Nani Widi mu Kubalula Mayindu Maku?

1, 2. (a) Mvutu mbi Yesu kavana Petelo bo kankamba kakimona kyadi? (Tala fikula yidi va thononu.) (b) Kibila mbi Yesu kantambudila mu phila ayoyi?

MINLONGUKI mi Yesu miba beni kyunda! Bawu bamwena ti Yesu wunkwiza vutula Kintinu ki Isaeli, vayi Yesu wutuba ti yaba fikama thangu mwingi kamonikina ziphasi ayi kafwa. Mvwala Petelo wutuba: ‘Mfumu, wuyimona kyadi. Mambu amomo masi kukwizila ko.’ Yesu wunkamba: ‘Botuka va yidi, Satana! Ngye wuntomba kumbwisa, bila mayindu maku masi ko ma Nzambi vayi ma kinsuni.’—Matai 16:21-23; Mavanga 1:6.

² Bo katuba mambu amomo, Yesu wumonisa ti mayindu ma Yave diswasana madi na mayindu ma nza ayiyi Satana kankengidila. (1 Yoane 5:19) Petelo wukindisa Yesu kaba bwimi, khadulu batu bawombo mu nza badi. Vayi Yesu wuzaba ti Yave wuba tomba nandi kaba wukubama mu ziphasi kankwiza vyokila ayi lufwa lwandi. Mvutu Yesu kavana Petelo, wumonisa ti nandi wukikinina mayindu ma Yave ayi wumanga mayindu ma nza.

3. Kibila mbi didi dyambu diphasi kukikinina mayindu ma Yave ayi kumanga mayindu ma nza?

³ Abo befu? Tunyindudilanga buka Yave voti buka batu ba nza? Bo twidi Baklisto, tumvanganga mangolo mwingi kuvanga mambu mankwangidika Nzambi. Mbi tulenda tubila mu matedi phila tunyindudilanga? Twidi mu kuvanga mangolo mwingi kuyindudila dedi Yave, voti kutadila mambu mu phila nandi kantadilanga? Mangolo mantombolu mwingi kuvanga mawu. Vayi kwisi ko phasi kuba mayindu ma batu ba nza. Mawu mammonikinanga bila pheve yi nza yidi koso kuma twidi. (Efeso 2:2) Mvandi, batu ba nza banluta sikikanga mayindu mu bawu veka, ayi befu mvitu tulenda tona kuyindula buka bawu. Bukyedika, didi dyambu diphasi kuyindudila dedi Yave, vayi disi ko dyambu diphasi kuyindudila dedi batu ba nza.

4. (a) Mbi byala tumonikina befu bika nza yibalula mayindu mitu? (b) Mbi tunkwiza longuka mu dilongi adidi?

⁴ Befu bika nza yibalula mayindu mitu, twala ba bwimi ayi twala tomba kubaka makani mitu veka mu matedi mambu mamboti ayi mambi. (Malako 7:21, 22) Diawu, nkinza beni kulonguka kuyindula ‘mayindu ma Nzambi,’ bika ti ‘ma kinsuni.’ Dilongi adidi, dinkwiza tusadisa kuvanga mawu. Tunkwiza mona bibila bimmonisa kibila mbi kutadila mambu mu phila Yave kantadilanga kwisinsundula ko ti tulendi bwe vanga ko ni kyuma, vayi ndandu tulenda baka. Tunkwiza mona mvandi mbi tufweti vanga mwingi mayindu ma nza ayiyi mabika ku tubalula. Mu dilongi dinkwiza, twala longuka bwidi tulenda nungina kuba mayindu ma Yave mu mambu mankaka ayi kuvanga mawu maba buka mayindu mitu.

MAYINDU MA YAVE MA TUTWADISANGA NDANDU

5. Kibila mbi batu bankaka bakhambu kikininanga ni mutu kabalula phila banyindudilanga?

⁵ Batu bankaka bakikininanga ko ni mutu kabalula phila banyindudilanga. Bawu bantubanga, “Minu yinyindulanga mu miveka.” Ḿba bawu bantomba kutuba ti, batidi kubaka makani mawu veka ayi badi nswa wu kuvanga mawu. Basintomba ko ni mutu kaba kamba mbi bafweti vanga, voti kuba kwika kuba buka batu bankaka.a (Tala matangu madi va wanda.)

6. (a) Kiphwanza mbi Yave katuvana? (b) Bukyedika ti kiphwanza beni kisi ko ndilu?

⁶ Buboti beni kuzaba ti befu kikinina mayindu ma Yave, mvandi tulenda tatamana kutadila mambu mu phil’itu. Nkanda 2 Kolinto 3:17 wuntuba: ‘Koso kwidi pheve yi Yave, kwidi mvandi kiphwanza.’ Yave wutuvana kiphwanza mwingi tuba ntindu batu tutidi kuba. Tulenda tatamana kuzola byuma tuntomba ayi kusola byuma tutidi. Yawu phila Yave ka tuvangila. Vayi mawu masinsundula ko ti kiphwanza kitu kisi ko ndilu. (Tanga 1 Petelo 2:16.) Bo tuntomba kuzaba ti dyambu didi dimboti voti dimbi, Yave tidi tusadila Dyambu dyandi mwingi di tutwadisa. Kuvanga mawu kumbotula kiphwanza kitu voti kutuvana ndandu?

7, 8. Kuyindudila mambu mu phila Yave kanyindudilanga ku tubotula kiphwanza? Vana kifwani.

⁷ Tulenda fwanikisa mawu mu phila ayiyi. Matata bamvanganga mangolo mwingi kulongisa bana bawu zikhadulu zimboti. Bawu balenda kuba longa kutubanga kyedika, kusalanga beni ayi kuvwa bankaka nkinza. Mawu masimbotula ko kiphwanza ki mwana. Vayi, matata beni badi mu kukubika bana bawu babaka ndandu mu luzingu. Bana ba kukonzuka ayi kubotuka ku nzo matata, bawu bela baka kiphwanza ki kubaka makani mawu veka. Ba kunatina luzingu mu phila matata baba longila, bawu bela ba bakubama mwingi kubaka makani mamboti, kutina ziphasi ayi mambu malenda batwadisa kyunda.

⁸ Dedi tata widi luzolo, Yave tidi bana bandi babaka luzingu lulutidi. (Yesaya 48:17, 18) Diawu katulongilanga minswa mi Kibibila mitedi zikhadulu zimboti ayi bwidi tulenda kyebila bankaka. Nandi wuku tutumisa mwingi tulonguka kutadila mambu mu phila kantadilanga ayi tuzingila mu minswa myandi. Kuvanga mawu kwisimbotula ko kiphwanza kitu. Vayi, ku tusadisa tuluta ba ndwenga ayi ku tusadisa kubaka makani malutidi mboti. (Minkunga 92:5; Zingana 2:1-5; Yesaya 55:9) Tulenda tatamana kusola mambu tuntomba, vayi twala baka makani mamboti mala tutwadisa mayangi. (Minkunga 1:2, 3) Befu ba mayindu ma Yave, twala baka ndandu mu phila ziwombo!

MAYINDU MA YAVE MALUTIDI ZANGAMA

9, 10. Bivisa mbi bimmonisa ti mayindu ma Yave malutidi zangama na mayindu ma nza?

⁹ Kibila kinkaka tuntombila mayindu mitu maba buka ma Yave, kidi mu kuzaba ti mayindu mandi malutidi zangama mu batu boso va nza. Nza yimvananga malongi matedi kubundana nyitu, bwidi bu kubakila mayangi va dikanda, bu kuluta bakila mayangi mu kisalu ayi mambu mankaka ma luzingu. Vayi mawombo mu malongi beni, masi ko kithwadi na mayindu ma Yave. Dedi, nza yinkindisanga batu kulandakana to mamboti mawu veka ayi batadila kitsuza buka dyambu dimboti. Mvandi bantubanga ti batu bakwela balenda luta ba mayangi ba kuvasana voti kuvambana kheti mu mambu malwelu. Malongi amomo, mambayisa mambu Kibibila kinlonga. Vayi, bukyedika ti malongi ma nza ayiyi malutidi na malongi madi mu Kibibila?

¹⁰ Yesu wutuba: “Nduenga yimmonikanga [buboti] mu mavanga mandi.” (Matai 11:19) Kheti nza yima nunga kuvanga mambu mawombo matedi tecnologia, bawu banunganga ko kumanisa ziphasi zinneni zimbotulanga mayangi dedi, mimvita, kithatu ayi buphunya. Mvandi, nza yintadilanga kitsuza buka dyambu dimboti. Vayi batu bawombo bankikininanga ti kiawu kintululanga makanda, kintwadisanga bimbevu ayi mambu mankaka. Vayi mbi tulenda tubila matedi malongi ma Yave? Baklisto bakikinina malongi ma Yave, badi mayangi va dikanda, buvinya buboti ayi badi kikundi ki ndembama na zikhomba ziawu zyoso zi kiphevi. (Yesaya 2:4; Mavanga 10:34, 35; 1 Kolinto 6:9-11) Mambu amomo, mamvana kivisa ti mayindu ma Yave, malutidi zangama na mayindu ma nza.

11. Nani wubalula mayindu ma Mose, ayi bwidi masundukila?

¹¹ Bisadi bi Yave mu thangu yikhulu bazaba ti mayindu ma Yave malutidi zangama. Tala kifwani ki Mose. Kheti nandi wulonguka ‘mu ndwenga yoso yi basi Ngipiti,’ nandi wuzaba ti ndwenga yikyedika yinkwizilanga kwidi Yave. (Mavanga 7:22; Minkunga 90:12) Diawu kadindila Yave: ‘Nzabikisa zinzila zyaku.’ (Esodu 33:13) Bo Mose kabika Yave kabalula mayindu mandi, Yave wunsadila mu phila yilutidi mwingi kudukisa lukanu Lwandi, ayi wuvana Mose nzitusu bo kantedila dibakala di kiminu kingolo.—Ebeleo 11:24-27.

12. Mbi Polo kasadila mwingi kubaka makani mandi?

¹² Mvwala Polo wuba dyela, wuba lukinzu ayi wuba kolukanga mbembu wadi. (Mavanga 5:34; 21:37, 39; 22:2, 3) Nandi wumanga ndwenga yi nza ayi wusadila Dyambu di Nzambi mwingi kubaka makani. (Tanga Mavanga 17:2; 1 Kolinto 2:6, 7, 13.) Mu kibila beni, nandi wubaka ndandu yiwombo mu kisalu ki kusamuna ayi wuba vingila mu mayangi lusakumunu lwandi lunkadidila mvu ka mvu.—2 Timoteo 4:8.

13. Nani widi kiyeku ki kubalula mayindu mitu mwingi tutadila mambu dedi bo Yave kantadilanga?

¹³ Bukyedika, mayindu ma Nzambi malutidi zangama na mayindu ma nza. Befu landakana zithumu zi Yave, twala baka mayangi makyedika ayi ndandu yiwombo. Vayi Yave kalendi tukwika ko tuyindudila buka nandi. ‘Nnanga wukwikama’ ayi bakulutu ba kimvuka, bakengidilanga ko mayindu mitu. (Matai 24:45; 2 Kolinto 1:24) Kadika mutu mu befu widi kiyeku ki kubalula mayindu mandi, mwingi kutadila mambu mu phila Yave kantadilanga. Bwidi tulenda vangila mawu?

KAWUBIKA NZA AYIYI YIBALULA MAYINDU MAKU

14, 15. (a) Mbi tufweti vanga mwingi tunyindudila dedi Yave? (b) Kibila mbi tulendi bika ko mayindu ma nza makota mu kilunzi kitu? Vana kifwani.

¹⁴ Buku yi Loma 12:2 yintuba: ‘Lubika balula mayindu minu mu mambu ma nza ayiyi, vayi bika lukituka bamona mu kubalula mayindu minu, mwingi luvisa benu veka mambu mamboti, mafwana ayi luzolo lusonga lu Nzambi.’ Kheti byuma binkaka bibalula mayindu mitu ava tulonguka kyedika, Kibibila kinlonga ti tulenda nunga kubalula mayindu beni mwingi tutadila mambu dedi bo Yave kantadilanga. Diawu, kheti bifu tutambula va dikanda ayi mambu tuma monikina mu luzingu mabalula beni phila tunyindudilanga, tulenda tatamana kubalula mayindu mitu. Ayi mawu mala baluka mu mambu tunsola kuyindula. Befu yindula mayindu ma Yave, twala mona befu veka ti mawu madi masulama mu mambu moso. Buawu twala tombila kutadila byuma mu phila nandi kantadilanga.

¹⁵ Vayi mo tubalula mayindu mitu mwingi tuyindudila dedi bo Yave kanyindudilanga, tufweti bika ‘balula mayindu mitu mu mambu ma nza ayiyi.’ Mansundula ti tufweti bika kutala, kutanga ayi kukuwa kyoso kyuma kikhambulu kithwadi na phila yi kuyindudila yi Nzambi. Mwingi ku tusadisa kuvisa nkinza widi kuvanga mawu, ndoko tumona kifwani ki bidya. Mutu wuntomba kuba buvinya bumboti, kalenda baka makani ma kudya bidya bilutidi mboti. Vayi mangolo kamvanga malenda ba maphamba na kudyanga bidya bibola! Bobuawu mvandi, mangolo tumvanga mwingi tulonguka mayindu ma Yave malenda ba maphamba befu bika mayindu ma nza makota mu kilunzi kitu.

16. Mu mambu mbi tufweti kukikebila befu veka?

¹⁶ Tulenda nunga mu phila zyoso kutina mayindu ma nza? Ndamba, twala tatamana kudengananga mawu, bila kwisi ko kuma twala kwenda kukhambulu mayindu ma nza. (1 Kolinto 5:9, 10) Kheti bo twidi mu kusamuna, twala kuwa batu kutuba mayindu ayi mambu ma luvunu bankikininanga. Vayi, kheti tulendi nunga ko kubika mayindu ma nza, befu tulendi tatamana ko kuyindula voti kukikinina mawu. Dedi Yesu, tufweti ba bakubama mwingi kumanga mu thinu mayindu Satana kantomba tuba. Ayi tulenda kukikeba befu veka mwingi tubika monanga mambu mammonisa phila yi kuyindudila yi nza.—Tanga Zingana 4:23.

17. Bwidi tulenda kukikebila mwingi tubika kwe monanga mambu mammonisa phila yi kuyindudila yi nza?

¹⁷ Dedi, tufweti sola buboti bakundi bitu. Kibibila ki tulubula ti befu ba kikundi na batu bakhambu sadilanga Yave, twala tona kuyindudila buka bawu. (Zingana 13:20; 1 Kolinto 15:12, 32, 33) Mvandi tufweti sola mu ndwenga bisavu bitu. Befu bika talanga mambu manlonga ti byuma byoso biyizila mu kinzimbukila, buphunya voti butsuza, twala kyeba mayindu mitu mu mambu moso malenda “kakidila nzayilu yi Nzambi.”—2 Kolinto 10:5.

18, 19. (a) Kibila mbi tufweti bela keba keba mu mayindu ma nza bankwedikanga kusweka? (b) Byuvu mbi tulenda kuyikuvusa ayi kibila mbi?

¹⁸ Tufweti zaba kubakula mayindu ma nza ayi kumanga mawu, kheti bo bankwedika kusweka mawu. Dedi, zitsangu zinkaka zimvyokanga mu televisão voti rádio zinnangikanga mangumba mankaka ma política. Ayi zitsangu zinkaka zinzabikisanga mambu manneni batu ba nza bansiminanga. Zifilmi ayi zibuku zinkaka zinkindisanga batu kuba mayindu ma ‘kuyitula va theti’ ayi kutula mvandi ‘dikanda va theti,’ ayi bamvanganga mambu beni kumonika buka madi mamboti, mansadisa ayi masulama. Vayi phila ayoyi yi kuyindudila yimbayisa mantuba Kibibila. Kiawu kintuba ti befu ayi dikanda ditu twala ba mayangi makyedika befu tula luzolo lwitu kwidi Yave va theti. (Matai 22:36-39) Mvandi, binongu binkaka bitedi bana balezi batu bankikininanga ti bidi bimboti, bilenda vanga bana kukikinina mayindu ma kitsuza.

¹⁹ Masinsundula ko ti didi dyambu dimbi kuzola kyoso kwa kisavu. Vayi tufweti kuyikuvusa: ‘Yinnunganga kubakula mayindu ma nza kheti bo bankwedika kusweka mawu? Yidi mu kukyeba bana bami ayi miveka mu kumanga tala bimona mesu binkaka mu televisão ayi kutanga kyoso kyuma? Yinsadisa bana bami batadila mambu mu phila Yave kantadilanga mwingi nza ayiyi yibika balula mayindu mawu mu mambu bammona ayi bankuwa?’ Befu zaba diswasana didi mu mayindu ma Nzambi ayi ma nza, twalasa balula ko ‘mayindu mitu mu mambu ma nza ayiyi.’

NANI WIDI MU KUBALULA MAYINDU MAKU?

20. Mbi byala monisa mutu widi mu ku tubalula?

²⁰ Tufweti tebuka moyo ti zitsangu tunkuwanga, zinkwizilanga mu khonzo wadi to. Yimweka yidi Yave, ayi yinkaka yidi Satana ayi nza kankengidila. Nani widi mu kubalula mayindu maku? Mwingi wubaka mvutu wufweti zaba theti kwidi wumbakilanga zitsangu zyaku. Befu kikinina mayindu ma nza, yawu yela balula mayindu mitu ayi twala yindudila dedi batu ba nza ayi kuba bwimi. Diawu, nkinza beni kusola buboti mbi tuntala, tuntanga, tunkuwa ayi tunyindula.

21. Mbi twala tubila mu dilongi dinkwiza?

²¹ Mu dilongi adidi tuma longuka ti mwingi tuba mayindu ma Yave, tufweti bika mayindu ma nza. Mvandi tufweti yindula mayindu ma Nzambi mwingi tuluta yindula buka nandi. Mu dilongi dinkwiza, twala longuka bwidi bu kuvangila mawu.