Zitsangu Zinkindisanga Kiminu

Zimbangi zi Yave bamvuanga nkinza zikhomba ziawu. (1 Pete. 2:17) Bawombo mu befu tuidi momawu mabanza Tannis wunkalanga ku Quênia kadi, nandi wutuba: “Minu yinzolanga beni kuzaba mambu zikhomba ziama mu nza yimvimba badi mu kuviokila.” Buidi Tannis ayi zikhomba zinkaka bannunginanga kuzaba mambu zikhomba mu nza badi mu kuviokila? Tona mu mvu 2013, mu jw.org, muidi zitsangu zintubila matedi zikhomba mu nza.

Mu kikhuku akiokio, muidi zitsangu zintubila matedi Zimbangi zi Yave ayi mambu mankaka dedi, zitsekudulu zi Kibibila, bivuka mu nza yimvimba, bisalu bi kutunga ayi mambu mankaka mankinza. Mvandi kintubila matedi zikhomba bantulanga mu buloko mu kibila ki kiminu kiawu. Dingumba di Minsoniki di tusadisanga kuzaba binongo bi tukindisanga matedi kisalu ki kusamuna mu mangumba ayi Mbambukulu Moyo. Banani bamfionguninanga zitsangu aziozio ayi buidi bankubikilanga ziawu?

Kufiongunina ayi Kuzabikisa Zitsangu

Dingumba di Minsoniki didi mu thuadusulu yi Dingumba Dinzabikisanga Zitsangu Kuidi Baboso. Diawu didi ku kikulutu kitu ayi dintuadusuluangu kuidi Dingumba Dintuadisi. Ayi mu Dingumba beni muidi kuvioka 100 di zikhomba zi babakala ayi zi bakieto—ayi bawombu mu bawu bakivananga ayi bansadilanga ku kinanu—bankaka badi minsoniki, mimfiongunini, mimfikudi ayi minsekudi. Ayi zikhomba zinkaka badi kiyeku ki kukoluka na zimfumu zi luyalu ayi batu bantiamunanga zitsangu. Ayi mu Dingumba Dintiamunanga Zitsangu Kuidi Baboso, muidi kuvioka 80 di mua mangumba mu zi Beteli ba kuba buelanga mioko mu nza yimvimba.

Muingi kukubika zitsangu beni, Dingumba Dintiamunanga Zitsangu Kuidi Baboso, dinsalanga mu kithuadi na mua mangumba amomo madi mu zi Beteli mu nza yimvimba. Bo zikhomba bammana kufiongunina binongo batu balenda vua nkinza, bosi Dingumba Dintiamunanga Zitsangu dinkubikanga mambu mankinza matedi binongo beni. Mawu mansundula kufiongunina ayi kukoluka na batu bazebi buboti binongo beni. Ba kumana kubaka bivisa bioso, bosi bansonikanga, babue fionguninanga, bantulanga zifoto voti zifikula bosi bamfilanga biawu kuidi Dingumba di Mintuadisi.

Mambu Zikhomba Bantubanga

Buidi zikhomba bambelanga mu kuzaba zitsangu beni? Cheryl, khomba yinkieto wunkalanga ku Filipinas wutuba, “Yinzolanga beni kutanga va meni zitsangu zintubila matedi kimvuka ki Yave ayi dikabu diandi.”

Batu bawombo bantubanga matedi disuasana didi mu zitsangu zidi mu jw.org ayi zitsangu zinkaka bantiamunanga mu nza. Yaya Tatiana, wunkalanga ku Cazaquistão, wutuba: “Yintonda beni, kibila zitsangu zidi mu jw.org zidi zi lufiatu ayi zintubanga mambu mankinza.” Khomba mueka bantedilanga Alma wunkalanga ku México wutuba: “Mu kutala mambu ma divunza batu bantiamunanga, yimbakanga beni khindusulu mu kumona mambu madi mu jw.org.”

Zitsangu zidi mu jw.org zisi ko to zi lufiatu vayi mvandi zinkindisanga kiminu kitu. Bernard, wunkalanga ku Quênia, wutuba: “Zitsangu aziozio zi kutsadisanga kumona zikhomba banga basi dikanda diama. Ayi mawu ma kutsadisanga kutanguna mazina mawu ayi mambu badi mu kuviokila mu minsambu miama.” Yaya Bybron, wunkalanga mvandi ku Quênia, wutuba: “Yimbanga mu mayangi ayi yimbakanga khindusulu bo yimmona khundudulu yi Bibibila mu zimbembo ziviakana! Ayi ma kutsadisanga kumona ti Yave kasi ko luvasanu.”

Binongo bintubila zikhomba badi mu kuviokila mu zikuamukusu voti zithototo mvandi binkindisanga kiminu kitu. Jackline, wunkalanga ku Quênia wutuba “Bo yinyindula matedi kibakala kiawu, kiminu kiama kinkindamanga. Ayi bo yimmonanga mambu ma kuba sadisanga kukindama, yinlongukanga ti—kusambila, kutanganga Kibibila ayi minkunga mitu midi beni nkinza muingi kukindisa zikhomba aziozio.”

Yaya Beatriz wunkalanga ku Costa Rica, wunzolanga kutanga zitsangu matedi bivuka. Nandi wutuba: “Zitsangu aziozio zi kutsadisanga kumona buidi kimvuka ki Yave mu nsualu kimvaninanga lusalusu kuidi zikhomba. Ayi bamvangilanga mawu mu phila yimboti ayi mu luzolo. Mawu ma kutsadisanga kumona ti akiki kiawu kimvuka ki Yave.”

Tumvutulanga beni matondo mu kubaka zitsangu matedi zikhomba zitu mu nza yimvimba! Ayi tunnunginanga kuvanga mawu mu kibila ki minkhailu minu ayi bawombo bamvaninanga miawu mu kusadila donate.jw.org. Matondo beni mu kuba koko kuyalubuka ayi mu minkhailu minu.