudi Amosi kasonika nandi wubue tuba: “Muingi batu boso basobila, batomba Yave, va kimueka na batu ba nza, batu bantedulu mu dizina diami, butubidi Yave.” (Mav. 15:14-18) Minlandikini amiomio mimona basa longuka ko to matedi Yave vayi mvandi batedulu mu dizina di Yave. Mawu mansundula ti bawu batona kunata dizina di Yave ayi bayiza ba bazabakana mu dizina beni.
Mu lukutukunu lu dingumba dintuadisi mu thangu bapostolo, bawu bavisa ti baklistu bafueti tedulu mu dizina di Nzambi (Tala lutangu 5)
6-7. (a) Kibila mbi Yesu kayizila va ntoto? (b) Kibila mbi kinkaka kilutidi Yesu kayizila va ntoto?
6 Dizina di Yesu dinsundula “Yave Mvukisi” ayi Yave wusadila Yesu muingi kuvukisa baboso banlekila kiminu mu muan’andi. Ayi Yesu wumonisa tsundu yi dizina diandi bo kayiza va ntoto ayi kavana luzingu luandi dedi nkhayilu kuidi baboso. (Mat. 20:28) Bo kavana luzingu luandi, nandi wuzibula nzila muingi batu bavuka ayi babaka luzingu lu mvu ka mvu.—Yoa. 3:16.
7 Kibila mbi vabe tombulu kuvukisa batu? Mu kibila ki mambu mamonika ku lumbu lu Edeni. Dedi bo tulongukizi mu dilongi dibedi, matata mitu matheti Adami ayi Eva babalukila Yave, diawu bazimbisila luaku lu kuzinga mvu ka mvu. (Ngene. 3:6, 24) Kubotula kuandi mambu amomo, mvandi Satana wutuba luvunu matedi Yave. (Ngene. 3:4, 5) Diawu vabe tombulu batu boso kuzaba ti, Yave kasa vanga ko ni diambu dimbi ayi ti dizina Diandi didi dinlongo. Mu kuba mvuala wu Yave, Yesu wuvanga mamoso muingi kudiodisa dizina di Yave.
Buidi mutu kalenda tubila ti widi nlandikini wu Yesu boti kasa zaba ko dizina di tat’andi?
8. Mbi baboso baba kiminu mu Yesu, babe tombulu kuvisa?
8 Vaba tombulu baboso baba kiminu mu Yesu, kuvisa ti Yave nandi tho yi luvukusu luawu. (Yoa. 17:3) Dedi bo Yesu katubila, bawu bala ba bazabakana mu dizina di Yave. Mvandi vabe tombulu bawu kuzaba nkinza wu kudiodisa dizina adiodio, kibila mawu mankuiza basadisa kuvuka. (Mav. 2:21, 22) Diawu vabe tombulu minlandikini mioso mikuikama, kulonguka matedi Yave ayi Yesu. Diawu ku tsuka nsambu kavanga mu Yoane 17 Yesu wutuba: “Minu yiba zabikisa dizina diaku ayi yela tatamana ku dizabikisa, muingi bawu bamonisa luzolo kuidi batu bankaka, dedi bo ngie wumbonisina luzolo ayi minu yala ba yawu kithuadi.”—Yoa. 17: 26.
‘BENU LUIDI ZIMBANGI ZIAMA’
9. Buidi tulenda monisina ti dizina di Yave nkinza didi kuidi befu?
9 Diambu dilutidi nkinza kuidi minlandikini mioso mi Yesu didi, kudiodisa dizina di Yave. (Mat. 6:9, 10) Dizina di Yave diawu difueti luta ba nkinza mu luzingu luawu. Bawu bafueti monisa mawu mu mavanga mawu. Vayi buidi tulenda sadisila kudiodisa dizina di Yave mu luvunu loso Satana katuba?
10. Mambu mbi bantubila mu Yesaya 42-44? (Yesaya 43:9; 44:7-9) (Tala mvandi fikula.)
10 Buku yi Yesaya mu kapu 42-44 yimmonisa buidi kadika mutu mu befu kalenda diodisila dizina di Yave. Mu zikapu aziozio Yave wundinda baboso bansadilanga zinzambi zinkaka, bamonisa bivisa boti zinzambi beni zidi zikiedika. Ayi dedi bumbelanga ku nzo lufundusu, Yave wuntumisa batu muingi bata kimbangi mu mambu amomo, vayi vamonikanga ko ni mutu.—Tanga Yesaya 43:9; 44:7-9.
Befu tummonisanga ti vasi ko Nzambi yinkaka kena Yave, mu mambu tuntuba ayi tumvanga (Tala lutangu 10-11)
11. Dedi bummonisina Yesaya 43:10-12 mambu mbi Yave katuba matedi dikabu diandi?
11 Tanga Yesaya 43:10-12. Matedi dikabu diandi Yave wutuba: ‘Benu muidi zimbangi Ziama, . . . Ayi minu yidi Nzambi.’ Yave wundinda kuidi baboso muingi bavana mvutu wu kiuvu akiki: ‘Vadi Nzambi yinkaka kubotula kuandi Minu?’ (Yesa. 44:8) Befu tuidi luaku lu kutambudila kiuvu akiokio. Ayi tulenda monisa ti Yave Nandi to Nzambi yikiedika mu mambu tunkoluka ayi tumvanga. Nandi to wulutidi zangama mu nza yimvimba. Phila tunnatina luzingu luitu yilenda monisa boti tunzolanga Yave ayi boti tuidi bakuikama mu nandi, kheti mu zithotolo zi Satana. Mu phila ayoyo tunkuiza sadisa kudiodisa dizina di Yave.
12. Buidi mbikudulu yidi mu Yesaya 40:3, 5 yisalimina?
12 Tunlandakananga kifuani ki Yesu bo tunsadisa kudiodisa dizina di Yave. Mbikudi Yesaya wutuba ti vala monika mutu wala ‘kubika nzila yi Yave.’ (Yesa. 40:3) Buidi mawu masalimina? Yoane mbotiki wukubikila Yesu nzila, no wuyizila mu dizina di Yave ayi wutubila va mvingi wu Yave. (Mat. 3:3; Mala. 1:2-4; Luk. 3:3-6) Mbikudulu beni yibue tuba: ‘Nkembu wu Yave wala monika.’ (Yesa. 40:5) Mawu masalama bo Yesu kayiza va ntoto va mvingi wu Yave ayi wuvangila mambu mu phila yivedila dedi naveka Yave.—Yoa. 12:45.
13. Buidi tulenda landikinina kifuani ki Yesu?
13 Dedi Yesu, befu mvitu tuidi zimbangi zi Yave. Tunnatanga dizina di Yave ayi tunzabikisanga kuidi bankaka zikhanu ziandi zimboti. Vayi muingi tuvangila mawu mu phila yifuana mvandi tufueti zabikisa kiyeku ki mfunu Yesu kadi mu kudiodisa dizina di Yave. (Mav. 1:8) Yesu nandi mbangi yi Yave yilutidi ayi befu tunlandakananga thuadusulu’andi. (Nzai. 1:5) Buidi kadika mutu mu befu kafueti tadila dizina di Yave?
PHILA TUNTADILANGA DIZINA DI YAVE
14. Dedi bummonisina Minkunga 105:3, mbi binsundula kuyayisa dizina di Yave ayi buidi tumvangilanga mawu?
14 Befu tunyayisanga dizina di Yave. (Tanga Minkunga 105:3.) Yave wunkuangalalanga beni bo tunyayisanga dizina diandi. (Yele. 9:23, 24; 1 Ko. 1:31; 2 Ko. 10:17) “Kuyayisa dizina di Yave” kunsundula kukuangalala mu Nzamb’itu Yave. Luaku lunneni kuidi befu kusadisa kudiodisa dizina di Nzambi. Tumonanga ko zitsoni kuyizabikisa kuidi zikolega zitu zi kisalu, zi kikola ayi batu bankalanga yitu va nsengi ti tuidi zimbangi zi Yave. Satana wuntomba tubika kuzabikisa dizina di Yave. (Yele. 11:21; Nzai. 12:17) Nandi ayi batu kansadilanga bantomba muingi batu babika kuzaba Yave. (Yele. 23:26, 27) Vayi luzolo tuidi mu Yave lu tuvanganga kuyayisa dizina diandi ‘thangu zioso.’—Minku. 5:11; 89:16.
15. Mbi binsundula kufiatila mu dizina di Yave?
15 Befu tumfiatilanga dizina di Yave. (Yoeli 2:32; Lom. 10:13, 14) Kufiatila mu dizina di Yave, kuisinsudula ko to kusadila dizina di Nzambi, vayi kunsundula mvandi kuzaba buboti kimutu ki Yave, kumfiatila, kutomba lusalusu ayi thuadusulu’andi. (Minku. 20:7; 99:6; 116:4; 145:18) Mvandi kuzabikisa zikhadulu ziandi zimboti kuidi bankaka ayi kuba kindisa kunyongina masumu mawu muingi babaka lunungu va meso ma Yave.—Yesa. 12:4; Mav. 2:21, 38.
16. Buidi tulenda monisina ti Satana widi nkua luvunu?
16 Befu tuidi bakubama muingi kutovuka mu kibila Yave. (Tia. 5:10, 11) Bo tuntatamana bakuikama mu Yave kheti mu thangu ziphasi, tummonisanga ti Satana nkua luvunu. Mu bilumbu bi Yobi, Satana wutuba matedi bisadi bioso bi Yave: ‘Biabioso mutu kadi wala vana biawu muingi kuvukisa luzingu luandi.’ (Yobi 2:4) Satana wutuba ti batu bankuiza sadila to Yave mu thangu yi mamboti vayi ba kuviokila mu ziphasi bankuiza yekula Yave. Yobi wumonisa ti mambu Satana katuba madi luvunu. Bobuawu mvandi, zioso kua ziphasi Satana kalenda tutuadisa, befu tuisinkuiza banda ko Yave mbusa. Ayi tuidi lufiatu ti Yave wala tatamana ku tukieba mu kibila ki dizina diandi.—Yoa. 17:11.
17. Dedi bummonisina 1 Petelo 2:12 mu ziphila mbi tulenda vanina nkembu kuidi Yave?
17 Befu tunkinzikanga dizina di Yave. (Zinga. 30:9; Yele. 7:8-11) Mu kuba zimbangi ziandi befu tulenda kinzika voti kubivisa dizina diandi. (Tanga 1 Petelo 2:12.) Vayi tuntomba kuvanga mamoso, muingi kuzitisa dizina di Yave mu mambu tunkoluka ayi tumvanga. Mu phila ayoyo tunkuiza vana nkembu kuidi Yave kheti tuidi batu ba masumu.
18. Phila mbi yinkaka tulenda monisina ti tumvuanga nkinza dizina di Yave? (Tala mvandi nota.)
18 Tunluta vuanga nkinza Yave, kena phila batu bankuiza tutadila. (Minku. 138:2) Kibila mbi? Kibila luzolo tuidi mu Yave lulenda vanga bankaka ku tutubila bubi.a Yesu wuvitika lufua lutsoni muingi kuzitisa Yave. Nandi kasa tsikika ko thalu mu ‘zitsoni kaviokila,’ mu kukhambu yindula mu phila mbi bankaka bankuiza ntadila. (Ebe. 12:2-4) Nandi wutsikika thalu mu kuvanga luzolo lu Nzambi.—Mat. 26:39.
19. Buidi wulenda monisina ti wumvuanga nkinza dizina di Yave?
19 Befu tunyemisanga dizina di Yave, ayi luidi luaku lunneni kuba zimbangi ziandi. Tuidi bakubama muingi kuviokila mu moso kua mambu mu kibila ki Yave. Mu befu, diambu dilutidi nkinza didi kuzitisa Yave. Diawu, makani mitu mafueti ba kutatamana kuzitisa Yave kheti mu moso kuandi mambu maphasi Satana kalenda tutuadisa. Mu phila ayoyo tuala monisa ti dizina di Yave nkinza beni didi kuidi befu dedi bo Yesu ka divuilanga nkinza.
NKUNGA 10 Zitisa Yave Nzamb’itu!
a Kheti Yobi wuba wukuikama vayi nandi wutona kukuazuka mu phila batu baba kuntadila, bo bakundi bandi batatu bamvunina mambu. Va thonono bo bana bandi bafua, ayi kiuka kiandi kimana ‘Yobi kasa sumuka ko ayi kasa fundisa ko Yave.’ (Yobi 1:22; 2:10) Vayi bo bakundi bandi bamvunina mambu, nandi ‘wuyolukila mu nganzi.’ Wuluta vua nkinza phila baba kuntadilanga kena kuzitisa Nzambi.—Yobi 6:3; 13:4, 5; 32:2; 34:5.