Minkunga mi Tufikikanga Kuidi Nzambi

Minkunga midi minkhailu mi Yave. Miawu mi tuvanganga kuyindula, minyikunanga mabanza mitu ayi mi tubikanga mu mayangi. Bukiedika, buawu tumbelanga bo tunkuwa minkunga mitu. Miawu minyikunanga ko to mabanza mitu, vayi mvandi mi tufikikanga kuidi Yave.

Tona mu mvu 2014, tuma basisa kuvioka 70 di minkunga ayi miawu midi mu kuvioka 500 di zimbembu! Vayi ḿba ngie wulenda kuyikuvusa, ‘Buidi bamvangilanga minkunga beni?’

Buidi Zikhomba Bankubikilanga Minkunga

OMinkunga beni mimvanguluanga kuidi dinkumba di Audio/Video, dinkenguduluanga kuidi Dingumba Dintadilanga Matedi Kulonga, didi mu thuadusulu yi Dingumba Dintuadisi. Dingumba di minkunga didi kuvioka 13 di zikhomba zi babakala ayi zi bakieto. Bawu bansadisanga kusonika, kukubika ayi kusueka. Mvandi Dingumba Dintadilanga Matedi Kulonga, bantumisanga zikhomba zinkaka badi bapisuka muingi kusadisa kufiongunina, kukuimbila ayi kukubika miawu. Zikhomba aziozio bakikululanga ayi bansadilanga mambu bazebi kuvanga bakana ko muingi kuyituadisa nzitusu.

Buidi bamvangilanga minkunga mitu? Ditheti, Dingumba Dintadilanga Matedi Kulonga, bamfionguninanga muingi kuzaba lutangu lu Kibibila lunkuiza sadisa kukubika nkunga ayi mabanza mantombulu mu nkunga beni. Bosi dingumba di minkunga bankubamanga muingi kusonika, kukubika ayi bammekanga kukuimbila nkunga beni. Dingumba Dintadilanga Matedi Kulonga babue fionguninanga wawu ayi bamvananga mayindu mu mambu bafueti balula. Bosi dingumba di minkunga babue ludikanga nkunga beni ayi bansuekanga wawu. Minkunga beni bansuekilanga miawu mu bibuangu biviakana,dedi ku Beteli voti mu zinzo zi zikhomba.

Muingi minkunga beni miba mimboti, zikhomba bansadilanga biuma biwombo dedi, kisadulu kinsadisanga kukubika ayi kusueka minkunga, kinkaka kinsadisanga kuzaba buidi bafueti kuimbidila, zimicrofoni, zikuluna ayi bisadulu binkaka binsadisanga kunyevisa minkunga beni. Ayi microfoni yimueka yilenda ba thalu yi 100 dolar voti 1.000 dolar. Mu mvu 2020, tubasisa 116.000 dolar muingi kusumba bisadulu bi minkunga.

Buidi tunsadilanga zimbongo? Tusiala bue sadila ko mangumba manneni mu zi Beteli, muingi kukubika ayi kusueka minkunga. Vayi tunluta sadilanga zikhomba bakivananga muingi kukubika, kufiongunina ayi kusueka minkunga beni kheti ku kinanu.

“Minkunga Minkindisanga Kiminu”

Zikhomba zi babakala ayi zi bakieto banzolanga kukuwa minkunga amiomio. Tara, wunkalanga ku Alemanha wutuba: “Kukuwa minkunga amiomio mu mbembu’ama, mi kutsadisanga kuba wuvumbama bo yinkuazuka ayi mi kutsadisanga kuluta fikama Yave.” Yaya Dmitry wunkalanga ku Kazaquistão wutuba: “Minu yinkuwanga minkunga amiomio mu khambu kuazuka boti miawu midi nguizani na minsua mi Kibibila. Ayi mvandi mi kutsadisanga kuluta sikika mayindu mama mu mambu ma kiphevi.”

Delia, wunkalanga ku África do Sul, wutuba buidi kambelanga bo kankuwa minkunga beni: “Miawu, minkindisanga kiminu kiama. Bo yidi mu kiunda voti yimviokila mu mambu maphasi, yimbakanga khindusulu mu kukuwa minkunga amiomio!”

Vadi minkunga tunluta zolanga. Lerato, wunkalanga ku África do Sul, wutuba: “Minkunga midi ntu diambu ‘Yindula ku Paladizu’ ayi ‘Nza Yimona Yinkuiza’ mi kuphanganga kuyindula mu thangu yala dengana mam’ami bo kala vulubuka. Mvandi yindulanga bo yala kunyamba mu luvulubukusu.”

Vadi nkunga wumueka wusadisa khomba mueka yinkieto wunkalanga ku Sri Lanka. Nandi wutuba: “Nlongisi’ama, wutsemba mu lukasu vantuala baboso bankotanga yama kikola kibila yidi Mbangi yi Yave. Yiba beni boma ayi yisa zaba ko ma kutuba. Bo yivutuka ku nzo, mam’ami wukhindisa muingi yiyuwa nkunga widi ntu diambu ‘O estudo me faz bem.’ Nkunga beni wutsadisa kumona nkinza wu kufiongunina ayi kuba wukubama muingi kuvana mimvutu. Mu kilumbu kilanda, minu yiyoluka na nlongisi’ama, nandi wundiuwa mu mvibudulu ayi wutonda mu kuvisa mambu Zimbangi zi Yave bankikininanga. Yintonda beni kimvuka ki Yave mu kutuvana minkunga mi tukindisanga.”

Kuidi tumbakilanga zimbongo tumvangilanga minkunga mitu? Tunnunginanga mu kibila ki minkhailu bamvananga mu nza yimvimba ayi khumbu zinkaka, bankaka bamvananga miawu mu kusadila donate.jw.org. Matondo beni mu minkhailu miaku wumvananga ayi mu kuba koko kuyalubuka.