DILONGI 30
NKUNGA 97 Diambu di Nzambi di Tuvana Moyo
Tatamana Kulonguka Mambu Mamona mu Malongi Matheti ma Kibibila
“Yintomba kutatamana ku lutebulanga moyo matedi mambu amomo, kheti benu luzebi buboti mawu.”—2 PET. 1:12.
MAMBU TUANLONGUKA
Tuemmona buidi tulenda sadila malongi matheti ma Kibibila tulonguka, mu luzingu luitu.
1. Ndandu mbi tubaka bo tulonguka malongi matheti ma Kibibila?
Malongi matheti ma Kibibila tulonguka, mabalula luzingu luitu. Dedi, bo tulonguka dizina di Yave, tuvanga mangolo moso muingi tumfikama. (Yesa. 42:8) Bo tulonguka kiedika kitedi lufua, tubika kubue kuazuka boti mutu tunzolanga befua widi mu kutovuka. (Mpovi 9:10) Ayi bo tulonguka zikhanu zi Nzambi matedi nza yimona, tubika kubue kuazukanga beni matedi bilumbu binkuiza kuntuala. Bubu tuidi lufiatu ti tulenda zinga mvu ka mvu.—Minku. 37:29; 90:10.
2. Dedi bummonisina 2 Petelo 1:12, 13, mbi bimmonisa ti baklistu bayonzuka mu kiphevi, balenda baka ndandu mu malongi matheti ma Kibibila?
2 Tufueti vua nkinza malongi matheti ma Kibibila tulonguka. Mu nkanda wummuadi kasonikina baklistu, mvuala Petelo wutuba ti bawu baba “diatila mu kiedika.” (Tanga 2 Petelo 1:12, 13.) Vayi bawu batona kuviokila mu mambu mawombo mu khati kimvuka, matula kiphevi kiawu va kingela. Bawombo batona kutuadisa malongi ma luvunu. (2 Pet. 2:1-3) Mvuala Petelo waba tomba kukindisa zikhomba aziozio, ayi kuba sadisa bakindama mu mambu amomo. Muingi kanunga kuvanga mawu, nandi wuba tebula moyo malongi matheti balonguka. Malongi beni, ma basadisa batatamana bakuikama nati kutsuka.
3. Fuanikisa kibila mbi baklistu boso bafueti tatamana kusadila malongi matheti ma Kibibila.
3 Kheti tueka mimvu miwombo mu kisalu ki Yave, tulenda baka ndandu mu malongi matheti tulonguka. Yindula mu kifuani akiki: Mutu widi wupisuka mu kulamba ayi wunlambanga mu mimvu miwombo, kalenda nyevisa bidia biandi mu kusadila biobiawu biuma kamana sadila mu bidia kalamba mimvu miwombo kumbusa. Vayi mawu madi disuasana na mutu wunlonguka kulamba bubu. Bobuawu mvandi, batu bamana sadila Yave mu mimvu miwombo ayi bo badi bamona mu kiedika, balenda tadila mu phila yiviakana malongi ma Kibibila. Tona tubotama, mambu mawombo mabaluka. Vayi bo tunsadila mambu matheti ma Kibibila tumana longuka thama, tulenda bakudila mambu mamona malenda tusadisa bubu. Mona malongi matatu matheti tulonguka mu Kibibila malenda tusadisa kheti tuidi baklistu bayonzuka mu kiphevi.
YAVE WIDI MVANGI
4. Ndandu mbi tumbakanga mu kuzaba ti Yave nandi Mvangi?
4 “Nzambi nandi wuvanga biuma bioso.” (Ebe. 3:4) Tuzebi ti diyilu, ntoto, monyo ayi biuma binkaka, Nzambi nandi wuvanga biawu mu nduenga ayi mu mangolo mandi. Nandi wu tuvanga, wu tuzebi buboti ayi wu tuvuanga nkinza. Nandi zebi malutidi mu befu. Kuzaba ti Yave nandi mvangi wu biuma bioso, ku tusadisanga kumona tsundu yi luzingu.
5. Kiedika mbi kilenda tusadisa kukikulula? (Yesaya 45:9-12)
5 Kuzaba ti Yave nandi Mvangi kulenda tusadisa kukikulula. Dedi, bo Yobi kaba tsikika to thalu mu naveka ayi mu mambu baba kumvunina, Yave wuntebula moyo ti nandi Mvangi wulutidi zangama. (Yobi 38:1-4) Mambu amomo masadisa Yobi kuvisa ti mayindu ma Yave mawu malutidi. Mu matedi mambu amomo, Yesaya wusonika: ‘Bukiedika ti tuphandu kalenda tuba kuidi ḿbumbi tuphandu mbi widi mu kuvanga?’—Tanga Yesaya 45:9-12.
6. Kibila mbi didi diambu dinkinza kuyindulanga mu nduenga yi mvang’itu? (Tala mvandi zifoto.)
6 Bo mutu weka mimvu miwombo mu kisalu ki Yave, nandi kalenda tona kufiatila mu mayindu mandi veka kena kutomba zithuadusulu zi Yave mu Kibibila. (Yobi 37:23, 24) Vayi mbi malenda monika nandi kutsikika mayindu mandi mu nduenga yi Yave Mvang’itu? (Yesa. 40:22; 55:8, 9) Kuzaba ti Yave nandi mvangi wulutidi nduenga, kulenda sadisa mutu beni kukikulula ayi kutadila mayindu mandi mu phila yifuana.
Mbi bilenda tusadisa kutadila mayindu mitu mu phila yifuana? (Tala lutangu 6)d
7. Mbi yaya Rahela kavanga muingi kakikinina zithuadusulu zimona?
7 Yaya Rahela wunkalanga ku Slovenia, wutuba ti kuyindula mu mvangi wu biuma bioso, wu kunsadisanga kukikinina bo mambu mambaluka mu kimvuka ki Yave. Nandi wutuba: “Thangu zinkaka yimmonanga phasi kukikinina makani zikhomba bantuama ntuala mu kimvuka bambakanga. Dedi, bo yilandakana video yi Zindubu #8 yi Dingumba Dintuadisi Mvu 2023, yisa zola ko kumona zikhomba baba mayedo kuvanga dilongi. Diawu yisambila kuidi Yave muingi katsadisa yibalula mayindu mami.” Yaya Rahela wukikinina ti Yave nandi wuvanga diyilu ayi ntoto, ayi nandi wuntuadisanga kimvuka kiandi mu phila yifuana. Ngie kumona phasi kuvisa voti kukikinina zithuadusulu zimona mu kimvuka, yindula mu nduenga ayi mangolo mvang’itu kadi.—Lom. 11:33-36.
KIBILA NZAMBI KAMBIKILANGA ZIPHASI
8. Ndandu mbi tumbakanga, mu kuzaba kibila mbi Nzambi kambikilanga ziphasi?
8 Kibila mbi Nzambi kambikilanga ziphasi? Bawombo basa nunga ko kubakula mvutu wu kiuvu akiokio, diawu bafuemina Nzambi, ayi bankaka batona kuyindula ti Nzambi kasi ko. (Zinga. 19:3) Vayi mu nzila Kibibila, tulonguka ti Yave katuadisanga ko ziphasi, vayi tuntovukanga mu kibila ki disumu. Mvandi tulonguka ti mu mvibudulu, Yave wunsadisanga batu bawombo kunzaba ayi kuvisa buidi nandi kala manisina ziphasi mvu ka mvu. (2 Pet. 3:9, 15) Kiedika akiokio ki tubombanga ayi ki tufikikanga kuidi Nzambi.
9. Thangu mbi vantombuluanga befu kuyindula kibila Yave kambikilanga ziphasi?
9 Tulonguka nkinza wu kumonisa mvibudulu nati thangu Yave kala manisa ziphasi zioso. Vayi, bo befu voti basi dikanda ditu tumviokila mu mambu maphasi voti makhambulu masonga, ḿba tuyikuvusanga kibila mbi Yave kasimvanga ko ni diambu. (Haba. 1:2, 3) Bo mawu mammonika, buboti beni kubotulanga thangu muingi kuyindula kibila mbi Yave kambikilanga muingi batu bamboti baviokila mu ziphasi.a (Minku. 34:19) Mvandi, tufueti yindula mu lukanu lu Yave lu kumanisa ziphasi zioso va ntoto.
10. Mbi bisadisa yaya Anne kununga kiunda kaba?
10 Kuzaba kibila mbi Nzambi kambikilanga ziphasi, kulenda tusadisa kukindama. Yaya Anne wunkalanga ku kiseki ki Mayotte ku Oceano Índico, wutuba: “Bo mam’ama kafua, yiba beni mu kiunda mu thangu yiwombo. Vayi yidi lufiatu ti kasi ko Yave wuntuadisanga ziphasi. Nandi widi phuila muingi ku tusadisa mu ziphasi zioso tumviokila ayi kuvulubusa batu bafua. Kuyindulanga mu zikhanu aziozio zi Nzambi ku kuphananga ndembama yi ntima.”
11. Buidi kuzaba kibila Nzambi kambikilanga ziphasi, ku tusadisanga kusamuna?
11 Kuzaba kibila mbi Nzambi kambikilanga ziphasi, mvandi kulenda tukindisa kutatamana kusamuna. Bo kamana kutuba ti mvibudulu yi Yave yimvananga luaku muingi batu banyongina masumu mawu, mvuala Petelo wubue tuba: “Yindula ntindu mbi batu lufueti ba. Lufueti ba batu badi zikhadulu zinlongo, ayi batu bammonisanga mu luzingu luawu ti bakivana kuidi Nzambi.” (2 Pet. 3:11) Kukivana kuidi Nzambi, kulenda sundula mvandi kusamuna zitsangu zimboti. Tunzolanga batu dedi bo Yave kanzodilanga, ayi tuntomba muingi bawu babaka luaku lu kuzinga mu nza yimona. Mu mvibudulu, Yave widi mu kuvana luaku kuidi batu bawombo muingi bansadila. Luaku lunneni kuidi befu, kusala mu kithuadi na Yave, bo tunsadisa batu bawombo kulonguka matedi nandi muingi bavuka—1 Ko. 3:9.
TUIDI MU KUZINGILA MU “BILUMBU BITSUKA”
12. Ndandu mbi tumbakanga mu kuzaba ti tuidi mu kuzingila mu bilumbu bitsuka?
12 Kibibila kimmonisa bivisa ti tuidi mu kuzingila mu “bilumbu bitsuka.” (2 Ti. 3:1-5) Mambu madi mu kumonika va nza mammonisa ti zimbikudulu zi Kibibila zitedi bilumbu bitsuka zidi mu kusalama. Ayi bo tummona zikhadulu zi batu dedi bo Kibibila kintubila, tumbanga lufiatu ti diambu di Nzambi dintubanga kiedika.—2 Ti. 3:13-15.
13. Mu kutadila mambu Yesu katuba mu Luka 12:15-21, biuvu mbi tufueti kuyikuvusa?
13 Kulonguka kiedika matedi bilumbu bitsuka tuidi mu kuzingila, kulenda tusadisa kusamuna mu kifuza. Yesu wusadila kifuani kilenda ku tusadisa kusamuna mu nsualu ayi mu kifuza. (Tanga Luka 12:15-21) Kibila mbi nandi katedila “kivungisi” dibakala diba busina? Nandi kasantedila ko abobo mu kibila ki busina kaba, vayi kibila nandi waba tula mambu ma kinsuni vatheti mu luzingu luandi. Dibakala beni wuba busina va meso ma batu bika kuandi va meso ma Nzambi. Diawu Nzambi kankambila: “Mu builu abubu, ngie wunkuiza fua.” Bubu mvandi, bo tsukulu yi nza yidi mu kuefikamanga, tufueti kuyikuvusa: Mambu mbi yinluta tulanga vatheti mu luzingu luama? Yinsadisanga bana bama kubaka makani ma nduenga? Yinsadilanga mangolo mama, biuma yidi ayi thangu’ama muingi kuba kikundi kimboti na Yave voti muingi yibaka busina?
14. Dedi bummonisina kifuani ki yaya Miki, kibila mbi didi diambu dimboti kuyindulanga ti tuidi mu kuzingila mu bilumbu bitsuka?
14 Kuzaba ti tuidi mu kuzingila mu bilumbu bitsuka, kulenda tusadisa kusadila buboti thangu’itu. Mawu mambu mamonikina khomba mueka bantedilanga Miki. Nandi wutuba: ‘Bo yiba ku kikola, yaba tomba kubuela longuka matedi bibulu, ayi mvandi yaba tomba kuba ntuami ntuala ayi kusadila kuma kulutidi tsatu. Bakundi bama bayonzuka mu kiphevi batsadisa kuvisa ti yilendi nunga ko kukivana beni muingi kulonguka matedi bibulu ayi mu yoyawu thangu kudukisa makani mami ma kiphevi. Bawu bathebula moyo ti tuidi mu kuzingila mu bilumbu bitsuka, ayi nza ayiyi yembelama kubungu. Vayi mu nza yimona, yela baka thangu yiwombo muingi kulonguka matedi bibulu bioso yintomba. Diawu yivanga zi curso zilenda kutsadisa kuyizingisa. Mawu matsadisa kubaka kisalu kiaba kuphananga thangu muingi yiba ntuami ntuala. Ayi buviokila thangu, yiyenda ku Equador kiba tsatu yi minsamuni.’ Miki ayi nnuni’andi beka mu kisalu ki kukengidila bimvuka ku tsi beni.
15. Bumviokila thangu, buidi batu balenda tadila zitsangu zimboti? Vana kifuani. (Tala mvandi zifoto.)
15 Bumviokila thangu batu balenda balula mayindu. Mona kifuani ki Tiagu khomba wu Yesu. Nandi wuyonzuka na Yesu, wuzaba ti Yesu nandi Mesia, ayi wumona Yesu kulonga mu phila yilutidi. Vayi Tiagu kasa ba ko nlandikini’andi bo Yesu kayiza fua ayi kavulubuka.b (Yoa. 7:5; Nga. 2:9) Diawu, bika kuvonga boti va thonono basi dikanda diaku basimvua ko nkinza mambu wu kuba longa. Tatamana kuetala batu bakhambu kikinina zitsangu zimboti mu khumbu yitheti muyoluka. Bika kuzimbakana ti tuidi mu kuzingila mu bilumbu bitsuka ayi kisalu ki kusamuna kifueti vangimina mu nsualu. Mambu wulenda longa basi dikanda diaku bubu, ḿba mawu mala kuba sadisa bo ziphasi zingolo ziala tona.c
Mbi bilenda tusadisa kubika vonga kusamuna basi dikanda ditu? (Tala lutangu 15)e
TONDA YAVE MU MALONGI KATUVANANGA
16. Ndandu mbi tumbakanga mu malongi ma Yave? (Tala mvandi quadro yintuba “Sadila Malongi ma Kibibila Muingi Kusadisa Bankaka.”)
16 Nduka bidia bioso bi kiphevi kimvuka ki Yave kimbasisanga, kikubuku muingi kusadisa batu bakhambu zaba kiedika. Dedi, dilongi di baboso dimvangamanga kadika sabala, ndongukulu yi Kibanga ki Nsungi ayi zivideo zinkaka mu jw.org, zikubuku muingi kusadisa batu bakhambu ba Zimbangi zi Yave. Vayi kheti bobo, befu mvitu tumbakanga ndandu yiwombo. Malongi beni mankindisanga luzolo ayi kiminu tuidi mu Yave, ayi mvandi ma tusadisanga kuba bapisuka mu kulonga bankaka.—Minku. 19:7.
17. Mu mambu mbi malongi matheti ma Kibibila malenda ku tusadisila?
17 Mu kuba Mbangi yi Yave, befu tunkuangalalanga bo batuzabikisanga phisulu yimona yi lutangu lumueka lu Kibibila. Vayi mvandi, tumvutulanga matondo kuidi Yave mu malongi matheti ma Kibibila ma tusadisa muingi tunsadila. Befu kumona ti tuntomba kuvangila mambu mu phil’itu, mu khambu landakana zithuadusulu zi kimvuka ki Yave, tufueti tebukanga moyo ti naveka Yave nkua ngolo zioso ayi nkua nduenga wuntuadisanga kimvuka kiandi. Bo befu voti basi dikanda ditu tumviokila mu mambu maphasi, tufueti vibidila ayi kutebuka moyo kibila Yave kambikilanga ziphasi. Ayi bo tuntomba kubaka makani matedi buidi tunkuiza sadila thangu’itu voti biuma tuidi, tufueti tebukanga moyo ti tuidi mu kuzingila mu bilumbu bitsuka. Bika malongi ma Yave matatamana ku tukindisa ayi ku tuvana nduenga.
NKUNGA 95 Muinda Wuḿbuelama Kukienzuka
a Tala dilongi dintuba “Porque Todo o Sofrimento Acabará em Breve?” mu Kibanga ki Nsungi ki kilumbu 15 Ngonda Yintanu mvu, 2007, va tsielu 21-25.
b Tala dilongi 8 di mua buku Zola Batu—Ayi Vanga Minlonguki.
c Tala dilongi dintuba, “Mbi Tuzebi Matedi Phila Yave Kala Fundisila Batu mu Bilumbu Binkuiza?” mu Kibanga ki Nsungi ki Ngonda Yintanu mvu, 2024 va tsielu 8-13.
d MAMBU MADI MU FIKULA : Nkulutu mueka wu kimvuka wumvana mayindu mu lukutukunu lu bakulutu ba kimvuka, vayi basinkikinina ko mayindu mandi. Va builu, nandi wuntala kuyilu ayi wuntona kutadila mayindu mandi mu phila yifuana.
e MAMBU MADI MU FOTO: Mu thangu kamvanga ndongukulu’andi yi Kibibila, khomba mueka wumfiongunina bivisa bimmonisa ti tuidi mu kuzingila mu bilumbu bitsuka. Mawu mansadisa kuvana kimbangi kuidi khomb’andi mu telefone.