DILONGI 12
NKUNGA 119 Tufueti ba Kiminu
Tatamana Kudiatila mu Kiminu
“Tuidi mu kudiatila mu kiminu, kubika kuandi mu biuma tummona.”—2 KO. 5:7.
MAMBU TUANLONGUKA
Tunkuiza mona buidi tulenda tatiminina kudiatila mu kiminu bo tumbaka makani mankinza.
1. Kibila mbi mvuala Polo kabela mu mayangi bo kayindula phila kanatina luzingu luandi?
MVUALA Polo wuzaba ti wunkuiza fua, vayi bo kayindula mu phila kanatina luzingu luandi, nandi wuyiza ba mu mayangi ayi wutuba: “Yidumizi nati kutsuka ayi yizingidi mu kiminu.” (2 Ti. 4:6-8) Mvuala Polo wubaka makani ma nduenga, mu kusola kusadila luzingu luandi mu kisalu ki Yave. Nandi wuba lufiatu ti Yave wuba mu mayangi mu kibila kiandi. Befu mvitu tulenda baka makani mamboti ayi kuba lunungu va meso ma Nzambi. Buidi tulenda vangila mawu?
2. Mbi binsundula kudiatila mu kiminu?
2 Mu matedi naveka ayi baklistu bankaka, mvuala Polo wutuba: Tuidi mu kudiatila mu kiminu, kubika kuandi mu biuma tummona.” (2 Ko. 5:7) Mbi mvuala Polo kaba tomba kutuba? Mu Kibibila kikuma “kudiata,” khumbu zinkaka kilenda sundula phila mutu kansola kunatina luzingu luandi. Batu bakhambulu kiminu mu Yave, bambakanga makani mu kutadila to mambu bammona, bankuwa ayi mabanza mawu. Vayi mutu widi kiminu mu Yave wunyindulanga mbi Yave kantomba ava kubaka makani. Nandi wumbanga lufiatu ti bo kanlandakana malongi ma Yave madi mu Kibibila, wala baka luzingu lumboti tona kuandi bubu, ayi Yave wala nsakumuna mu bilumbu binkuiza.—Minku. 119:66; Ebe. 11:6.
3. Ndandu mbi tuala baka befu kutatamana kudiatila mu kiminu? (2 Kolintu 4:18)
3 Khumbu zinkaka bo tumbaka makani, vantombuluanga kufiatila mu mambu tummona, tunkuwa ayi mu mabanza mitu. Vayi kutsikika to thalu mu mambu amomo, malenda tutuadisa ziphasi. Kibila mbi? Kibila Khumbu zinkaka mambu tunkuwa voti tummona malenda ku tuvukumuna. Ayi mvandi malenda ku tuvanga kubayisa malongi voti luzolo lu Nzambi. (Mpovi 11:9; Mat. 24:37-39) Boti tundiatila mu kiminu, tunkuiza baka makani “mankuangidikanga Mfumu.” (Efe. 5:10) Kulandakana zithuadusulu zi Nzambi kunkuiza tutuadisa ndembama yi ntima ayi mayangi makiedika. (Minku. 16:8, 9; Yesa. 48:17, 18) Mvandi, befu kutatamana kudiatila mu kiminu, tuala zinga mvu ka mvu.—Tanga 2 Kolintu 4:18.
4. Buidi mutu kalenda zabila boti widi mu kudiatila mu kiminu?
4 Buidi tulenda zabila boti tuidi mu kudiatila mu kiminu voti mu biuma tummona? Mu kufiongunina biuvu abibi: Mambu mbi mantuadisanga makani mitu? Tumbakanga makani mu kutadila to mambu tummona? Voti tumbakanga makani mu kulandakana zithuadusulu zi Yave? Tuemmona phila zitatu zinkinza tulenda tatiminina kudiatila mu kiminu. (1) Bo tunsola kisalu, (2) bo tunsola mutu wu kukuela ayi (3) bo tuntambula zithuadusulu mu Kimvuka. Mu kadika diambu, tunkuiza mona mbi bilenda tusadisa kubaka makani mamboti.
BO TUNSOLA KISALU
5. Mbi tuntombanga kuzaba bo tunsola kisalu?
5 Befu boso tuntomba kudukisa zitsatu zitu ayi zi dikanda ditu. (Mpovi 7:12; 1 Ti. 5:8) Bisalu binkaka bamfutanga buboti, ayi mutu kalenda nunga kusadila zimbongo beni muingi kudukisa zitsatu zi dikanda diandi ayi kulunda zinkaka. Bo tunsola ntindu kisalu tunkuiza sala, befu tunyindulanga thalu yi zimbongo tunkuiza tambula. Vayi boti mawu to tunyindulanga ava kukikinina kisalu, buna tuidi mu kubika mayindu mitu ma tutuadisa.
6. Buidi tulenda diatila mu kiminu bo tunsola kisalu? (Ebeleo 13:5)
6 Boti tuidi mu kudiatila mu kiminu, tunkuiza yindula boti kisalu beni kinkuiza tula nkaku kikundi kitu na Yave. Tulenda kuyikuvusa: Mu kisalu beni vankuiza tombulu minu kuvanga mambu Yave kanlendanga? (Zinga. 6:16-19) Kiawu kinkuiza tula nkaku mu mbuongimini’ama, ayi kinkuiza phanga kuba kinanu ki dikanda diama? (Fil. 1:10) Boti mvutu widi ngete, buna yidi mbonosono yi nduenga kumanga kisalu akiokio kheti didi diambu diphasi kubaka kisalu ku kibuangu wunkalanga. Bo tunlandakana zithuadusulu zi Yave, tumbakanga makani mammonisa ti tuidi lufiatu ti Yave wunkuiza tukieba ayi kudukisa zitsatu zitu.—Mat. 6:33; tanga Ebeleo 13:5.
7-8. Buidi khomba mueka wunkalanga ku America do Sul kadiatila mu kiminu? (Tala mvandi foto.)
7 Mona buidi yaya Javier,a wunkalanga ku America do Sul kabakila ndandu mu kudiatila mu kiminu. Nandi wutuba: “Minu yivana nkanda muingi kusadila ku kisalu kimueka bakanikisa kufhuta zimbongo ziwombo kuvioka zio yaba tambulanga ku kisalu kiama, ayi mawu minu yaba tomba.” Vayi yaya Javier wuba makani ma kuba ntuami ntuala. Nandi wubue tuba: “Bathumisa muingi kusolula na mfumu wu kisalu. Ava kusolula yandi, minu yisambila kuidi Yave ayi yilomba lusalusu luandi kibila yizaba ti Yave nandi zebi malutidi nkinza mu minu. Minu yabe tomba kubaka zimbongo, vayi yabasa tomba ko kisalu kinkuiza thula nkaku kudukisa makani mami ma kiphevi.”
8 Yaya Javier wutatamana: “Bo yabe koluka na mfumu wu kisalu, nandi wukhamba ti vankuiza tombulu kusala bilokula biwombo mu kilumbu. Diawu mu lukinzu, minu yinkamba ti yilendi vanga ko mawu kibila khanu mankuiza tula nkaku kisalu kiama ki kusamuna.” Yaya Javier wumanga kisalu beni. Bo vavioka zisabala wadi, nandi wutona kisalu ki ntuami ntuala. Buviokila thangu mu mvu beni, nandi wuyiza baka kisalu kaba salanga to mua bilokula mu kilumbu. Nandi wutuba: “Yave wuyuwa minsambu miami ayi wutsadisa kubaka kisalu ki kutsadisanga kuba ntuami ntuala. Yidi beni mayangi mu kisalu akiki ki kuphananga luaku lu kuvana thangu’ama muingi kusadila Yave ayi zikhomba ziama.”
Ba kukanikisa ku kubuela zimbongo mu kisalu wumvanganga, buidi wunkuiza monisina ti wunkikinina ti Yave to zebi malutidi nkinza mu ngiewu? (Tala lutangu 7-8)
9. Mbi belonguka mu kifuani ki yaya Trésor?
9 Buabu, boti kisalu ki tutula nkaku kudiatila mu kiminu? Tala kifuani ki yaya Trésor, ku Congo. Nandi wutuba: “Yabe tambulanga zimbongo ziwombo kuvioka zio yabe tambulanga mu kisalu kitheti yiba, ayi batu baba kukhinzikanga beni. Vayi yaya Trésor wabe khambuanga mu zikhutukunu, mu kibila ki kisalu akiokio. Ayi mvandi baba kunkuikanga kuvanga mambu mawombo makhambulu masonga. Yaya Trésor waba tomba kubika kisalu beni, vayi waba monanga boma kukadila abobo mu khambu kisalu. Mbi binsadisa? Nandi wutuba: “Habakuki 3:17-19 yitsadisa kuvisa ti minu kubika kisalu beni, Yave wala khieba. Diawu yibika kisalu beni. Nandi wubue tuba: “Zimfumu ziwombo zi kisalu banyindulanga ti ba kufuta zimbongo ziwombo kuidi mutu, buna nandi kalenda kikinina kusala bilokula biwombo kheti mawu mankuiza tula nkaku mbuongimini’andi ayi kumvanga kabika kubue viokisanga thangu na dikanda diandi. Yidi beni mayangi kununga kukieba kikundi kiama na Yave. Bo vavioka mvu mueka, Yave wutsadisa kubaka kisalu kimboti kiaba kuphananga thangu muingi kuvanga mambu ma kiphevi. Bo tuntula Yave va theti mu luzingu luitu, ḿba mu mua thangu tulenda viokila mu mambu ma kukhambu ku zimbongo, vayi Yave wunkuiza tukieba. Befu kufiatila mu malongi ayi mu zikhanu zi Yave, tuala tatamana kudiatila mu kiminu ayi nandi wala tusakumuna.
BO TUNSOLA MUTU WU KUKUELA
10. Mbi khomba kafueti yindula bo kansola mutu wu kukuela, ayi kibila mbi kafueti bela keba keba?
10 Dikuela didi nkhailu wu Yave, ayi disi ko diambu dimbi kutomba kukuela. Bo khomba wunkietu kantomba khomba wu kukuela, nandi wunsikikanga thalu mu kitoko, mu phila nandi kamvangilanga mambu, buidi kankiebilanga bankaka, buidi kankiebilanga zimbongo, boti wunkiebanga buboti basi dikanda ayi boti wu kunkuangidikanga.b Mambu amomo nkinza madi, vayi na kutsikika to thalu mu mawu, kalenda vukumuka.
11. Buidi tulenda tatiminina kudiatila mu kiminu bo tunsola mutu wu kukuela? (1 Kolintu 7:39)
11 Yave wunkuangalalanga beni bo kammona zikhomba zitu kulandakana zithuadusulu ziandi, bo bansola mutu wu kukuela. Dedi, bawu banlandakananga dilongi dintuba ti bafueti tedimina nati bankuiza ba phunga yifuana muingi kutomba kimasi ayi kukuela. (1 Ko. 7:36) Mvandi, bawu bantombanga mutu wu kukuela mu kufiongunina zikhadulu Yave kantuba ti nnuni wumboti ayi nkazi wumboti bafueti ba. (Zinga. 31:10-13, 26-28; Efe. 5:33; 1 Ti. 5:8) Boti mutu wukhambu ba Mbangi yi Yave wuba tomba bumasi, bawu banlandakananga dilongi di kibibila dintuba ti kafueti ba to nlandikini wu Yesu. (Tanga 1 Kolintu 7:39.) Bamvanganga mawu kibila badi lufiatu ti Yave wunkuiza tatamana kuba vana lusalusu loso luntombulu muingi batatamana kuba mu mayangi.—Minku. 55:22.
12. Mbi kifuani ki yaya Rosa ki kulonga?
12 Tala kifuani ki khomba mueka bantedilanga Rosa widi ntuami ntuala wunkalanga ku Colombia. Ku kisalu kiandi, wuzaba dibakala dimueka wukhambu ba Mbangi yi Yave waba tomba kuba yandi bumasi. Rosa mvandi wutona kuzola dibakala beni. Nandi wutuba: “Wabe monikina buka ti wuba dibakala dimboti. Nandi wabe sadisanga batu bawombo, ayi wuba wuzabakana mu mavanga mamboti. Yizola beni phila kaba kukhebilanga. Nandi wuba mamoso yaba tomba mu dibakala yintomba kukuela. Vayi diambu dimueka to diaba khambu, kasa ba ko Mbangi yi Yave.” Rosa wubue tuba: “Disa ba ko diambu diluelu kummanga, kibila diba diambu yaba tomba. Mu thangu beni yaba kuyimonanga beni minu veka ayi yaba tomba kukuela. Vayi, vasa monika ko khomba muingi yikuela. Yaya Rosa kasa tsikika ko to thalu mu mambu amomo, nandi wuyindula buidi makani kankuiza baka mankuiza bivisila kikundi kiandi na Yave. Diawu kabakila makani ma kutatuka dibakala beni ayi kubuela kukivana mu bisalu bi kiphevi. Buviokila thangu, bantumisa mu Kikola ki Minsamuni mi Kintinu, ayi bubu nandi widi ntuami ntuala wufilu. Yaya Rosa wutuba: “bubu yidi beni mayangi, disi ko diambu diluelu kuvanga mambu Yave kantomba tuvanga, bulutidi bo tuidi mu tsatu. Vayi bo tumvangila mambu mu phila yi Yave, tumbakanga ndandu yiwombo.”
BO TUNTAMBULA ZITHUADUSULU MU KIMVUKA
13. Khumbu zinkaka buidi tulenda bela bo tuntambula thuadusulu yimona?
13 Tuntambulanga zithuadusulu mu nzila bakulutu ba kimvuka, minkengididi mi bimvuka, voti kuidi kisadi kikuikama zi tutuadisanga mu mbuongimin’itu. Vayi Khumbu zinkaka, ḿba tuisimvisa ko kibila mbi zikhomba babe vanina thuadusulu beni. Tulenda ba divuda boti thuadusulu beni yidi yifuana muingi kulandakana. Ayi ḿba tulenda tona kutsikika thalu mu zinzimbala zi zikhomba batuvana zithuadusulu beni.
14. Mbi binkuiza tusadisa kutatamana kudiatila mu kiminu, bo tuntambula zithuadusulu mu kimvuka? (Ebeleo 13:17)
14 Tuidi lufiatu ti Yave nandi wuntuadisanga kimvuka kiandi ayi nandi zebi mambu tumviokila. Mawu ma kutu vanganga kuntumukina mu khambu yunguta. (Tanga Ebeleo 13:17.) Mvandi bo tuntumukina, tuntuadisanga kithuadi mu kimvuka ki Yave. (Efe. 4:2, 3) Kheti zikhomba bantuadisa kimvuka badi batu ba masumu, tuidi lufiatu ti Yave wala tusakumuna befu kutatamana kuba tumukina. (1 Samu. 15:22) Mu thangu yifuana, nandi wala ludika mamoso mantombulu.—Mika 7:7.
15-16. Mbi bisadisa khomba mueka kutatamana kudiatila mu kiminu kheti wuba divuda mu thuadusulu katambula? (Tala mvandi foto.)
15 Tala kifuani kimueka kimmonisa ndandu yi kulandakananga zithuadusulu zi kimvuka. Ku Peru, bawombo bankolukanga Espanhol, vayi batu bawombo bankalanga kuawu bankolukanga zimbembu zinkaka. Yimueka mu zimbembu beni yidi Quechua. Mu mimvu miwombo, zikhomba bankolukanga Quechua, batomba batu bankolukanga mbembu ayoyo muingi kuba zabikisa zitsangu zimboti. Vayi muingi kukinzika minsiku mi luyalu, zikhomba bayiza vana zithuadusulu zimona matedi phila yi kusamunina. (Lom. 13:1) Bawombo batona kuyikuvusa boti mawu mankuiza tula nkaku kusamuna mu kibuangu akiokio. Vayi zikhomba bayiza bakula ti kulandakana zithuadusulu beni, ku batuadisa beni ndandu. Yave wuba sakumuna ayi bawu banunga kubakula batu bawombo bankolukanga mbembu yi Quechua.
16 Yaya Kevin, nkulutu wumueka wu kimvuka ki Quechua wuba mu nkangu wu batu beni, wutuba: “Minu yikiyuvusa, buidi tulenda bakudila batu bankolukanga mbembu yi Quechua’?” Mbi yaya Kevin kavanga? Nandi wutuba: “YitebukiIa moyo Zingana 3:5, ayi yiyindula mu kifuani ki Mose. Vabe tombulu nandi kutuadisa dikabu di Isaeli muingi kubasika ku buvika ku Ngipiti. Ayi mawu maba monikina buka ti kasinkuiza nunga ko, vayi kheti bobo nandi wutumukina Yave ayi Yave wunsakumuna mu phila yi kukuitukila.” (Esodu 14:1, 2, 9-11, 21, 22) Yaya Kevin wuba wukubama muingi kulandakana phila ayoyo yimona yi kusamunina. Ndandu mbi kabaka? Nandi wutuba: “Yiyituka beni kumona phila Yave ka tusakumunina. Ava mawu mamonika, befu tuabe diatanga beni mu kisalu ki kusamuna ayi Khumbu zinkaka tuaba dengananga to mutu mueka voti batu buadi baba kolukanga mbembu Quechua. Vayi bo tutsikika thalu mu bizunga bi batu bankolukanga Quechua, befu tubaka beni ndandu. Tuluta baka minlonguki mi Kibibila, ayi bawombo mu bawu, banlandakananga zikhutukunu. Bo tundiatila mu kiminu, befu tuntambulanga lusakumunu luwombo.
Batu bawombo zikhomba basamuna, ba basadisa kubakula bibuangu bifikama bidi batu bankolukanga mbembu yi Quechua (tala lutangu 15-16)
17. Mbi ngie belonguka mu dilongi adidi?
17 Tuma mona ziphila zitatu zinkinza tulenda tatiminina kudiatila mu kiminu. Vayi tufueti tatamana kuvanga mangolo ma kudiatila mu kiminu mu mambu moso ma luzingu luitu. Dedi bo tunsola bisavu, bo tumviokisa thangu na bakundi, bo tumbaka makani matedi kikola, ayi bu kukonzudila bana. Moso kuandi makani tumbaka, tufueti tuadusu kubika kuandi to mu mambu tummona, vayi mvandi mu kuyindulanga kikundi kitu na Yave, malongi ka tuvananga, ayi lukanu ka tuvana ti wunkuiza tukieba. Befu kuvanga mawu, tuala tatamana kudiata na Yave Nzamb’itu, mu thangu zioso.—Mika 4:5
NKUNGA 156 Yidi Kiminu
a Bavingisa mazina mankaka.
b Mu lutangu alulu, bantubila matedi khomba wunkietu wuntomba kukuela. Vayi malongi amama mvandi, nkinza madi kuidi khomba wu dibakala wuntomba kukuela.