DILONGI 10
NKUNGA 31 Diatanga na Nzambi!
Yindula mu Phila Yave Ayi Yesu Banyindudilanga
“Mu kumona ti Klistu wutovuka mu kinsuni, diawu benu mvinu banu bakubama, mu kuba momawu mayindu.”—1 PET. 4:1.
MAMBU TUANLONGUKA
Tuenlonguka buidi mvuala Petelo kalonguka kuyindudila mu phila Yesu kaba yindudilanga, ayi buidi befu tulenda landikinina kifuani kiandi.
1-2. Mbi binsundula kuzola Yave ayi buidi Yesu kamonisina mawu?
“Zola Yave Nzambi’aku mu ntim’aku woso, mu muel’aku woso, mu mangolo maku moso ayi mu mayindu maku moso.” (Luk. 10:27) Yesu wuzaba lutumu lulutidi nkinza mu nsiku wu Mose. Tufueti zola Yave mu ntim’itu woso, mawu mansundula mayindu ayi mabanza mitu. Tufueti zola mvandi mu muel’itu woso voti mu mangolo mitu moso. Kuzola Yave mu mayindu mitu moso, kulenda sundula mvandi phil’itu yi kuyindula voti yi kutadila mambu. Befu tulendi visa ko mamoso matedi phila Yave kanyindudilanga. Vayi befu kuba “mayindu ma Klistu” voti kulonguka matedi nandi kulenda tusadisa kuvisa mayindu ma Nzambi. Kibila Yesu wulandakana mu phila yivedila phila Yave kanyindudilanga.—1 Ko. 2:16
2 Yesu waba zolanga Yave mu mayindu mandi moso. Nandi wuzaba luzolo lu Nzambi ayi wuba wukubama muingi kuntumamana kheti khumbu zinkaka vaba tombulu kutovuka muingi kuvanga mambu masulama. Yesu wusikika thalu mu kisalu ki Tat’andi ayi kasa bika ko ni kiuma kivunzikisa mayindu mandi.
3. Mbi Petelo kalonguka mu kifuani ki Yesu, ayi mbi kakindisa baklistu bankaka bavanga? (1 Petelo 4:1)
3 Mvuala Petelo ayi bapostolo bankaka baba luaku lu kuviokisa thangu yiwombo na Yesu ayi kulonguka buidi nandi kaba yindudilanga. Bo kasonika nkand’andi wutheti, mvuala Petelo wukindisa baklistu baba momawu mayindu Yesu kaba.a (Tanga 1 Petelo 4:1.) Petelo wusadila kikuma kimueka bansadilanga mu busodi bo kasonika: “Banu bakubama.” Diawu baklistu ba kulandakana phila Yesu kaba yindudilanga, bala ba bakubama muingi kunuana nzingu wu ziphuila zi kinsuni, ayi kununga nza ayiyi yi Satana.—2 Ko. 10:3-5; Efe. 6:12.
4. Mambu mbi tunkuiza tubila mu dilongi adidi, mankuiza tusadisa kulandakana malongi ma mvuala Petelo?
4 Tuemfiongunina phila Yesu kanyindudilanga, ayi buidi tulenda landikinina kifuani kiandi. Tuemmona buidi (1) tulenda landikinina phila Yave kanyindudilanga, ayi mbi binkuiza tusadisa kuvanga mawu, (2) nkinza wu kukikululanga ayi (3) kuba nduenga, mu kufiatila Yave mu nsambu.
BA MAYINDU MA YAVE
5. Buidi Petelo kamonisina ti kasa ba ko mayindu ma Yave?
5 Vaba thangu Petelo kasa yindula ko mu phila Yave kanyindudilanga. Yesu wukamba kuidi bapostolo bandi ti bankuiza mvakula ayi kunnata kuidi zimfumu zi binganga ku Yelusalemi, muingi bantovula bosi bamvonda. (Mat. 16:21) Petelo wuzaba ti Yesu wuba Mesia bakanikisa muingi kuvukisa dikabu di Nzambi. Diawu ḿba dibela diambu diphasi kuidi nandi kukikinina ti Yave wunkuiza bika muingi Yesu kafua. (Mat. 16:16) Petelo wunata Yesu va khonzo ayi wunkamba: “Mfumu, wuyimona kiadi, mambu amomo malendi kumonikina ko.” (Mat. 16:22) Petelo kasa ba ko mayindu mamueka na Yesu, kibila kasa ba ko mayindu ma Yave.
6. Buidi Yesu kamonisina ti wuba mayindu ma Yave?
6 Yesu wuba momawu mayindu Tat’andi kaba. Diawu kakambila Petelo: “A Satana, mbika! Ngie wuntomba kumbuisa, kibila wisi ko mayindu ma Nzambi, vayi ma batu.” (Mat. 16:23) Yesu wuzaba ti muingi kuvanga luzolo lu Nzambi vabe tombulu nandi kutovuka ayi kufua, diawu kamangina malongi ma Petelo, kheti mabe monikina ti nandi waba tomba kunsadisa. Mu mawu Petelo wulonguka ti vabe tombulu nandi kuyindudila mu phila Yave kanyindudilanga.
7. Buidi Petelo kamonisina kuntuala ti nandi wuba mayindu ma Yave? (Tala levista.)
7 Buviokila thangu Petelo wumonisa ti waba tomba kuba mayindu ma Yave. Yiba thangu Yave kaba tomba muingi bapakanu baba mu khati dikabu diandi. Bafila Petelo muingi kuelonga kuidi koloneliu wumueka mu bapakanu wuba wutheti wukota mu dikabu di Yave. Basi Yuda basa ba ko kithuadi na bapakanu. Diawu vabe tombulu Petelo kutambula lusalusu muingi kuvanga kiyeku akiokio. Bo Petelo kavisa mayindu ma Nzambi mu mambu amomo nandi wubalula phil’andi yi kuyindudila. Bo kavanga mawu nandi wukikinina kiyeku akiokio mu khambu ba divuda. (Mav. 10:28, 29) Nandi wulonga Koloneliu ayi dikanda diandi, ayi bawu babotama.—Mav. 10:21-23, 34, 35, 44-48.
Petelo wunkota ku nzo Koloneliu (Tala lutangu 7)
8. Buidi tulenda monisina ti tuidi mayindu ma Yave? (1 Petelo 3:8 ayi nota)
8 Kuntuala Petelo wukindisa baklistu bankaka, bo katuba “banu kithuadi mu mayindu.” (Tanga 1 Petelo 3:8 ayi nota.) Mu kutadila mambu amomo ḿba vadi nsamuni mu kimvuka kiaku wuntomba kukota mu kisalu ki thangu ka thangu. (Mat. 6:33) Boti buawu tulendi kunkamba ko ti kasinkuiza nunga ko, vayi mu luzolo tufueti kunkindisa ayi kumbuela mioko.
BA MUTU WUKIKULULANGA
9-10. Buidi Yesu kamonisina khadulu yi kuyikulula?
9 Va builu ava kafua, Yesu wulonga kuidi bapostolo bandi nkinza wu kukikululanga. Ava thangu beni Yesu wutuma bapostolo bandi muingi bakubika biuma bioso bintombulu, ayi biuma beni biba, dibola, dituaya, muingi batu bankuiza basukula malu ava badia. Vayi nani wuyikulula muingi kusukula malu ma bankaka?
10 Mu khambu mona zitsoni, Yesu wukikulula. Bapostolo bandi bayituka mu mambu kavanga kibila kiba kisalu kisadi to kalenda vanga. Yesu wubonga dituaya ayi wutona kusukula malu ma bapostolo. (Yoa. 13:4, 5) Ḿba wukala nkulu muingi kununga kusukula malu ma 12 di bapostolo bandi kubunda mvandi Yuda no wuyiza mvakula. Vayi kheti bobo Yesu wumanisa kuvanga kisalu beni. Bosi nandi mu mvibudulu wusudikisa: “Benu mumvisa tsundu yi mambu amomo, yima muvangila? Benu mu kuthedilanga ‘Nlongisi’ ayi ‘Mfumu’, benu munnunga, kibila minu yidi. Diawu, boti minu, Nlongisi ayi Mfumu, yima sukula malu minu, buna benu mvinu mufueti kuyisukulanga malu benu na benu.”—Yoa. 13:12-14.
Kukikulula . . . kunsundula mvandi “mayindu mitu ma tsi ntima”
11. Buidi Petelo kamonisina ti wulonguka kuyikulula? (1 Petelo 5:5) (Tala mvandi fikula.)
11 Petelo wulonguka mu kukikulula ku Yesu. Bo Yesu kavutuka ku diyilu, Petelo wuvanga mangitukulu mu kubelusa dibakala dimueka wuba kikata tona kabutuka. (Mav. 1:8, 9; 3:2, 6-8) Mangitukulu amomo mavanga bawombo kuba minlandikini mi Yesu. (Mav. 3:11) Bukiedika ti Petelo wukinangika muingi kutomba nzitusu mu mambu kavanga? Petelo kasa tomba ko nzitusu wu batu mu kibila ki mangitukulu kavanga. Petelo mu kukikulula wuvana nzitusu kuidi Yave ayi Yesu bo katuba: “Mu kibila ki dizina diandi ayi mu kibila ki kiminu mu dizina diandi, diawu dibakala adidi lummona ayi no benu luzebi, kama telimina.” (Mav. 3:12-16) Mambu Petelo kasonikina baklistu matedi nkinza wu kukikulula ma tutebula moyo, bo Yesu kasukula malu ma bapostolo bandi.—Tanga 1 Petelo 5:5.
Bo Petelo kavanga mangitukulu, mu kukikulula, wuvana nzitusu kuidi Yave ayi Yesu. Befu mvitu tulenda monisa khadulu ayoyo mu kuvanga mamboti, mu khambu tomba kutambula nzitusu (Tala lutangu 11-12)
12. Dedi Petelo, buidi tulenda kunina khadulu yi kuyikulula?
12 Tulenda landakana kifuani ki kuyikulula ki mvuala Petelo. Tebuka moyo ti kuyikulula kuisinsundula ko to kutuba mambu mamboti. Kikuma mvuala Petelo kasadila muingi kutubila khadulu yi kuyikulula, kinsundula mvandi “mayindu mitu ma tsi ntima”. Befu tumvanganga bisalu biwombo muingi kusadisa bankaka, kibila tunzolanga Nzambi kubika ti muingi kutambula nzitusu. Tummonisanga ti tuidi batu bayikululanga, bo tunsadila Yave ayi zikhomba zitu mu mayangi kheti bo bankaka bakhambu mona kisalu tumvanga.—Mat. 6:1-4.
BA “NDUENGA”
13. Mbi binsundula kuba ‘nduenga’?
13 Mbi binsudula kuba ‘nduenga’? (1 Pet. 4:7) Baklistu badi nduenga, bamvanganga mamoso madi kithuadi na phila Yave kanyindudilanga. Ayi bawu bazebi ti kikundi kiawu na Yave kiawu kilutidi nkinza mu luzingu luawu. Bawu badi mayindu mafuana matedi baveka ayi bayitadilanga ko ti bazebi mambu moso. Bammonisanga ti bamfiatilanga mu Yave, mu kumfikama mu nzila nsambu.b
14. Buidi Petelo mu mua thangu kabika kubue fiatila mu Yave?
14 Yesu wulubula bapostolo bandi mu builu butsuka ava kafua. Nandi wuba kamba: “Mu builu abubu, benu boso munkuiza ndiekula mu kibila ki mambu mankuiza mbonikina.” Petelo mu kuyifiatila wumvutudila: “A mfumu, kheti baboso bankuiza kuyekula mu kibila ki mambu mankuiza kumonikina, minu yisinkuiza kuyekula ko.” Va builu beni Yesu wuba kindisa “tatamananu bakotuka ayi tatamananu kusambila” (Mat. 26:31, 33, 41) Boti Petelo wusadila dilongi adiodio khanu wumonisa kibakala ayi wukuikama mu Yesu. Vayi nandi wumanga mfumu’andi ayi mawu mantuadisa kiunda.—Mat. 26:69-75.
15. Mbi bisadisa Yesu kutatamana kuba nduenga mu builu butsuka ava kafua?
15 Yesu waba fiatilanga mu Yave. Kheti wuba wuvedila, khumbu ziwombo nandi waba sambilanga. Mawu mansandisa kuba kibakala muingi kuvanga luzolo lu Nzambi. (Mat. 26:39, 42, 44; Yoa. 18:4, 5) Kifuani ki Yesu ki kuvanganga nsambu kikindisa beni mvuala Petelo.
16. Buidi Petelo kamonisina ti wuyiza ba mutu wu nduenga? (1 Petelo 4:7)
16 Buviokila thangu, Petelo wutona kumonisa lufiatu luandi mu Yave mu kusambilanga. Bo Yesu kavulubuka, wukamba Petelo ayi bapostolo bandi ti wunkuiza bavana phevi’andi yinlongo muingi banunga kudukisa kiyeku ki kusamuna zitsangu zimboti. Diawu Yesu kakambila bapostolo bandi batatamana ku Yelusalemi nati mambu amomo mankuiza salama. (Luk. 24:49; Mav. 1:4, 5) Mbi Petelo kavanga bo kaba telimina? Nandi ayi baklistu bankaka “batatamana kusambila.” (Mav. 1:13, 14) Kuntuala mu nkand’andi wutheti kasonikina Baklistu, nandi wuba kindisa baba nduenga ayi bafiatilanga mu Yave mu nzila nsambu. (Tanga 1 Petelo 4:7.) Petelo wuyiza ba mutu wuyonzuka mu kiphevi wuba nduenga, ayi waba tuamanga ntuala mu kimvuka.—Nga. 2:9.
17. Kheti tuzebi kuvanga mambu mawombo, mbi tufueti tatamananga kuvanga? (Tala mvandi foto.)
17 Muingi tuba batu ba nduenga tufueti tatamananga kufikama Yave mu nzila nsambu. Befu tuzebi ti kheti tunnunganga kuvanga mambu mawombo, vayi nkinza beni kusambilanga kuidi Yave. Bulutidi bo tumbaka makani mankinza mu luzingu tufueti sambilanga kuidi Yave muingi kundinda zithuadusulu ayi kuba lufiatu ti nandi zebi mbi bilutidi nkinza mu befu.
Petelo wulonguka kufiatila Yave mu nzila nsambu. Befu mvitu tulenda monisa nduenga befu kudinda lusalusu lu Yave mu nzila nsambu bulutidi bo tuntomba kubaka makani mankinza mu luzingu (Tala lutangu 17)c
18. Buidi tulenda yindudila mu phila Yave kanyindudilanga?
18 Tumvutulanga beni matondo kuidi Yave mu phila katuvangila, kibila tulenda nunga kulandakana zikhadulu ziandi. (Ngene. 1:26) Tuzebi ti tulendi nunga ko kulandakana zikhadulu ziandi mu phila yivedila. (Yesa. 55:9) Vayi kheti bobo dedi mvuala Petelo, befu tulenda nunga kuvisa phila Yave kanyindudilanga. Diawu, tuvanganu mangolo muingi tutatamana kuba mayindu ma Nzambi ayi kukuna zikhadulu dedi, kukikulula, ayi kuba nduenga.
NKUNGA 30 Tat’ami, Nzambi’ami ayi Nkundi’ami
a Kikuma “kuba momawu mayindu,” dedi buntubila 1 Petelo 4:1, kilenda sundula mvandi phil’itu yi kuyindudila, “mabanza ayi mavanga mitu.”
b Muingi wubuela zaba mbi binsundula kuba mayindu mafuana voti kiphevi kimboti, mona mu JW Library® voti mu jw.org mu kilongulu “Textos Biblicos Explicados” lutangu “2 Timoti 1:7 Luntuba ti —‘Phevi yinlongo yo Yave katu vananga yi tuvanganga ko kuba boma,’” mu kikhuku “Kuba Nduenga”.
c FIKULA VA THONONO: Khomba mueka widi mu kuvanga nsambu bo kantelimina intrevista yi kisalu.