Yesu Waba Vuanga Nkinza Dizina di Yave

1-2. (a) Mbi Yesu kavanga va builu ava bamvonda? (b) Biuvu mbi tunkuiza baka mimvutu mu dilongi adidi?

VA BUILU kilumbu 14 ngonda yi Nisa, mvu 33 T.K., Yesu wudia bidia bimfumu va masika ma builu na bapostolo bandi bakuikama. Nandi wuzaba ti bembelama kumvakula kuidi Yuda, ayi wunkuiza viokila mu ziphasi ziwombo ayi kufua mu mioko mi zimbeni ziandi. Bo kamana kudia bidia bimfumu va masika ma builu na minlandikini miandi, nandi wutuba mambu mawombo makindisa bapostolo bandi. Bo thangu yifuana muingi batiakana, Yesu wuvanga nsambu wumfunu beni. Mvuala Yoane wusonika nsambu awowo mu kapu 17 yi Buku yi Yoane.

² Mu dilongi adidi, tuemmona mimvutu mi biuvu abibi: Mambu mbi maba kuazula Yesu ava kafua? Mbi kaba luta vuanga nkinza bo kaba va ntoto?

“YIBA ZABIKISA DIZINA DIAKU”

3. Mbi Yesu katuba matedi dizina di Yave, ayi mbi kaba tomba kutuba? (Yoa. 17:​6, 26)

³ Mu nsambu kavanga Yesu wutuba: “Yiba zabikisa dizina diaku.” Khumbu wadi Yesu katuba ti wuzabikisa dizina di Yave kuidi minlandikini miandi. (Tanga Yoa. 17:​6, 26.) Mbi nandi kaba tomba kutuba? Bukiedika ti nandi waba tomba kuba zabikisa dizina dio bawu bakhambu zaba? Ndamba. Kibila minlandikini mi Yesu baba basi Yuda ayi bazaba ti dizina di Nzambi, didi Yave. Dizina beni diaba monikanga biveve na biveve di zikhumbu mu masonoko ma kiebeleo. Diawu tulenda tubila ti Yesu kabasa tubila ko to matedi dizina di Yave, vayi mvandi mbi diawu dinsundula. Nandi wusadisa minlandikini miandi kuzaba buboti Yave, mu kuba zabikisa lukanu lu Yave matedi ntoto, batu ayi zikhadulu ziandi zimboti. Bukiedika, Yesu to zebi buboti Yave.

4-5. (a) Fuanikisa mbi binsundula kuzaba dizina di mutu? (b) Buidi minlandikini mi Yesu bayiza zabila buboti Yave?

⁴ Yindulabu boti mu kimvuka kiaku muidi nkulutu wu kimvuka widi dotoli. Ngie zebi ti nandi wunsadilanga Yave mu mimvu miwombo, vayi kilumbu kimueka ngie wumbakana kubela ayi ba kunata mu thinu ku nzo mbuku khomba beni kansadilanga. Nandi wumvanga mamoso muingi kuvukisa monyo’aku. Buidi wummuena, dizina di khomba ayoyo dinkuiza tatamana kuba yoyawu tsundu kuidi ngiewu? Bukiedika ti ndamba. Nandi kasiedi ko to nkulutu wu kimvuka ngie wuzebi, vayi mvandi dotoli wuvukisa luzingu luaku.

⁵ Bobuawu mvandi, minlandikini mi Yesu bazaba dizina di Yave, vayi bayiza visa tsundu yi dizina adiodio, mu kisalu ki kusamuna Yesu kavanga. Kibila mbi tuntubila mawu? Kibila, Yesu wulandakana buboti kifuani ki tat’andi mu mambu katuba ayi kavanga. Mu phila ayoyo, minlandikini miandi bayiza zaba buboti Yave mu kukuwa malongi ma Yesu ayi kumona phila nandi kaba tadilanga batu.—Yoa. 14:9; 17:3.

“DIZINA DIAKU, DIO WUPHANA”

6. Mu phila mbi Yave kavanina Yesu dizina diandi? (Yoa. 17:​11, 12)

⁶ Bo Yesu Kanata minlandikini miandi mu nsambu, nandi wudinda: “wuba kieba mu kibila ki dizina diaku, dizina dio wuphana.” (Tanga Yoa. 17:​11, 12.) Mawu mansundula ti Yesu wutambula dizina di Yave? Ndamba. Buabu, mbi Yesu kaba tomba kutuba mu bikuma “dizina diaku dio wuphana?” Nandi waba tomba kutuba ti wuyiza dedi mvuala wu Yave, ayi wuvanga mangitukulu mawombo mu dizina di tat’andi, Yave. (Yoa. 5:43; 10:25) Ayi mvandi, dizina di Yesu dinsundula, “Yave Mvukisi.” Mawu mammonisa ti dizina di Yave didi kithuadi na dizina di Yesu.

7. Fuanikisa buidi Yesu kayolukila va mvingi Yave.

⁷ Muingi kufuanikisa, dedi bo nyadi kalenda fidila mvual’andi ku tsi yinkaka muingi kayoluka va mvingi’andi, Yave wufila Yesu dedi mvuala muingi kazabikisa kuidi dikabu diandi matedi nandi.—Mat. 21:9; Luk. 13:35.

8. Buidi dizina di Yave dibela mu Yesu ava kiza va ntoto? (Esodu 23:​20, 21)

⁸ Mu kuba mvuala wu Yave, Yesu wunzabikisanga zithuadusulu zi Yave kuidi zimbasi zinkaka ku diyilu ayi mvandi kuidi batu va ntoto. (Yoa. 1:​1-3) Ḿba, nandi mbasi Yave kafila muingi kukeba basi Isaeli bo baba kuenda ku ntoto Yave kaba kanikisa. Bo kakamba basi Isaeli batumukina mbasi ayoyo, Yave wuba Kamba: “Kibila dizina diama didi mu nandi.”a (Tanga Esodu 23:​20, 21.) Bo katuba ti dizina diandi diba mu Yesu, maba sundula ti Yesu wuba mvuala wu Yave, mutu wulutidi muingi kukakidila ayi kudiodisa dizina diandi.

“TATA, ZITISA DIZINA DIAKU”

9. Buidi Yesu kamonisina ti waba vuanga nkinza dizina di Yave.

⁹ Kheti ava kiza va ntoto, Yesu waba vuanga beni nkinza dizina di Yave. Diawu tulendi kuituka ko mu mambu kavanga bo kaba va ntoto. Kutsuka kisalu kiandi ki kusamuna Nandi wusambila: “Tata, zitisa dizina diaku.” Bosi vayuwakana mbembu yifumina ku diyilu yituba: “Minu yimana dizitisa ayi yinkuiza bue zitisa diawu.”—Yoa. 12:28.

10-11. (a) Buidi Yesu kazitisila dizina di Yave? (Tala mvandi fikula.) (b) Kibila mbi vantombulu kuvedisa ayi kukakidila dizina di Yave?

¹⁰ Yesu mvandi wuzitisa dizina di tat’andi. Phila yimueka kavangila mawu yidi mu kuzabikisa zikhadulu zimboti zi tat’andi kuidi bankaka. Vayi vabe tombulu kuvanga mambu mankaka muingi kuzitisa dizina di Yave. Vabe tombulu kuvedisa ayi kukakidila dizina di Yave mu luvunu loso bantuadisanga mu diawu.b Yesu wumonisa ti mambu amomo madi beni nkinza bo kalonga minlandikini miandi kusambila. Nandi wutuba: “Tat’itu widi ku diyilu, bika dizina diaku diba dinlongo.”—Mat. 6:9.

¹¹ Kibila mbi vantombulu kuvedisa ayi kukakidila dizina di Yave? Kibila tona kuandi ku lumbu lu Edeni, Satana wuvunina Yave mambu. Nandi wutuba ti Yave widi nkua luvunu ayi ti nandi waba kuimina mambu mamboti kuidi Adami ayi Eva. (Ngene. 3:​1-5) Mu mambu amomo katuba, Satana waba monisa ti phila yi Yave yi kuvangila mambu yisi ko yisulama. Luvunu alolo lubivisa dizina di Yave. Buviokila thangu mu bilumbu bi Yobi, Satana wutuba ti batu basadilanga ko Yave mu luzolo, vayi mu kibila ki biuma balenda tambula kuidi Nzambi. Ayi mvandi wutuba ti vasi ko mutu kalenda tatamana wukuikama mu Yave na kuviokila mu ziphasi. (Yobi 1:​9-11; 2:4) Vabe tombulu thangu muingi kumonisa ti mambu Satana katuba matedi Yave, maba ma luvunu.

“YIDI MU KUVANA LUZINGU LUAMA”

12. Mu kibila ki luzolo mu Yave, mbi Yesu kaba wukubama muingi kuvanga?

¹² Mu kibila ki luzolo kaba mu Yave, Yesu wabe tomba kuvanga mamoso muingi kuvedisa ayi kukakidila dizina di Yave. Nandi wutuba: “Yidi mu kuvana luzingu luama.” (Yoa. 10:​17, 18) Yesu wuba wukubama muingi kufua mu kibila ki Yave. c Bakuela batheti Yave kavanga Adami ayi Eva, bambanda mbusa mu kuba ku khonzo Satana. Vayi Yesu kasa vanga ko mawu. Nandi wuba wukubama muingi kukuiza va ntoto, ayi kumonisa luzolo luandi mu Yave. Nandi Wuvangila mawu mu kutatamana wukuikama mu Yave nati kutsuka. (Ebe. 4:15; 5:​7-10) Nandi wutatamana wukuikama kheti mu lufua lu phasi va dikunzi. (Ebe. 12:2.) Mu phila ayoyo nandi wumonisa ti waba zolanga Yave ayi waba kinzika dizina diandi.

13. Kibila mbi Yesu kabela mutu wufuana muingi kumonisa ti Satana nkua luvunu? (Tala mvandi fikula.)

¹³ Yesu wumonisa ti Satana nkua luvunu mu phila kanatina luzingu luandi. (Yoa. 8:44) Nandi wuzaba buboti Yave kuvioka woso kua mutu. Diawu boti mambu Satana katuba matedi Yave maba makiedika khanu Yesu wuzaba mawu. Vayi nandi wutatamana kukakidila dizina di Yave. Kheti bo mabe monikina buka ti Yave wunyekula, Yesu wuba wukubama muingi kufua kena kubanda mbusa tat’andi wu luzolo.—Mat. 27:46.d

“YIMA MANISA KISALU KIO WUPHANA”

14. Buidi Yave kasakumunina lukuikumunu lu Yesu?

¹⁴ Mu builu butsuka ava kafua, Yesu wusambila: “Yima manisa kisalu kio wuphana muingi kuvanga.” Nandi wuba lufiatu ti Yave wala nsakumuna mu lukuikumunu luandi. (Yoa. 17:​4, 5) Lufiatu Yesu kaba mu tat’andi luba lukiedika. Yave kasa bika ko muingi muan’andi katatamana ku dibumbi. (Mav. 2:​23, 24) Yave wuvulubusa Yesu, ayi wumvana kiyeku kimfunu ku diyilu. (Fil. 2:​8, 9) Buviokila thangu, Yesu wutona kuyala mu kintinu ki Nzambi. Mbi kintinu beni kiala vanga? Bo kalonga minlandikini miandi kusambila, Yesu wutuba: “Bika Kintinu kiaku kiza. Ayi bika luzolo luaku luvangama va ntoto, dedi bo lumvangimina ku diyilu.”—Mat. 6:10.

15. Mambu mbi Yesu kala vanga?

¹⁵ Mu bilumbu binkuiza, Yesu wala bunga zimbeni zi Nzambi mu mvita wu Alimangedoni. (Nzai. 16:​14, 16; 19:​11-16) Bosi nandi wala tula Satana ku diyenga ko kalasa bue vangila ko ni kiuma. (Nzai. 20:​1-3) Yesu wala tuadisa ndembama ayi wala vedisa batu boso, mu luyalu lu kiveve ki mimvu. Nandi wala vulubusa bafua, wala kitula ntoto woso paladizu ayi luzolo lu Yave luala vangama.—Nzai. 21:​1-4.

16. Mambu mbi mala vangama mu luyalu lu kiveve ki mimvu?

¹⁶ Mambu mbi mala monika kutsuka luyalu lu kiveve ki mimvu? Disumu diala mana. Diawu valasa bue tombulu ko kudinda nlemvu wu masumu mu nzila khudulu, mvandi valasa bue tombulu ko kuvanga nsambu mu dizina di Yesu. Ayi mben’itu lufua tutambakana kuidi Adami luala mana. Bafua bala vulubuka ayi batu boso va ntoto bala ba bavedila.—1 Ko. 15:​25, 26.

17-18. (a) Mambu mbi mala monika kutsuka luyalu lu kiveve ki mimvu? (b) Mbi Yesu kala vanga bo luyalu lu kiveve ki mimvu luala mana? (1 Kolintu 15:​24, 28) (Tala mvandi fikula.)

¹⁷ Mambu mbi mankaka mala monika kutsuka luyalu lu kiveve ki mimvu? Diambu dilutidi mfunu diala monika. Dizina di Yave diala vedusu. Buidi? Tona kuandi ku Lumbu lu Edeni, Satana wutuba ti Yave widi nkua luvunu ayi nyadi wukhambulu luzolo. Tona mu thangu beni, bisadi bi Yave bamvanganga beni mangolo muingi kudiodisa ayi kukakidila dizina di Yave. Kutsuka luyalu lu kiveve ki mimvu, mambu moso mala dedukusu. Yave wala monisa ti nandi widi tata yi luzolo.

¹⁸ Baboso bala zaba ti Satana nkua luvunu. Mbi Yesu kala vanga bo luyalu luandi lu kiveve ki mimvu luala mana? Bukiedika ti nandi mvandi wala ba buka Satana mu kutomba kubalukila Yave? Ndamba. (Tanga 1 Kolintu 15:​24, 28.) Yesu wala vutula luyalu kuidi tat’andi, ayi wala ba kutsi luyalu lu Yave. Bukiedika, mu kibila ki luzolo kadi mu Tat’andi, Yesu wala vutula biabioso kuidi Yave.

19. Buidi Yesu kantadilanga Yave?

¹⁹ Yesu wumonisa mu phila yivedila ntindu mbi mutu tat’andi kadi. Diawu tulendi kuituka ko kumona kibila Yave kavanina dizina diandi kuidi Yesu. Buidi Yesu kantadilanga dizina di Yave? Nandi wunluta vuanga nkinza Yave kena kioso kua kiuma. Nandi wuba wukubama muingi kufua mu kibila ki Tat’andi, ayi widi wukubama muingi kuvutula biabioso kuidi Yave kutsuka luyalu lu kiveve ki mimvu. Buidi tulenda landikinina kifuani kiandi? Tuala baka mvutu wu kiuvu akiokio mu dilongi dinlanda.