Vanga Kikundi Kifikama na Zikhomba.

1-2. Mbi Yave kamvuanga nkinza, ayi mbi kantomba tuvanga?

YAVE wumvuanga nkinza phila tuntadilanga bankaka. Yesu wulonga ti tufueti zola badi yitu dedi bo tuyizodilanga. (Mat. 22:​37-39) Mawu mansundula, kumonisa mamboti kheti kuidi batu bakhambu sadilanga Yave. Bo tumvanga mawu tunlandakananga kifuani ki Yave, no “wunnokisanga mvula ayi wuntebusanga muinya kuidi batu boso, kuidi bankua mambi ayi bankua mamboti, mvandi kuidi basonga ayi bakhambulu basonga.”—Mat. 5:45.

² Kheti Yave wunzolanga batu boso, nandi wunluta zolanga batu bamvanganga mambu mamboti. (Yoa. 14:21) Nandi wuntomba tulandakana kifuani kiandi. Diawu ka tukindisila tumonisa “luzolo lungolo” kuidi zikhomba zitu, ayi “luzolo lu kikhomba”. (1 Pet. 4:8; Lom. 12:10) Phila luzolo alolo, luawu tummonisanga kuidi musi dikanda ditu, voti kuidi nkund’itu wufikama.

3. Buidi bamfuanikisila luzolo?

³ Bamfuanikisa Luzolo na kikunusu kintombuluanga nlangu muingi kiyonzuka. Mvuala Polo wulonga baklistu: “Bika lutatamana kumonisa luzolo lu kikhomba.” (Ebe. 13:1) Yave wuntomba tutatamana kumonisa luzolo kuidi badi yitu. Dilongi adidi dinkuiza monisa nkinza wu kufikama zikhomba zitu, ayi buidi tulenda vangila mawu.

KIBILA MBI TUFUETI FIKIMINA ZIKHOMBA

4. Dedi bummonisina Minkunga 133:​1, buidi tulenda tatiminina kuvua nkinza kithuadi tuidi na zikhomba? (Tala mvandi foto.)

⁴ Tanga Minkunga 133:1. Tunkikininanga mu mambu nsoniki wu minkunga kasonika bo katuba ti, kuba kikundi na batu banzolanga Yave didi diambu dimboti. Dedi bo mutu kalenda difukila kiuma kidi beni kitoko kammonanga, befu mvitu tulenda bika kubue vua nkinza kithuadi tuidi na zikhomba. Befu tummonananga na zikhomba Khumbu ziwombo mu sabala. Buidi tulenda tatiminina kuba vua nkinza? Mu kubotula thangu muingi kuyindula nkinza kadika khomba kadi mu kimvuka ayi kuidi befu.

5. Ndandu mbi luzolo luitu lu kikhomba luntuadisanga? Makani mbi bankaka bambakanga bo bammona luzolo luitu lu kikhomba?

⁵ Bawombo banlandakananga lukutukunu mu Khumbu yitheti, bankuitukanga beni bo bammonanga luzolo luitu lu kikhomba. Bo bammonanga mawu, bawu bankikininanga ti bama bakula kiedika. Yesu wutuba: “Benu kuba luzolo benu na benu, buawu batu boso bala zabila ti luidi minlandikini miama.” (Yoa. 13:35) Mona mambu mamonikina Chaithra, widi mu faculdade wunlongukanga kibibila na Zimbangi zi Yave. Nandi wukikinina thumusunu bamvana muingi kulandakana lukutukunu lu mavula. Bo kalandakana luawu mu kilumbu kitheti, nandi wukamba nlongisi’andi wu kibibila: “Matata mama bambumbakananga ko vayi mu lukutukunu alulu 52 di batu bama mbumbakana. Yimona luzolo lu Yave mu dikanda adidi di kipheve. Yitidi kuba mu khati dikanda adidi.” Chaithra wutatamana kukonzuka mu kipheve ayi wubotama mu mvu 2024. Bukiedika, bo batu bamona mu kimvuka bammona mavanga mitu mamboti ayi luzolo tummonisanga befu na befu, ayi kuidi bankaka, bawu bambanga phuila yi kusadila Yave.—Mat. 5:16.

6. Buidi kufikama zikhomba ku tukebilanga?

⁶ Kufikama zikhomba kulenda kutukeba. Mvuala Polo wukamba baklistu: ‘Tatamananu kukindasana benu na benu kadika kilumbu, [mu kuzaba ti muidi mu kuzingila mu bilumbu bitsuka], muingi ni mutu mu benu kabika kanga ntima, ayi kubua mu luvunu lu masumu.’ (Ebe. 3:13) Befu kuba mu kiunda ayi kutona kuvekuka mu kiedika, Yave kalenda sadila zikhomba zitu muingi ba tusadisa kudiatila mu kiedika. (Minku. 73:​2, 17, 23) Mambu amomo, madi beni khindusulu kuidi befu.

7. Nguizani mbi yidi luzolo ayi kithuadi? (Kolosai 3:​13, 14)

⁷ Tuntambulanga lusakumunu luwombo kibila tuidi mu khati dingumba di batu bamvanganga mangolo muingi kumonisa luzolo bawu na bawu. (1 Yoa. 4:11) Dedi, luzolo lu tuvanganga kuvibidila mu bankaka, ayi mawu mantuadisanga kithuadi. (Tanga Kolosai 3:​13, 14; Efe. 4:​2-6) Diawu vasi ko kibuangu kinkaka tulenda mona ndembama ayi mayangi madi mu kimvuka kitu.

TUAMA NTUALA MUINGI KUZITISA BANKAKA

8. Buidi Yave ka tusadisilanga kuba kithuadi?

⁸ Yave wutu sadisanga kuba kithuadi na zikhomba zitu mu nza yimvimba kheti tuidi batu ba masumu. Madi mambu ma kukuitukila. (1 Ko. 12:25) Kibibila kintuba ti Nzambi wu tulonganga, muingi “tuzolasananga befu na befu.” (1 Te. 4:9) Mu bikuma binkaka tulenda tuba ti, mu nzila kibibila Yave wu tukambanga mambu tufueti vanga muingi tuba kithuadi befu na befu. Bo tumfiongunina malongi mandi ayi kuma sadila, yawu phila Yave ka tulongilanga. (Ebe. 4:12; Tia. 1:25) Mawu mambu zimbangi zi Yave bamvangilanga mangolo muingi kuvanga.

9. Mbi tulenda longuka mu mambu madi mu Loma 12:​9-13 matedi kuzitisanga bankaka?

⁹ Buidi diambu di Nzambi di tusadisilanga kufikama zikhomba? Mona mambu Polo katuba matedi mambu amomo madi mu Loma 12:​9-13. (Tanga.) Tsikika thalu mu bikuma: ‘tuamanga ntuala muingi kuzitisanga bankaka’. Mbi mawu mansundula? Tufueti tuama ntuala muingi kumonisa luzolo kuidi bankaka, kulemvukila, kuyamba ayi kukabila bankaka biuma tuidi. (Efe. 4:32) Bika to kutemina khomba yinkaka katuamina ku kufikama, ngie wulenda “tuama ntuala kuvanga mawu. Yesu wutuba: “Kuvana kunluta tuadisanga mayangi kena kutambula.”—Mav. 20:35.

10. Buidi tulenda zitisila bankaka mu kifuza? (Tala mvandi foto.)

¹⁰ Bo kamana kutuba ti tufueti tuama ntuala muingi kuzitisa bankaka, Polo mvandi wutuba ti tufueti vangila mawu mu kifuza, tubika ba bolo. Mutu wukhambulu bolo wunzolanga kusala, ayi bo bakumvana kisalu muingi kuvanga, nandi wumvanganga kiawu mu kifuza. Zingana 3:​27, 28 yi tulubula: Kawubika kuvanga mamboti kuidi mutu wufueti vangila mawu, boti widi luaku lu kunsadisa. Diawu, bo tummona mutu widi mu kuviokila mu tsatu, tumvanganga mamoso muingi kunsadisa. Tubikanga ko mambu tufueti fika vanga, muingi kuma vanga bo tuala baka thangu. Ayi mvandi tuyindulanga ko ti befu khambu sadisa mutu, bankaka bankuiza nsadisa.—1 Yoa. 3:​17, 18.

11. Mbi binkuiza tusadisa kufikama zikhomba zitu?

¹¹ Phila yinkaka tulenda zitisila bankaka, yidi mu kuba wukubama muingi kuba lemvukila, kheti mu thangu ba tunyongisa. Efeso 4:26 yintuba: “Bikanu kulundanga nganzi nati va masika.” Kibila mbi? lutangu 27 luntuba ti malenda vana “luaku kuidi Nkadi’ampemba.” Khumbu ziwombo mu kibibila, Yave wutu kambanga tulemvukilanga bankaka. Kolosai 3:13 yi tukindisa: “Tatamananu kulemvukilanga benu na benu mu ntima woso.” Tulenda nunga kufikama zikhomba zitu, befu khambu tsikika thalu mu zinzimbala ziawu. Bo tumvanga mawu, tunsadisanga kukieba kithuadi ayi ndembama tuidi na zikhomba zitu. (Efe. 4:3) Mu bukhufi tulenda tuba ti, kulemvukila kuntuadisanga kithuadi ayi ndembama.

12. Buidi Yave katusadisilanga kulemvukila?

¹² Tuzebi ti disi ko diambu diluelu kulemvukila mutu wutulueka ntima. Vayi tulenda nunga kuvanga mawu mu lusalusu lu Yave. Polo bo katuba ti, tufueti zolasana befu na befu ayi kuba kifuza, mvandi wutuba: “Banu kifuza mu kipheve.” Mutu widi kifuza mu kipheve, wumvangilanga mambu mu nzaki, mu luzolo ayi mu mayangi. (Lom. 12:11) Mu phila ayoyo, pheve yi Nzambi yilenda tusadisa kumonisa luzolo, ayi kulemvukila bankaka mu ntima woso. Diawu, tutatamana kulomba kuidi Yave muingi katusadisa.—Luk. 11:13.

“BIKANU KUTUADISA KITHATU VA KHAT’INU”

13. Mambu mbi malenda tuadisa kithatu va khat’itu?

¹³ Mu kimvuka ki Yave muidi batu ba mimvila miviakana. (1 Ti. 2:​3, 4) Befu khambu ba keba keba, tulenda bika muingi mambu amomo ma tutula kithatu bo tunsola mambu tutidi, dedi phuatulu, mbukulu ayi phila yi kuviokisila thangu. (Lom. 14:4; 1 Ko. 1:10) Bo Yave ka tulonganga ti tufueti ba luzolo befu na befu, tufueti ba keba keba muingi tubika tula zitsatu zitu vantuala, voti kuyindula ti tulutidi kena bankaka.—Fil. 2:3.

14. Mangolo mbi tufueti vanga ayi kibila mbi?

¹⁴ Kuvanga mangolo muingi kukindisa bankaka, kutusadisanga kubika ba kithatu. (1 Te. 5:11) Mu bilumbu abibi, zikhomba ziwombo bavonga mu kipheve ayi babotula mu kimvuka, bavutukizi. Tufueti kuba yamba ayi kuba monisa luzolo. (2 Ko. 2:8) Khomba mueka yinkietu wuba wuvonga mu kipheve mu kumi di mimvu, wuvutuka mu kimvuka wutuba: “Bathambula mu mayangi ayi baphana zimbote.” (Mav. 3:19) Ndandu mbi mamboti amomo mantuadisa? Nandi wutuba: “Yimona koku ku Yave kuthuadisa ayi kuphana mayangi.” Befu kuba kifu ki kukindisanga bankaka, Yesu Klistu kalenda ku tusadila muingi kukindisa ayi kubomba badi mu kuviokila mu ziphasi.—Mat. 11:​28, 29.

15. Phila mbi yinkaka tulenda tuadisila kithuadi? (Tala mvandi foto.)

¹⁵ Phila yinkaka tulenda tuadisila kithuadi, yidi mu mambu tunkoluka. Yobi 12:11 yintuba: ‘Matu mankuwanga bikuma, dedi bo ludimi lumbimbilanga bidia.’ Dedi bo mutu wupisuka mu kulamba kambimbilanga bidia muingi kazaba boti bidi bimboti ava kuvana batu badia, mvandi vantombuluanga kuyindula buboti mu mambu tuntuba ava kuma tuba. (Minku. 141:3) Makani mitu mafueti ba kukoluka mambu mankindisa ayi mo batu boso bankuwa, bankuiza vua nkinza.—Efe. 4:29.

16. Banani bafueti luta ba kifu ki kukindisanga bankaka mu mambu bankoluka?

¹⁶ Matata ayi banuni, bafueti ba kifu ki kukolukanga mambu mankindisa. (Kolo. 3:​19, 21; Titu 2:4) Bakulutu ba kimvuka bafueti ba tho yi khindusulu ayi mbombolo, mu kuba minsungi mi mameme ma Yave. (Yesa. 32:​1, 2; Nga. 6:1) Ngana yimueka yi kibibila yintuba: Buboti beni dilongi tunkuwa mu thangu yifuana.—Zinga. 15:23.

“LUZOLO MU MAVANGA AYI MU KIEDIKA”

17. Buidi tulenda monisina luzolo lukiedika kuidi zikhomba?

¹⁷ Mvuala Yoane wu tukindisa “tubika tubanga to va munu ti tunzolanga, vayi tufueti monisa mawu mu mavanga ayi mu bukiedika.” (1 Yoa. 3:18) Tuntomba kumonisa luzolo lukiedika kuidi zikhomba zitu. Buidi tulenda vangila mawu? Bo tumviokisa thangu na zikhomba zitu, buawu tunkuiza luta kuba fikimina ayi luzolo luitu mu bawu lunkuiza buelama. Diawu tufueti tomba luaku loso muingi tuviokisanga thangu na zikhomba mu zikhutukunu ayi mu kisalu ki kusamuna. Mvandi tufueti botulanga thangu muingi kue tala zikhomba. Befu kuvanga mawu tunkuiza monisa ti, tuidi mu kutuadusu mu malongi ma Yave mantuba ti “tufueti zolasana befu na befu.” (1 Te. 4:9) Ayi tuala tatamana kumona bivisa ti didi diambu dimboti zikhomba kuzingila va kimueka mu kithuadi.—Minku. 133:1.