Mubongulu Malongi Madi mu Nzingulu ayi Kisalu Thuadusulu yi Lukutukunu
7-13 NGONDA YIKUMI
KIUKA KIDI MU DIAMBU DI NZAMBI | YAKOBI 3-5
‘Monisa Nduenga yi Nzambi’
(Yakobi 3:17) Vayi nduenga yintotukilanga kuidi Nzambi va theti yidi yivedila bosi yidi yindembama, yilembama, yidi yikubama muingi kutumamana, yidi nzaki mu lemvukila, yifulukidi mu kiadi ayi yimbutanga mimbutu mimboti, yitulanga luviakunu ko ayi yisi mayuya ko.
cl 221-222 ¶9-10
Widi mu Kumonisa “Nduenga yi Nzambi” mu Luzingu Luaku?
9 “Theti yidi yivedila.” Kuba wuvedila kusundula kuba wudiodila, bakana ko to kunganda nyitu vayi mu ntima. Kibibila kintuba ti nduenga yidi nguizani na ntima, vayi yawu yilendi kota ko mu ntima wubiva mu mayindu, zinzinunu ayi mabanza mambi. (Zingana 2:10; Matai 15:19, 20) Vayi, enati ntim’itu widi wuvedila—voti, mu phila batu ba masumu balenda nungina, —befu tuala “tina mambi ayi vanga mamboti.” (Minkunga 37:27; Zingana 3:7) Buisi ko bufuana kutubila ti kuba wuvedila yidi khadulu yitheti yinduenga yi Nzambi? Kibila, befu khambu ba badiodila mu mayindu ayi mu kipheve, buidi tuala monisina mu phila yilutidi zikhadulu zinkaka zi nduenga yi Nzambi?
10 “Ayi yindembama.” Nduenga yi Nzambi yitusadisanga tutomba ba ndembama, ayi yawu yidi mbutu wu pheve yi Nzambi. (Ngalatia 5:22) Tuvanga mamoso tunnunga muingi tubika tulula “kithuadi ki ndembama” kimbundisa dikabu di Yave. (Efeso 4:3) Mvandi tuntombanga kuvutula ndembama bo yawu yintuluka. Kibila mbi madidi nkinza? Kibibila kintuba: ‘Lutatamana . . . kuzingilanga mu ndembama, buna Nzambi yi luzolo ayi yi ndembama wala ba yinu.’ (2 Kolinto 13:11) Diawu, befu tatamana kuzingila mu ndembama, Nzambi yi ndembama wala ba yitu. Phila tunkiebila zikhomba zitu zi kipheve yilenda bivisa kikundi kitu na Yave. Buidi tulenda monisina ti tuidi bankua ndembama? Tala kifuani.
(Yakobi 3:17) Vayi nduenga yintotukilanga kuidi Nzambi va theti yidi yivedila bosi yidi yindembama, yilembama, yidi yikubama muingi kutumamana, yidi nzaki mu lemvukila, yifulukidi mu kiadi ayi yimbutanga mimbutu mimboti, yitulanga luviakunu ko ayi yisi mayuya ko.
cl 223-224 ¶12
Widi mu Kumonisa “Nduenga yi Nzambi” mu Luzingu Luaku?
12 “Yilembama.” Mbi binsundula kuba mutu wulembama? Batu badi beni luzabu lu nza, batuba ti phasi beni kusekula kikuma ki Kingeleko “yilembama” kidi mu Yakobi 3:17. Minsekudi minkaka basadila bikuma buka “mamboti,” “kiadi,” ayi “kuzaba visa bankaka.” Matangu madi vawanda mu Kibibila Tradução do Novo Mundo [nwt], mammonisa ti kikuma beni kinsundula “kukikinina mambu mabela mu phila mutu wunkaka kantombila.” Buidi tulenda monisina ti tunsadilanga khadulu ayoyo yi nduenga yi Nzambi mu luzingu luitu?
cl 224-225 ¶14-15
Widi mu Kumonisa “Nduenga yi Nzambi” mu Luzingu Luaku?
14 “Yidi yikubama muingi kutumamana.” Kikuma ki Kingeleko basekula “yidi yikubama muingi kutumamana,” kisi ko mu matangu mankaka mu Masonoko ma Kingeleko. Mutu wumueka widi luzabu lu nza, wutuba ti bansadilanga kikuma akioki “khumbu ziwombo muingi kutubila tsembulu masodi bantambulanga.” Mvandi kinsundula: “kufika kikinina diambu” ayi “kutumukina kheti mu khambu zaba kibila.” Woso mutu wuntuadusuanga mu nduenga yi Nzambi, wumfika tumamananga mambu mantuba Kibibila. Kasi ko wuzabakana buka mutu wumbakanga makani ayi wummanganga kubalula mayindu kheti bo bakummonisa ti diyindu diandi disi ko disulama. Vayi, widi wukubama muingi kubalula diyindu diandi mu thangu bakummonisa bivisa bi Kibibila bimmonisa ti diyindu diandi disi ko disulama. Ngie widi wuzabakana mu phila ayoyi?
“Yifulukidi mu Kiadi ayi Yimbuntanga Mimbutu Mimboti”
15 “Yifulukidi mu kiadi ayi yimbutanga mimbutu mimboti.” Kiadi yidi khadulu yinkinza beni mu nduenga yi Nzambi, ayi bantubila ti yawu “yifulukidi mu kiadi.” Bantubila va kimueka ‘kiadi’ ayi ‘mimbutu mimboti.’ Diambu dimboti kutubila mawu, kibila mu Kibibila, khumbu ziwombo kiadi kintubilanga matedi kuvua nkinza bankaka mu bukiedika, ayi kiadi akioki kimvanganga mutu kavangila bankaka mambu mawombo mamboti. Buku yimueka yitubila kiadi buka “mabanza ma kiunda mu kibila ki mambu mambi mutu kamviokila ayi mangolo ma kuvanga dioso diambu muingi kusadisa mutu beni.” Mansundula ti nduenga yi Nzambi yisi ko lukasu voti kukhambu ku mabanza. Vayi yawu yidi yilembama ayi yi luzolo. Buidi tulenda monisina ti tufulukidi mu kiadi?
(Yakobi 3:17) Vayi nduenga yintotukilanga kuidi Nzambi va theti yidi yivedila bosi yidi yindembama, yilembama, yidi yikubama muingi kutumamana, yidi nzaki mu lemvukila, yifulukidi mu kiadi ayi yimbutanga mimbutu mimboti, yitulanga luviakunu ko ayi yisi mayuya ko.
cl 226-227 ¶18-19
Widi mu Kumonisa “Nduenga yi Nzambi” mu Luzingu Luaku?
18 “Yitulanga luviakunu ko.” Nduenga yi Nzambi yi tuvananga mangolo muingi tununga kithatu ki mimvila. Befu diatila mu nduenga beni, tuala vanga mangolo muingi tubotula mu ntim’itu mayindu moso mammonisa luviakunu mu batu. (Yakobi 2:9) Tulendi monisa ko luviakunu mu bankaka mu kibila ki ndongukulu, zimbongo voti kiyeku mu kimvuka; mvandi tulenzanga ko zikhomba zitu zi kipheve, kheti basi ko beni mbakulu. Kibila enati Yave wumonisa luzolo Luandi mu bawu, buna befu mvitu tufueti batadila banga batu bafueni tambula luzolo luitu.
19 “Yisi mayuya ko.” Kikuma basekula mu kingeleko “mayuya” kilenda sundula “mutu wumvanganga mbonosonu.” Mu thangu yikhulu, basi ngeleko ayi basi loma baba fukanga bizizi biawu mu thangu bamvanga mbonosonu. Diawu, kikuma ki kingeleko basekula “mayuya” batona kusadila kiawu muingi kutubila mutu wukhambu monisanga nani kadi mu bukiedika. Kuzaba ti nduenga yi Nzambi yisi ko yi luvunu, mawu mafueti balula bika to phila tunkiebilanga zikhomba zitu zi kipheve, vayi mvandi mabanza tuidi mu bawu.
Bakula Kiuka Kisuama mu Diambu di Nzambi
(Yakobi 4:5) Benu lummuena ti mu phamba masonoko meti tubila ti: “Mu kiphala kingolo kanzodilanga pheve yoyi katula mu befu.”
w08 15/11 20 ¶6
Mambu Mankinza Madi mu Nkanda wu Yakobi ayi Petelo
4:5—Matangu mbi ma Kibibila Yakobi kantubila avava? Nandi kasa sudikisa ko matangu beni. Mambu amomo masonimina mu lulendo lu Nzambi, ḿba mabongulu mu mayindu madi mu matangu amama: Ngenesi 6:5; 8:21; Zingana 21:10; ayi Ngalatia 5:17.
(Yakobi 4:11, 12) A zikhomba ziama, lubika ba kifu kitubidilanga badieno. Bila woso mutu wuntubidila khomb’andi voti sambisidi khomb’andi, buna kazaba ti Minsiku katubididi ayi kasambisidi. Vayi enati ngiewu sambisidi Minsiku, buna wusiedi ko mutu wowo wunsadilanga miawu vayi weka mfundisi. 12 Vayi lubika zimbakana ti mutu wumueka to Wumvananga Minsiku ayi nandi Mfundisi. Nandi to wulenda vukisa ayi wulenda vonda. Vayi ngiewu widi nani mu sambisa wadi yaku?
w97 15/11 20-21 ¶8
Kiminu ki Tuvanganga Kuba Mvibudulu ayi Kusambila
8 Didi disumu kutubidila zikhomba zitu zi kipheve. (Yakobi 4:11, 12) Vayi, bankaka bantubidilanga bubi zikhoma zi kipheve, ḿba mu kibila ki mavanga mawu ma luvunu voti bantomba kukinangika mu kulenza bankaka. (Minkunga 50:20; Zingana 3:29) Kikuma ki kingeleko basekudila ‘kutubidila’ kilenda sundula kumonisa mavanga mambi ayi kuvunina mutu wunkaka mambu mangolo. Mawu mansundula kufundisa khomba mu mambu mambi beni. Kibila mbi kuvanga mawu kuidi ‘kutubidila ayi kufundisa nsiku wu Nzambi’? Minsoniki mi zithumu ayi bafalisi baba ‘vunzikisanga Minsiku mi Nzambi’ ayi baba fundisanga dedi bubela mayindu mawu veka. (Malako 7:1-13) Bobuawu mvandi, befu fundisa khomba wu kipheve no Yave kasi mfundisa ko, bukiedika ti khanu tuisinkuiza ‘fundisa ko nsiku wu Nzambi’ ayi kutuba ti wawu wisi ko wufuana? Ayi befu tubidila khomba mu phila yikhambulu yisonga, tuisintumukina ko nsiku wu luzolo.—Loma 13:8-10.
Matangu ma Kibibila
(Yakobi 3:1-18) Zikhomba ziama, lubika ba bawombo banlongisa, luzebi ti befu minlongi, befu tuala luta sambusu. 2 Bila befu boso tueti vanga zinzimbala zi phila mu phila. Woso mutu [wukhambu vanganga] nzimbala mu mambu keti tuba, buna widi mutu wufuana, mutu kalenda yadila nyitu’andi yimvimba. 3 Bo tueti tula minsinga mu munu wu mvalu muingi yitutumimina, buawu tueti tumina nyitu’andi yimvimba. 4 Tala makumbi: Kheti madi manneni ayi phemu yingolo yikuma nyikunanga, vayi meti tuadusu kuidi kisengo kiluelu kioki mfumu keti balula muingi kudiatisa makumbi koso ku katidi. 5 Bobuawu buidi mu diambu di ludimi, kidi kinama kimueka kiluelu vayi kieti kukiniemisa mu diambu di mambu mandi manneni. Keti mbazu yiluelu, yilenda kuandi vika nsitu wunneni. 6 Ludimi luidi buka mbazu. Luidi buka nza yifulukidi mambu mambi, luawu luidi va khati binama bi nyitu’itu vayi lumbivisanga nyitu yimvimba, luawu lunlemanga buka mbazu yinzimbisanga luzingu luitu loso. 7 Mutu wulenda kodika zi phila zioso zi bibulu: bibulu bi nsitu, bibulu bidi malu manna, zinuni, bibulu bindiatilanga mu vumu, ayi zimbizi zi ḿbu. Vayi mutu wubikodikanga. 8 Vayi mu diambu di ludimi, kuisi ko mutu kalenda yadila luawu, bila luidi kiuma kimbi, kivonganga ko, luidi buka kiyimbu kimvondanga. 9 Mu luawu tueti sadila mu kembila Yave, Tat’itu, ayi luawu tueti sadila mu singa batu bobo bavangulu mu “mfikula yi Nzambi.” 10 Mu munu wumueka muntotukilanga lusakumunu ayi tsingulu. Zikhomba ziama, buisi ko buawu bufueti bela. 11 Lutuama mona tho yi nlangu yintotula mu khumbu yimueka nlangu wu kitoko ayi nlangu wu ndudi? 12 A zikhomba ziama, nti wu figi wulenda buta makundi ma olive, voti nti wu vinu wulenda buta makundi ma figi? Tho yi nlangu yidi ndudi tsalu yilendi totula nlangu wu kitoko ko. 13 Buna nani widi nduenga ayi widi diela? Bika kamonisa khadulu yimboti mu mavanga mandi mamvangimina mu nlembami yi nduenga. 14 Vayi enati kiphala kingolo ayi phevi yi ziphaka bidi mu mintima minu, buna lubika kukiniemisa ayi lubika tombanga luvunu mu kakidilanga mambu makiedika. 15 Nduenga yi phila ayoyi yilendi ba kuidi Nzambi ko; yidi nduenga yi nza, yidi yi kimutu ayi yi zipheve zimbi. 16 Bila voso vama vadi kiphala ayi pheve yi ziphaka, vawu vadi divunzi ayi mavanga mambi ma phila mu phila. 17 Vayi nduenga yintotukilanga kuidi Nzambi va theti yidi yivedila bosi yidi yindembama, yilembama, yidi yikubama muingi kutumamana, yidi nzaki mu lemvukila, yifulukidi mu kiadi ayi yimbuntanga mimbutu mimboti, yitulanga luviakunu ko ayi yisi mayuya ko. 18 Vayi batu bobo bansalanga mu diambu di ndembama, bankunanga mbutu wu busonga mu ndembama.
14-20 NGONDA YIKUMI
KIUKA KIDI MU DIAMBU DI NZAMBI | 1 PETELO 1-2
‘Banu Banlongo’
(1 Petelo 1:14, 15) Banga bana badi bulemvo, lubika landakana zinzinunu ziozi ziba yinu mu thama bo luba batu bakhambulu diela, 15 vayi banga mutu wowo Wunlongo wulutela, buna bika benu mvinu muba banlongo mu khadulu’inu,
w17.02 9 ¶5
Khudulu—“Nkhayilu Yilutidi” yi Yave
5 Buidi tulenda monisina ti tunzolanga dizina di Yave? Mu mavanga mitu. Yave kantomba tuba batu banlongo. (Tanga 1 Petelo 1:15, 16.) Mawu mansundula ti tufueti buongimina to Yave ayi kuntumamana mu ntima woso. Kheti tumviokila mu zithotolo, tumvanganga mamoso tunnunga muingi tuzingila mu minsua misonga mi Yave. Bo tumvanganga mambu mamboti, ‘tumbikanga muind’itu wulezama’ ayi mawu mantuadisanga nkembo mu dizina di Yave. (Matai 5:14-16) Tunzingilanga mu minsiku mi Nzambi, ayi mu phila ayoyi tummonisanga ti minsiku miandi midi mimboti ayi Satana widi nkua luvunu. Bo tunsumuka, befu tunyonginanga masumu mitu ayi tumbikanga kuvanga mambu mambi malenda bivisa dizina di Yave.—Minkunga 79:9.
(1 Petelo 1:16) bila masonama ti: “Banu banlongo kibila minu yidi wunlongo.”
lvs 77 ¶6
Buidi Tulenda Sodila Buboti Bisavu Bitu?
6 Yave wutuba: “Banu banlongo kibila minu yidi wunlongo.” (1 Petelo 1:14-16; 2 Petelo 3:11) Muingi Yave kakikinina mbuongimin’itu, yawu yifueti ba yinlongo voti yivedila. (Deutelonomi 15:21) Tuzebi ti befu kuvanga mambu Yave kammonanga khenene, dedi kitsuza, buphunya ayi mambu matedi zipheve zimbi, mbuongimin’itu yisinkuiza ba ko yinlongo. (Loma 6:12-14; 8:13) Vayi mbi bilenda monika befu kuviokisanga thangu mu biuma abiobi? Bukiedika ti Yave wunkuiza zola? Ndamba. Mbuongimin’itu yisinkuiza ba ko yinlongo. Mawu malenda tulula kikundi kitu na Yave.
Bakula Kiuka Kisuama mu Diambu di Nzambi
(1 Petelo 1:10-12) Mimbikudi miomi mibikula nlemvo wowo balukubikila, miyuvula ayi mifiongunina tsundu yi phulusu beni. 11 Mizola zaba thangu mbi voti buidi buela vangimina mambu momo matuba pheve yi Klisto, pheve yoyi yiba mu mawu; yisamuna tona thama ziphasi ziela mona Klisto ayi nkembo wowo wela landakana. 12 Bamonisa ti mambu beni baba kamba, masa ba mu diambu diawu ko vayi mu diambu dinu. Buabu, balukamba mambu beni kuidi batu bobo ba lusamunina nsamu wumboti mu nzila yi lulendo lu pheve yinlongo, yoyi yiba ku diyilu. Ayi zimbasi zimmonanga phuila mu kumona mambu beni.
w08 15/11 21 ¶10
Mambu Mankinza Madi mu Nkanda Yakobi ayi Petelo
1:10-12. Zimbasi ziba beni phuila yi kumona ayi kuvisa mambu masuama makiedika ma kipheve, mambu momo mimbikudi mi Nzambi mi thangu yikhulu basonika mu matedi kimvuka ki baklisto kisolo. Vayi, mambu beni amomo mayiza zabakana to mu thangu naveka Yave katona kukieba kimvuka. (Efeso 3:10) Disi ko diambu dimboti kulandakana kifuani ki zimbasi mu kuvanga mangolo ma kufiongunina “mambu masuama ma Nzambi”?—1 Kolinto 2:10.
(1 Petelo 2:25) Bila luba banga mamemi mazimbala vayi buabu luvutukidi kuidi mvungi ayi nsungi wu miela minu.
it-3 658 ¶3
Nsungi
Nsungi Wulutidi. Nkanda wutheti wu Petelo 2:25 ḿba wuntubila madi mu Yesaya 53:6 mu matedi bobo badi ‘buka mamemi manzimbalanga,’ ayi Petelo wutuba ti: “Vayi buabu luvutukidi kuidi mvungi ayi nsungi wu miela minu.” Mawu mantubila Yave Nzambi, kibila batu bobo Petelo kasonikina basa tatuka ko Yesu Klisto, vayi, mu nzil’andi ba bavutula kuidi Yave Nzambi, nandi widi Mvungi Wulutidi wu dikabu diandi. (Minkunga 23:1; 80:1; Yelemia 23:3; Yehezekeli 34:12) Yave mvandi widi nsungi, mutu wowo wumfionguninanga. (Minkunga 17:3) Kufiongunina (Gr., e·pi·sko·pés) kulenda ba nguizani na lufundusu lungolo lu Nzambi, dedi bubela mu thangu yikhulu T.K., dedi mu mambu mamonikina Yelusalemi, bakhambu visa thangu “bala bafiongunina [Gr., e·pi·sko·pé].” (Luka 19:44) Voti, mawu malenda tuadisa ndandu kuidi batu bobo bankembisa Nzambi mu kilumbu “kala kuiza [Gr., e·pi·sko·pés].”—1 Petelo 2:12.
Matangu ma Kibibila
(1 Petelo 1:1-16) Petelo, mvuala wu Yesu Klisto, mfidisidi nkanda kuidi batu bobo Nzambi kasobula ayi banzingila mu zitsi zi nzenza, batembakana mu bizunga bi Ponti, Ngalatia, Kapadoci, Asi ayi Bitini 2 Nzambi Tata wulusobula tona thama bobo bubela lukanu luandi lolo kakubika ayi benu lukitulu batu banlongo mu lusadusu lu pheve’andi mu diambu di tumukina Yesu Klisto ayi vedusu mu menga mandi: Bika nlemvo ayi ndembama biba yinu mu buwombo. 3 Bika Nzambi kakembusu, nandi Tata yi Mfumu’itu Yesu Klisto wutuvana luzingu lumona mu kiadi kiandi bo kavulubukisa Yesu Klisto mu bafua, mu kutuvana diana diodi di moyo, 4 bila wutukubikila kiuka kioki kilendi fua ko. Kilendi biva ko; kilendi vembudila ko, kioki kilundulu ku diyilu kuidi benu. 5 Benu lunkebolongo mu lulendo lu Nzambi mu nzila yi kiminu mu kibila ki phulusu yoyi yikubimini muingi kumonika mu thangu yitsuka. 6 Diawu diodi dilembo kulumonisa mayangi, kheti buabu lufueti monoso diaka kiadi, mu ndambu thangu, mu kibila ki zithotolo zi phila mu phila, 7 muingi kiminu kinu bo kimeni toto buboti kikituka diambu di luzitu di nkembo ayi di nzitusu mu kilumbu Yesu Klisto kala kuiza, bila kiminu kinu kilutidi luvalu ayi wola yoyi yeti biva ayi yoyi beti tota mu mbazu. 8 Yesu, mutu wowo kalumueni ko vayi mueti kunzola. Kheti lummueni ko, vayi lueti kunwilukila ayi diawu luididi mu mayangi yi nkembo ayi yika yilendi sudukusu ko. 9 Bila luntambulanga tsundu yi kiminu kinu: phulusu yi miela minu. 10 Mimbikudi miomi mibikula nlemvo wowo balukubikila, miyuvula ayi mifiongunina tsundu yi phulusu beni. 11 Mizola zaba thangu mbi voti buidi buela vangimina mambu momo matuba pheve yi Klisto, pheve yoyi yiba mu mawu; yisamuna tona thama ziphasi ziela mona Klisto ayi nkembo wowo wela landakana. 12 Bamonisa ti mambu beni baba kamba, masa ba mu diambu diawu ko vayi mu diambu dinu. Buabu, balukamba mambu beni kuidi batu bobo ba lusamunina nsamu wumboti mu nzila yi lulendo lu pheve yinlongo, yoyi yiba ku diyilu. Ayi zimbasi zimmonanga phuila mu kumona mambu beni.13 Diawu, bika luba bakubama mu diela dinu, muingi lusala ayi lubika ba phulu yi kudia ayi kunua; lutula diana dinu mu nlemvo wowo luela tambula mu kilumbu Yesu Klisto kela monika. 14 Banga bana badi bulemvo, lubika landakana zinzinunu ziozi ziba yinu mu thama bo luba batu bakhambulu diela, 15 vayi bo didi ti mutu wowo wulutela widi Wunlongo, buna bika benu mvinu muba banlongo mu khadulu’inu, 16 bila masonama ti: “Banu banlongo kibila minu yidi wunlongo.”
21-27 NGONDA YIKUMI
KIUKA KIDI MU DIAMBU DI NZAMBI | 1 PETELO 3-5
“Tsukulu yi Mambu Moso Yeka Nduka”
(1 Petelo 4:7) Vayi tsukulu yi mambu moso yeka nduka. Diawu, lubika ba phulu yi kudia ayi kunua, vayi luleka nkielu mu kusambila.
w13 15/11 3 ¶1
“Luleka Nkielu mu Kusambila”
DIBAKALA dimueka wunsalanga yibuilu wutuba ti “Thangu yilutidi phasi muingi mutu katatamana wukotuka, yidi ava buisi bukia.” Ḿba batu bankaka bantatamananga kuba bakotuka builu boso, mvandi balenda kikinina mambu dibakala adiodi katuba. Bubu baklisto bamviokila mu ziphasi zidedakana, kibila nza yimbi yi Satana yilenda dedakana na builu bukhambu fika kia, yeka mu thangu’andi yilutidi kitombi. (Loma 13:12) Tulenda kuyitula va kingela befu leka mu kipheve mu thangu ayiyi yitsuka. Diawu, nkinza beni ‘tukiyala’ ayi tutumukina ndubu yintuba ti tufueti “leka nkielu mu kusambila.”—1 Petelo 4:7.
(1 Petelo 4:8) Vayi tuamina mambu moso, luzolasananga benu na benu mu bukiedika, bila luzolo lueti fuka masumu mawombo.
w99 15/4 22 ¶3
Buidi bu Kukikinina ayi Kunungina Kulebakana Tuidi mu Kipheve
Tebukanga moyo ndubu yi luzolo mvuala Petelo kavana: “Tsukulu yi mambu moso yeka nduka. Diawu, lubika ba phulu yi kudia ayi kunua, vayi luleka nkielu mu kusambila. Vayi tuamina mambu moso, luzolasananga benu na benu mu bukiedika, bila luzolo lueti fuka masumu mawombo.” (1 Petelo 4:7, 8) Disi ko diambu diphasi kubika zinzimbala—zitu ayi zi bankaka—zikota mu mayindu ayi mu mintima mitu ayi zituvanga tubua mu masumu. Satana zebi buboti mambu amomo. Ntambu mueka kanluta sadilanga widi, kutuvasa muingi kanunga. Diawu, tufueti ba nsualu muingi kukilemvukila mu luzolo befu na befu ayi tubika “vana buangu kuidi Satana.”—Efeso 4:25-27.
(1 Petelo 4:9) Luyambanga bubote zinzenza mu khambu nyunguta.
Kuyambanga Batu—Khadulu Yimbote Tufweti Ba
2 Diambu dimueka Petelo kakindisa zikhomba kuvanga didi ‘kuyambanga bubote zinzenza.’ (1 Petelo 4:9) Mu Kingeleko kikuma ‘kuyamba’ kinsundula “kumonisa luzolo voti mambote kuidi batu wukhambu zaba.” Vayi Petelo wukindisa zikhomba muingi bayamba ‘bubote zinzenza,’ kheti bawu baba yizabasananga ayi kuvanga bisalu va kimueka. Buidi kuyambanga bankaka kuba sadisila?
3 Mawu maba sadisa kuba kithuadi na zikhomba. Abu ngiewu? Wuntebuka moyo mayangi wumona bo khomba mueka ka kutumisa ku nzo’andi? Ayi bo wutumisa mutu ku nzo’aku, mawu mabuela kindisa kikundi kinu. Phila yimbote yi kuzabila zikhomba zitu yidi mu kutona ku bayambanga. Baklisto bazingila mu thangu yi Petelo, nkinza beni wuba mu bawu kufikama zikhomba mu kibila ki mambu mambi maba buelama. Mu bilumbu abi “bitsuka,” befu mvitu tufueti vanga mawu.—2 Timoteo 3:1.
Bakula Kiuka Kisuama mu Diambu di Nzambi
(1 Petelo 3:19, 20) Mu pheve beni kayendila ayi kasamunina zipheve ziba mu buloku, 20 zipheve beni zisa tumukina ko mu thangu Nzambi kaba vibidila mu bilumbu bi Nowa bo kaba tunga nzaza. Batu baluelu kuandi, dinana di batu divuka mu khuka yi nlangu beni.
w13 15/6 23
Biuvu bi Mintangi
Kibibila kintuba ti Yesu “wusamuna kuidi zipheve ziba mu buloku.” (1 Petelo 3:19) Mbi mawu mansundula?
▪ Mvuala Petelo wutuba ti zipheve beni ziawu ziozi ‘zisa tumukina ko mu thangu Nzambi kaba vibidila mu bilumbu bi Nowa.’ (1 Petelo 3:20) Mammonisa ti Petelo waba tubila bivangu bi kipheve babaka makani ma kulandakana matingu ma Satana. Yuda wutubila matedi zimbasi “zikhambu kieba kikulutu kiawu, vayi ziyekula bibuangu biawu,” bo katuba ti Nzambi “wuzilunda zikangama mu zithangu zioso ku tsi kitombi, mu diambu di tsambusulu yi lumbu kinneni.”—Yuda 6.
Mu phila mbi bivangu bi kipheve bikhambu tumukina mu bilumbu bi Nowa? Ava khuka minlangu, bivangu abiobi bimbi bi kipheve, bivuata zinyitu zi kinsuni—mawu masa ba ko mu lukanu lu Nzambi kuidi bawu. (Ngenesi 6:2, 4) Mvandi, zimbasi aziozi ziba bundananga nyitu na bakieto, baba vanganga mambu mambi beni. Nzambi kasa vanga ko bivangu bi kipheve muingi kubundananga nyitu. (Ngenesi 5:2) Zipheve aziozi zimbi ayi zikhambu tumukina, ziela bungu mu thangu Yave kasola. Vayi bo bamvingila, Yuda wutuba ti bawu badi buka ‘ku tsi kitombi kingolo,’—tulenda dedikisa buka buloku bu kipheve.
Thangu mbi ayi buidi Yesu ‘kasamunina kuidi zipheve aziozi zimbi mu buloko’? Petelo wusonika ti mawu mayiza monika kuntuala bo Yesu ‘kazingusu mu pheve.’ (1 Petelo 3:18, 19) Mona mvandi ti Petelo wutuba ti Yesu “wusamuna.” Kikuma Petelo kasadila kimmonisa ti mambu beni mamonika ava kasonika nkand’andi wutheti. Mawu buka mammonisa ti, mua thangu yivioka bo Yesu kavulubuka, nandi wusamuna kuidi ziphevi zimbi mu matedi thumbudulu yifuana bela tambula. Mambu beni Yesu kaba samunina, masa kuba vana ko kivuvu. Vayi wuba nsamu wu lufundusu. (Yona 1:1, 2) Bo kamonisa kiminu ayi lukuikumunu luandi nate kafua ayi kavulubuka—Yesu wumonisa kivisa ti Nkadi’ampemba kasi ko lulendu mu nandi—, ayi Yesu wubaka kibila muingi kusamuna nsamu awowo wu lufundusu.—Yoane 14:30; 16:8-11.
Mu bilumbu binkuiza, Yesu wala kanga Satana ayi zipheve aziozi zimbi ayi wala ku batula mu buloku bu kipheve. (Luka 8:30, 31; Nzaikusu 20:1-3) Nate thangu beni yintuka, zipheve aziozi zimbi zikhambu tumukina, ziela tatamana buka mu kitombi kingolo ki kipheve, ayi mbungulu’awu yitsuka yidi yifuana.—Nzaikusu 20:7-10.
(1 Petelo 4:6) Kiawu kioki, bila Nsamu wumboti wunlongolo kuidi batu bafua, mu diambu bo basambusulu mu nsuni banga batu badi moyo, babaka bu zingila mu pheve bobo buididi Nzambi yi moyo.
w08 15/11 21 ¶8
Mambu Mankinza Madi mu Nkanda Yakobi ayi Petelo
4:6—Banani bobo ‘bafua basamunina nsamu wumboti’? Badi batu baba ‘bafua mu zinzimbala ayi mu masumu mawu,’ voti batu bo baba bafua mu kipheve ava bayuwa zitsangu zimboti. (Efeso 2:1) Mu thangu batona kulekila kiminu mu zitsangu zimboti, bawu batona ‘kuzingila’ mu kipheve.
Matangu ma Kibibila
(1 Petelo 3:8-22) Bosi, bika benu boso luba mayindu mamueka, luvua nkinza mabanza ma bankaka, luzolasananga banga zikhomba, lumonasananga kiadi, ayi lukikululanga. 9 Lubika vutudilanga mambi mu mambi; bifingu mu bifingu. Vayi, bulutidi mboti lusakumunanga kibila mu bila akioki benu lutedulu mbila muingi lutambula lusakumunu. 10 Woso mutu wutidi kuzinga mboti ayi wutidi kumona bilumbu bi mayangi, buna kafueti yadila ludimi luandi mu mambu mambi ayi bididi biandi mu mambu ma luvunu. 11 Kafueti tinanga mambi ayi kafueti vanganga mamboti; kafueti tombanga ndembama ayi landakananga yawu. 12 Bila mesu ma Yave madi kuidi basonga, Yave wuntambanga makutu mandi mu lusambulu lu basonga, vayi kizizi ki Yave kidi kikangama kuidi bobo bamvanganga mambi. 13 Nani wulenda kuluvanga phasi enati mamboti lueti vanga? 14 Vayi enati lulenda mona phasi mu mambu masonga, buna luidi mu mayangi. Lubika mona batu tsisi ayi lubika kukiyamisa. 15 Vayi mu mintima minu, lukembisa Klisto banga Mfumu. Bika lubanga bakubama mu zitsangu zioso mu vutula mu malembi ayi mu lukinzu kuidi woso mutu tidi kuzaba kibila ki diana diodi didi mu benu. 16 Vayi bika luba mayindu mamboti ma mintima mivedila mu kibila ki batu boso balembo kulutubidila banga ti muidi batu bamvanganga batu mambi, batu bobo balembo yolukila khadulu’inu yimboti mu Klisto bafua tsoni. 17 Bila bulutidi mboti, enati buawu buididi luzolo lu Nzambi, mumona phasi mu vanganga mambu mamboti vayi bika ti kuvanganga mambu mambi. 18 Naveka Klisto wumona phasi mu khumbu yimueka mu kibila ki masumu minu; Nandi mutu wusonga. Wufua mu kibila ki batu bobo bakhambulu basonga muingi kutunata kuidi Nzambi. Wufua mu nsuni vayi wuzingusu mu pheve. 19 Mu pheve beni kayendila ayi kasamunina zipheve ziba mu buloku, 20 zipheve beni zisa tumukina ko mu thangu Nzambi kaba vibidila mu bilumbu bi Nowa bo kaba tunga nzaza. Batu baluelu kuandi, dinana di batu divuka mu khuka yi nlangu beni. 21 Kubotama kuidi tsundu beni, mvandi kumuvukisa bubu, (bika ti mu kubotula masumu madi mu mutu vayi kudinda kuidi Nzambi ka kusadisa kuba mayindu mambote) mu nzila yi luvulubukusu lu Yesu Klisto. 22 Bila buna kavuendi va lubakala lu Nzambi tona kamaka ku diyilu, zimbasi ayi bimfumu ayi lulendu, bidi ku tsi minsua miandi.
28 NGONDA YIKUMI–3 NGONDA KUMI YIMUEKA
KIUKA KIDI MU DIAMBU DI NZAMBI | 2 PETELO 1-3
‘Tebukanga Moyo Kilumbu ki Nganzi yi Yave’
(2 Petelo 3:9, 10) Yave kasi ko malembe mu matedi kudukisa lukanu luandi, dedi bunyindudilanga bankaka, vayi nandi benu kamvibidila, bila kasintomba ko ni wumueka kabungu, vayi wuntomba baboso babalula mavanga. 10 Vayi kilumbu ki Yave kiela kuiza banga muivi ayi mu kilumbu beni diyilu diela zimbala mu biyoko bingolo ayi bima bi diyilu biela siuta mu mbazu, ntoto ayi mavanga madi muawu mela thumbu zimbusu.
w06 15/12 27 ¶11
Yave Wala ‘Vanga Busonga Buvangama’
11 Vayi, buidi tulenda visila mambu Yesu katuba ti Yave wala vanga busonga buvangama mu “nsualu”? Diambu di Nzambi dimmonisa ti kheti Yave “widi mvibudulu,” wala vanga busonga busalama thangu ya kufuana. (Luka 18:7, 8; 2 Petelo 3:9, 10) Mu bilumbu bi Nowa, mu thangu khuka yi nlangu yitona, bankua matingu bafua mu thinu. Mvandi mu bilumbu bi Loti, mu thangu mbazu yibasikila ku diyilu, batu bambi bafua. Yesu wutuba: “Buawu bobo buela bela mu lumbu kioki Muana mutu kela monika.” (Luka 17:27-30) Bankua mambi bala bue “bungua mu kinzimbukila.” (1 Tesalonika 5:2, 3) Diawu, tulenda ba lufiatu ti Yave kalasa bika ko nza yi Satana yibue tatamana kheti kilumbu kimueka.
(2 Petelo 3:11, 12) Bo didi ti biuma bioso bifueti siuta, buna phila batu mbi lufueti ba? Lufueti ba batu ba khadulu yinlongo ayi beti kinzikanga Nzambi, 12 bo lulembo vingila kilumbu ki Nzambi ayi bo lulembo tudi nsualu muingi kifika fuana. Mu kilumbu beni diyilu diodi dilema mbazu diela siuta ayi biuma bi diyilu biela siuta mu mbazu.
w06 15/12 19 ¶18
“Kilumbu ki Yave Kima Fikama”
18 Disi ko diambu di kukuitukila kumona ti mvuala Petelo wutulubula tutatamana kutula mu mayindu mitu ‘kilumbu ki Yave’! Buidi tulenda vangila mawu? Phila yimueka yidi mu kuba ‘batu ba khadulu yinlongo ayi beti kinzikanga Nzambi.’ (2 Petelo 3:11, 12) Kutatamana kusikika mayindu mitu mu mambu amomo, kuala tusadisa tuvingila mu tsatu yingolo ‘kilumbu ki Yave.’ Kikuma ki Kingeleko basekudila “kutula mu mayindu” kinsundula “kuvanga kifika kuiza.” Befu tulendi vanga ko kilumbu ki Yave kifika kuiza mu thinu. Vayi, bo tumvingila kilumbu beni, tuala mona ti thangu yinluta vioka thinu befu sikika mayindu mitu mu kisalu ki Nzambi.—1 Kolinto 15:58.
Bakula Kiuka Kisuama mu Diambu di Nzambi
(2 Petelo 1:19) Ayi tuidi mambu ma mimbikudi makitulu makinda, mu mawu lufueti lubukila bila madi banga muinda wunlema mu kitombi nate buisi butona kienzuka ayi mbuetete yitsuka yintotuka mu mintima minu.
w08 15/11 22 ¶2
Mambu Mankinza Madi mu Nkanda Yakobi ayi Petelo
1:19—Nani wowo “mbuetete yitsuka,” thangu mbi katelama ayi buidi tuzabidi mawu? Yesu Klisto nandi “mbuetete yitsuka” ayi nandi Ntinu wubieku mu Kintinu ki Nzambi. (Nzaikusu 22:16) Mu mvu 1914, Yesu wutelama vantuala bivangu bioso buka Ntinu mu Kintinu ki Mesia, muingi kuzabikisa thononu yi kilumbu kimona. Mu thangu Yesu kakituka vantuala bapostolo bandi, mawu mavana mbonosono yi nkembo ayi lulendu luandi mu Kintinu kiandi, ayi mawu mamonisa lufiatu mu mambu mabikulu ma Nzambi. Kusikimina mu mambu amomo kulenda kienzula mintima mitu, ayi mu phila ayoyi tunzabanga ti mbuetete yitsuka yima telama.
(2 Petelo 2:4) Bukiedika, enati Nzambi kasa mona ko kiadi zimbasi bo zivola masumu vayi wuzilosa ku buloku bu kipheve, kuawu zilundulu bo zidi zikangama mu zisieni muingi kuvingila tsambusulu.
w08 15/11 22 ¶3
Mambu Mankinza Madi mu Nkanda Yakobi ayi Petelo
2:4—Mbi biobi “Buloku bu Kipheve,” ayi thangu mbi zimbasi zimbi ba batula muawu? Buloku bu kipheve buidi buphila bulenda dedakana na buloku bukiedika, ayi bivangu bi kipheve to bantulanga muawu, bika ti batu. Yidi buka phila yi kitombi kingolo mu mayindu mu matedi zikhanu zimboti zi Nzambi. Bo badi mu buloku bu kipheve basi ko ni kivuvu kitedi bilumbu binkuiza. Nzambi wutula zimbasi zimonisa matingu mu bilumbu bi Nowa mu buloku bu kipheve, ayi bala tatamana mu phila ayoyi nate kilumbu Nzambi kela ba bunga.
Matangu ma Kibibila
(2 Petelo 1:1-15) Simoni Petelo, kisadi ayi mvuala wu Yesu Klisto, mfidisidi nkanda kuidi bobo batambula kiminu ki thalu yimueka banga befu mu nzila yi busonga bu Nzamb’itu ayi Mvulus’itu Yesu Klisto. 2 Bika baluwokisila nlemvu ayi ndembama mu nzila yi nzayilu yi Nzambi ayi Yesu, Mfumu’itu. 3 Lulendu luandi lutuvana biuma bioso biobi tuvua nkinza mu luzingu ayi mu kukiyekula mu nzila yi zaba mutu wowo wututela mu nkembo’andi ayi wumvanganga mamboti. 4 Mu nzila yoyi katuvanina zitsila zinneni ayi zilutidi thalu muingi mu ziawu benu mvinu lufubakana mu kithuadi mu lunitu lu kinzambi benu bo lutina mbivusu yi nzinunu yidi va nza. 5 Mu diambu diodi, bika lutula zingolo zinu mu buela vanganga mamboti va mbata kiminu kinu, nzayilu va mbata vanganga mambote, 6 kukiyala va mbata nzayilu, lukuikumunu va mbata kukiyala, kukiyekula kuidi Nzambi va mbata lukuikumunu, 7 luzolo lu kikhomba va mbata kukiyekula kuidi Nzambi, bosi luzolo va mbata luzolo lu kikhomba. 8 Bila enati mambu amama madi yinu ayi enati mawu malembu yilama mu benu, buna malendi kulukitula miolo ko ayi bisita ko mu nzayilu’inu yi Mfumu’itu Yesu Klisto. 9 Bila mutu wukhambulu mambu amama widi banga phofo ayi kamonanga mboti ko. Wuzimbakana ti wuvedoso mu masumu mandi mathama. 10 Diawu, zikhomba ziama, bika lumonisa bufula mu kindisa lutelu luinu ayi tsobodolu’inu. Bila enati lumvanganga mambu amama buna lulendi bua ko, 11 ayi buna bela kuluyakula bumboti mu Kimfumu ki mvu ka mvu ki Mfumu’itu ayi Mvulus’itu Yesu Klisto. 12 Diawu, ndiela kulutebulanga moyo mu zithangu zioso mu mambu amama: Kheti luzebi mawu ayi luidi bakinda mu kiedika ki thangu ayiyi. 13 Vayi minu ndimueni ti didi diambu disonga kulutebulanga moyo bo ndikidi zinga mu nitu ayayi, 14 bila yizebi ti fioti kuandi fisiedi buna ndieka bika nitu beni banga bumbonisina Mfumu’itu Yesu Klisto. 15 Vayi ndiela tula zingolo mu diambu lutebukilanga mambu amama moyo kibila minu ndiedi.