DILONGI 34
NKUNGA 3 Mangolo Mitu, Kivuvu Kitu, Lufiatu Luitu
Fiatila mu Nlemvu wu Yave
“Ngiewu wala lemvukila zinzimbala ziama ayi masumu mama.”—MINKU. 32:5.
MAMBU TUANLONGUKA
Tuemmona kibila mbi tufueti ba lufiatu mu nlemvu wu Yave, ayi buidi Kibibila ki tuvana lufiatu ti Yave wunlemvukilanga masumu ma batu banyonginanga mu bukiedika.
1-2. Buidi tulenda bela bo Yave ka tulemvukilanga? (Tala mvandi fikula )
NTINU Davidi wuzaba mbi binsundula ku kifundisa mu kibila ki masumu. (Minku. 40:12; 51:3) Nandi wuvanga zinzimbala ziwombo mu luzingu luandi. Vayi nandi wunyongina mu bukiedika masumu mandi ayi Yave wunlemvukila. (2 Samu. 12:13) Mu kibila ki nlemvu wu Yave, Davidi wuyiza baka luvovomu.—Minku. 32:1.
2 Dedi Davidi, befu mvitu tulenda baka luvovomu befu kutambula nlemvu wu Yave. Mayangi beni kuzaba ti Yave widi wukubama muingi kulemvukila zinzimbala zitu befu kunyongina ziawu mu bukiedika, kufungula masumu mitu ayi kuvanga mangolo muingi kubika vutukila zioziawu zinzimbala. (Zinga. 28:13; Mav. 26:20; 1 Yoa. 1:9) Ayi mvandi, mayangi kuzaba ti bo Yave kanlemvukila mutu, nandi wunzimbakananga masumu mutu beni ka bevanga.—Yehe. 33:16.
Ntinu Davidi wusonika minkunga miwombo mintubila nlemvu wu Yave. (Tala lutangu 1-2)
3-4. Buidi khomba mueka kabela bo kayiza botama, ayi mbi tunkuiza mona mu dilongi adidi?
3 Khumbu zinkaka tulenda ba divuda boti Yave wu tulemvukila. Mona mambu mamonikina yaya Jennifer, wuyonzukila mu kiedika. Bo kaba kikhupa, nandi wutona kuvanga mambu Yave kanlendanga, ayi wunata nzingulu wadi. Bo vavioka mimvu miwombo, nandi wuvutuka kubue sadila Yave ayi wukivana muingi kubotama. Nandi wutuba: “Yaba nata luzingu lu kitsuza, kukolo malavu, kutomba biuma biwombo ayi kutuadusu mu nganzi. Kheti yizaba ti minu kunyongina mu bukiedika masumu mami, Yave wunkuiza ndemvukila mu nzila khudulu, vayi yabasa kikininanga ko ti Yave widi wukubama muingi kulemvukila masumu mami.”
4 Ngie mvaku wummonanga phasi kukikinina ti Yave wulemvukila zinzimbala wuvanga kumbusa? Yave wuntomba tufiatila mu nlemvu’andi ayi tuba loluawu lufiatu Ntinu Davidi kaba. Mu dilongi adidi, tunkuiza mona kibila mbi tufueti fiatila mu nlemvu wu Yave, ayi mbi binkuiza tusadisa kuvanga mawu.
KIBILA MBI TUFUETI FIATILA MU NLEMVU WU YAVE?
5. Mbi Satana kantomba tukikinina? Vana kifuani.
5 Befu kufiatila mu nlemvu wu Yave, tuala nunga mintambu mi Satana. Satana wumvanganga mangolo mawombo muingi ku tuvanga kubika kubue sadilanga Yave. Muingi kanunga kuvanga mawu, nandi wuntombanga ziphila zi ku tuvanga kuyindula ti Yave kalasa tulemvukila ko. Mona mambu mamonikina dibakala musi Kolintu babotula mu kimvuka mu kibila ki kitsuza. (1 Ko. 5:1, 5, 13) Kuntuala bo nandi kanyongina masumu mandi, Satana waba tomba muingi zikhomba mu kimvuka babika kunlemvukila ayi babika kumvutula mu kimvuka. Mu yoyawu thangu, Satana waba tomba muingi dibakala beni kabua mu kiunda kingolo ayi kayindula ti Yave kalendi kunlemvukila ko.—Satana bubu mvandi, wukhidi sadilanga miomiawu mintambu, vayi “befu tuzebi buboti mintambu miandi.”—2 Ko. 2:5-11.
6. Buidi tulenda bakila luvovomu ayi kubika kukivana beni foto?
6 Befu kufiatila mu nlemvu wu Yave tunkuiza baka luvovomu. Bo tumvanga zinzimbala, kilunzi kitu ki tutatisanga. (Minku. 51:17) Adiodio didi diambu dimboti kibila dinkuiza tusadisa kuvanga mangolo muingi kubika kubue vutukilka zioziawu zinzimbala. (2 Ko. 7:10, 11) Vayi befu kukivana beni foto mu masumu tunyongina, tulenda vonga mu kiphevi. Vayi befu kuba lufiatu ti Yave wu tulemvukila, tuisinkuiza kukivana beni foto. Ayi mu phila ayoyo, tunkuiza sadila Yave mu mayangi ayi mu kilunzi kidiodila. (Kolo. 1:10, 11; 2 Ti. 1:3) Vayi buidi tulenda bela lufiatu ti Yave be tulemvukila?
MBI BILENDA TUSADISA KUFIATILA MU NLEMVU WU YAVE?
7-8. Buidi Yave kayizabikisila kuidi Mose, ayi lufiatu mbi mawu ma tuvana? (Esodu 34:6, 7)
7 Yindula mu mambu Yave katuba matedi naveka. Dedi, yindula mambu Yave kakamba Mose ku Mongo Sinai.a (Tanga Esodu 34:6, 7.) Yave khanu wukamba Mose matedi mambu mawombo vayi nandi wunkamba matedi zikhadulu dedi, Nzambi nkua nlemvu ayi nkua kiadi. Bukiedika ti Nzambi nkua nlemvu ayi nkua kiadi kasinkuiza lemvukila ko batu banyongina masumu mawu mu bukiedika? Tuidi lufiatu ti Yave wunlemvukilanga mu bukiedika mu kibila ki zikhadulu ziandi zimboti.
8 Tuidi lufiatu ti Yave kavunzikisanga ko zikhadulu ziandi ayi ti nandi widi Nzambi yi lufiatu. (Minku. 31:5) Diawu tulenda fiatila mu diambu diandi. Boti ngie wuntatamana kukivana foto mu zinzimbala wuvanga kumbusa, ba lufiatu ti Yave nkua nlemvu ayi nkua kiadi, wunkuiza lemvukila masumu maku ngie kunyongina mawu mu bukiedika.
9. Mbi kikuma ‘kulemvukila’ kinsundula? (Minkunga 32:5)
9 Yindula mambu Yave katuadisa minsoniki mi Kibibila basonika matedi nlemvu’andi. Dedi, tala mambu Ntinu Davidi kasonika matedi nlemvu wu Yave: ‘Ngiewu wala lemvukila zinzimbala ziama ayi masumu mama.’ (Tanga Minkunga 32:5.) Kikuma ki kiebleo basekudila ‘kulemvukila’ kilenda sundula kutelama, kubotula voti kunata. Bo kalemvukila Ntinu Davidi, buka ti Yave wubotula masumu ma Davidi ayi wunata mawu. Mu phila ayoyo Davidi wuyiza baka luvovomu. (Minku. 32:2-4) Bo tunyongina mu bukiedika masumu mitu, befu mvitu tulenda baka luvovomu ayi tuisinkuiza bue kukivana beni foto mu zinzimbala Yave kalemvukila.
10-11. Mbi kikuma ‘wukubama muingi kulemvukila’ ki tulonga matedi Yave? (Minkunga 86:5)
10 Tanga Minkunga 86:5. Ntinu Davidi wutuba ti Yave widi ‘wukubama muingi kulemvukila’. Buku yimueka yituba matedi Yave: ‘[Nandi] widi nkua nlemvu—ayi khadulu yi kulemvukila yidi mu khati kimutu kiandi.’ Kibila mbi tuntubila mawu? Lutangu lu Kibibila luntatamana: ‘Luzolo luaku lukuikama luidi luwombo kuidi batu boso ba kubuongiminanga.’ Dedi bo tulongukizi mu dilongi dibedi, luzolo lukuikama lu Yave, lu kumvanganga kukuikama mu bisadi biandi ba kunzolanga. Mu kibila ki luzolo alolo, nandi wunlemvukilanga mu bukiedika masumu ma batu boso banyonginanga mawu. (Yesa. 55:7.) Ngie kutona kuba divuda mu nlemvu wu Yave, bika kuzimbakana ti Yave widi nkua nlemvu ayi widi wukubama muingi kulemvukila batu boso banyonginanga mu bukiedika ayi bantomba nlemvu’andi.
11 Khindusulu yiwombo kuzaba ti Yave zebi buboti ti befu tuidi bankua masumu. (Minku. 139:1, 2) Mawu madi kithuadi na mambu mankaka Davidi kasonika malenda ku tusadisa kufiatila mu nlemvu wu Yave.
YAVE WUNTEBUKANGA MOYO PHILA TUVANGULU
12-13. Dedi buntubila Minkunga 103:14, mbi Yave kantebukilanga moyo matedi befu, ayi mbi tufueti vanga muingi tu tambula nlemvu’andi?
12 Tanga Minkunga 103:14. Ntinu Davidi wutuba ti Yave ‘wuntebukanga moyo ti tuidi fundu fundu wu ntoto.’ Mu bikuma abiobio, nandi wusudikisa kibila mbi Yave widi wukubama muingi kulemvukila zinzimbala zitu. Nandi wuntebukanga moyo ti tuidi batu ba masumu. Muingi tuvisa mawu, ndoko tufiongunina buboti mambu Ntinu Davidi kaba tomba kutuba.
13 Ntinu Davidi wutuba ti Yave zebi phila tuvangulu. Yave wuvanga Adami mu fundu fundu ntoto ayi zebi buboti ti befu batu ba masumu tuidi tsatu yi kudia, kulala ayi kuvumuka. (Ngene. 2:7) Vayi bo Adami ayi Eva basumuka, bawu ba tutambikisa disumu di tuvanganga kuba phuila yi kuvanga mambu mambi. Yave zebi mambu amomo ayi mvandi wuntebukanga mawu moyo. Kikuma ki kiebeleo basadila muingi kusekudila kutebuka moyo, kilenda sundula mvandi kuvanga diambu. Diawu tulenda tuba ti Yave wumvisanga ti thangu zinkaka tumvanganga mambu mambi mu kibila ki phila tuvangulu. Diawu kambanga wukubama muingi ku tulemvukila befu kunyongina mu bukiedika masumu mitu.—Minku. 78:38, 39.
14. (a) Buidi Ntinu Davidi kasudikisila kitesu ki nlemvu wu Yave? (Minkunga 103:12) (b) Mbi tulenda longuka mu phila Yave kalemvukila Ntinu Davidi? (Tala Quadro “Yave Wunlemvukilanga ayi Wunzimbakananga.”)
14 Nati mu kitesu mbi Yave ka tulemvukilanga? (Tanga Minkunga 103:12.) Ntinu Davidi wutuba ti bo Yave kanlemvukilanga mutu, Nandi wuntatulanga masumu mandi ku kinanu dedi khonzu yinkotilanga muinya yidi kinanu na khonzu yimbasikilanga muinya. Mbi mambu amomo mantomba kutuba matedi nlemvu wu Yave? Buku yi mueka yisudikisa mawu mu phila ayiyi: Nzambi na kubotula masumu ma mutu, tulenda ba lufiatu ti nandi kalasa bue tebukila ko moyo mambu beni, ayi masumu ma mutu beni mala zimbala. Diawu bo Yave ka tulemvukila, nandi katebukilanga ko moyo mambu tu bevanga ayi kasadilanga ko masumu ka tulemvukila muingi ku tufundisa.—Yehe. 18:21, 22; Mav. 3:19.
15. Mbi tufueti vanga boti tukhidi tatamana kukivana foto mu mambu tuvanga kumbusa?
15 Buidi mambu Ntinu Davidi kasonika mu buku yi Minkunga 103 malenda ku tusadisa kufiatila mu nlemvu wu Yave? Boti tukhidi tatamana kukivana foto mu masumu tunyongina kumbusa, tufueti vanga mangolo muingi kutebuka moyo ti Yave zebi phila tuvangulu. Ti tuidi bankua masumu, ayi ti nandi wunzimbakananga masumu mitu bo ka tulemvukila. Diawu befu mvitu tufueti kuyilemvukila. Yave katsikikanga ko thalu’andi mu masumu tuvanga kumbusa. (Minku. 130:3) Befu kufiatila mu nlemvu wu Yave, tunkuiza nunga kuyilemvukila ayi kutatamana kusadila Yave mu kilunzi kidiodila.
16. Fuanikisa kibila mbi didi diambu dimbi kutsikika thalu mu zinzimbala tuvanga kumbusa? (Tala mvandi fikula.)
16 Kutatamana kukivana foto mu zinzimbala tuvanga kumbusa, kuidi dedi mueka na mutu wundiatisa dikalu vayi wuntsikika to thalu’andi mu lumuenu lummonisa kumbusa dikalu. Kheti didi diambu dimboti khumbu zinkaka mu mua thangu kuvanga mawu, vayi muingi kudiatisa dikalu mu nsika vantombulu kutsikika thalu kuntuala. Bobuawu mvandi, khumbu zinkaka dimbanga diambu dimboti kuyindula mu zinzimbala tuvanga kumbusa, muingi tuvanga mangolo ma kubika kubue vanga zinzimbala beni. Vayi befu kutatamana to kutsikika thalu’itu mu ziawu, tunkuiza tatamana kukivana foto ayi mawu mankuiza tutula nkaku kusadila Yave. Diawu tufueti tsikika thalu mu zikhanu zi Yave zitedi nza yimona, ko tualasa bue tebukilanga ko moyo mambu mambi tuviokila.—Yesa. 65:17; Zinga. 4:25.
Dedi bo mutu wundiatisanga dikalu kafueti tsikika thalu’andi kuntuala, befu mvitu tufueti tsikika thalu’itu mu lusakumunu tuala tambula, kubika kuandi mu zinzimbala tuvanga kumbusa (Tala lutangu 16)
TATAMANA KUFIATILA MU NLEMVU WU YAVE
17. Kibila mbi tufueti tatamana kukindisa luzolo ayi lufiatu luitu mu nlemvu wu Yave?
17 Tufueti tatamana kuvanga mangolo muingi kufiatila mu luzolo ayi mu nlemvu wu Yave. (1 Yoa. 3:19.) Kibila mbi? Kibila Satana wunkuiza vanga mangolo mawombo muingi ku tuvanga kuyindula ti Yave ka tuzolanga ko ayi ti kalasa tulemvukila ko. Boso kua bubela, makani mandi makhidi, ku tuvanga tubika kubue sadila Yave. Mu kuzaba ti thangu’andi yeka yikhufi, nandi wunkuiza buela mangolo mandi muingi ku tuvukumuna. (Nzai. 12:12) Tulendi bika ko muingi Satana kanunga.
18. Mbi wulenda vanga muingi wufiatila mu luzolo ayi nlemvu wu Yave?
18 Muingi tukindisa lufiatu luitu mu luzolo lu Yave, tufueti sadila mambu tu belonguka mu dilongi dibedi. Muingi tufiatila mu nlemvu wu Yave, tufueti yindula mu mambu Yave katuadisila minsoniki mi Kibibila basonika matedi nandi. Bika kuzimbakana ti Yave zebi phila tuvangulu, ti tuidi bankua masumu ayi ti nandi wunkuiza tulemvukila. Mvandi, tebuka moyo ti bo nandi kanlemvukila mutu, nandi wumvanganga mawu mu bukiedika. Diawu, tulenda ba loluawu lufiatu Ntinu Davidi kaba bo katuba: Matondo beni Yave, mu ‘kulemvukila masumu ayi zinzimbala ziama.’—Minku. 32:5.
NKUNGA 1 Zikhadulu zi Yave
a Mona dilongi dintuba “Achegue a Deus—Jeová Descreve a si Mesmo” mu Kibanga ki Nsungi kilumbu kitheti Ngonda Yintanu mvu, 2009.