Mu kusadila kintinu kiandi, Yave wala manisa mambu moso mantuadisanga ziphasi. Zitsangu beni zidi zimboti diawu batu boso bafueti zabila ziawu. Kibila Yesu wuntomba muingi minlandikini miandi basamuna zitsangu zi Kintinu kuidi batu boso. (Matai 28:19, 20) Buidi Zimbangi zi Yave bantumukinanga nsiku wu Yesu?

1. Buidi mambu madi mu Matai 24:14 madi mu kusalimina bubu?

Yesu wutuba: “Zitsangu azizi zimboti zi Kintinu ziela samunu mu nza yimvimba.” (Matai 24:14) Zimbangi zi Yave bambakanga mayangi bo bamvanganga kisalu akiokio ki nkinza. Befu tunsamunanga zitsangu zimboti mu nza yimvimba kuvioka 1.000 di zimbembu. Kuvanga kisalu akiokio kinnene vantombuluanga mangolo mawombo. Diawu kisalu beni, kilendi vangama ko mu khambu lusalusu lu Yave.

2. Mangolo mbi befu tumvanganga muingi kusamuna?

Befu tunsamunanga mu bibuangu bioso tundengana batu. Dedi Baklisto batheti, befu mvitu tunsamunanga “nzo ka nzo.” (Mavanga 5:42) Kusamunina mu phila ayoyo ku tusadisanga kukoluka na bivevi di batu mu kadika mvu. Kheti, batu tukhambu dengananga mu zinzo ziawu tuba samuninanga bo tumvana kimbangi ki baboso. Tumbotulanga thangu muingi kusamuna woso kuandi mutu wuntomba kuzaba matedi Yave ayi zikhanu ziandi.

3. Kidi kiyeku kinani kusamuna zitsangu zimboti?

Baklisto bakiedika, bawu badi kiyeku ki kusamuna zitsangu zimboti kuidi baboso. Kisalu akiokio kisi ko ki kusakana. Diawu tumvangilanga mangolo muingi kusamuna nati mu kitesu tulenda nunga. Kibila tuzebi ti luzingu lu batu luidi va kingela. (Tanga 1 Timoteo 4:16.) Befu tutambulanga ko zimbongo mu kisalu tumvanganga, kibila Kibibila kintuba: “Luvana mu phamba kibila benu mvinu mu phamba lutambula.” (Matai 10:7, 8) Kheti batu bankaka basintomba ko kutu kuwa, vayi befu tuntatamananga kusamuna, kibila kusamuna yidi mvandi phila tumbuonguminanga Yave ayi mawu ma kunkuangidikanga.

BUELA LONGUKA

4. Befu tumvanganga mangolo muingi kusamuna kuidi batu boso

VIDEO: Kusamuna Zitsangu Zimboti “nati Kusukila Nza” (7:33)

• Mambu mbi ma kuvanganga kukuituka mu kumona mangolo Zimbangi zi Yave bamvanganga muingi kusamuna?

Tanga Matai 22:39 ayi Loma 10:13-15, bosi tubilanu biuvu binlanda:

• Buidi kisalu ki kusamuna kimmonisinanga luzolo tuidi mu bankaka?

• Buidi Yave kantadilanga batu boso bamvanganga mangolo muingi kusamuna zitsangu zimboti?—Tala lutangu 15.

5. Befu tuidi bisadi binsalanga va kimueka na Nzambi

Tuidi bivisa biwombo bimmonisa ti Yave widi mu kutuadisa kisalu kitu. Tala kifuani kimonika ku Nova Zelandia, khomba mueka bantedilanga Polo, wutuba ti bo kaba samuna mu nzo ka nzo va masika wudengana nkieto mueka, wusambila mu kusadila dizina di Yave. Nkieto beni wudinda kuidi Nzambi kansadisa muingi kabaka luaku lu kulonguka kiedika. “Bo vavioka to bilokulu bitatu” Yaya Polo wudodumuna muelu’andi muingi kunlonga kiedika.

Tanga 1 Kolinto 3:9, bosi tubilanu kiuvu kinlanda:

• Buidi kifuani kimonika ku Nova Zelandia kimonisina ti Yave Nandi wuntuadisanga kisalu ki kusamuna?

Tanga Mavanga 1:8, bosi tubilanu kiuvu kinlanda:

• Kibila mbi vantombulu lusalusu lu Yave muingi tutatamana kuvanga kisalu ki kusamuna?

Ngie Zebi?

Mu lukutukunu lumvangamanga va khati tsika sabala befu tuntambulanga khubumunu yi tusadisanga kubuela pisuka mu kusamuna. Boti wumana landakana lukutukunu beni, buidi wummuena khubumunu tuntambulanga?

6. Befu tuntumamananga zithuadusulu Yave ka tuvana muingi kusamuna

Mu thangu yikhulu, zimbeni batomba kuvanga minlandikini mi Yesu babika kusamuna. Baklisto batheti bakakidila luaku baba lu kusamuna ayi bavanga mangolo muingi kisalu ki kusamuna kiba “nsua va mesu ma batu boso.” (Filipi 1:7) Mawu mvandi Zimbangi zi Yave bamvanganga bubu.a

VIDEO: Bakakidila Muingi Kubaka Nsua wu Kusamuna Zitsangu Zimboti (2:28)

Tanga Mavanga 5:27-42, bosi tubilanu kiuvu kinlanda:

• Kibila mbi befu tualasa lembulu ko kusamuna?—Tala matangu 29, 38, ayi 39.

MBI NGIE BELONGUKA

Yesu nandi wuvana thuadusulu muingi minlandikini miandi basamunanga zitsangu zi kintinu mu mimvila mioso. Ayi Yave widi mu kusadisa dikabu diandi kuvanga kisalu beni.

Vutukila Mambu Mamfunu

• Buidi kisalu ki kusamuna kimvangiminanga mu nza yimvimba?

• Buidi kisalu ki kusamuna kimmonisinanga luzolo tuidi mu bankaka?

• Mu mbuenu’aku kisalu ki kusamuna kintuadisanga mayangi?

TALA MAMBU MANKAKA

Tala buidi Zimbangi zi Yave bansamuninanga batu mu mavula manneni.

Kisalu Kinkinza ki Kuvana Kimbangi ki Baboso Kivangimina ku Paris (5:11)

Mbi Zimbangi zi Yave bamvanganga muingi kununga kusamuna kuidi batu batina ku zitsi ziawu?

Tunsadisanga Batu Batina mu Zitsi Ziawu Kubaka Bidia bi Kiphevi (5:59)

Batu bavanga kisalu ki kusamuna buka misioni batuba ti, baluta baka mayangi mu luzingu.

Yidi mu Mayangi mu Kisalu Yisola (6:29)

Buela longuka matedi makani zimfumu zi luyalu babaka ma kuvana nsua muingi kusamuna mu kambu kikhafi.

“Os pregadores do Reino vão aos tribunais” (O Reino de Deus já Governa!, capítulo 13)

Yesu wulonga ti, muingi mutu kaba nlandikini’andi kafueti botama. (Tanga Matai 28:19, 20.) Vayi mbi binsundula kubotama? Ayi mbi mutu kafueti vanga muingi kudukisa makani beni?

1. Mbi binsundula kubotama?

Kikuma “kubotama” kiyizila mu Kingeleku kinsundula “kukota ngie woso” mu nlangu. Mawu mamonika bo Yesu kabotama mu muila Yolidani, nyitu’andi yoso yikota ku tsi nlangu. Tuzabidi mawu kibila bo kamana kubotama nandi “wubasika mu nlangu.” (Malaku 1:9, 10) Dedi Yesu Baklisto bakiedika bo bambotama nyitu’awu yoso yinkotanga mu nlangu.

2. Bo mutu kambotama mbi kammonisanga?

Bo mutu kambotama wummonisanga ti, be kukivana kuidi Yave. Buidi mutu ka kukivaninanga? Ava kubotama, nandi wumvanganga nsambu ayi wunkanikisanga kuidi Yave ti wunkuiza nsadila mu luzingu luandi loso. Mvandi wunkanikisanga ti kubuongimina to Yave ayi kuvanga luzolo luandi, mawu mankuiza luta ba nkinza mu luzingu luandi. Nandi wumbakanga makani ma “kukimanga naveka . . . Ayi kulandakana” malongi ma Yesu mu luzingu luandi loso. (Matai 16:24) Kukivana kuidi Yave ayi kubotama mawu mamvanganga mutu kuba kikundi kifikama na Yave ayi kuidi batu boso ba kumbuongiminanga.

3. Mbi mutu kafueti vanga ava kubotama?

Ava kubotama didi diambu dinkinza mutu kulonguka matedi Yave ayi kuba lufiatu lungolo mu nandi. (Tanga Ebeleo 11:6.) Bo wunkuiza ba nzailu ayi kiminu mu Yave, buawu luzolo luaku mu nandi lunkuiza buelimina. Kuvanga mawu mankuiza buela phuil’aku yi kusamuna matedi Yave ayi kuzigila mu phila nandi kantombila. (2 Timoteo 4:2; 1 Yoane 5:3) Bo mutu “mu khambu lukuiku naveka wuntomba kuzingila mu phila Yave kantombila” buawu kankuiza bakila makani ma kukivana ayi kubotama.—Kolosai 1:9, 10.a

BUEKA LONGUKA

4. Tulenda longuka mawombo mu phila Yesu kabotimina

Tanga Matai 3:13-17 muingi wubuela longuka matedi phila Yesu kabotimina. Bosi tubilanu biuvu binlanda:

• Bukiedika ti Yesu wuba muana tsombi bo kabotama?

• Buidi nandi kabotimina? Bukiedika ti mua nlangu to bandukudila ku ntu?

Bo kamana kubotama, Yesu wutona kisalu kinkinza Yave kamvana. Tanga Luka 3:21-23 ayi Yoane 6:38, bosi tubilanu kiuvu kinlanda:

• Bo Yesu kamana kubotama kisalu mbi kiluta ba nkinza mu luzingu luandi?

5. Kubotama madi makani ngie wulenda dukisa

Va thonono, mayindu ma kukivana kuidi Yave ayi kubotama, malenda ba buka kiyeku dinneni beni. Vayi bo wunluta buela longuka matedi Yave ayi kusadila mambu nandi kantuba ti wufueti vanga, buawu wunkuiza buedila lufiatu luaku mu kubaka makani amomo mankinza ma kubotama. Mona mbi batu bankaka bavanga muingi kubotama, tala VIDEO.

VIDEO: Kindisa Kikundi Kiaku na Yave (1:11)

Tanga Yoane 17:3 ayi Yakobi 1:5, bosi tubilanu kiuvu kinlanda:

• Mbi bilenda sadisa mutu kukubama muingi kubotama?

1. Kukivana kuidi Yave mu nzila nsambu mu kunkanikisa ti tunkuiza nsadila mu luzingu luitu loso

2. Bo tumbotama befu tummonisanga kuidi bankaka ti tube kukivana kuidi Yave

6. Bo tumbotama tumbakanga luaku lu kuba mu dikanda di Yave

Bo tumbotama tumbakanga luaku lu kuba mu khati dikanda di Yave didi kithuadi mu nza yimvimba. Kheti tuidi bikhulu biviakana, voti tunzingilanga mu zitsi ziviakana, tunkikininanga mu mambu mamueka ayi tuntumukinanga minsiku mimueka. Tanga Minkunga 25:14 ayi 1 Petelo 2:17, bosi tubilanu kiuvu kinlanda:

• Bo mutu kambotama ntindu mbi kikundi nandi kambanga na Yave ayi kuidi batu boso ba kumbuongiminanga?

MBI NGIE BELONGUKA

Yesu wulonga ti Baklisto boso bafueti botama. Vayi ava bavanga mawu, bafueti kindisa theti kiminu mu Yave, kuzingila mu phila nandi kantombila ayi kukivana muingi kunsadila.

Vutukila Mambu Mamfunu

• Mbi binsundula kubotama ayi kibila mbi didi diambu dinkinza?

• Nguizani mbi yidi kukivana kuidi Yave ayi kubotama?

• Mbi ngie wufueti vanga muingi wudukisa makani ma kukivana ayi kubotama?

TALA MAMBU MANKAKA

Longuka matedi tsundu yi kubotama ayi kukhambu botama.

“Mbi Binsundula Kubotama?” (Dilongi didi mu jw.org)

Fiongunina mbi mutu kafueti vanga muingi kubotama.

“Luzolo mu Yave Lutukindisa Muingi Kubotama” (Kibanga ki Nsungi, Ngonda Yintatu 2020)

Tala mbi bisadisa dibakala dimueka kubaka makani ma kubotama.

“Eles queriam que eu provasse a verdade por mim mesmo” (A Sentinela, 1 de Fevereiro de 2013)

Longuka kibila mbi kubotama madi makani mankinza kadika mutu kafueti baka mu khambu lukuiku, ayi buidi ngie wulenda dukisila makani ma kubotama.

“Devo me Batizar?” (Os Jovens Perguntam—Respostas Práticas, Volume 2, capítulo 37)