DILONGI 28
NKUNGA 88 Bika Minu Yidiata mu Zinzila Ziaku
Kibila Mbi Tufueti Tombanga Malongi?
‘Batu bantombanga malongi bawu badi nduenga.’—ZINGA. 13:10.
MAMBU TUANLONGUKA
Tuemmona mbi tufueti vanga muingi tubaka ndandu mu malongi tuntambula.
1. Mbi bilenda tusadisa kubaka makani malenda tutuadisa ndandu? (Zinga. 13:10; 15:22)
BEFU boso tuntombanga kubaka makani manduenga malenda tutuadisa ndandu. Diambu di Nzambi Kibibila dilenda tusadisa mu mambu amomo.—Tanga Zingana 13:10; 15:22.
2. Mambu mbi Yave katukanikisa?
2 Yave, nandi mutu wulutidi wulenda kutuvana malongi manduenga. Nandi wukanikisa kutusadisa, bo katuba: ‘Yala kuvana malongi ayi yela sikika thalu’ama kuidi ngiewu.’ (Minku. 32:8) Mambu amomo mammonisa ti Yave widi wukubama muingi kutuvana malongi, nandi wu tuvuanga nkinza ayi wunkuiza tusadisa kusadila malongi mandi mu luzingu luitu.a
3. Mbi tunkuiza longuka mu dilongi adidi?
3 Mu dilongi adidi, tunkuiza sadila diambu di Nzambi muingi tubaka mvutu wu biuvu abibi binna: (1) Zikhadulu mbi yifueti kuna, muingi yibaka ndandu mu malongi yintambula? (2) Nani kalenda phana malongi mamboti? (3) Buidi tulenda monisina ti tunzolanga kukuwa malongi? (4) Kibila mbi yilendi bika ko bankaka bambakila makani?
ZIKHADULU MBI TUFUETI KUNA?
4. Zikhadulu mbi tufueti kuna, muingi tubaka ndandu mu malongi mamboti?
4 Muingi tubaka ndandu mu malongi mamboti, tufueti kukikulula ayi kuzaba ndilu’itu. Thangu zinkaka tufueti kikinina ti, tusa zaba ko mambu moso matedi makani tuntomba kubaka. Diawu, befu khambu kukikulula ayi kuzaba ndilu’itu, Yave kasinkuiza tusadisa ko, ayi mvandi, tuisinkuiza nunga ko kusadila malongi tuntambula. (Mika 6:8; 1 Pet. 5:5) Vayi, befu kukikulula ayi kuzaba ndilu’itu, tunkuiza ba bakubama muingi kusadila malongi moso mabongulu mu Kibibila tuntambula ayi kumona ndandu mu mawu.
5. Khanu mambu mbi mavanga Ntinu Davidi kukinangika?
5 Mona mambu tulenda longuka mu kifuani ki Ntinu Davidi. Nandi wuba bibila biwombo muingi kukinangika. Ava kaba ntinu nandi wuba wuzabakana mutu wupisuka mu kuyola, ayi wuba luaku lu kusala vantuala ntinu. (1 Samu. 16:18, 19) Bo kayiza ba ntinu wu Isaeli, Yave wunsadisa mu nzila phevi yinlongo. (1 Samu. 16:11-13) Mvandi nandi wuba wuzabakana mu kuba mutu wupisuka mu kunuana mvita, ayi no wununga disodi dipisuka di basi filistea, Ngoliati. (1 Samu. 17:37, 50; 18:7) Boti Davidi wuba mutu waba kuyinangikanga khanu kasa kikinina ko malongi batu bankaka baba kumvananga. Vayi nandi waba zolanga kukuwa malongi.
6. Buidi tuzabidi ti Davidi waba zolanga kukuwa malongi? (Tala mvandi va thonono levista.)
6 Bo Davidi kayiza ba ntinu, nandi wutatamana kufikama batu baba kumvananga malongi mamboti. (1 Lusa. 27:32-34) Masi ko mambu ma kukuitukila kibila, Davidi wuba kifu ki kukuwanga malongi mamboti. Mvandi waba kikininanga kubika kuandi to malongi ma babakala, vayi mvandi ma nkietu wumueka baba tedilanga Abigaili. Nandi wuba wukuelana na dibakala dimueka wuba mavanga mambi baba tedilanga Nabali. Mu kukikulula, Davidi wukikinina malongi mamboti ma Abigaili ayi mawu mansadisa kubika bua mu disumu dingolo—1 Samu. 25:2, 3, 21-25, 32-34.
Mu kukikulula Davidi wukikinina ayi wusadila malongi Abigaili kamvana (Tala lutangu 6)
7. Mbi tulenda longuka mu kifuani ki Davidi? (Mpovi 4:13) (Tala mvandi fikula.)
7 Tulenda longuka mawombo mu kifuani ki Davidi. Dedi, kheti tuzebi kuvanga mambu mawombo voti tuidi biyeku biwombo, tulendi yindula ko ti tuzebi mambu moso ayi ti vasintombulu ko kukuwa malongi. Dedi Davidi, tufueti ba bakubama muingi kukuwa malongi mamboti mu khambu tala mutu betuvana mawu. (Tanga Mpovi 4:13.) Kuvanga mawu kulenda tusadisa kubika vanga zinzimbala ziwombo zilenda tutuadisa ziphasi.
Tufueti ba bakubama muingi kukuwa malongi mamboti mu khambu tadila mutu betuvana malongi beni (Tala lutangu 7)c
NANI KALENDA PHANA MALONGI MAMBOTI?
8. Kibila mbi Yonatani kabela mutu wufuana muingi kuvana Davidi malongi?
8 Mona mambu mankaka tulenda longuka mu kifuani ki Davidi. Nandi waba vuanga nkinza malongi ma batu baba kikundi kimboti na Yave Nzambi, ayi mvandi ma batu baba visanga mambu kaba viokila. Dedi, bo kaba tomba kuzaba boti kalenda ba kikundi kimboti na Ntinu Sauli, Davidi wuyuwa malongi ma Yonatani, muana wu Ntinu Sauli. Kibila mbi Yonatani kabela mutu wufuana muingi kumvana malongi mamboti? Kibila Yonatani wuba kikundi kimboti na Yave ayi mvandi wuzaba buboti tat’andi Sauli. (1 Samu. 20:9-13) Buidi kifuani akiokio kilenda tusadisila?
9. Bo tuntomba malongi, kuidi banani tufueti tomba lusalusu? (Zingana 13:20)
9 Bo tuntomba malongi, buboti beni kudinda kuidi zikhomba badi kikundi kimboti na Yave, no befu tuzebi ti bankuiza tusadisa.b (Tanga Zingana 13:20.) Dedi, yindula mu kifuani akiki: Khomba mueka wu ditoko wuntomba mutu kakuela. Kuidi nani nandi kankuiza dinda malongi? Ḿba nkundi’andi wukhambulu wukuela kalenda kumvana malongi mabongulu mu Kibibila. Vayi ḿba khomba ayoyo wu ditoko kalenda baka ndandu na kukoluka na bakuela badi bakuikama mu Yave, bayonzuka mu kipheve ayi badi mayangi va dikuela diawu.
10. Mambu mbi tunkuiza longuka?
10 Tuma tubila zikhadulu wadi tufueti kuna ayi mvandi banani balenda tuvana malongi mamboti. Buabu, tuentubila kibila mbi tufueti ba bakubama muingi kukuwa malongi ayi mvandi, boti vantombulu bankaka ba tubakila makani.
MONISA TI WUNZOLANGA KUTAMBULA MALONGI
11-12. (a) Mbi tulendi vanga ko? (b) Mbi Ntinu Roboão kavanga bo kaba tomba kubaka makani mankinza?
11 Khumbu zinkaka, mutu kalenda monikina buka ti wuntomba malongi, vayi ḿba wuntomba to muingi bankaka bakikinina makani kabaka. Mutu awowo kazolanga ko kukuwa malongi. Nandi kafueti longuka mu mambu mamonikina Ntinu Roboão.
12 Ntinu Roboão wuvinginina Solomo mu luyalu ku Isaeli. Dikabu di Isaeli baba tovuka mu kibila ki mambu Salomo kaba kuba dinda. Diawu bawu badinda lusalusu kuidi Roboão muingi kadekula bizitu biawu. Roboão wuba dinda bamvana thangu muingi kanunga kubaka makani amomo. Va thonono nandi wudinda malongi kuidi bakulutu, baba sadisanga tat’adi. (1 Minti. 12:2-7) Vayi, wubayisa malongi bakulutu beni bamvana. Kibila mbi kavangila mawu? Kibila nandi wubaka makani mandi veka, ayi waba tomba to bankaka bakikinina mu mawu. Diawu kalandikinina mambu bakundi bandi bankamba, kibila mawu kaba tomba kukuwa. (1 Minti. 12:8-14) Mu kulandakana malongi ma bakundi bandi, nandi wutuadisa ziphasi ziwombo kuidi naveka, ayi kuidi dikabu di Nzambi.—1 Minti. 12:16-19.
13. Kiuvu mbi tufueti kuyivana muingi tuzaba boti tuidi bakubama muingi kukuwa malongi?
13 Mbi tulenda longuka mu kifuani ki Roboão? Bo tundinda malongi, tufueti ba bakubama muingi kukikinina malongi beni. Buidi tulenda zabila mambu tufueti vanga? Tulenda kuyikuvusa: ‘Bukiedika ti yindindanga malongi bosi yimbayisanga mawu kibila masi ko mawu yintomba kukuwa?’ Tala kifuani kimueka.
14. Mbi tufueti tebukanga moyo bo tuntomba malongi? Vana kifuani. (Tala mvandi foto.)
14 Yindula mu kifuani akiki: Khomba mueka ba kumvana luaku lu kubaka kisalu kankuiza tambula zimbongo ziwombo. Vayi ava kakikinina, nandi wundinda malongi Kuidi nkulutu wumueka mu kimvuka. Nandi wu kunzabikisa ti kisalu beni kinkuiza ntula nkaku muingi kuba va kimueka na dikanda diandi. Nkulutu beni wu kimvuka wuntebula moyo khomba beni ti kiyeku kiandi kitheti kidi kudukisa zitsatu zi kiphevi zi dikanda diandi. (Efe. 6:4; 1 Ti. 5:8) Yindula boti khomba beni, kasinsadila ko malongi babe mvana, ayi wundinda malongi kuidi zikhomba zinkaka muingi bankamba mambu kantomba kukuwa. Bukiedika ti nandi widi wukubama muingi kukuwa malongi? Voti wuntomba to bankaka bakikinina makani mandi? Tufueti tebuka moyo ti ntim’itu wulenda ku tuvukumuna. (Yele. 17:9) Ayi khumbu zinkaka, malongi mo tuisintomba ko kukuwa, mawu mankuiza tusadisa.
Befu tuntombanga malongi mamboti mu bukiedika, voti tuntomba to batu bakikinina mu makani mitu? (Tala lutangu 14)
KIBILA MBI YILENDI BIKA KO BANKAKA BAMBAKILA MAKANI?
15. Mu mambu mbi tufueti ba keba keba ayi kibila mbi?
15 Kadika mutu mu befu kafueti baka makani mandi veka. (Nga. 6:4, 5) Dedi bo tuma tubila, mutu wunduenga wuntombanga malongi mamboti mu diambu di Nzambi ayi kuidi zikhomba bayonzuka mu kiphevi ava kabaka makani. Vayi, tufueti ba keba keba, muingi tubika dinda bankaka ba tubakila makani. Bankaka bamvanganga mawu mu kukuvula khomba kankinzikanga: “Boti ngiewu, khanu makani mbi wunkuiza baka?” Bankaka banlandananga to mambu bankaka bamvanganga mu khambu fiongunina mawu.
16. Mambu mbi matedi kudia bidia baba vaninanga dedi minkhailu kuidi bitumba mamonika ku kimvuka ki Kolintu, ayi nani wuba nsua wu kubaka makani matedi kudia biawu? (1 Kolintu 8:7; 10:25, 26)
16 Tala mambu mamonika mu kimvuka ki Kolintu mu thangu bapostolo matedi kudia bidia baba vananga dedi minkhailu kuidi bitumba. Mvuala Polo wusonika kuidi baklistu abobo: “Tuzebi ti bitumba bidi biuma bi phamba mu nza ayi vadi Nzambi yimueka to yikiedika.” (1 Ko. 8:4) Mu kulandakana mambu amomo mvuala Polo katuba, baklistu bankaka babaka makani ma kudia bidia baba vananga dedi minkhailu kuidi bitumba bo baba sumbisanga va zandu. Vayi bankaka bamanga kudia biawu muingi kubika bivisa kilunzi kiawu. (Tanga 1 Kolintu 8:7; 10:25, 26.) Mvuala Polo kabasa kuikanga ko bankaka batadila mambu beni mu phil’andi, voti basi Kolintu balandakana makani ma bankaka. Amomo madi makani ma kadika mutu. Kibila “Nzambi wala fundisa kadika mutu mu befu mu kutadila mavanga mitu.”—Lom. 14:10-12
17. Mbi bilenda monika befu kulandakana to makani ma batu bankaka? Vana kifuani. (Tala mvandi foto.)
17 Ntindu mambu amomo malenda tumonikina bubu. Yindula matedi zifrações zi menga. Kheti didi diambu diphasi, kadika mutu mu befu kafueti baka makani matedi mambu amomo. (Lom. 14:4) Befu kulandakana to makani ma batu bankaka, tunkuiza vanga mambu malenda tatisa kilunzi kitu. Diawu tufueti kubika kilunzi kitu muingi tusadila minsua mi Kibibila. (Ebe. 5:14) Buabu, thangu mbi tufueti tomba malongi ma zikhomba bayonzuka mu kiphevi? Tufueti vanga to mawu, bo befu veka tube fiongunina minsua mi Kibibila matedi mambu beni ayi tummona phasi kuvisa buidi tulenda sadila minsua beni mu makani tuntomba kubaka.
Tufueti tomba to malongi, bo tube fiongunina minsua mi kibibila befu veka ayi tuntomba kuvisa mawu (Tala lutangu 17)
TATAMANA KUTOMBA MALONGI
18. Mbi Yave katuvana muingi tubaka makani ma nduenga?
18 Yave wutufiatilanga, diawu katuvana luaku lu kubaka makani mitu veka. Muingi kutusadisa, nandi wutuvana diambu diandi Kibibila. Ayi mvandi, wutuvana bakundi ba nduenga, balenda kutusadisa kufiongunina mu kusadila minsua mi Kibibila. Nandi wudukisa kiyeku kiandi ki kuba tata yi luzolo. (Zinga. 3:21-23) Mbi tulenda vanga muingi kumvutula matondo?
19. Buidi tulenda kuangidikila Yave?
19 Dedi bo matata banzolanga kumona bana bawu kukonzuka mu kiphevi ayi kusadisa bankaka kusadila Yave, bobuawu mvandi, Yave wunkuangalalanga bo kammona ti befu tuidi mu kutatamana kukonzuka mu kiphevi ayi tuntombanga malongi mamboti muingi tubaka makani ma kunkuangidikanga.
NKUNGA 127 Phila Mutu Mbi Yifueni Ba
a Khumbu zinkaka baklistu, balenda dinda malongi matedi mbukulu, kukieba zimbongo ayi mambu mankaka, kuidi zikhomba bayonzuka mu kiphevi.
b Muingi kubuela zaba matedi mambu amomo, tala mu buku, Baka Mayangi ma Mvu ka Mvu!, dilongi 39 kinduika 5 ayi kikhuku “Tala mambu mankaka”.
c MAMBU MADI MU FIKULA VA THONONO : Nkulutu mueka wu kimvuka, wumvana malongi kuidi nkulutu wunkaka wu kimvuka matedi mambu kabe tuba mu kiyeku kaba mu lukutukunu.