DILONGI 15
NKUNGA 30 Tat’ami, Nzambi’ami ayi Nkundi’ami
‘Kufikama Nzambi Kuntuadisanga Ndandu.’
‘Kuidi minu, kufikama Nzambi didi Diambu dimboti.’ —MINKU. 73:28.
Mambu Tuanlonguka
Tuanlonguka buidi tulenda fikimina Yave, ayi ndandu yinkuizilanga mu kuvanga mawu.
1-2. (a) Mbi bintombulu muingi kuba kikundi kifikama na mutu? (b) Mbi tunkuiza tubila mu dilongi adidi?
NGIE widi nkundi wufikama? Buidi wukunina kikundi kifikama ayi nandi? Ḿba ngie wuviokisa yandi thangu yiwombo, wuzaba mambu kaviokila, dikanda diandi, mambu kanzolanga ayi mo kanlendanga. Mvandi wubakula ti widi zikhadulu zimboti zio ngie wuntomba kukuna. Diawu,ngie wutonina kunzola.
2 Vantombuluanga thangu ayi mangolo muingi kuba kikundi kifikama na mutu. Ayi mawu mvandi matombulu muingi kuba kikundi kifikama na Yave Nzambi. Mu dilongi adidi, tunkuiza mona buidi tulenda fikimina Nzambi ayi ndandu mbi tunkuiza baka. Theti , tunkuiza tubila kibila mbi didi diambu dimboti kufikama nkund’itu wulutidi Yave.
3. Bukiedika ti kutebukanga moyo mu ndandu yinkuizilanga mu kusadila Yave, kunkuiza tusadisa? Fuanikisa.
3 Bukiedika, ngie wunkikinina ti kufikama Yave didi diambu dimboti. Vayi kuyindula mu ndandu yinkuizilanga mu kufikama Yave kunkuiza tusadisa kutatamana kumfikama. (Minku. 63:6-8) Dedi, tuzebi ti kusola buboti bidia, kunua beni nlangu, kuvunda ayi kunyikuna binama bi nyitu voti kuvanga zi exercícios, ku tusadisanga kuba buvinya bumboti. Vayi kheti bobo bawombo bavuanga ko nkinza mambu amomo. Vayi kuzaba ndandu tumbakanga mu kuvanga mambu amomo, kunkuiza tuvana phuila yi kuvanganga mawu. Mvandi kutebukanga moyo ndandu yinkuizilanga mu kusadila Yave, kunkuiza tusadisa kutatamana kuvanga mangolo ma kuba kikundi kifikama ayi Nandi.—Minku. 119:27-30.
4. Dedi bummonisina Minkunga 73:28, mbi biaba tombulu nsoniki wu nkunga katebukanga moyo?
4 Tanga Minkunga 73:28. Nsoniki wu Minkunga 73. wuba musi Levi, wuba kiyeku ki kukuimbilanga ku tempelo yi Yave. Ḿba nandi wubuongimina Yave mu lukuikumunu mimvu miwombo vayi kheti bobo vaba tombulu katebukanga moyo ti kufikama Nzambi, diba diambu dimboti kuidi nandi ayi kuidi bankaka. Kibila mbi didi diambu dimboti kuzaba buboti Yave ayi kukindisa kikundi kitu ayi Nandi?
“KUFIKAMA NZAMBI KUNTUADISANGA MAYANGI”
5. (a) Kibila mbi kufikama Yave kuntuadisanga mayangi? (b) Dedi bummonisina buku yi Zingana 2:6-16, buidi nduenga yi Yave yikukiebilanga ayi yi kusadisilanga?
5 Kufikama Yave kuntuadisanga mayangi. (Minku. 65:4) Vadi bibila biwombo bi tuvanga kukikinina mu mawu. Kibila kitheti tumbakanga ndandu mu luzingu bo tunsadila nduenga yidi mu kibibila. Nduenga ayoyo yitukiebanga mu minkangulu mimbi, ayi yitusadisanga kubika bua mu masumu mangolo. (Tanga Zingana 2:6-16.) Diawu kibibila kintuba: ‘Mayangi kuidi mutu wumbaka nduenga ayi kuidi mutu wumbaka nzayilu.’—Zinga. 3:13.
6. Kibila mbi mayangi ma nsoniki wu minkunga madekukila?
6 Kheti bo badi bakundi ba Yave, mvandi bamviokilanga mu mambu makiunda. Mayangi ma nsoniki wu Minkunga 73 mayiza dekuka, bo katona kuba mayindu makhambu fuana. Nandi wutona kumona nsoki batu bambi bakhambu vuanga nkinza minsiku mi Nzambi kibila baba monikina buka ti baba luzingu lu mayangi, busina, buvinya bumboti ayi ti baviokilanga ko mu ziphasi. (Minku. 73:3-7, 12) Mambu amomo maba kuntatisanga beni diawu ka yiyuvusila boti mangolo moso kaba vanga mu kusadila Yave maba maphamba. Mu kibila ki kiunda kaba nandi wutuba: ‘Bukiedika mu phamba kuandi yikebizi ntim’ami wuvedila ayi mu phamba yisukulizi mioko miama.’—Minku. 73:13.
7. Buidi tulenda nungina mabanza ma kiunda? (Tala mvandi fikula yidi va thonono levista.)
7 Nsoniki wu minkunga kasa bika ko kiunda kimvongisa. Nandi wuvanga dioso diambu muingi kanunga kiunda kaba. Nandi ‘wukota ku nzo yinlongo yi Nzambi’ ayi kuawu Yave kansadisila kubalula phil’andi yi kuyindudila. (Minku. 73:17-19) Yave wumvisanga buboti mabanza mitu bo tuidi mu kiunda. Befu kusambila kuidi Nandi, kundinda lusalusu ayi kukikinina thuadusulu katuvananga mu nzila kibibila ayi mu nzila kimvuka, tuala baka mangolo muingi tukindama mu mambu ma tutuadisa kiunda. Ayi kheti bo tuidi mu kukuazuka Yave kalenda kutu bomba ayi ku tuvumbika.—Minku. 94:19.a
Musi Levi wusonika Minkunga 73, widi wutelama vantuala nzo yinlongo yi Nzambi (Tala lutangu 7)
“KUFIKAMA YAVE KU TUTUADISANGA NDANDU BUBU AYI KIVUVU MATEDI NZA YIMONA”
8. Ziphila mbi zi wadi tumbakilanga ndandu bo tumfikama Nzambi?
8 Vadi ziphila wadi zinkinza tumbakilanga ndandu mu kufikama Nzambi. Yitheti, tulenda baka luzingu lu mayangi bubu. Dimmuadi, tuidi kivuvu kisikama mu matedi nza yimona. (Yele. 29:11) Tuemfiongunina mawu.
9. Ndandu mbi tumbakanga bo tumfikamanga Yave?
9 Kufikama Nzambi kuntuadisanga ndandu mu luzingu luitu. Vayi bawombo bubu bakikininanga ko ti Nzambi widi. Bawu bayindulanga ti luzingu luisi ko tsundu ayi ti batu boso va ntonto bala fua mu khambu kivuvu ki kubue zinga. Vayi mu nzila ndongukulu yi kibibila tummonanga bivisa ti Nzambi widi, ayi “wunsakumunanga batu boso ba kuntombanga mu bukiedika.” (Ebe. 11:6) Yave katuvangila muingi tunsadilanga. Ayi kuvanga mawu, kutu tuadisanga mayangi mu luzingu.—Deute. 10:12, 13.
10. Dedi buntubila Minkunga 37:29 mambu mbi Yave kakanikisa kuidi bo ba kumfiatilanga?
10 Batu bawombo banyindulanga ti, kusala, kukieba dikanda ayi kulunda zimbongo muingi kuyinzigisa bo bala nuna, mawu to mantombulu mu luzingu. Bawu basa zaba ko mambu Nzambi kankanikisa matedi bilumbu binkuiza. Vayi bisadi bi Yave badi kivuvu mu Nzambi. (Minku. 25:3-5; 1 Tim. 6:17) Befu tumfiatilanga mu Nzambi ayi mu mambu ka tukanikisa. Tuidi kivuvu ki kuzinga mvu ka mvu ayi kunsadila mu thangu zioso.—Tanga Minkunga 37:29.
11. Ndandu mbi tumbakanga bo tumfikama Nzambi?
11 Vadi ziphila zinkaka tumbakilanga ndandu bo tumfikamanga Nzambi. Dedi Yave wunlemvukilanga masumu ma batu banyongina mawu ayi bamvanga mangolo muingi kumfikama. (Yesa. 1:18) Mawu ma tusadisanga kuba kilunzi kidiodila, ayi kukhambu tsikika thalu mu masumu tuvola kumbusa. (Minku. 32:1-5) Ayi tumbanga mu mayangi bo tumvanga mambu Yave kanzolanga. (Zinga. 23:15) Botula thangu muingi kuyindula mu ndandu yinkaka yinkuizilanga mu kuba kikundi kifikama na Nzambi. Vayi, buidi wulenda tatiminina kufikama Nzambi?
BUIDI WULENDA TATIMININA “KUFIKAMA NZAMBI”
12. Mambu mbi wuvanga muingi kufikama Nzambi?
12 Muingi kufikama Nzambi ngie wubotama. Muingi wubaka makani amomo, ngie wulonguka mambu mawombo matedi Yave Nzambi ayi Yesu Klistu, wunyongina masumu wuvanga, wukuna kiminu mu Nzambi, wuvanga mangolo ma kuzingila mu kithuadi na luzolo luandi. Vayi muingi wuluta fikama Nzambi fueti tatamana kuvanganga mambu amomo.—Kolo. 2:6.
13. Mambu mbi matatu malenda tusadisa kutatamana kufikama Yave?
13 Mbi binkuiza tusadisa kutatamana kufikama Yave? (1) Kutatamana kutanganga ayi kulonguka kibibila. Bo tumvanga mawu makani mitu mafueti ba kubika to kulonguka mambu matheti matedi Yave vayi mvandi kuvisa luzolo luandi mu befu ayi kubika muingi minsua miandi mituadisa luzingu luitu. (Efe. 5:15-17) (2) Tufueti kindisa kiminu kitu mu kuyindulanga bivisa bimmonisa ti Yave wutuzolanga. (3) Tufueti tatamana kuvanga mangolo ma kulenda mambu Yave kanlendanga ayi kubika ba bukundi na batu bamvanganga mambu mambi.—Minku. 1:1; 101:3.
14. Dedi bummonisina 1 Kolintu 10:31, buidi tulenda kuangidikila Yave mu lumbu ka lumbu? (Tala mvandi zifoto.)
14 Tanga 1 Kolintu 10:31. Tufueti vanga mangolo muingi kuvanganga mambu mankuangidikanga Yave. Mawu masinsundula ko to kuvanga mambu mamboti mu kisalu ki kusamuna voti mu zikhutukunu. Vayi tufueti vanganga mambu mamboti mankuangidika Yave mu lumbu ka lumbu. Dedi, bo tuntubanga kiedika mu mambu moso ayi tunkabilanga bankaka, tunkuangidikanga Yave. (2 Ko. 8:21; 9:7) Yave mvandi wuntomba muingi tumonisa ti tumvuanga nkinza nkhayilu wu luzingu. Tummonisanga ti tumvuanga nkinza luzingu mu kuba mayindu mafuana matedi bidia, kunua ayi mu phila tunkiebilanga buvinya buitu. Mangolo moso tumvanganga muingi kukuangidika Yave kheti mu mambu maluelu mankuiza tusadisa kumfikama.—Luka 16:10.
Kudiatisa dikalu mu keba keba, kukieba buvinya buitu mu kunyikunanga binama bi nyitu, kudia bidia bimboti, ayi kukabila bankaka, zidi ziphila tulenda kuangidika Yave (Tala lutangu 14)
15. Buidi Yave kantomba tutadilanga bankaka?
15 Yave wummonisanga mamboti kuidi batu basonga ayi bakhambulu basonga. (Mat. 5:45) Ayi Nandi wuntomba muingi befu mvitu tuvanga mawu. Tulenda vangila mawu mu kukhambu tubila bankaka bubi, kubika ba batu bantianga kunuana, vayi kuba batu balembama kuidi baboso.” (Titu 3:2) Kuyindulanga mu mambu amomo kunkuiza tusadisa kubika lenza bankaka, kheti bawu basadilanga ko Yave. (2 Ti. 2:23-25) Befu tunluta fikamanga Yave bo tummonisanga mamboti ayi tumvuanga nkinza baboso.
“FIKAMA YAVE KHETI MU NZIMBALA WUVANGA”
16. Buviokila Thangu buidi nsoniki wu Minkunga 73 katona kuyimuena?
16 Ḿba mu kibila ki nzimbala wuvanga, wulenda kuyimuena ti wusi ko wufuana muingi kutambula luzolo lu Yave. Dedi bo tuma tubila, mawu mvandi nsoniki wu Minkunga 73 kamonikina. Nandi wutuba: ‘Nkadu to wukhambu khanu yisialubuka.’ (Minku. 73:2) Nandi wukikinina ti wuyiza ba dedi kibulu ki nsitu vantuala Yave. (Minku. 73:21, 22) Mu kibila ki nzimbala nsoniki wu minkunga kavanga nandi wuyimuena buka ti Yave kasa bue ba ko luzolo mu nandi, ayi ti kansikuiza nlemvukila ko?
17. (a) Mbi nsoniki wu minkunga kavanga bo kaba mu kiunda? (b) Mbi tulenda longuka mu kifuani kiandi? (Tala mvandi zifoto.)
17 Boti nsoniki wu minkunga wukimuena ti kasiedi ko tsadulu, buna mayindu amomo masa kadidila ko? Kibila bo kaba mu kiunda, nandi wuvisa ti vaba tombulu kufikama Nzambi. Diawu katubila: ‘Minu yidi yaku ayi ngie wusimba mu koko kuama ku lubakala. Malongi maku ma kuthuadisanga, ayi ngie wala kuthambula mu nkembo.’ (Minku. 73:23, 24) Bo tuidi balebakana voti mu kiunda, tufueti tsikika mayindu mitu mu Yave muingi tuba basikama. (Minku. 73:26; 94:18) Befu kuvanga nzimbala tufueti dinda nlemvu kuidi Yave, kibila Nandi widi wukubama muingi ku tulemvukila. (Minku. 86:5) Tufueti vanga mangolo muingi kufikama Yave, bulutidi bo tuidi mu kiunda.—Minku. 103:13, 14.
Bo tuidi mu kiunda voti balebakana mu kipheve tufueti fikama Yave mu kuluta kukivana mu mambu ma kiphevi (Tala lutangu 17)
“TATAMANA KUFIKAMA YAVE”
18. Kibila mbi tulenda tubila ti kufikama Yave kuisi ko tsukulu?
18 Tuala tatamana kulonguka ayi kufikama Yave nate ku nza yimona. Kibibila kintuba ti nduenga ayi nzayilu yi Yave, “bidi bi kukuitukila.”—Lom. 11:33.
19. Lufiatu mbi buku yi Minkunga yi tuvana?
19 Minkunga 79:13, yintuba: ‘Befu dikabu diaku ayi nkangu’aku wu mameme, tuala kuzitisa mu thangu zioso ayi tuala yamikisa nzitusu’aku mu zimbandu zioso.’ Ngie mvaku wulenda ba lufiatu ti Yave wunkuiza kusakumuna ngie kumfikama. Ayi dedi nsoniki wu minkunga ngie wulenda tuba: ‘Nzambi widi thadi yi ntim’ami ayi kiuka kiama mu thangu zioso.’—Minku. 73:26.
NKUNGA 32 Ba ku Khonzo Yave
a Batu bannuananga na kiunda kingolo mu mimvu miwombo balenda tomba lusalusu lu mimfelemi. Muingi wubuela zaba mona Kibanga ki Nsungi ki kilumbu 1 mvu 2023.