Biuvu bi Mintangi
“Makani” mbi Yave kala tula mu mintima mi mintinu mi nza mu bilumbu binkuiza?
Matedi thonono yi ziphasi zingolo, buku yi Nzaikusu 17:16, 17 yintuba: “Kumi di ziphoka zio bemona ayi kibulu ki nganzi, bala lenda nkietu wu kindumba, bala kumbika pheni nkua, bala dia nsuni’andi ayi bala kumvika nawoso ku mbazu. Kibila Nzambi wutula mu mintima mi mintinu mi nza, phuila yi kudukisa makani mandi, ngete, phuila yi kudukisa makani mamueka badi, ma kuvana kuidi kibulu ki nganzi kintinu kiawu.” Bilongulu bitu biaba tubanga ti “makani” Yave kala tula mu mintima mi mintinu mi nza, madi makani ma kutulula binganga bioso bi luvunu.
Vayi, vantombulu kubalula phisulu’itu matedi mambu amomo. Kibila “makani” Yave kala tula mu mintima mi mintinu mi nza madi, muingi mintinu mioso mi nza bavana kintinu kiawu kuidi “kibulu ki nganzi.” Muingi tuvisa buidi mawu mala sundukila, tuenfiongunina mua biuvu binlanda.
Banani bantubila mu mbikudulu ayoyo? “Nkietu wu kindumba” mu lutangu alolo, mvandi ba kuntedilanga “Babiloni Yinneni” yinsundula binganga bioso bi luvunu. “Kibulu ki nganzi ki ndimba yibenga” yinsundula Dingumba di Mintinu ditona mu mvu 1919 baba tedilanga Liga das Nações, vayi bubu bayitedilanga Organização das Nações Unidas. (Nzai. 17:3-5) “Kumi di ziphoka” zinsundula mintinu mioso mimbuelanga mioko kibulu ki nganzi.
Kithuadi mbi kidi nkietu wu kindumba ayi kibulu ki nganzi ki ndimba yibenga? Mbikudulu yintuba ti nkietu wu kindumba “wukala” va mbata kibulu ki nganzi, wu kumbuelanga mioku ayi wuntomba kumvukumuna ayi kuntuadisa.
Mbi biala monikina nkietu wu kindumba? Kibulu ki nganzi ayi kumi di ziphoka bala “lenda nkietu wu kindumba.” Muingi kumonisa nganzi’awu, bala bonga kimvuama kiandi kioso ayi bala zabikisa mavanga mandi mambi. Bosi kibulu ki nganzi wala dukisa lukanu lu Nzambi mu kutulula nkietu wu kindumba. (Nzai. 17:1; 18:8) Mawu mansundula mbungulu yi binganga bioso bi luvunu. Vayi ava mawu mamonika, Yave wala vanga muingi mintinu mioso mi nza kuvanga mambu ma kukuitukila mamonikini’abu ko, tona mintinu mi nza mitona kuyala.
Mbi Yave kala vanga muingi mintinu mi nza bavanga? Yave wala tula mu mintima mi kumi di ziphoka mayindu ma kuvana kimfumu kiawu kuidi kibulu ki nganzi ki ndimba yibenga, kinfuanikisa Organização das Nações Unidas. (Nzai. 17:13) Yindula mbi mawu mansundula. Bukiedika ti mintinu mi nza, baveka bala baka mayindu amomo ma kuvana kimfumu kiawu kuidi kibulu ki nganzi? Ndamba. Mbikudulu yimmonisa ti naveka Nzambi wala bavanga kuba mayindu amomo. (Zinga. 21:1; dedikisa na Yesaya 44:28.) Bukiedika ti mintinu mi nza bala vana kimfumu kiawu malembe malembe? Ndamba. Mawu mala monika mu kinzimbukila mu khumbu mueka to. Bosi kibulu ki nganzi wala dukisa lukanu lu Yave lu kutulula binganga bioso bi luvunu.
Buabu, mbi tuidi mu kuvingila? Vasintombulu ko kumona voti kukuwa mu zitsangu ti malembe malembe, mintinu mi nza badi mu kuvana kimfumu kiawu kuidi Nações Unidas. Kibila mu kinzimbukila, Yave wala tula mu mintima miawu mayindu ma kuvana mu thinu kimfumu kiawu kuidi kibulu ki nganzi. Bo mawu mala monika, tuala zaba ti ziphasi zingolo zientona. Diawu, ava mawu mamonika, tufueti ba “bakotuka mu kusadila diela ditu” kibila mambu mambelama kubaluka mu thinu.—1 Te. 5:6.