Yave Wala Tusadisa Kukindama

1. Kibila mbi vantombulu befu kukindama, ayi lusalusu mbi tuidi? (1 Petelo 5:10)

MU BILUMBU abibi bitsuka, vantombulu befu tukindama. Bawombo mu befu tumviokilanga mu bimbevu bingolo, bankaka bafuilu batu banzolanga, ayi bankaka bamviokilanga mu zikhuamusu kuidi basi dikanda voti kuidi zimfumu zi luyalu. (Mat. 10:​18, 36, 37) Ba lufiatu ti mu dioso kua diambu tumviokila, Yave kalenda tusadisa kukindama.—Tanga 1 Petelo 5:10.

2. Mbi bilenda tusadisa kukindama?

² Kukindama kunsundula kusikama mu kivuvu kheti tumviokila mu zikhuamusu voti zinzomunu. Tulendi nunga ko kukindama mu mangolo mitu veka vayi mu “mangolo malutidi ma Yave.” (2 Ko. 4:7) Mu dilongi adidi, tunkuiza mona mambu manna Yave kansadilanga muingi ku tusadisa kukindama. Mvandi tunkuiza mona buidi tulenda bakila ndandu mu mawu.

NSAMBU

3. Kibila mbi tulenda tuba ti nsambu widi mangitukulu?

³ Kheti tuidi batu ba masumu, tuidi luaku lu kukoluka na Yave mu nzila nsambu, muingi tukindama. (Ebe. 4:16) Tulenda sambila kuidi Yave yoso kua thangu tutidi ayi mu moso kua mambu. Nandi kalenda kuwa yoso kua mbembu ayi voso kua vama. (Yona 2:​1, 2; Mav. 16:​25, 26) Bo tunkuanzuka ayi tuisinzaba ko ma kutuba, Yave kalenda visa mabanza mitu ayi kutusadisa. (Lom. 8:​26, 27) Bukiedika, nsambu widi mangitukulu.

4. Kibila mbi kusambila muingi Yave katusadisa kukindama, kidi kithuadi na luzolo luandi?

⁴ Mu diambu diandi, Yave wu tukanikisa: “Befu kudinda dioso kua diambu didi kithuadi na luzolo luandi, nandi wala ku tukuwa.” (1 Yoa. 5:14) Bukiedika ti tulenda dinda lusalusu lu Yave muingi tukindama? Ngete! Kibila kuvanga mawu kidi kithuadi na luzolo luandi. Kibila mbi tuntubila mawu? Kibila bo tunkindamanga mu ziphasi, tunsadisanga Yave kuvana mvutu kuidi Satana mutu wu kunfiesanga. (Zinga. 27:11) Mvandi Kibibila kimmonisa ti, Yave widi wukubama muingi kumonisa mangolo mandi kuidi batu badi bakuikama mu nandi. (2 Lusa. 16:9) Diawu tulenda ba lufiatu ti Yave widi mangolo ayi phuila muingi kutusadisa kukindama.—Yesa. 30:18; 41:10; Luk. 11:13.

5. Buidi nsambu wulenda tusadisila kubaka ndembama yi ntima? (Yesaya 26:3)

⁵ Kibibila kintuba ti bo tunzabikisa mabanza mitu kuidi Yave mu nzila nsambu, nandi wala tuvana “ndembama yi Nzambi yilutidi diela dioso di batu.” (Fil. 4:7) Mona mbi mawu mansundula. Dedi bawombo bakhambu sadila Yave, bamvanganga mangolo muingi kubotula mayindu moso mu kilunzi muingi kuba mu ndembama. Vayi mayindu amomo malenda tula mutu beni va kingela, kibila ziphevi zimbi balenda kumvukumuna. (Dedikisa na Matai 12:​43-45.) Vayi bo tunsambila kuidi Yave, befu tummonisanga ti tu kumfiatilanga ayi nandi wutuvananga ndembama yilutidi kena dioso diambu batu bamvanganga muingi kubaka ndembama. (Tanga Yesaya 26:3.) Phila yimueka Yave kamvangilanga mambu amomo yidi, ku tusadisa kutebukila moyo matangu ma kibibila ma tukindisanga. Ayi mawu ma tu bombanga kibila ma tumonisanga ti Yave, wutu vuanga nkinza ayi nandi wuntomba muingi tubaka luzingu lu mayangi.—Minku. 62:​1, 2.

6. Mambu mbi tulenda dinda mu nsambu? (Tala mvandi foto.)

⁶ Mambu wulenda vanga. Bo wumviokila mu mambu manthota kiminu kiaku, yekula bizitu biaku kuidi Yave, muingi wubaka ndembama. (Minku. 55:22) Ndinda ka kuvana nduenga muingi wununga mambu beni. (Zinga. 2:​10, 11) Mvandi, bo wunsambila muingi ka kusadisa kukindama, mona buidi nandi kankuiza kusadisila ayi mvutudila matondo. (Fil. 4:6). Kawubika mambu maphasi wumviokila ma kutula nkaku muingi wumona lusakumunu Yave ka kuvananga.—Minku. 16:​5, 6.

DIAMBU DI NZAMBI

7. Buidi Kibibila kilenda tusadisila kukindama?

⁷ Yave wutuvana diambu diandi muingi ku tusadisa kukindama. Mu Kibibila muidi matangu mawombo ma tuvana lufiatu ti Yave wu tusadisanga. Tala kifuani kimueka mu Matai 6:8 yintuba: “Tat’inu zebi mambu muntomba, ava benu mundinda mawu.” Yesu wutuba mambu amomo kibila nandi wuzaba buboti Yave, kena woso kua mutu. Diawu, tuisi ko kibila muingi kuba divuda boti Yave wala dukisa zitsatu zitu ayi ku tusadisa kununga mambu maphasi. Mu Kibibila muidi mambu mawombo malenda tukindisa bo tumviokila mu ziphasi.—Minku. 94:19.

8. Buidi minsua mi Kibibila milenda ku tusadisila kukindama?

⁸ Minsua mi Kibibila milenda ku tusadisa kukindama ayi kubaka makani manduenga mu luzingu. (Zinga. 2:​6, 7) Dedi, Kibibila ki tukindisa tubika kuazuka mu mambu ma lumbu ka lumbu. (Mat. 6:34) Befu kuba kifu ki kutanganga Kibibila ayi kuyindula mu mambu tuntanga, tuala tebukanga moyo minsua mi Kibibila milenda tusadisa bo tumviokila mu ziphasi.

9. Buidi bifuani bi batu bafiatila mu Yave bilenda ku tusadisila?

⁹ Mu Kibibila, muidi bifuani bi batu bafiatila mu Yave ayi batambula lusalusu luandi. (Ebe. 11:​32-34; Tia. 5:17) Bo tunyindulanga mu bifuani abiobio, tumbanga lufiatu ti Yave widi kisuamunu kitu, mangolo mitu ayi lusalusu luitu mu thangu ziphasi. (Minku. 46:1) Kifuani kimboti ki bisadi bi Yave bikuikama mu thangu yikhulu, ki tusadisanga kukindama.—Tia. 5:​10, 11.

10. Buidi tulenda sadila buboti diambu di Nzambi?

¹⁰ Mambu wulenda vanga. Tanga Kibibila kadika kilumbu ayi sonika matangu malenda ku kusadisa. Bawombo bambakanga ndandu mu Kufiongunina Matangu ma Kibibila ma Kadika Kilumbu. Khomba mueka bantedilanga Mariea wubakula ti mawu madi makiedika, bo matata mandi baba mbela yi cancer. Mbi binsadisa kukindama bo kaba kieba matata mandi? Nandi wutuba: “Kadika kilumbu va meni, yintanganga Matangu ma Kibibila ma Kadika Kilumbu ayi yinfionguninanga mawu. Kuvanga mawu ma kutsadisanga kuyindula mambu Yave kala vanga mu bilumbu binkuiza kuntuala, ayi kubika tsikika mayindu mu ziphasi yidi mu kuviokila.”—Minku. 61:2.

ZIKHOMBA ZITU ZI KIPHEVI

11. Kibila mbi kuzaba ti tuisi ko befu veka kulenda tusadisa kukindama?

¹¹ Yave wu tuvana zikhomba zi kiphevi mu nza yimvimba muingi ku tusadisa kukindama. Mu kuzaba ti ‘zikhomba zitu zioso mu nza yimvimba, mvandi badi mu kuviokila mu zioziawu ziphasi’ ma tusadisanga kumona ti tuisi ko befu veka. (1 Pet. 5:9) Bukiedika, tulenda ba lufiatu ti, zioso kua ziphasi tumviokila, zikhomba zitu mvawu bamviokianga mu zioziawu ziphasi. Boti bawu badi mu kukindama, befu mvitu tulenda nunga kukindama.—Mav. 14:22.

12. Buidi zikhomba balenda tusadisila ayi mbi tulenda vanga mu bawu? (2 Kolintu 1:​3, 4)

¹² Zikhomba balenda tusadisa muingi tukindama. Mvuala Polo wumona mawu mu luzingu luandi. Nandi waba vutulanga matondo kuidi zikhomba baba kunsadisanga mu thangu kaba mu buloku. Bawu bansadisa ayi bankindisa. (Fil. 2:​25, 29, 30; Kolo. 4:​10, 11) Bubu mvandi, zikhomba zitu balenda tusadisa bo tumviokila mu ziphasi. Ayi befu mvitu tulenda kuba sadisa.—Tanga 2 Kolintu 1:​3, 4.

13. Mbi bisadisa yaya Maya kukindama?

¹³ Zikhomba zitu ku Russia basadisa khomba mueka bantedilanga Maya. Mu mvu 2020, zi police bafuandubula nzo’andi bosi bannata ku nzo lufundusu mu kibila ki kusamuna zitsangu zimboti kuidi batu. Yaya Maya wutuba: “Mu thangu yiba yivonga ayi mu kiunda zikhomba bathela mu telefone ayi batsonikina minkanda muingi kukhindisa. Minu yizaba ti yidi dikanda dinneni di luzolo. Vayi lusalusu zikhomba baphana, matsadisa kumona ti luzolo alolo luidi lukiedika.”

14. Buidi lusalusu lu zikhomba lulenda ku tusadisa kukindama? (Tala mavandi foto.)

¹⁴ Mambu wulenda vanga. Bo wumviokila mu ziphasi, fikama zikhomba zi kiphevi. Bika kubayisa lusalusu lu bakulutu ba kimvuka. Bawu balenda ba ‘kibuangu ki kusuamina phemu, ayi ki kusuamina kivuka kingolo.’ (Yesa. 32:​2, nota.) Tebuka moyo ti, zikhomba zi kiphevi mvawu badi mu kuviokila mu mambu maphasi. Kumonisa mamboti kuidi mutu wuntomba lusalusu, kulenda ku kusadisa kukindama bo wumviokila mu mambu maphasi.—Mav. 20:35.

KIVUVU KITU

15. Buidi kivuvu kisadisila Yesu kukindama? (Ebeleo 12:2)

¹⁵ Yave wu tuvana kivuvu ki tusadisanga kukindama. (Lom. 15:13) Kivuvu kisadisa Yesu kukindama bo kaba va ntoto. (Tanga Ebeleo 12:2.) Yesu wuzaba ti, lukuikumunu luandi luala sadisa kudiodisa dizina di Yave. Yesu waba yindula mu thangu kala vutuka ku diyilu ayi kuba ntinu mu Kintinu ki Nzambi. Bobuawu mvandi, kivuvu ki kuzinga mvu ka mvu va ntoto, ma tusadisanga kukindama mu ziphasi tumviokilanga mu nza ayiyi yi Satana.

16. Buidi kivuvu kisadisila yaya Alla kukindama, ayi mbi belonguka mu mambu nandi katuba?

¹⁶ Tala buidi kivuvu kisadisila khomba mueka ku Russia bantedilanga Alla, no nnuni bantula mu buloku. Bo mambu amomo mamonika, yaya Alla wutuba: “Kusambila ayi kuyindula mu kivuvu kitu ma kutsadisanga kubika ba beni mu kiunda. Yimvisanga ti ziphasi aziozio ziala mana, ayi ti Yave wala bunga zimbeni ziandi, ayi wala ku tusakumuna.”

17. Buidi tulenda monisina ti tumvuanga nkinza kivuvu Yave katuvana? (Tala mvandi foto.)

¹⁷ Mambu wulenda vanga. Botula thangu muingi wuyindula mu kivuvu Yave ka tukanikisa. Yindula mu lusakumunu loso tuala tambula mu nza yimona. Ngie wala mona ti moso kua mambu wumviokila madi to ‘mu mua thangu ayi madi maluelu.’ (2 Ko. 4:17) Mvandi vanga mamoso wulenda nunga muingi wuzabikisa bankaka matedi kivuvu kiaku. Bawombo badi mu kutovuka mu nza ayiyi yi Satana mu kukhambu ba kivuvu mu bilumbu binkuiza. Ḿba bawu balenda tomba kuzaba mambu Yave kakanisa kuvanga mu nzila kintinu kiandi.

18. Kibila mbi tufueti fiatila mu zikhanu zi Yave?

¹⁸ Bo kamana kuviokila mu zikhuamusu zioso, Yobi wukamba Yave: ‘Buabu, minu yima zaba ti Ngie widi lulendu lu kuvanga biuma bioso. Ayi vasi ko ni kiuma wulenda lembakana mu bio wunyindula kuvanga.’ (Yobi 42:2) Yobi wulonguka ti vasi ko ni kiuma kilenda tula nkaku Yave kudukisa lukanu luandi. Ayi mambu amomo malenda tusadisa kukindama. Muingi kufuanikisa, yindula nkietu widi kimbevu kingolo ayi widi mu kiunda mu kuzaba ti minfelimi miwombo basa nunga ko kumbuka. Vayi bo mfelimi wuzabakana ayi wu lufiatu, wubakula kimbevu mbi kiba yandi ayi wunsudikisa mbi kafueti vanga muingi kabeluka, nandi wuyiza ba beni mu mayangi. Kheti vantombulu thangu yiwombo muingi kabeluka, nandi wala tatamana kukindama kibila widi kivuvu ti, mu bilumbu binkuiza—mambu mala baluka. Bobuawu mvandi, kufiatila mu kivuvu tuidi mu nza yimona kulenda tusadisa kukindama.

19. Mbi bi tusadisanga kukindama?

¹⁹ Dedi bo tuma muena, Yave wu tusadisanga kununga kukindama mu nzila nsambu, Diambu diandi, zikhomba zitu zi kiphevi ayi mu nzila kikuvu kitu. Befu kusadila mambu moso amomo, nandi wala tusadisa kununga ziphasi zioso nati kala bunga nza yi Satana.—Fil. 4:13.